Murli du jour du vendredi 9 décembre 2022

09-12-2022 praatahmurli om shanti "baapdaada"' madhuban

“meethe bachche - tum karmakshetra par aaye ho part bajaane, tumhein karma zaroor karne hain, aatma ka svadharma shanti hai, isliye shanti nahin maangani hai, svadharma mein tikna hai''

prashn:- bane banaaye drama ko jaante hue bhi baap tumhein kaun si baat nahin batlaate? kaaran kya?

uttar:- baap jaante hain - kal kya hone vaala hai to bhi bataayenge nahin। aise nahin kal earthquake hogi - yeh aaj hi bata den। agar batla den to drama real na rahe। tumhein sab kuchh saakshi hokar dekhna hai। agar pahle se hi pata ho to us samay tumhein baap ki yaad bhi bhool jaayegi। pichhaadi ki scene dekhne ke liye tumhein mahaaveer banna hai। achal-adol rehna hai। baap ki yaad mein shareer chhoden, iske liye paripakva avastha banaani hai।

om shanti। om shanti ka arth bachchon ko samjhaaya hai। manushya kehte hain man ki shanti chaahiye, woh kaise mile? is par shaayad ek kitaab chhapi hui hai। baap ne bachchon ko samjhaaya hai, tum bhi kehte ho om shanti। ab iska arth kya hai? koi to om ka arth bhagwan samajhte hain। baap bhi kehte hain om shanti। om arthaat aham (main aatma)। peechhe phir kehte hain mera shareer। to aatma khud hi kehti hai om shanti। mera svadharma hai hi shant aur rahne ka sthaan bhi nirvaandhaam, shantidham hai। aatma khud apna parichay deti hai ki main shant swaroop hoon phir poochhne ki darkaar hi nahin rehti ki man ki shanti kaise mile? baap bhi kehte hain - om shanti। main bhi param aatma hoon, tum sab bachchon ka baap hoon। shantidham mein rahne vaala hoon। tum aatmaon ne yahaan shareer dhaaran kiya hai part bajaane। phir man ki shanti ka to prashn hi nahin uth sakta। om ka arth bhi koi nahin jaanta, isliye dhakke khaate rehte hain - man ki shanti ke liye। aatma jab ashareeri hai to hai hi shant। shareer mein aane se karmendriyaan zaroor kaam karengi। karmakshetra par zaroor kaam karna padta hai to shanti par koi kitaab banaane ki darkaar nahin। yeh to second ki baat hai samajhne ki। aatma khud hi kehti hai om shanti। baaki kya chaahiye? kahaan se shanti aayegi? aatma ka desh shantidham hai। abhi to vahaan jaakar baithenge nahin। part zaroor bajaana hai। vaise hi parampita paramatma se jeevanmukti paane ke liye koi kitaab aadi ki darkaar nahin। yeh to second ki baat hai। kitaab bhakti maarga mein banaate hain, na ki gyaan maarga mein। phir bhi baahar vaalon ko samjhaane ke liye reality ki jo samjhaani hai - sachche man ki shanti par, sachchi geeta par likhna padta hai। nahin to buddhi kehti hai - apne ko aatma nishchay karo, sukhdhaam aur shantidham ko yaad karo to ant mati so gati ho jaayegi। baaki yahaan thode hi man ki shanti ho sakti hai। shantidham to hai nirvaandhaam, jahaan baap bhi rehte hain aur ham aatmaayen bhi rehti hain। roodra maala bhi kehte hain to roodra gyaan yagya bhi ek hi hai। gyaan saagar baap hi yeh gyaan suna sakte hain। baaki gyaan to bahut prakaar ka hai। science ka bhi gyaan, kaareegri ka bhi gyaan hota hai। parantu woh hai vyavhaar ki baaten। gyaan se manushya bahut aklamand bante hain। abhi tum bachchon ko srishti ke aadi-madhya-ant ki knowledge mili hai। yeh paathshaala hai, yahaan padhaaya jaata hai। baap hai gyaan ka saagar, unko sab knowledge hai। sab ved-shaastra aadi ko jaante hain। wrong-right, jhooth-sach kya hai, woh main samjhaata hoon। ab bataao sach kya hai? sarvavyaapi kehna yeh sach hai? main to tumhaara baap hoon। sarvavyaapi se to koi gyaan mil na sake। purushaartha ho na sake। sarvavyaapi hokar kya kare? khud maalik hai, bhagwan to kabhi patit hota nahin। woh to jab chaahe to vaapis chala jaae। yahaan to patit hain isliye vaapis koi ja na sake। patit banne se saara gyaan ud jaata hai, buddhi maleen ho jaati hai। yog nahin lagta, yaad mein vighna pad jaate hain isliye koi bhi paap karma nahin karna chaahiye। yaad bhi zaroor karna hai। baap ke bigar puraane paap kat nahin sakte। aise nahin haridvaar mein rahne se koi paap kat sakte hain, nahin। paap to karte rehte hain। saadhu-santon ko agar pata hota ki hamaara ghar shantidham hai to vahaan se hokar aate। baba tumko sab saakshaatkaar karaate hain। goya tum hokar aaye ho। bhakti maarga mein bhi saakshaatkaar hota hai - divya drishti se। tum jab satayug mein ho to in aankhon se lakshmi-naaraayan ko dekhenge। woh bhi tumko dekhenge। abhi saakshaatkaar mein dekhte ho। baba ke paas divyadrishti ki chaabi hai, woh aur kisko mil na sake। baba ne samjhaaya hai yeh chaabi main kisko bhi nahin deta hoon। inki evaj mein main phir svarga ki raajaai nahin karta hoon। taraaju equal rakhte hain। tum vishwa ke maalik bante ho, main nahin banta hoon। bhakti maarga mein jo saakshaatkaar karte hain woh bhi moorti mein thode hi taakat hai।

