Murli du jour du samedi 10 décembre 2022

10-12-2022 praatahmurli om shanti "baapdaada"' madhuban

“meethe bachche - tum roohaani ashva ho, tumhein vijayi ratna banne ki race karni hai, mahaarthi ashva woh jo raajaai paane ki race karen''

prashn:- tum bachchon mein satopradhaan purooshaarthi kaun aur tamo purooshaarthi kaun?

uttar:- satopradhaan purooshaarthi woh jo rachayita aur rachna ko jaankar purooshaartha karte hain। jinki buddhi mein srishti ke aadi-madhya-ant ki knowledge ghoomti rehti hai, jinhen baap ki yaad ka shuddh ahankaar hai aur tamo purooshaarthi woh jo kehte kalpa pahle jaisa purooshaartha kiya hoga vaisa kar lenge। jo milna hoga woh mil jaayega।

geet:- duhkhiyon par kuchh raham karo maa baap hamaare…

om shanti। jab yahaan baithte hain to jitna ho sake baap ki yaad mein rehna hai। kal bhi samjhaaya ki saara kalpa tum deh-abhimaani rehte ho। is samay hi ek baar dehi-abhimaani banna padta hai। deh-abhimaan chhod vaapis chalna hai। yeh kapde athva tan bahut puraane ho gaye hain। yeh deh ka ashuddha ahankaar chhodna hai। baap ko yaad karna hai। baap ko yaad to karte hain parantu pata nahin ki hamaara baap kaun hai। kah dete hain baap sarvavyaapi hai phir to pukaar bhi na saken। gaate to hain na ki O god father। jab kisi ko duhkh hota hai to god ko yaad karte hain। buddhi oopar chali jaati hai। agar bhakta hi bhagwan ho phir to bhagwan ko yaad karne ki darkaar hi na pade। na aisa kehna pade ki he bhagwan ham duhkhi kangaal hain। bhakti maarga mein hai duhkh, isliye bhagwan ko yaad karte hain। main bachchon ko sukh dekar jaata hoon, to us sukh ko sabhi yaad karte hain। avinaashi baap, avinaashi sukh de jaate hain। ab tum bachchon ka teesra netra gyaan ka khula hai, jisse baap rachayita aur uski rachna ke aadi madhya ant ko achhi reeti jaan chuke hain। kal jo ghar mein geeta padhte the, us geeta se rachta aur rachna ka knowledge nahin milta tha aur hi rachna ko bhool gaye। rachta ko bhoole to rachna ko bhi bhoole। baap teesra netra gyaan ka dekar samjhaate hain, raajayog sikhlaate hain jisse tum svarga ke maalik banenge। geeta padhne se koi svarga ki yaad nahin aa sakti। kitne lecture karte hain। ab tum baap se direct sunte ho। to raat din ka farka feel hota hai। usmein to rachta aur rachna ko hi bhool jaate hain। abhi baba ne rachta aur rachna ka raaz baith samjhaaya hai aur barobar purooshaartha bhi karte hain varsa lene ka। phir kiska purooshaartha satopradhaan hai kiska rajo, kiska tamo hota hai। uttam, madhyam, kanishta purooshaarthi hain। bachche jaante hain ki hamaare purushaartha se itni oonch praalabdha banengi, to kyon nahin aisa purushaartha karna chaahiye। khud bhi samajhte hain ki abhi ham achha purushaartha karenge to kalpa-kalpa aisa hi hamaara purushaartha hoga। agar nahin karte hain to samajh mein aata hai kalpa pahle bhi usne purushaartha nahin kiya hai to pad bhrashta ho jaayega। ashva daudaate hain na। race mein ghode daud hoti hai। kehte hain ki phalaane ne win kiya। yahaan bhi nambarvaar hain। koi to aise bhi hain jo kehte hain ham jaasti kuchh samajhne nahin chaahte hain। na samajh sakte hain na kisi ko samjhaayenge। unhon ke liye phir sahaj yukti hai to sirf baap ko yaad karna hai। yaad karna seekhenge ki woh bhi nahin। behad ka baap jisko tum bhakti maarga mein yaad karte ho, woh baap ab sammukh brahma ke tan se kehte hain mujhe yaad karo। baba ne rachna ka raaz bhi samjhaaya hai। shivbaaba to sabhi aatmaon ka baap hai। koi bhi aatma ko prajaapita nahin kahenge। aatmaayen to anaadi hain। prajaapita brahma rachta hai - mukh vanshaavli। ham aatmaayen to hain shivbaaba ki santaan। kehte hain ki tum mere to ho hi। jitne ho utne hi ho। kam jaasti aatmaayen kabhi bhi ho nahin sakti। unhon ka hi behad drama mein part hai। yeh anaadi bana banaaya khel hai। baap kehte hain main aata hoon zaroor ek sat dharma sthaapan karne aur anek dharmon ka vinaash karaane। jo satdharma praayah lop ho gaya hai, woh abhi sthaapan ho raha hai। sat dharma arthaat satayug ka aadi sanaatan devi-devta dharma, jo sat paramatma ne aakar sthaapan kiya hai। jaise Christian dharma Christ ne sthaapan kiya, vaise aadi sanaatan sat dharma, sat baap ne sthaapan kiya hai। sachkhanda sthaapan karne vaala sachcha baba hai। tum brahman bachche hi jaante ho ki barobar baap aaya hua hai। baba samjhaate hain ki ab drama poora hota hai। to ab puraana kapda chhodna hai। naatak mein bhi actors ka part mukarrar ho jaata hai। apne time par kapde badal-kar chale jaate hain na। baap kehte hain ki ab tumhaari aatma apvitra ho gai hai। aatma sampoorn pavitra ho jaae to phir unko shareer bhi pavitra chaahiye। is shareer mein rehte aatma ko pavitra banaana hai। nahin to aatma ko ham pavitra kahaan banaayenge। pavitra yahaan hi karna hai। ab 5 tatva bhi tamopradhaan hain। aatma jab pavitra ban karmaateet avastha mein aa jaayegi to phir puraana hisaab-kitaab chuktu ho jaayega। yeh baat bachchon ki hai। bachche hi sunte hain। to brahman zaroor chaahiye।

