Murli du jour du vendredi 6 janvier 2023

06-01-2023 praatahmurli om shanti "baapdaada"' madhuban

“meethe bachche - krodh bahut duhkhadaai hai, yeh apne ko bhi duhkhi karta to doosre ko bhi duhkhi karta, isliye shreemat par in bhooton par vijay praapta karo''

prashn:- kalpa-kalpa ka daag kin bachchon par lagta hai? unki gati kya hoti hai?

uttar:- jo apne ko bahut hoshiyaar samajhte, shreemat par poora nahin chalte। andar koi na koi vikaar gupta va pratyaksha roop mein hai, use nikaalte nahin। maaya gheraav karti rehti hai। aise bachchon par kalpa-kalpa ka daag lag jaata hai। unhein phir ant mein bahut pachhtaana padega। woh apne ko ghaata daalte hain।

geet:- aaj andhere mein hai insaan…

om shanti। bachche jaante hain ki behad ka baap jisko heavenly god father kaha jaata hai woh sabka baap hai। woh bachchon ko sammukh baith samjhaate hain। baap to sabhi bachchon ko in naynon se dekhte hain। unko bachchon ko dekhne ke liye divya drishti ki darkaar nahin। baap jaante hain paramdham se bachchon ke paas aaya hua hoon। yeh bachche bhi yahaan dehdhaari ban part baja rahe hain, in bachchon ko sammukh baith padhaata hoon। bachche bhi jaante hain behad ka baap jo svarga ki sthaapna karne vaala hai, woh phir se hamko bhakti maarga ke dhakkon se chhudaae hamaari jyot jaga rahe hain। sabhi centres ke bachche samajhte hain ki ab ham eeshvareey kul ke va brahman kul ke hain। srishti ka rachta kaha jaata hai parampita paramatma ko। srishti kaise rachi jaati hai, woh baap baith samjhaate hain। bachche jaante hain maat-pita bigar kabhi manushya srishti rachi nahin ja sakti। aise nahin kahenge ki pita dvaara srishti rachi jaati hai, nahin। gaaya hi jaata hai tum maat-pita... yeh maat-pita srishti rachkar phir unhon ko laayak banaate hain। yeh badi khoobi hai। aise to nahin oopar se devtaayen aakar dharma sthaapan karenge। jaise Christ Christian dharma ki sthaapna karte hain। to Christ ko bhi Christian log father kehte hain। agar father hai to mother bhi zaroor chaahiye। unhonne mother rakha hai “meri'' ko। ab meri kaun thi? Christ ki nai aatma ne aakar tan mein pravesh kiya to jismen pravesh kiya, uske mukh se praja rachi। woh ho gaye Christian। yeh bhi samjhaaya gaya hai ki nai aatma jo oopar se aati hai, unka aisa koi karma nahin hai jo duhkh bhoge। pavitra aatma aati hai। jaise parampita paramatma kabhi duhkh nahin bhog sakta। duhkh athva gaali aadi sab is saakaar ko dete hain। to Christ ko bhi jab cross par chadhaaya to zaroor jis tan mein Christ ki aatma ne pravesh kiya usne hi yeh duhkh sahan kiya। Christ ki pure soul to duhkh nahin sahan kar sakti। to Christ hua father। maa kahaan se laaven! phir meri ko mother bana diya hai। dikhaate hain meri kumaari thi unse Christ paida hua। yeh sab shaastron se uthaaya hai। dikhaaya hai na kunti kanya thi unse karna paida hua। ab yeh divya drishti ki baat hai। parantu unhonne phir kaapi kiya hai। to jaise yeh brahma mother hai। mukh dvaara bachche paida kar phir sambhaalne ke liye mama ko diya। to Christ ka bhi aise hai। Christ ne pravesh kar dharma ki sthaapna ki। unko kahenge Christ ki mukh vanshaavli bhaai aur behen। Christian ka prajaapita ho gaya Christ। jismen pravesh kar bachche paida kiye woh ho gai maata। phir sambhaalne liye diya meri ko, unhon ne meri ko mother samajh liya hai। yahaan to baap kehte hain main inmen pravesh kar mukh santaan rachta hoon। to usmein yeh mama bhi mukh santaan thahri। yeh hain detail mein samajhne ki baaten।

