Murli du jour du lundi 30 mai 2022

30-05-2022 praatahmurli om shanti "baapdaada"' madhuban

“meethe bachche - baap aaya hai tumhaari sab shuddh kaamnaayen poori karne, raavan ashuddha kaamna poori karta aur baap shuddh kaamna poori karta''

prashn:- jo baap ki shreemat ka ullanghan karte hain - unki antim gati kya hogi?

uttar:- shreemat ka ullanghan karne vaalon ko maaya ke bhoot ant mein raam naam sat hai… karke ghar le jaayenge। phir bahut kadi saja khaani padegi। shreemat par na chale to yeh mare। dharmaraaj poora hisaab leta hai, isliye baap bachchon ko achhi mat dete, bachche maaya ki buri mat se saavdhaan raho। aisa na ho baap ka bankar phir koi vikarma ho jaae aur 100 guna danda bhogna pade। shreemat par na chalna, padhaai chhodna hi apne oopar baddua, akripa karna hai।

geet:- om namo shivaae…

om shanti। yeh parampita paramatma ki mahima bhakta log gaate hain। kehte bhi hain he bhagwan, he shivbaaba, yeh kisne kaha? aatma ne apne baba ko yaad kiya kyonki aatma jaanti hai hamaara laukik baap bhi hai aur yeh hai paarlaukik baap, shivbaaba। woh aate bhi hain bhaarat mein aur ek hi baar avtaar lete hain। gaate bhi hain he patit-paavan aao, bhrashtaachaari patiton ko shreshthaachaari paavan banaane ke liye। parantu sab apne ko patit bhrashtaachaari samajhte nahin hain। sab ek kisam ke bhi nahin hote hain। har ek ka pad apna-apna hota hai। har ek ke karmon ki gati nyaari hoti hai, ek na mile doosre se। baap baith samjhaate hain - tum baap ko na jaanne ke kaaran itne orphan patit ban gaye ho। kehte bhi hain patit-paavan, sarva ke sadgati daata aap ho। phir geeta va ganga patit-paavni kaise hui। tumko itna besmajh kisne banaaya hai? in paanch vikaaron roopi raavan ne। abhi sabhi raavan raajya athva shok vaatika mein hain। head jo hain unhon ko to bahut phikraat rehti hai। sab duhkhi hain, isliye pukaarte hain he baba aap aao, hamko svarga mein le chalo। sadaiv nirogi, badi aayu vaale, shanti sampanna, dhanvaan banaao। baap to sukh shanti ka saagar hai na। manushya ki yeh mahima nahin ho sakti। bhal manushya apne ko shivoham bhi kahlaate hain, parantu hain patit। baap samjhaate hain - tum baap ko sarvavyaapi kehte ho, isse to koi bhi baat thaharti nahin। bhakti bhi chal nahin sakti kyonki bhagat bhagwan ko yaad karte hain। bhagwan ek hai, bhaktiyaan anek hain। jab sab mujh bhagwan ko patthar thikkar mein thok khud bhi pattharbuddhi ban jaate hain, tab mujhe aana padta hai। prajaapita brahma dvaara paavan duniya ki sthaapna karaate hain। yeh prajaapita brahma ke adopted bachche hain, kitne dher bachche hain। abhi bhi vriddhi ko paayenge। jo brahman banenge vahi phir devta banenge। pahle tum shoodra the। phir brahma mukh vanshaavli brahman bane phir devta kshatriy banenge। yeh chakra phirta hai। yeh baap hi samjhaate hain। yeh manushya srishti hai, sookshm vatan mein hain pharishte। vahaan koi jhaad nahin hai। yeh manushya srishti roopi jhaad yahaan hai। to baap aakar is gyaan amrit ka kalash maataaon ke sir par rakhte hain। vaastav mein koi amrit nahin hai। yeh hai knowledge। baap aakar sahaj raajayog ki shiksha dete hain। baap kehte hain main to niraakaar hoon, number one manushya ke tan mein pravesh karta hoon। khud kehte hain jab main brahma tan mein pravesh karoon tab to brahman sampradaay ho। brahma yahaan hi chaahiye। woh sookshm vatan vaasi to avyakt brahma hai। main is vyakta mein pravesh karta hoon, inko pharishta banaane ke liye। tum bhi ant mein pharishte ban jaate ho। tum braahmanon ko yahaan hi pavitra banna hai। phir pavitra duniya mein jaakar janma lenge। tum donon hinsa nahin karte ho। kaam kataari chalaana sabse teekhi hinsa hai, jisse manushya aadi madhya ant duhkh paate hain। dvaapar se lekar kaam kataari chalaate aaye hain, tab hi girna shuru hota hai। manushya ke paas hai bhakti ki knowledge। ved shaastra padhna, bhakti karna। gaate bhi hain gyaan, bhakti, vairaagya। bhakti ke baad hi baba saari duniya se vairaagya dilaate hain kyonki is patit duniya ka vinaash hona hai isliye deh sahit deh ke sabhi sambandhiyon aadi ko bhool jaao। mujh ek ke saath buddhiyog lagaao। aisi practice ho jo ant samay koi bhi yaad na pade। is puraani duniya ka tyaag karaaya jaata hai। behad ka sannyaas behad ka baap hi karaate hain। punarjanma to sabko lena hai, nahin to itni vriddhi kaise hoti। had ke sannyaasiyon dvaara pavitrata ka bal bhaaratvaasiyon ko milta hai। bhaarat jaisa pavitra khanda aur koi hota nahin, baap ki yeh birth place hai। parantu manushya jaante nahin, baap kaise avtaar lete hain, kya karte hain। kuchh bhi jaante nahin। brahma ka din, brahma ki raat bhi kehte hain। din arthaat svarga, raat arthaat narka। jaante nahin। brahma ki raat to tum bachchon ki bhi raat। brahma ka din to tum bachchon ka bhi din ho jaata hai। raavan raajya mein sab durgati ko paaye hue hain। abhi tum bachche baap dvaara sadgati ko pa rahe ho। tum is samay ho eeshvareey aulaad। parampita paramatma ka bachcha brahma unke tum adopted bachche, to shivbaaba ke potre thahre। yeh putra brahma bhi sunte to tum potre potriyaan bhi sunte ho। abhi phir yeh gyaan praayah lop ho jaayega। yeh raajayog baap hi aakar sikhlaate hain। sannyaasiyon ka part hi alag hai aur tum aadi sanaatan devi-devta dharma vaalon ka part hi alag hai। vahaan devtaaon ki aayu bhi badi rehti hai। akaale mrityu nahin hoti hai। vahaan devtaayen aatma-abhimaani hote hain। parmaatma-abhimaani nahin। phir maaya ki praveshta hone se deh-abhimaani ban jaate hain। is samay tum aatma-abhimaani bhi ho to parmaatma-abhimaani bhi ho। is samay tum jaante ho ham paramatma ki santaan hain, paramatma ke occupation ko jaante hain। yeh shuddh abhimaan hua। apne ko shivoham ya paramatma kehna yeh ashuddha abhimaan hai। tum abhi apne ko bhi aur paramatma ko bhi jaan gaye paramatma dvaara। tum jaante ho parampita paramatma kalpa-kalpa aate hain। bhakti maarga mein bhi alpakaal ka sukh woh dete hain। baaki woh chitra to jad hain। tum jis manokaamna se pooja aadi karte ho to main tumhaari sab shuddh kaamnaayen poori karta hoon। ashuddha kaamna to raavan poori karta hai। bahut riddhi siddhi aadi seekhte hain। woh hai raavan mat। main hoon hi sukh daata। main kisko duhkh nahin deta hoon। kehte hain duhkh sukh eeshvar hi dete hain। yeh bhi mere oopar kalank lagaate hain। agar aisa hai to bulaate hi kyon ho। paramatma raham karo, kshama karo। jaante hain, dharmaraaj ke dvaara bahut danda khilaayenge।

