Murli du jour du jeudi 8 décembre 2022

08-12-2022 praatahmurli om shanti "baapdaada"' madhuban

“meethe bachche - tum roohaani aashik ho - ek maashuk paramatma ke, tumhein ek ko hi dil se yaad karna hai, dil ki preet ek baap se rakhni hai''

prashn:- mahaaveer bachchon ki sthiti aur purushaartha kya hoga - uski nishaani sunaao?

uttar:- woh yog se aatma ko pavitra (satopradhaan) banaane ka purushaartha karte rahenge। unhein baaki koi bhi baat ki parvaah nahin hogi। unki buddhi mein rahega ki ab puraani duniya se nai duniya mein transfer hona hai। woh vinaash se darenge nahin। unke dil ke andar roohaani pyaar ki aag rahegi। woh purushaartha karte-karte rudra maala ka daana ban jaayenge।

geet:- na woh hamse juda honge…

om shanti। isko kaha jaata hai roohaani pyaar arthaat roohon ka roohaani baap ke saath pyaar। duniya bhi us roohaani baap ko hi yaad karti hai ki hamko duhkh se liberate karo ya duhkh haro। ab duhkh haro ke pichhaadi sukh karo bhi kahenge। sukh hai hi satayug aadi mein to zaroor kaliyug ant mein duhkh hoga। yeh baaten tum bachche samajhte ho। saari duniya to nahin jaanti hai। tumhaare mein bhi thode hain। koton mein koi kaha jaata hai na। yeh hai roohaani lav aatmaon ka paramatma ke saath। saari duniya ka maashook ek hi paramatma hai। woh sabhi aatmaon ka maashook hai, jisko hi sab pukaarte hain। aatmaayen to chhoti-badi nahin hoti hain। ab tum aatmaon ka lav ho gaya hai ek parampita paramatma ke saath। inko roohaani pyaar kaha jaata hai। duniya mein woh aashik maashook to jismaani hote hain। unka aapas mein pyaar bhi jismaani hota hai। tumhaara to roohaani pyaar hai। baap hi aakar tumhaare duhkh harkar sukh dete hain। tumko bahut sukh milta hai phir duhkh bhi bahut milta hai। baap kehte hain - he bachche, ab tumhaara pyaar mere saath hua hai kyonki tum jaante ho baba hamko sukhdhaam ka maalik banaane vaala hai। mukti aur jeevanmukti ka daata hai। baap kehte hain tum raho bhi bhal apne-apne ghar mein, jaise jismaani aashik maashuk bhi alag-alag apne ghar mein rehte hain, yeh bhi aise hai। main doordesh se aata hoon tumko padhaane। tumne bulaaya hai ki he patit-paavan aao, he duhkh harta sukh karta ab aao। vaastav mein aata to main apne time par hoon। aise nahin tumhaari pukaar par aa jaata hoon। main aata tab hoon jabki tumko kaliyug se satayug mein chalna hai va manushya se devta, bhrashtaachaari se shreshthaachaari banna hai। to ab tumhaara baap ke saath roohaani lav hai। tumhaare andar roohaani pyaar ki aag lagi hui hai। jaise agyaan mein kaam-krodh ki aag lagti hai। ab tum aatmaon ka pyaar hota hai baap ke saath। duniya to kuchh bhi samajhti nahin hai। kah dete paramatma sarvavyaapi hai, naam roop se nyaara hai। ek taraph kehte hain naam roop se nyaara, doosre taraph kehte sarvavyaapi hai। to usmein manushya jaanvar aadi sab aa gaye।

