Murli du jour du dimanche 15 mai 2022

15-05-22 praatahmurli om shanti ''avyakt-baapdaada'' revise 18-01-91 madhuban

vishwa kalyaankaari banne ke liye sarva smritiyon se sampanna ban sarva ko sahayog do

aaj samartha baap apne smriti swaroop bachchon ko dekh harshit ho rahe hain। vishwa ke desh evan videsh ke sarva bachche smriti divas mana rahe hain। aaj ka smriti divas bachchon ko apne brahman jeevan arthaat samartha jeevan ki smriti dilaate hain kyonki brahma baap ki jeevan kahaani ke saath brahman bachchon ki bhi jeevan kahaani hai। niraakaar baap ne saakaar brahma ke saath brahman rache। tab hi braahmanon dvaara avinaashi yagya ki rachna hui। brahma baap aap braahmanon ke saath-saath sthaapna ke nimitta bane, to brahma baap ke saath aadi braahmanon ki bhi jeevan kahaani hai। aadi dev brahma aur aadi brahman donon ka mahatva yagya sthaapna mein raha। anaadi baap ne aadi dev brahma dvaara aadi braahmanon ki rachna ki। aur aadi braahmanon ne anek braahmanon ki vriddhi ki। yahi sthaapna ki, brahma baap ki kahaani aaj ke smriti divas par varnan karte ho। smriti divas kehte ho to sirf brahma baap ko yaad kiya va brahma baap dvaara jo baap ne smritiyaan dilaai hain woh sarva smritiyaan smriti mein aai? aadi se ab tak kya-kya aur kitni smritiyaan dilaai hai - yaad hai? amritvele se lekar raat tak bhi sarva smritiyon ko saamne laao - ek din mein poori ho jaayegi! lambi list hai na! smriti saptaah bhi manaao to bhi vistaar jyaada hai, kyonki sirf revise nahin karna hai lekin realise karte ho isliye kehte hi ho smriti swaroop। swaroop arthaat har smriti ki anubhooti। aap smriti swaroop bante ho aur bhakta sirf simran karte hain। to kya-kya smritiyaan anubhav ki hain - iska vistaar to bahut bada hai। jaise baap ka parichay kitna bada hai lekin aap log saar roop mein paanch baaton mein parichay dete ho। aise smritiyon ke vistaar ko bhi 5 baaton mein bhi saar roop mein laao ki aadi se ab tak baapdaada ne kitne naam smriti mein dilaaye! kitne naam honge! vistaar hai na। ek-ek naam ko smriti mein laao aur swaroop ban anubhav karo, sirf repeat nahin karna। smriti swaroop banne ka aananda ati nyaara aur pyaara hai। jaise baap aap bachchon ko noore ratna naam ki smriti dilaate hain। baap ke naynon ke noor। noor ki kya visheshta hoti hai, noor ka kartavya kya hota hai, noor ki shakti kya hoti hain? aisi anubhootiyaan karo arthaat smriti swaroop bano। isi prakaar har ek naam ki smriti anubhav karte raho। yeh ek drishtaanta roop sunaaya। aise hi shreshtha swaroop ki smritiyaan kitni hain? aap braahmanon ke kitne roop hain jo baap ke roop woh braahmanon ke roop hain। un sabhi roopon ke smriti ki anubhooti karo। naam, roop, gun - anaadi, aadi aur ab, brahman jeevan ke sarvagun smriti swaroop bano।

aise hi kartavya। kitne shreshtha kartavya ke nimitta bane ho! un kartavyon ki smriti emerge karo। paanchavi baat baapdaada ne anaadi-aadi desh ki smriti dilaai। desh ki smriti se vaapas ghar jaane ki samarthi aa gai, apne raajya mein raajya adhikaari banne ki himmat aa gai aur vartamaan sangamayugi brahman sansaar mein khushiyon ke jeevan jeene ki kala smriti mein aa gai। jeene ki kala achhi reeti aa gai hai na? duniya marne ki kala mein tej ja rahi hai aur aap brahman sukhmay khushiyon ke jeevan ki kala mein ud rahe ho। kitna antar hai!