baap samjhaate hain bachche bhakti maarga ke in shaastron aadi mein koi saar nahin hai। abhi tumko bhakti achhi nahin lagti। aise bhi nahin kehte ho ki he bhagwan। aatma dil andar yaad karti hai। bas yeh hai ajpaajaap। aatmaon se niraakaar baap baat karte hain। aatma sunti hai। agar kahe sarvavyaapi hai phir to sab paramatma ho gaye। baap kehte hain kitne pattharbuddhi ban gaye hain। manushyon ko to bada dar rehta hai, kahaan guru baddua na de। baap to hai sukhdaata। baddua athva akripa to baap bachchon ke oopar karte hi nahin। bachche shreemat par nahin chalte, padhte nahin to akripa apne oopar karte hain। baap kehte hain bachche mujh ek baap ko yaad karo। satayug treta mein bhakti hoti nahin। ab raat hai to manushya dhakka khaate rehte hain, tab kaha jaata hai satguru bigar ghor andhiyaara। satguru hi aakar saare chakra ka raaz samjhaate hain ki tum devta the phir kshatriy bane, phir vaishya shoodra banen। aise 84 janma poore kiye। 8 punarjanma satayug mein, 12 punarjanma treta mein, phir 63 janma dvaapar kaliyug mein। chakra ko phirna hi hai। yeh baaten manushya nahin jaante। yahi bhaarat vishwa ka maalik tha aur koi khanda nahin tha। jab jhooth khanda shuru hota hai to phir aur-aur khanda bhi hote hain। ab to dekho ladaai jhagda kitna hai। yeh hai hi orphans ki duniya, baap ko nahin jaante। radiyaan maarte rehte hain he paramatma... baap kehte hain main ek hi baar aata hoon, patit duniya ko paavan banaane। baapu ke liye samajhte the ki raamraajya sthaapan karte hain, unko bahut paise dete the। parantu woh paisa kabhi apne kaam mein nahin lagaate the। phir bhi raamraajya to hua nahin। yeh to hai shivbaaba, daata hai na। sirf samjhaate hain vinaash to hona hi hai, isse tum paise ko saphal karo। yeh centre aadi kholo। board laga do ek baap se aakar svarga ka varsa le lo second mein। baap kehte hain meri yaad se hi tum paavan banenge। tumhaari buddhi mein yeh chakra phirna chaahiye। brahman hi yagya ke rakshak bante hain। yeh hai rudra gyaan yagya, krishna ka yagya nahin। satayug mein yagya hote nahin। yeh hai gyaan yagya। baaki sab hain bhakti ke yagya। anek prakaar ke shaastra yagya mein rakhte hain। chaun-chaun ka murabba bana dete hain, usko gyaan yagya nahin kahenge। baba kehte hain mujh, roodra ka gyaan yagya racha hua hai। jo meri mat par chalenge unko bada inaam milega, vishwa ki baadshaahi। tum bachchon ko mukti, jeevan mukti ki saugaat deta hoon। baba kehte hain manushyon ki to 84 laakh yoniyaan rakhi, aur mujhe to kan-kan mein daal diya hai phir bhi main par-upkaari seva-dhaari hoon। tum raavan ki mat par mujhe gaali dete aaye ho। yeh bhi drama bana hua hai। abhi tum bachchon ko kadam-kadam shreemat par chalna hai। baap achhi mat denge, maaya buri mat degi isliye khabardaar rehna। mera bankar phir koi vikarma kiya to sauguna danda pad jaayega। yogbal se phir shareer bhi pavitra milega। sannyaasi log to kah dete hain aatma nirlep hai baaki shareer patit hai isliye ganga snaan karte hain। are aatma sachcha sona nahin hogi to jevar sachche sone ka kaise banega। is samay 5 tatva bhi tamopradhaan hain।