ab tum bachche jaante ho - aatmaon ka maashook hai paramatma, unse preet lagaani hai। yeh to jaante hain aapdaayen bahut aayengi। bhinna-bhinna prakaar ke vighna bhi padenge। vighna to har ek ko padte hain। yeh koi nai baat nahin hai kyonki nai duniya ki sthaapna ke liye baba bilkul nai baaten suna raha hai। likha hua bhi hai brahma dvaara sthaapna। parantu sthaapna aur vinaash ki baat ko koi samajhte nahin hain। sthaapna kiski? kehte hain raajasva ashvamedh gyaan yagya racha। zaroor yagya racha svaraajya ke liye। nar se naaraayan aur naari se lakshmi banne ke liye raajayog sikhaate hain। achha phir uski result kahaan? yeh hai nai baat isliye manushya moonjhate hain। guru log to kisko mukti jeevanmukti de na sake। yeh bas gapode lagaaye hain ki phalaana paar nirvaan gaya athva vaikunthavaasi hua। baba ne samjhaaya hai delvaada mandir mein oopar vaikuntha ke chitra dikhaaye hain, neeche tapasya ke। ab tumko samajh mili hai ki yeh bhaarat hi vaikuntha tha। kab tha, yeh bhi tum hi jaante ho। pujaari log kya jaanen! manushya hi kaudi jaisa, manushya hi heere jaisa banta hai। aage yeh baaten khyaal mein bhi nahin thi। baap ne batlaaya hai ki purushaartha kar oonch pad paana hai। agar achha purushaartha karenge to nai raajdhaani mein oonch pad paayenge। achha purushaartha karenge to achha pad milega। tumhaare liye svarga koi door nahin hai। jaise school mein bachche padhkar paas hote hain to ek class se doosre mein transfer hote hain। tum bhi transfer hote ho puraani duniya se nai duniya mein। tum jaante ho ham purushaartha karte-karte jaakar pahle-pahle roodra maala ka daana banenge। school mein bhi paas hote hain to phir nambarvaar jaakar baithte hain। yahaan bhi tum bachche jaante ho ham padhte hain phir ham aatmaayen mool vatan mein chale jaayenge, phir nai duniya mein aayenge। pichhaadi mein sabko maaloom padega। result pichhaadi mein niklegi। jo mahaaveer honge woh koi bhi baat ki parvaah nahin rakhenge। jaante hain vinaash to hona hi hai। darne ki baat hi nahin। earthquake to honi hi hai। tumko to jaana hai nai duniya mein। jaise student samajhte hain ham doosre class mein transfer honge। ab hamaari aatma padh rahi hai - parampita paramatma se। tum srishti ke aadi-madhya-ant ko jaan gaye ho। tum tamopradhaan se satopradhaan ban jaayenge, padhaai bhi final ho jaayegi, phir ham paas hokar baba ke paas pahunch jaayenge। yeh to jaante ho jo kalpa pahle hua hai ab vahi hona hai। purushaartha to bachchon ko har baat mein karna hi hai। tum bachche yogbal se apne ko pavitra bana rahe ho। yog se hi aatma ki khaad nikalti hai। hamko poora-poora yogi banna hai। ham aadhaakalpa ke aashik hain। abhi humein maashook mila hai। woh hamko nai duniya mein jaane ke liye laayak bana rahe hain। karma bhi karna hai। yeh sab kuchh karte hue yaad ek hi baap ko karna hai। tumhaari buddhi mein hai - yog se ham apne ko pavitra bana rahe hain। yog se aatma ki khaad nikalti hai, hamko poora yogi banna hai। ismen hi badi pahalvaani chaahiye। aashik-maashook apna dhandhaadhori bhi karte hain aur maashook ko bhi yaad karte rehte hain। woh aashik maashook vikaar ke liye nahin hote hain। woh shareer par aashik hote hain tab unka gaayan hai। yeh hai roohaani aashik maashook। tumne aadhaakalpa mujhe poora yaad kiya hai। ab tumko aakar mila hoon। manushya samajhte hain bhagwan se mukti milegi। baap kehte hain tumhaare liye mukti se jeevanmukti bhi attach hai। mukti mein jaakar phir jeevanmukti mein zaroor aayenge। maaya ke bandhan se chhoot jaate hain, phir aate hain satopradhaan mein। pahle sukh ke peechhe duhkh ka kaayda hai। sabko sato rajo tamo mein aana hi hai। abhi tamopradhaan jadajdeebhoot avastha hai jhaad ki। ab unse hi kalam lagaani hai। daivi jhaad ka kalam lag raha hai। vo log sapling banaate hain jhaadon aadi ki। unki ceremony karte hain। tumhaari kya ceremony hogi? unki hai jangal ki ceremony। tumhaari hai bahishta ki ceremony। tum kaanton ko phool banaate ho। yeh saari sangam ki baat hai। ab poora-poora purushaartha karna hai। nirantar yaad ki hi koshish karni hai। tumko phaayda bahut hoga। achha varsa milega। baap ke saath yog athva poora lav chaahiye। unse hi vikarma vinaash hote hain। tumhaare mein jo khaad padi hai vo yog se hi nikalti hai। saara madaar hai yaad karne par। nahin to maaya vikarma kara deti hai। baap kehte hain jo kuchh vikarma kiya hai। woh baap ke aage rakh maaphi maangani hai। baap sammukh aaye hain to toba bhar lo (maaphi le lo)। tumhaare mein bhi nambarvaar hain jo baap ko poora lav karte hain। lav karne vaale hi baap ki raay par chalte honge। tum sab seetaaon ka raam ek hi baap hai। tum to samajh gaye ho ab auron ko samjhaana hai। baaki bhakti to ek prakaar ki dukaandaari hai। yeh karte-karte hi mar jaayenge। ladaaeeyaan lagengi, vinaash hoga। phir to kuchh kar bhi nahin sakenge। bhaktimaarga bhi aise hi khatma ho jaayega। abhi tum bachche baap se varsa le rahe ho। baap kehte hain bachche bhoolo nahin। tum sabse jaasti lovely (pyaare) ho। tumko hi sabse oonch pad milta hai। nahin padhenge to pad bhi nahin paayenge।