to smriti divas arthaat sarva smritiyon ke roohaani nashe ka anubhav karna। is smriti divas par duniya ke samaan aap sabhi yeh shabd nahin kehte ki aise hamaara brahma baap tha। unhonne yeh kaha tha, yeh kiya tha, duniya vaale tha… tha... karte hain aur duhkh ki lahar phailaate hain lekin aap braahmanon ki yeh visheshta hai - aap kahenge ab bhi saath hai। saath ka anubhav karte hain। to aap logon mein yeh visheshta hai। aap aise nahin kahenge ki brahma baap chale gaye। jo vaayda kiya hai - saath rahenge, saath chalenge। agar aadi aatma bhi vaayda nahin nibhaaye to kaun vaayda nibhaayega? sirf roop aur seva ki vidhi parivartan hui hai। aap sabhi ka lakshya hai - ‘pharishta so devta।' pharishta roop ka sample brahma baap bana hai। sarva bachchon ki paalna ab bhi brahma dvaara hi ho rahi hai isliye brahma kumaar aur brahma kumaariyaan kahlaate ho। samjha? smriti divas ka mahatva kya hai? in smritiyon mein sada hi lavleen raho। isko hi kehte hain - baap samaan banne ki anubhooti। aap aatmaon ne baap samaan anubhav kiya। isi ‘samaan' shabd ko logon ne ‘samaana' shabd kah diya hai। aatma paramatma mein sama nahin jaati, lekin baap samaan banti hai। sabhi bachchon ne apne-apne naam se smriti divas ki yaad bheji hai। kai sandeshi bankar yaadapyaar le aaye aur har ek kehta hai meri khaas yaad dena। to ek ek ko alag yaad patra likhne ki bajaae dil se patra likh rahe hain। har ek ke dil ka pyaar baapdaada ke naynon mein, dil mein samaaya hua hai aur ab vishesh samaaya hai। khaas yaad karne vaalon ko baapdaada khaas ab bhi emerge karke yaadapyaar de rahe hain। har ek ke dil ke umang aur dil ki roohrihaan, dil ke haal-chaal, dilaaraam baap ke paas pahunch gaye। baapdaada sabhi bachchon ko yahi smriti dila rahe hain ki sada dil ke saath ho, seva mein saath ho aur sthiti mein sada saakshi ho। to sada hi maayaajeet ka jhanda lahraata rahega। sabhi bachchon ko nothing new ka paath har paristhiti mein sada smriti mein rahe। brahman jeevan arthaat question mark aur aashcharya ki rekha ho nahin sakti। kitne baar yeh samaachaar bhi suna hoga। naya samaachaar hai kya? nahin। brahman jeevan arthaat har samaachaar sunte kalpa pahle ki smriti mein samartha rahe - jo hona hai woh ho raha hai, isliye kya hoga yeh question uth nahin sakta। trikaaldarshi ho, drama ke aadi-madhya-ant ko jaanne vaale ho to kya vartamaan ko nahin jaante hain? ghabraate to nahin ho na! brahman jeevan mein har kadam mein kalyaan hai। ghabraane ki baat nahin hai। aap sabka kartavya hai apne shanti ki shakti se ashaanta aatmaon ko shanti ki kirnen dena। apne hi aapke bhaai-behen hain, to apne eeshvareey parivaar ke sambandh se sahayogi bano। jitna hi yuddha mein teevra gati hai, aap yogi aatmaon ka yog unhon ko shanti ka sahayog dega, isliye aur vishesh samay nikaal shanti ka sahayog do - yeh hai aap brahman aatmaon ka kartavya। achha।

sarva smriti swaroop shreshtha aatmaon ko sada baap samaan banne ke lakshya aur lakshan dhaaran karne vaali aatmaon ko, sada svayan ko baap ke saath anubhav karne vaale sameep aatmaon ko, sada nothing new paath ko sahaj swaroop mein laane vaale, sada vishwa kalyaankaari ban vishwa ki aatmaon ko sahayog dene vaale - aise sada vijayi ratnon ko baapdaada ka yaadapyaar aur namaste।

daadiyon se avyakt baapdaada ki mulaakaat - aadi braahmanon ki maala brahma baap ke saath aadi brahman nimitta bane na। aadi braahmanon ka bahut bada mahatva hai। sthaapna paalna aur parivartan। vinaash shabd thoda ophishal lagta hai to sthaapna, paalna aur vishwa parivartan karne mein aadi braahmanon ka vishesh part hai। shaktiyon ki pooja bahut dhoomdhaam se hoti hai। niraakaar baap va brahma baap ki pooja itni dhoomdhaam se nahin hoti। brahma ke mandir bhi bahut gupta hi hain। lekin shakti sena bhakti mein bhi naameegraami hai, isliye ant tak stage par vishesh bachchon ka part hai। brahma ka bhi gupta part hai - avyakt roop arthaat gupta। braahmanon ko taiyaar kiya aur brahma ka part gupta ho gaya। sarasvati ko bhi gupta dikhaate hain kyonki unka bhi drama mein gupta part chal raha hai। aadi brahman aatmaaen sabhi ek do ke sameep aur shaktishaali hain। shareer bhi kamjor nahin hai, shaktishaali hai। (daadi jaanki se) yeh to thoda sa beech mein rest dilaane ka saadhan ban gaya। baaki kuchh bhi nahin hai। vaise to rest karti nahin ho। koi kaaran banta hai rest karne ka। sabhi daadiyon mein bahut pyaar hai na! baap ke saath-saath nimitta aadi braahmanon se bhi pyaar hai। to aap sabke pyaar ki duvaaen, shubh bhaavnaaen aadi brahman aatmaon ko tandurusta rakhti hai। achha hai, silence ki seva ka part achha mila hai। kitni aatmaaen ashaanta hain, kitni preyar kar rahi hain! unhon ko kuchh na kuchh anchali to denge na? deviyon se jaakar shakti maangate hain na! to shakti dena aap vishesh aatmaon ka kartavya hai na? din pratidin yeh anubhav karenge ki kahaan se shanti ki kirnen aa rahi hai। phir dhoondhenge, sabki nazar bhaarat bhoomi par aayegi। achha।