doosri baat - baap samjhaate hain aaj ek party aabu mein aane vaali hai - vegetarian ka prachaar karne। to unko samjhaana hai behad ka baap ab devi-devta dharma ki sthaapna kar rahe hain jo pakke vegetarian the। aur koi bhi dharma itna vegetarian hota nahin hai। ab yeh sunaayenge ki vaishnav banne mein kitne phaayde hain। parantu sab to ban nahin sakte kyonki bahut hire hue hain। (aadat padi hui hai) chhodna bada mushkil hai। parantu is par samjhaana hai ki behad ke baap ne jo heaven sthaapan kiya hai, usmein sabhi vaishnav arthaat vishnu ki vanshaavli the। devtaayen bilkul viceless the। aajkal ke vegetarian to vicious hain। Christ se 3 hajaar varsha pahle bhaarat heaven tha। to aise-aise samjhaana hai। tum bachchon ke bigar aisa koi manushya nahin jisko maaloom ho ki svarga kya cheez hai? kab sthaapan hua? vahaan kaun raajya karte hain? lakshmi-naaraayan ke mandir mein bhal jaate hain। baba bhi jaate the parantu yeh nahin jaante ki svarga mein inhon ki raajdhaani hoti hai। sirf mahima gaate hain parantu unhon ko kisne raajya diya, kuchh bhi pata nahin। ab tak bahut mandir banaate hain kyonki samajhte hain lakshmi ne dhan diya hai isliye deepmaala par vyaapaari log lakshmi ki pooja karte hain। in mandir banaane vaalon ko bhi samjhaana chaahiye। jaise foreigners aate hain to unko bhaarat ki mahima bataani chaahiye ki Christ se 3 hajaar varsha pahle bhaarat aisa vegetarian tha, aisa koi ho nahin sakta। unmein bahut taakat thi। god goddess ka raajya kaha jaata hai। ab vahi raajya phir se sthaapan ho raha hai। yeh vahi samay hai। shankar dvaara vinaash bhi gaaya hua hai, phir vishnu ka raajya hoga। baap dvaara svarga ka varsa lena ho to aakar le sakte ho। ramesh usha donon ko service ka bahut shauk hai। yeh wonderful joda hai, bahut serviceable hai। dekho naye-naye aate hain to puraanon se bhi teekhe chale jaate hain। baba yuktiyaan bahut bataate hain, parantu koi na koi vikaar ka nasha hai to maaya uchhalne nahin deti hai। koi mein kaam ka thoda ansh hai, krodh to bahuton mein hai। paripoorna koi bana nahin hai। ban rahe hain। maaya bhi andar kaatti rehti hai। jab se raavan raajya aarambha hua hai tab se in choohon ne kutarna (kaatna) shuru kiya hai। ab to bhaarat bilkul hi kangaal ho gaya hai। maaya ne sabko pattharbuddhi bana diya hai। achhe-achhe bachchon ko bhi maaya aise gherti hai jo unhon ko pata nahin padta ki hamaara kadam peechhe kaise ja raha hai। phir sanjeevni booti sunghaakar hosh mein laate hain। krodh bhi duhkhadaai hai। apne ko bhi duhkhi karta, doosron ko bhi duhkhi karta hai। koi mein gupta hai, koi mein pratyaksha। kitna bhi samjhaao, samajhte nahin hain। abhi apne ko bahut hoshiyaar samajhte hain। peechhe bahut pachhtaana padega। kalpa-kalpa ka daag lag jaayega। shreemat par chale to phaayda bhi bahut hai। nahin to ghaata bhi bahut hai। mat donon ki mashhoor hai। shreemat aur brahma ki mat। kehte hain brahma bhi utar aaye to bhi yeh nahin maanega... shreekrishna ka naam nahin lete hain। ab to parampita paramatma khud mat dete hain। brahma ko bhi unse hi mat milti hai। baap ka bachchon par bahut pyaar hota hai। bachchon ko sirkulhe chadhaate hain। baap ki em rehti hai ki bachcha oonch chadhe to kul ka naam niklega। parantu bachcha na baap ki maanen, na daada ki maanen to goya badi maa ki bhi nahin maana। uska kya haal hoga! baat mat poochho। baaki serviceable bachche to baapdaada ki dil par chadhte hain। to unki baba khud mahima karte hain। to unhon ko samjhaana hai ki isi bhaarat mein vishnu ke gharaane ka raajya tha jo phir sthaapan ho raha hai। ab baba phir usi bhaarat ko vishnupuri bana rahe hain।

