Murli du jour du jeudi 29 décembre 2022

29-12-2022 praatahmurli om shanti "baapdaada"' madhuban

meethe bachche - koi kitna bhi gunvaan ho, meetha ho, dhanvaan ho tumhein uski taraph aakarshit nahin hona hai, jisma ko yaad nahin karna hai

prashn:- jin bachchon ko knowledge mili hai unke mukh se baap ke prati kaun se meethe bol nikalte hain?

uttar:- oho! baba aapne to humein jeeydaan de diya। meethe baba aapne humein srishti ke aadi-madhya-ant ki knowledge dekar, sarva duhkhon se chhuda diya to kitni shukriya nikalni chaahiye।

prashn:- ant ke samay baap ke sivaae kisi mein bhi rag na jaae uske liye kya karna hai?

uttar:- baba kahe bachche - koi bhi cheez lobh ke vash apne paas extra nahin rakhni hai। extra rakhenge to usmein rag jaayegi। baap ki yaad bhool jaayegi।

geet:- dheeraj dhar manuva…

om shanti। bachchon ko dheeraj kaun de raha hai? bachchon ki buddhi jhat behad ke baap taraph chali jaati hai। so bhi sirf is samay hi tum bachchon ki buddhi jaati hai। yoon to behad baap ki taraph bahuton ki buddhi jaati hai। parantu unhon ko ye maaloom hi nahin hai ki yeh sangamayug hai। baap aaya hua hai, sabko ek hi baar pata to nahin pad sakta। bachche baap ka banen to maaloom pade। ab tum bachchon ne baap ko jaana hai। jaante ho baba aaya hua hai। behad ka varsa de rahe hain, jo 5 hajaar varsha pahle tumko diya tha। woh aate hi hain bachchon ko behad svarga ka varsa dene। woh behad ka baap hote hue phir padhaate bhi hain। bhagwan yaani baap phir bhagvaanuvaach arthaat padhaate hain। padhaate kya hain? woh bhi tum bachche samajhte ho। ham baap ke sammukh baithe hain। baba koi shaastra to padha hua nahin hai। yeh daada padha hua hai। unko kaha hi jaata hai gyaan ka saagar, almighty authority। khud bhi kehte hain main sabhi vedon, shaastron aadi ko achhi reeti jaanta hoon - yeh sab bhakti maarga ki saamagri hain। yeh mere rache hue nahin hain। poochha jaata hai yeh shaastra kab se padhte aaye ho? to kehte hain yeh parampara se chala aaya hai। baap kehte hain mere ko to koi padhaane vaala nahin hai। na mera koi baap hai aur sab garbha mein pravesh karte hain, maata ki paravrish lete hain। main to garbha mein aata hi nahin hoon, jo maata ki paravrish loon। manushya ki aatma garbha mein jaati hai। satayug ke lakshmi-naaraayan ne bhi to garbha se janma liya। to woh bhi manushya thahre। main to is shareer mein aakar pravesh karta hoon, drama plan anusaar kalpa pahle muaaphik। yeh akshar aur koi jaante nahin। kalpa ki aayu ka hi kisko pata nahin hai। baap hi baith samjhaate hain main tumhaara baap bhi hoon, shikshak bhi hoon, satguru bhi hoon। tum jaante ho yeh baba milkiyat dene vaala hai। baba svarga ki baadshaahi dene aaya hai। narka ki raajaai thode hi denge! yeh buddhi mein rehna chaahiye ki behad ka baap hamko raajayog sikhla rahe hain। baap svarga ki sthaapna karne vaala hai। kehte hain meri mat par chalo, main tumko svarga ka maalik banaata hoon। phir dvaapar se tum raavan ki mat par chalte ho। satayug mein to koi manushya ki mat gati sadgati ke liye milti nahin। na darkaar hai। kaliyug mein sab gati sadgati ke liye mat maangate hain। jaante hain ham koi samay svarga mein the, paavan the, tab to pukaarte hain - he patit-paavan, he sadgati daata hamko sadgati do। satayug mein yeh radi nahin maari jaati। ab tum jaante ho baba aaya hua hai। bahut saralta se raajayog aur sahaj gyaan ki mat dete hain। unki shreemat hai। oonche te ooncha hai bhagwan। unse ooncha koi hai nahin, aur woh hamaara roohaani baap hai। roohaani father hone ke kaaran woh roohon ko hi gyaan dete hain, jismaani father hone se bachche jismaani knowledge uthaate hain isliye baap kehte hain - aatma-abhimaani bano aur baap ko yaad karo। koi bhi jismaani yaad nahin rahni chaahiye। tum aatma ho, manushya bhal kitna bhi achha ho, dhanvaan ho, meetha ho to bhi dehdhaari ko yaad nahin karna। ek parampita paramatma ko hi yaad karna। koi saahookaar ka bachcha hoga to baap ko hi yaad karega। gaandhi ko va shaastri aadi ko thode hi yaad karega। sabse jaasti yaad parampita paramatma ko karte hain phir koi lakshmi-naaraayan ko, koi raadhe-krishna ko bhi karte hain। samajhte hain yeh hokar gaye hain। unhon ki history-geography bhi hai। oonche te ooncha hai baap, woh phir aayega, zaroor world ki history-geography repeat hogi। kaliyug ke baad phir satayug aayega। parantu yeh sivaae tum bachchon ke aur kisko bhi maaloom nahin। sirf kahne maatra kehte hain - history-geography repeat। samajhte kuchh bhi nahin। pahle tum bhi aise the। samajhte the barobar lakshmi-naaraayan ka raajya tha, parantu kitna samay chala, kya hua phir woh kahaan chale gaye, kuchh bhi pata nahin tha। abhi bhi nambarvaar achhi reeti dhaaran kar shreemat par chalte ho - yeh bhi theek hai। mansa-vaacha-karmana madad dete hain। gyaan aur yog ki madad se bahuton ka kalyaan karenge।