tum jaante ho ki svarga ki sthaapna kaise ho, to brahma zaroor chaahiye। yeh hai braahmanon ka kul। kehte hain ki main brahma ke tan ka aadhaar leta hoon, in braahmanon ko rachne ke liye। yeh baaten to tum brahman aur braahmaniyaan hi jaante ho। yeh hai sangamayug ki rachna, kitne guhya raaz hain। shuru mein baba itne guhya raaz samjhaate the kya? kaha jaata hai na - saagar ko syaahi banaao, jangal ko kalam banaao, prithvi ko kaagaj banaao to bhi yeh gyaan poora nahin hoga। tum bachche sunte hi rehte ho। yeh guhya baaten bhi dhaaran unhon ko hongi jinhon ka padhaai mein attention hai। baap se varsa lene ke liye kamar kaskar khade hain। thoda bhi agar sanshay ho gaya to ud jaayega। phir achaanak kisko teer lag jaayega, to ekdam nishchaybuddhi ho jaayega। naye-naye totke baba sunaate hain। kal bhi baba ne bahut achhi reeti samjhaaya tha। baap kehte hain ki main param aatma paramdham mein rahne vaala hoon, jisko supreme soul kehte hain। yahaan ki aatma ko koi supreme kah na sake। supreme soul ek hi hai, unki hi sab bandagi karte hain। paramdham mein rahne vaala paramatma woh phir sarvavyaapi ho na sake। yahaan to duhkh hai, janma-maran hai। paramatma to janma-maran rahit hai। jo mahaarthi hain jinka poora purushaartha chal raha hai varsa lene ka, ve race mein dekho kaise daudte hain। koi ghode naaummeend bhi hote hain। parantu last mein aise tej daudaate hain jo sabse aage chale jaate hain। yahaan bhi aise hai। koi to chalte-chalte dheele ho jaate hain, gir padte hain। koi ko chot lag jaati hai to langade ho padte hain। yahaan bhi bahut achhe-achhe naye bachche hain jo puraanon se bahut tej daud rahe hain। kaeeyon ko purushaartha karne mein grahchaari baith jaati hai। koi par kabhi brihaspati ki dasha baithti, kabhi chakra ki, kabhi shaneechar ki। raahu ki dasha bhi baith jaati hai। to kabhi phaayda, kabhi nuksaan hota rehta hai। baba khud jaante hain ki is bachche par grahchaari hai, is kaaran se grahan laga hua hai। baap kehte hain isse paar hokar teevra-vegi ban jaao। jab raahu ka grahan lagta hai to do teen varsha pavitra rah phir karmendriyon se vikaar mein chale jaate hain। baap kehte hain kaam mahaashatru hai, in par vijay paani hai। achhe-achhe bachchon par bhi grahchaari lag jaati hai। shaadi kar lete hain। pran bhi pahle karte hain to ham pavitra rahenge, parantu gir padte hain। kabhi shreemat par chalte, kabhi phir ulti mat par chal padte hain। baba bachchon ko achhi reeti jaante hain, baba ko kehte ki baba hamaari ab race chal rahi hai। baap kehte hain ki khabardaar rehna kyonki race horse (ghodon ki daud) hai na! dekho, bachche bhavishya 21 janmon ka sukh milta hai। yeh koi kam baat hai। bhool karne se phir bhavishya sabhi janmon par grahchaari athva gobi (ghaata) lag jaata hai isliye baba kehte hain ki shreemat par poora purushaartha karo। baba to pahle se hi bata dete hain - jitna rustam (pahalvaan) banenge, gyaan-yog mein teekhe hoge, utna maaya ke toofaan bhi jor se aayenge। khabardaar rehna, karmendriyon dvaara vikarma kar paap aatma nahin banna hai। tum ho eeshvareey aulaad। to bahut royal banna hai। lakshmi-naaraayan dekho kitne royal hain। yeh sanskaar abhi bharne hain kyonki is samay tum eeshvareey aulaad kahlaate ho। maan tumhaara