yeh tumhaari roohaani government bade te badi hai, parantu dekho tumko service karne ke liye 3 pair prithvi ke bhi nahin milte hain, phir tumko vishwa ka maalik banaata hoon। vishwa ki baadshaahi aisi deta hoon jo vahaan koi khitpit nahin kar sakte। aasmaan, saagar aadi sabke maalik ban jaate ho। koi bhi had nahin rehti। abhi to bilkul kangaal ban pade hain। abhi phir tum vishwa ke maalik ban rahe ho to shreemat par chalna pade। shreemat par na chala to yeh mara। maaya ke bhoot raam naam sat hai, karke ghar le jaayenge। saja badi kadi khaayenge। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yagya ki pyaar se seva kar, kadam-kadam par shreemat par chalte baap se man-ichchhit phal arthaat vishwa ki baadshaahi leni hai।

2) vinaash to hona hi hai - isliye apna sab kuchh saphal kar lena hai। paisa hai to centre khol aneko ke kalyaan ke nimitta banna hai।

vardaan:- mansa dvaara teevragti ki seva karne vaale baap samaan merciful bhav

sangamayug par baap dvaara jo vardaanon ka khajaana mila hai use jitna badhaana chaaho utna doosron ko dete jaao। jaise baap merciful hai aise baap samaan merciful bano, sirf vaani se nahin, lekin apni mansa vritti se vaayumandal dvaara bhi aatmaon ko apni mili hui shaktiyaan do। jab thode samay mein saare vishwa ki seva sampanna karni hai to teevragti se seva karo। jitna svayan ko seva mein busy karenge utna sahaj maayaajeet bhi ban jaayenge।

slogan:- apne santushta aur khushnumah jeevan se har kadam mein seva karne vaale hi sachche sevaadhaari hain।