tum shakti sena double ahinsak ho। tumhaare mein koi bhi hinsa nahin hai। tum kisko bhi duhkh nahin dete ho। hinsa arthaat duhkh dena। ghoonsa maarna, talvaar chalaana va kaam kataari chalaana - yeh sab duhkh dena hai। tum koi bhi prakaar ka duhkh nahin dete ho isliye ahinsa parmodharma kaha jaata hai। manushya to sab hinsa karte hain। hai hi raavan raajya। manushyon ne to shreekrishna ke charitron mein bhi hinsa dikha di hai। tum bachche jaante ho shreekrishna to raajkumaar tha, unke aise charitra va jeevan kahaani ki baat nahin। charitra hain hi eeshvar ke। vahi ratnaagar, saudaagar, gyaan ka saagar, jaadoogar hai। are, niraakaar paramatma phir sauda kaise karega? saudaagar to manushya hoga na। in sab baaton ko tum jaante ho to kaise saudaagar aur ratnaagar hai। unko sab kyon yaad karte hain? he patit-paavan, sarva ke sadgati daata, duhkh harta sukhkarta। mahima bhi ek ki hai। yeh mahima na to sookshm vatan vaasi, na sthoolavtan vaasi ki ho sakti hai। yeh mahima hai moolavtanvaasi ki। oonche te oonch hai baap, ham aatmaayen unke bachche hain। ham sab nambarvaar part bajaane aate hain। baap kehte hain - yeh jo knowledge tumko sunaata hoon - woh praayahlop ho jaati hai। woh geetaayen to dher hain। phir bhi puraani geetaayen niklengi। tumhaare kaagaj thode hi niklenge। geeta bahut bhaashaaon mein hain। oonche te oonchi geeta hai parantu sab banaai hai manushyon ne, yathaartha to hai nahin isliye sab andhere mein hain, tab gaaya jaata hai gyaan soorya pragta... is soorya ki mahima nahin। gyaan soorya ki mahima hai। yeh soorya dhoop deta, saagar paani deta, unke naam in par, inke naam un par laga diye hain। gyaan saagar ko hi gyaan soorya kehte hain। tum jaante ho hamaara andhiyaara ab door ho gaya hai। srishti ke aadi-madhya-ant ko tum hi jaante ho। jab rachayita ke part ko jaante ho to auron ke part ko bhi zaroor jaante honge। tumko knowledge mil rahi hai। tum jaante ho yeh baba bahut pyaara hai। hamko jeeydaan dete hain। duhkh se chhudaate hain। kaal ke chambe se chhudaate hain। koi marne se bach jaate hain - kehte hain doctor ne jeeydaan diya। tumko to ek hi baar aisa jeeydaan milta hai - jo tum kabhi beemaar nahin honge, phir yeh nahin kehna padega ki phalaane ne jeeydaan diya। yeh hai bilkul nai baat।