avyakt mahaavaakya - party ke saath

1- nishchay buddhi vijayi aatmaaen hain aisa anubhav karte ho? sada nishchay atal rehta hai? va kabhi dagmag bhi hote ho? nishchay-buddhi ki nishaani hai - vo har kaarya mein, chaahe vyavhaarik ho, chaahe parmaarthi ho, lekin har kaarya mein vijay ka anubhav karega। kaisa bhi saadhaaran karma ho, lekin vijay ka adhikaar usko avashya praapta hoga, kyonki brahman jeevan ka vishesh janma siddha adhikaar vijay hai। koi bhi kaarya mein svayan se dilshikasta nahin hoga, kyonki use nishchay hai ki vijay janma siddha adhikaar hai। to itna adhikaar ka nasha rehta hai। jiska bhagwan madadgaar hai uski vijay nahin hogi to kiski hogi! kalpa pahle ka yaadgaar bhi dikhaate hain ki jahaan bhagwan hai vahaan vijay hai। chaahe paanch paandav dikhaate hain, lekin vijay kyon hui? bhagwan saath hai, to jab kalpa pahle yaadgaar mein vijayi bane ho to abhi bhi vijayi honge na? kabhi bhi koi kaarya mein sankalp nahin uthna chaahiye ki ye hoga, nahin hoga, vijay hogi ya nahin, hogi... yeh question uth nahin sakta। kabhi bhi baap ke saath vaale ki haar ho nahin sakti। yeh kalpa-kalpa ki noondh nishchit hai। is bhaavi ko koi taal nahin sakta। itna dridh nishchay sada aage udaata rahega। to sada vijay ki khushi mein naachte gaate raho।

2- sada apne ko bhaagya vidhaata ke bhaagyavaan bachche hain, aisa anubhav karte ho? padmaapadma bhaagyavaan ho ya saubhaagyavaan ho? jiska itna shreshtha bhaagya hai woh sada harshit rahenge kyonki bhaagyavaan aatma ko koi apraapti hai hi nahin। to jahaan sarva praaptiyaan hongi, vahaan sada harshit honge। koi ko alpakaal ki lottery bhi milti hai to uska chehra bhi dikhaata hai ki usko kuchh mila hai। to jisko padmaapadma bhaagya praapta ho jaae woh kya rahega? sada harshit। aise harshit raho jo koi bhi dekhkar poochhe ki kya mila hai? jitna-jitna purushaartha mein aage badhte jaayenge utna aapko bolne ki bhi aavashyakta nahin rahegi। aapka chehra bolega ki inko kuchh mila hai, kyonki chehra darpan hota hai। jaise darpan mein jo cheej jaisi hoti hai, vaisi dikhaai deti hai। to aapka chehra darpan ka kaam kare। itni aatmaon ko jo sandesh mila hai to itna samay kahaan milega jo aap log baithkar sunaao। samay bhi naajuk hota jaayega, to sunaane ka bhi samay nahin milega। to phir seva kaise karenge? apne chehre se। jaise museum ke chitron se seva karte ho। chitra dekhkar prabhaavit hote hain na। to aapka chaitanya chitra seva ke nimitta ban jaaye, aise taiyaar chitra ho? itne chaitanya chitra taiyaar ho jaayen to aavaaj bulanda kar denge। sadaiv chalte-phirte, uthte-baithte yeh smriti rakho ki ham chaitanya chitra hain। saare vishwa ki aatmaon ki hamaare taraph nazar hai। chaitanya chitra mein sabke aakarshan ki baat kaun si hoti hai? sada khushi hogi। to sada khush rehte ho ya kabhi uljhan aati hai? ya vahaan jaakar kahenge - yeh ho gaya isliye khushi kam ho gai। kya bhi ho jaaye, khushi nahin jaani chaahiye। aise pakke ho? agar bada paper aaye to bhi paas ho jaayenge? baapdaada sabka photo nikaal rahe hain ki kaun-kaun haan kah raha hai। aise nahin kehna ki us samay kah diya। master sarvashaktivaan ke aage vaise koi bhi badi baat nahin hai। doosri baat aapko nishchay hai ki hamaari vijay hui hi padi hai, isliye koi badi baat nahin hai। jiske paas sarvashaktiyon ka khajaana hai to jis bhi shakti ko order karenge woh shakti madadgaar banegi। sirf order karne vaala himmat vaala chaahiye। to order karna aata hai ya order par chalna aata hai? kabhi maaya ke order par to nahin chalte ho? aise to nahin ki koi baat aati hai aur samaapta ho jaati hai, peechhe sochte ho - aise karte the to bahut achha hota। aise to nahin? samay par sarvashaktiyaan kaam mein aati hain ya thoda peechhe se aati hain? agar master sarvashaktivaan ki seat par set ho to koi bhi shakti order nahin maane yeh ho nahin sakta। agar seat se neeche aate ho aur phir order karte ho to vo nahin maanenge। laukik reeti se bhi koi kursi se utarta hai to uska order koi nahin maanta। agar koi shakti order nahin maanti hai to avashya position ki seat se neeche aate ho। to sada master sarvashakti-vaan ki seat par set raho, sada achal adol raho, halchal mein aane vaale nahin। baapdaada kehte hain shareer bhi chala jaaye lekin khushi nahin jaaye। paisa to uske aage kuchh bhi nahin hai। jiske paas khushi ka khajaana hai uske aage koi badi baat nahin aur baapdaada sada sahayogi sevaadhaari bachchon ke saath hai। bachcha baap ke saath hai to badi baat kya hai? isliye ghabraane ki koi baat nahin। baap baitha hai, bachchon ko kya phikar hai। baap to hai hi maalaamaal। kisi bhi yukti se bachchon ki paalna karni hi hai, isliye bephikar। duhkhadhaam mein sukhdhaam sthaapan kar rahe ho to duhkhadhaam mein halchal to hogi hi। garmi ki season mein garmi hogi na! lekin baap ke bachche sada hi safe hain, kyonki baap ka saath hai।