baba kehte hain - main manokaamna poorn karne ke liye saakshaatkaar karaata hoon। ganesh, hanoomaan aadi jiski pooja karte hain to saakshaatkaar main karaata hoon। parantu vo log samajhte hain paramatma sabmen hain isliye mujhe sarvavyaapi kah diya, ulta gyaan le liya। vaastav mein sab brothers hain। sabmen aatma hai। sab father to ho na saken। sabhi aatmaayen pukaarti hain he god father raham karo, to sab bachche ho gaye। bachche baap se varsa lete hain to deh ka abhimaan chhodna pade। bas main aatma baap se varsa le rahi hoon। aatma ko mel va female nahin kehte। bhal chola female ka hai parantu yeh kehna theek hai ki varsa le raha hoon। baap se varsa lene ka sabko hak hai। main Christian hoon, main phalaana hoon। yeh sab shareer ke dharma hain। aatma ek hi hai। shareer badalta hai, tab kehte hain yeh musalmaan hai, yeh hindu hai। aatma ka naam nahin badalta, shareer ka badalta hai। baap to hai hi patit-paavan, gyaan ka saagar। baap ki mahima alag ho jaati hai। woh shanti ka saagar, gyaan ka saagar hai। unke saath yog lagaane se ham shantidham chale jaayenge, so bhi abhi। aisa yog kabhi koi laga nahin sakte। tum shantidham ko jaante ho। baaki yaad shivbaaba ko karte ho। sannyaasi kehte hain ham brahm gyaani hain। brahm se yog lagaate hain parantu unse vikarma vinaash nahin ho sakte। vo yog hi wrong hai। brahm arthaat rahne ka sthaan। brahm gyaani athva tatva gyaani baat ek hi hai। baap kehte hain yeh inhon ka bhram hai। patit-paavan brahm nahin ho sakta। aatmaon ka baap shiv hai, unko hi patit-paavan kaha jaata hai। baaki vaapis to koi ja nahin sakte। sabhi ko satopradhaan se tamopradhaan banna hi hai। jabki pahla number shri naaraayan hi banta hai to aur sabhi bhi zaroor tamopradhaan banenge। punarjanma lete aayenge। yeh bhi buddhi mein rakha jaata hai।