tumko bahut nasha hona chaahiye। woh log to muphta apna naam nikaalne ke liye maatha maar rahe hain। kharcha to government se mil jaata hai। sanyaasiyon ko to bahut paise milte hain। abhi bhi kehte hain bhaarat ka praacheen yog sikhlaane jaate hain to jhat paise denge। baba ko to kisi ke paise ki darkaar nahin। yeh khud saari duniya ko madad karne vaala bhola bhandaari hai, madad milti hai bachchon ki। himmate bachche madde baap। jab koi baahar se aate hain to hire hue hain, samajhte hain aashram hai kuchh deven। parantu tumko bolna hai kyon dete ho? gyaan to kuchh suna nahin hai। kuchh pata nahin। ham beej bote hain svarga mein phal milna hai, yeh pata bhi tab ho jab gyaan sunen। aise aane vaale karodon aayenge। yeh achha hai jo baba gupta roop mein aaya hai। shreekrishna ke roop mein aata to reti muaaphik ikatthe ho jaate, ekdam chatak padte, koi ghar mein baith na sake। tum eeshvareey santaan ho। yeh bhoolo mat। baap ki to dil mein rehta hai ki bachche poora varsa leven। svarga mein to dher aayenge parantu himmat kar oonch pad paayen, woh koton mein koi niklega। achha!

maat-pita baapdaada ka meethe-meethe sikeeldhe bachchon prati yaadapyaar aur good morning। roohaani baap ki roohaani bachchon ko namaste।