baba kehte hain jo kuchh beemaari aadi hoti hai yeh tumhaare hi karmon ka hisaab-kitaab hai। tumko to padhna aur padhaana hai। yeh raajdhaani sthaapan ho rahi hai। ismen gareeb, saahookaar, praja, naukar, chaakar aadi sab banne hain। jo baadshaah bante hain zaroor unhonne achhe karma kiye hain। shreemat par chalte hain tab achha pad paate hain, bada bhaari school hai। nambarvaar martabe hain। koi barrister laakh roopaya kamaate hain, koi barrister 500 bhi nahin kamaate। kahenge takdeer। padhaai poori nahin padh sakte hain to kahenge drama anusaar inki takdeer aisi hai। padhaai ke anusaar hi pad paayenge। aage chalkar tumko poora-poora saakshaatkaar hota rahega। kahenge tumhaare oopar itni mehnat ki phir tum padhe nahin। ab to saja khaani padegi। janma-janmaantar ki sajaaon ka saakshaatkaar hota hai। karmaateet avastha mein jaana hai to pichhaadi mein sab saakshaatkaar karte rahenge। aise-aise kiya hai, uski yeh-yeh saza hai। sazaaon ka bhi saakshaatkaar karaate hain। abhi tum jaante ho ham aatmaayen bachche hain। bhakti maarga mein maashook ke aashik the। ab to woh mil gaya hai। is maashook se kya milta hai? oho! woh hamko svarga ka maalik banaate hain। tum ab baap aur varse ko jaan gaye ho, isliye baap samjhaate hain koi bhi mile to samjhaao - tumko do baap hain - ek had ka, doosra behad ka। behad ke baap se 21 peedhi sukh ka varsa milta hai। raavan ke raajya mein duhkh hi duhkh hai isliye baba ko yaad karte hain - he duhkh harta sukh karta aao। kitni sahaj baat hai। sirf brahma ka mukh dekh manushyon ka maatha kharaab ho jaata hai। prajaapita brahma koi to hoga na। nahin to kahaan se laayenge। bi.ke. ka proof denge। ham bi.ke. baap ke paas baithe hain। yeh manushya srishti roopi jhaad hai to prajaapita brahma bhi yahaan hi hoga।

baap kehte hain - maaya tumse bahut ladegi। baap ko yaad karne nahin degi isliye khabardaar rehna। maaya tumhaara baap se mukh modne ka purushaartha karegi। parantu tumko modna nahin hai। tumhaare pair hain narka ki taraph aur mukh hai svarga ki taraph। ab vaikuntha mein jaana hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) padhaai achhi tarah padhni aur padhaani hai। sachcha aashik ban ek baap se roohaani lav rakhna hai। koi bhi vikarma nahin karne hain।

2) koi bhi vighna ya aapdaayen aayen lekin baap se munh nahin modna hai। vighnon ko paar kar pahalvaan banna hai।

vardaan:- har aatma ke prati pyaar ki drishti, pyaar ki bhaavna rakhne vaale baap samaan bhav

jaise dvaapar se aap logon ne baap ko anek gaaliyaan di phir bhi baap ne pyaar kiya। to follow father kar baap samaan bano। kaisi bhi aatmaayen hon lekin apni drishti, apni bhaavna pyaar ki ho - isko kaha jaata hai sarva ke pyaare। koi insult kare ya ghrina sabke prati pyaar ho। chaahe sambandhi kya bhi kahen, kya bhi karen lekin aapki bhaavna shuddh ho, sarva ke prati kalyaan ki ho - isko kehte hain baap samaan।

slogan:- vishesh aatma woh hai jo visheshtaaon ko hi dekhe aur unka hi varnan kare।