tum jaante ho har ek dharma vaale kitne janma lete honge? devtaaon ko kahenge poore 84 janma lete hain। auron ke janma accurate nahin bata sakte। koi hisaab kare to nikaal sakte hain। parantu jaroorat nahin hai। hamaara apne purushaartha se kaam hai aur jaasti baaton mein nahin jaana hai। tumko mukti, jeevanmukti chaahiye to manamnaabhav। main hoon hi patit-paavan, aakar raajayog sikhlaata hoon। patit-paavan zaroor kaliyug ant mein aayega, na ki dvaapar mein। sirf shivraatri likhne se arth nahin nikalta hai। trimoorti shivraatri likhna chaahiye। bhakti mein ghor andhiyaara hai tab kehte hain gyaan soorya pragta… zaroor kaliyug ka ant hoga। roshni hai satayug mein। baap zaroor sangam par aayega। sab patit banen tab to baap aakar paavan banaaye kyonki sabka connection hai na। bahut sannyaasi log bhi kehte hain man ki shanti kaise hogi। aatma ka svadharma hi shant hai। jaise bhaaratvaasi devi-devtaaon ko bhoole hue hain, vaise aatma bhi apne svadharma ko bhooli hui hai। aatma hi jaanti hai - mujhe raavan ne ashaanta kiya hai। yeh gyaan abhi mila hai। yahaan to shanti kabhi mil nahin sakti। shanti-dhaam mein hi shanti mil sakti hai। vahaan to sabko jaana hai। ham shantidham mein jaayenge phir aayenge sukhdhaam mein। doosre dharma vaalon ko shanti adhik milti hai, hamko sukh adhik milta hai। unhon ko na itna sukh, na duhkh milega। yeh hain detail ki baaten। koi ne lakshya ko achhi reeti pakad liya hai, woh bhi kaaphi hai। ghar mein rehte baap aur varse ko yaad karte raho। parantu praja nahin bana sakenge। jo praja banaayenge vahi raaja-raani, maalik banenge। mehnat hai na। projector par samjhaana sahaj hai। bade-bade aadmiyon ko nimantran de unhon ko samjhaana chaahiye। tum bachche bahuton ka kalyaan kar sakte ho। yeh bhi naye tareeke nikal rahe hain। angreji mein bhi projector slides vilaayat mein jaakar dikhla sakte ho। yeh gola aadi jab dekhenge to samjhenge ki yeh hai bhaarat ki philosophy। yeh knowledge baap hi de sakte hain। yeh hai roohaani gyaan। rooh se hi roohaani gyaan milta hai। sachche doctor aaph philosophy bhi tum ho। baap hai roohaani surgeon। roohon ko injection lagaate hain। tumhaara hai sab gupta। vo log to baith shaastra aadi padhte hain to unhon ka bahut maan hota hai। woh roohon ko patit samajhte nahin, nirlep kah dete hain। to sachchi-sachchi knowledge tum hi de sakte ho। yeh bhi samjhaaya hai woh hai had ka sannyaas, tumhaara hai behad ka sannyaas, jo behad ka baap hi sikhlaate hain। woh hai hathayog, yeh hai raajayog। vo hathayog se karmendriyon ko vash karne chaahte hain। tum raajayog se karmendriyon ko vash karte ho। bahut farka hai। ab baap dvaara tum knowledgeful bante ja rahe ho। parantu banenge nambarvaar purushaartha anusaar। aise baap ke saath kitna lav rehna chaahiye। yeh hai gupta lav। aatma bhi gupta hai। aatma jaanti hai ki hamko baba mila hai। duhkh se chhuda rahe hain। baba aapne to kamaal ki hai। kalpa-kalpa aap hamko gyaan dete ho phir ham bhool jaate hain। baap kehte hain - haan bachche, hamne to kaha tha yeh gyaan praayahlop ho jaayega। satayug mein yeh knowledge nahin rahegi। yeh sab drama bana hua hai। zara bhi pharka nahin pad sakta। bana banaaya drama hai, jo kuchh hota hai saakshi hokar dekhte chalo। vinaash hona hai, sthaapna honi hai, saakshi hokar dekhna hai। samjho kal earthquake hoti hai to aise nahin main bataaoonga ki yeh hona hai। phir to sab prabandha kar len। saakshi hokar dekhte chalo। mool baat hai mujhe yaad karo। nahin to mujhe bhi bhool jaayenge। tum bachchon ko mahaaveer banna hai। mahaaveer-mahaaveerni ko god aaph knowledge, goddess oph knowledge kaha jaata hai। god hi yog sikhlaae mahaaveer banaate hain। pichhaadi mein jab earthquake aadi hongi us samay mahaaveerapna chaahiye। abhi to tum purushaarthi ho। achal-adol rehna pade aur saath-saath baba ki yaad mein maren to bahut achha। jo gyaan mein achal-adol honge woh baithe-baithe shareer chhodenge। phir karmaateet avastha mein jaakar service karenge। bachchon ko paripakva avastha mein shareer chhod sookshm vatan mein jaakar phir nai duniya mein aana hai। achha!

bachchon ko sadaiv apna chart dekhna hai jo ham baba se poora varsa paayen। koi bhi baat ke sanshay mein aakar padhaai kabhi nahin chhodni chaahiye। baba baar-baar kehte hain - mujhe yaad karo to vikarma vinaash honge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi baat mein sanshaybuddhi ban padhaai nahin chhodni hai। apni sthiti achal, adol banaani hai। ek baap se sachcha lav rakhna hai।

2) apna time vistaar ki baaton mein vesta nahin karna hai। buddhi kisi bhi karma mein maleen na ho, iska poora dhyaan rakhna hai।

vardaan:- mansa-vaacha-karmana aur sambandh-samparka mein pavitrata ki dhaarna dvaara parampoojya aatma bhav

pavitrata sirf brahmacharya nahin lekin mansa sankalp mein bhi kisi ke prati negative sankalp nahin ho, bol mein bhi koi aise shabd na niklen, sambandh-samparka bhi sabse achha ho, kisi mein jara bhi apvitrata khandit na ho tab kahenge poojya aatma। to pavitrata ke foundation ko check karo। sada smriti mein rahe ki main param pavitra poojya aatma is shareer roopi mandir mein viraajmaan hoon, koi bhi vyartha sankalp mandir mein pravesh kar nahin sakta।

slogan:- apne bhavishya ko spashta dekhne va jaanne ke liye sampoornata ki sthiti mein sthit raho।