raatri class 15-6-68

past jo ho gaya hai unko rivaaeej karne se jinki kamzor dil hai to unhon ke dil ki kamzori bhi rivaaeej ho jaati hai isliye bachchon ko drama ke patte par thahraaya gaya hai। mukhya phaayda hai hi yaad se। yaad se hi aayu badi honi hai। drama ko bachche samajh jaayen to kab khyaal na ho। drama mein is samay gyaan seekhne aur sikhaane ka chal raha hai। phir part banda ho jaayega। na baap ka, na hamaara part rahega। na unka dene ka part, na hamaara lene ka part hoga। to ek ho jaayenge na। hamaara part nai duniya mein ho jaayega। baba ka part shantidham mein hoga। part ka reel bhara hua hai na hamaara praarabdha ka part, baba ka shantidham ka part। dene aur lene ka part poora hua, drama hi poora hua। phir ham raajya karne aayenge, woh part change hoga। gyaan stop ho jaayega। ham woh ban jaayenge। part hi poora to baaki pharka nahin rahega। bachchon ke saath baap ka bhi part nahin rahega। bachche gyaan ko poora le lete hain। to unke paas kuchh rehta hi nahin hai। na dene vaale ke paas rehta, na lene vaale mein kami rehti to donon ek do ke samaan ho gaye। ismen vichaar saagar manthan karne ki buddhi chaahiye। khaas purushaartha hai yaad ki yaatra ka। baap baith samjhaate hain। sunaane mein to moti baat ho jaati hai, buddhi mein to sookshm hai na। andar mein jaante hain shiv baba ka roop kya hai। samjhaane mein mota roop ho jaata hai। bhakti maarga mein bada ling bana dete hain। aatma hai to chhoti na। yeh hai kudrat। kahaan tak ant paayenge? phir pichhaadi mein beanta kah dete। baba ne samjhaaya hai saara part aatma mein bhara hua hai। yeh kudtar hai। ant nahin paaya ja sakta। srishti chakra ka ant to paate hain। rachayita aur rachna ke aadi madhya ant ko tum hi jaante ho। baba knowledgeful hai। phir bhi ham full ban jaayenge, paane ke liye kuchh rahega nahin। baap ismen pravesh kar padhaate hain। woh hai bindi। aatma ka va paramatma ka saakshaatkaar hone se khushi thode hi hoti hai। mehnat kar baap ko yaad karna hai to vikarma vinaash honge। baap kehte hain mere mein gyaan banda ho jaayega to tere mein bhi banda ho jaayega। knowledge le oonch ban jaate hain। sabhi kuchh le lete hain phir bhi baap to baap hai na। tum aatmaayen aatma hi rahenge, baap hokar to nahin rahenge। yeh to gyaan hai। baap baap hai, bachche bachche hain। yeh sabhi vichaar saagar manthan kar deep mein jaane ki baaten hain। yeh bhi jaante hain jaana to sabhi ko hai। sabhi chale jaane vaale hain। baaki aatma jaakar rahegi। saari duniya hi khatma honi hai, ismen nidar rehna hota hai। purushaartha karna hai nidar ho rahne ka। shareer aadi ka koi bhi bhaan na aaye, usi avastha mein jaana hai। baap aap samaan banaate hain, tum bachche bhi aap samaan banaate rehte ho। ek baap ki hi yaad rahe aisa purushaartha karna hai। abhi time pada hai। yeh rehearsal teekhi karni pade। practice nahin hogi to khade ho jaayenge। taange thirakne lag padengi aur heartfail achaanak hota rahega। tamopradhaan shareer ko heartfail hone mein deri thode hi lagti hai। jitna ashareeri hote jaayenge, baap ko yaad karte rahenge to nazdeek aate jaayenge। yog vaale hi nidar rahenge। yog se shakti milti hai। gyaan se dhan milta hai। bachchon ko chaahiye shakti। to shakti paane liye baap ko yaad karte raho। baba hai avinaashi surgeon। woh kab patient ban na sake। abhi baap kehte hain tum apni avinaashi davaai karte raho। ham aisi sanjeevni booti dete hain jo kab koi beemaar na pade। sirf patit-paavan baap ko yaad karte raho to paavan ban jaayenge। devtaayen sadaiv nirogi paavan hain na। bachchon ko yeh to nishchay ho gaya hai ham kalpa kalpa varsa lete hain। anginat baar baap aaya hai, jaise abhi aaya hai। baba jo sikhlaate, samjhaate hain yahi raajayog hai। woh geeta aadi sabhi bhakti maarga ke hain। yeh gyaan maarga baap hi bataate hain। baap hi aakar neeche se oopar uthaate hain। jo pakke nishchay buddhi hain vahi maala ka daana bante hain। bachche samajhte hain bhakti karte karte ham neeche girte aaye hain। abhi baap aakar sachchi kamaai karaate hain। laukik baap itni kamaai nahin karaate jitni paarlaukik baap karaate hain। achha - bachchon ko goodnight aur namaste।

dhaarna ke liye mukhya saar:-

1) serviceable banne ke liye vikaaron ke ansh ko bhi samaapta karna hai। service ke prati uchhalte rehna hai।

2) ham eeshvareey santaan hain, shreemat par bhaarat ko vishnupuri bana rahe hain, jahaan sab pakke vaishnav honge... is nashe mein rehna hai।

vardaan:- duhkh ke chakkaron se sada mukta rahne aur sabko mukta karne vaale svadarshan chakradhaari bhav

jo bachche karmendriyon ke vash hokar kehte hain ki aaj aankh ne, mukh ne va drishti ne dhokha de diya, to dhokha khaana arthaat duhkh ki anubhooti hona। duniya vaale kehte hain - chaahte nahin the lekin chakkar mein aa gaye। lekin jo svadarshan chakradhaari bachche hain woh kabhi kisi dhokhe ke chakkar mein nahin aa sakte। woh to duhkh ke chakkaron se mukta rahne aur sabko mukta karne vaale, maalik ban sarva karmendriyon se karma karaane vaale hain।

slogan:- akaal takhtansheen ban apni shreshtha shaan mein raho to kabhi pareshaan nahin honge।