abhi hai। balihaari to is ek janma ki maanni chaahiye। baaki to 84 janma le patit bante hi aaye ho। jab tak baba na aaye tab tak yeh manushya srishti jhaad jadajdeebhoot tamopradhaan hona hi hai na। in lakshmi-naaraayan ko bhi vishwa ka maalik us maalik ne banaaya। somnaath ka mandir bhi bahut naameegraami hai। shivbaaba ne dhan diya hai isliye unke mandir mein bhi bahut dhan lagaaya। pujaari bhi jab bante hain to bhi kitna dhan rehta hai, jo itne mandir banaaye hain। to poojya-pane mein kitna na dhan hoga। abhi to hai praja ka praja par raajya। kuchh hai nahin। brahma ki raat hai na। phir brahma ka din hota hai to svarga ban jaayega। heere javaahron ke mahal ban jaayenge। bhala itna sona aayega kahaan se? vahaan sona to mitti misal hota hai। dikhlaate hain ki pahaado mein garmaais hoti hai to phatte hain। khaaniyon se hi sona nikalta hai na। sone ki eeten banaate honge। jaise maaya machchhandar ke khel mein dikhaate hain to usne sookshm vatan mein sone ki eet dekhi, samjha le jaayenge। aankh kholi to kuchh nahin dekha। yahaan bhi bachche divya drishti mein sone ke mahal dekhkar aate hain। bachchon ne geet to suna, duhkhiyon par kuchh raham karo... baap ka naam hi hai blissful। aise nahin ki woh sabhi mein viraajmaan hai। maaya ne buddhi ko bilkul hi taala laga diya hai। baap kehte hain ki mere sivaae yeh taala koi khol nahin sakta। nambarvaar taala unhon ka hi khulta, jinka kalpa pahle khula hai। unhon ke purushaartha se samajh sakte hain ki yeh achhi service karte hain। parampita paramatma ne zaroor koi shareer dhaaran kiya hoga, unki pahli rachna hai brahma। brahma ke mukh dvaara brahman rache। brahman hain choti। jagat amba braahmani hai, brahma brahman hai। shakti sena brahman braahmani hai। baap kehte hain main hi knowledgeful hoon। mera bhi drama mein part hai। main hi aakar tumko rachta aur rachna ka raaz samjhaata hoon। yahaan to baap, teacher, satguru ek hi hai। teenon hi karma ikatthe karte hain। satguru saath bhi le jaayenge, yeh guarantee hai। baap sabhi ko sukh shanti deta hai। baap ke to sabhi bachche hain aise thode hi ki koi ko de, koi ko na de। baap to sabhi ko maaya ki janjeeron se chhudaane vaala hai, isliye sab unko yaad karte hai। svarga ki sthaapna karte hain। baaki sabko mukti mein bhej dete hain। yeh to baap ka hi kaam hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) koi bhi vikarma in karmendriyon dvaara nahin karna hai। sanskaaron ko royal banaana hai। maaya ke toofaanon se darna nahin hai। gyaan-yog mein teekha banna hai।

2) shreemat par koi bhi grahchaari ko paar kar teevra vegi banna hai। ulti mat par nahin chalna hai। khabardaar rah yaad ki race karni hai।

vardaan:- har karma yogayukta, yuktiyukta karne vaale karmayogi so nirantar yogi bhav

karmayogi aatma ka har karma yogayukta, yuktiyukta hoga। agar saadhaaran ya vyartha karma ho jaata hai to bhi nirantar yogi nahin kahenge। nirantar yog arthaat yaad ka aadhaar hai pyaar। jo pyaara lagta hai woh svatah yaad rehta hai। pyaar vaali cheez apni or aakarshit karti hai। to har second, har sankalp, har bol sada shreshtha ho aur ek baap se dil ka pyaar ho tab kahenge karmayogi so nirantar yogi।

slogan:- mehnat se chhootna hai to mohabbat ke jhoole mein jhoolte raho।