sarva bachchon prati baapdaada ka sandesh - sarva tapasvi bachchon prati yaadapyaar। dekho bachche, samay ke samaachaar sunte oonche te oonche saaksheepan ke aasan aur bephikar baadshaah ke sinhaasan par baith sab khel dekh rahe ho na? is brahman jeevan mein ghabraane ka to svapna mein bhi sankalp uth nahin sakta। yeh to tapasya varsha ke nirantar lagan ki agni mein behad ki vairaagya-vritti prajjavlit karne ka pankha lag raha hai। aapne baap samaan sampanna banne ka sankalp kiya arthaat vijay ka jhanda lahraane ka plan banaaya, to doosre taraph samaapti ki halchal bhi to saath-saath noondhi hai na? rehearsal hi drama ke reel ko samaapta karne ka saadhan hai, isliye nothing new।

samay ke circumstance pramaan aane-jaane mein va kisi vastu ke milne mein kuchh kheenchaataan ho, man ke sankalp ki kheenchaataan mein nahin aana। jahaan jis paristhiti mein raho, dilkhush mithaai khaate raho। khushhaal raho, pharishton ki chaal mein udo। saath-saath is samay harek centre par vishesh tapasya ka programme chalta rahe। jo jitna jyaada samay nikaal sakte hain, utna silence ka sahayog do। achha। om shanti।

vardaan:- sarva khajaanon se sampanna ban har samay seva mein busy rahne vaale vishwa kalyaankaari bhav

vishwa kalyaan ke nimitta bani hui aatma pahle svayan sarva khajaanon se sampanna hogi। agar gyaan ka khajaana hai to full gyaan ho, koi bhi kami nahin ho tab kahenge bharpoor। kisi-kisi ke paas khajaana full hote hue bhi samay par kaarya mein nahin laga sakte, samay beet jaane ke baad sochte hain, to unhein bhi full nahin kahenge। vishwa kalyaankaari aatmaayen mansa, vaacha, karmana, sambandh-samparka mein har samay seva mein busy rehti hain।

slogan:- gyaan aur yog ki nature bana lo to har karma natural shreshtha aur yuktiyukta hoga।

soochna- aaj maas ka teesra ravivaar hai, sabhi raajayogi tapasvi bhaai bahinen saayan 6.30 se 7.30 baje tak, vishesh yog abhyaas ke samay apne poorvaj pan ke svamaan mein sthit ho, kalpa vriksha ki jadon mein baith poore vriksha ko shaktishaali yog ka daan dete hue, apni vanshaavli ki divya paalna karen।