abhi tum jeete ji baap ke bane ho। koi-koi ko phir maaya raavan apni taraph kheench leti hai। use kahenge raavan roopi kaal kha gaya। eeshvareey god mein aakar phir badalkar aasuri god mein chale jaate hain। kaal ne nahin khaaya parantu jeete ji eeshvar ke bane, phir jeete ji raavan ke ban padte hain। yahaan dharmaatma bane phir vahaan jaakar adharmi ban jaate hain। yahaan sangam par dharma ka raajya hai, vahaan adharma ka raajya hai। satayug mein hai hi ek dharma। kaliyug mein hai adharma ka raajya, kaurav raajya। paandavon ke saath kehte hain shreekrishna the। tumhaare saath to shivbaaba hai। jua ki baat nahin। raajaai na kaurvon ki hai, na paandavon ki hai। baap aakar dharma ka raajya sthaapan karte hain। chaahte bhi hain raamraajya ho। ham svargavaasi bane arthaat yeh narka hai। parantu kisko seedha narkavaasi kahen to bigad padte hain। baap baith bachchon ko samjhaate hain। behad ka baap niraakaar hai। behad ke baap ko hi bhagwan kaha jaata hai। had ke baap ko bhagwan thode hi kahenge। shreekrishna ko thode hi gyaan saagar, patit-paavan kahenge। unki mahima sirf tum brahman jaante ho। tumko baap aakar aap samaan banaate hain। baap bhi jaante hain, tum bachche bhi jaan jaate ho, varsa mil jaata hai। jaise ki laukik baap se bachchon ko varsa milta hai। woh to alag-alag hai। yahaan tum samajhte ho ham behad ke baap se varsa pa rahe hain। aisa koi school va satsang hoga nahin, jahaan sab kahen ham behad ke baap se varsa lene aaye hain। yahaan baap raajayog sikhlaate hain। kehte hain tum nar se naaraayan banenge। so zaroor sangamayug arthaat kaliyug ant aur satayug aadi ka sangam hoga tab to tum purushaartha kar nar se naaraayan banenge। yeh raajayog ham baba se seekh rahe hain - nar se naaraayan, naari se lakshmi banne ke liye। nar-naaraayan ka mandir bhi banaate hain। unko 4 bhujaayen dete hain kyonki saath mein hain। naari lakshmi ka phir mandir nahin hai। naari lakshmi ko deepmaala par bulaate hain। unko mahaalakshmi kehte hain। tum lakshmi ki moorti 4 bhujaaon ke sivaae nahin dekhenge। jisko poojte hain, yeh yugal vishnu ka roop hai, isliye 4 bhujaayen di hain। yeh sab baaten baap hi samjhaate hain। manushya to kuchh jaante nahin। bhagwan ko dhoondhate rehte hain। dhakka khaate rehte hain। bhagwan to hai hi oopar phir dhoondhane ki kya darkaar hai। mandir mein jo shreekrishna ka chitra hai woh chitra ghar mein rakh kyon nahin poojte? khaas mandir mein hi kyon jaate hain? mandir mein jaayenge, paise rakhenge, daan karenge। ghar mein daan kisko karenge? to yeh sab bhakti maarga ki rasmen hain। baap kehte hain tumko koi bhi chitra rakhne ki darkaar nahin। kya tum shivbaaba ko nahin jaante ho jo chitra rakhte ho? kya chitra rakhne se yaad kar sakte ho? baba jeeta hai phir bachche chitra kyon rakhenge? baap tumko gyaan de raha hai phir chitra kya karenge? boodhe hain yaad bhool jaati hai isliye chitra diya jaata hai। baaki aur koi bhi dehdhaari ko yaad karte rahenge to ant samay vahi yaad aayega। kuchh na kuchh rag hai to woh tumhaare peechhe padega। phir bhal kitne bhi shivbaaba ke chitra rakho। agar rag aur taraph hogi to woh yaad zaroor aayega isliye baap kehte hain bachche poora nashtomoha ho jaao। kisi bhi cheez mein moh hoga, 2-4 jodi joote honge to woh yaad aayenge isliye kaha jaata hai jyaada koi bhi vastuen nahin rakho। nahin to buddhi usmein jaayegi। sivaae baap ke aur koi ko yaad na karo। lobh hota hai na - ham achhe-achhe vastra rakhen, 2-4 joote rakhen, ghadi rakhen। thode paise rakhen। rakhenge to woh yaad aayega। baba ko maaloom hona chaahiye - tumhaare paas kya rakha hai। vaastav mein tumko kuchh bhi rakhna nahin hai, jo milta hai vahi rakhna hai। ek baap ke sivaae aur kuchh bhi yaad na rahe। itni practice karni hai - tab hi vishwa ke maalik banenge। yeh koi nahin samajhte ki raadhe-krishna vishwa ke maalik the, sirf kehte hain bhaarat mein raajya karke gaye hain। jamuna ke kanthe par inke mahal the। parantu woh saare vishwa ke maalik the। yeh sirf tumhaari buddhi mein hai। behad ka baap behad ka maalik banaane aaya hai। praja aur raaja mein farka bahut hai। yahaan tum nar se naaraayan banne aaye ho to poora follow karo। phakeer se ameer banna hai। itna purushaartha karna chaahiye। khushi se padhna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan-yog se sabko madad karni hai। double ahinsak banna hai। kisi ko bhi duhkh nahin dena hai।

2) nashtomoha banna hai। kisi bhi cheez mein buddhi ki rag nahin rakhni hai। ek baap ki yaad sada rahe- iski practice karni hai।

vardaan:- brahman jeevan mein yaad aur seva ke aadhaar dvaara shaktishaali banne vaale maayaajeet bhav

brahman jeevan ka aadhaar hai yaad aur seva। agar yaad aur seva ka aadhaar kamjor hai to brahman jeevan kabhi tej chalega, kabhi dheela chalega। koi sahayog mile, koi saath mile, koi circumstance mile to chalenge nahin to dheele ho jaayenge isliye yaad aur seva donon mein teevragti chaahiye। yaad aur nihsvaartha seva hai to maayaajeet banna bahut sahaj hai phir har karma mein vijay dikhaai degi।

slogan:- vighna-vinaashak vahi banta hai jo sarva shaktiyon se sampanna hai।