Murli du jour du lundi 6 février 2023

06-02-2023 praatahmurli om shanti "baapdaada"' madhuban

“meethe bachche - tum brahman abhi bahut oonchi yaatra par ja rahe ho, isliye tumhein double engine mili hai, do behad ke baap hain to do maa bhi hain''

prashn:- sangamayug par kaun sa title tum bachche apne oopar nahin rakhva sakte?

uttar:- his holiness va har holiness ka title tum bi.ke. apne par nahin rakhva sakte ya likh sakte kyonki tumhaari aatma bhal pavitra ban rahi hai lekin shareer to tamopradhaan tatvon se bane hue hain। yeh badaai abhi tumhein nahin leni hai। tum abhi purushaarthi ho।

geet:- yeh kahaani hai deeve aur toofaan ki…

om shanti। behad ka baap bachchon ko baith samjhaate hain। yeh to bachche samajh gaye hain ki behad ke do baap hain to maa bhi zaroor do hongi। ek jagdamba, doosri yeh brahma bhi maata thahri। donon baith samjhaate hain to tumko jaise double engine mil gai। pahaadi par jab gaadi jaati hai to double engine lagaate hain na! ab tum brahman bhi oonchi yaatra par ja rahe ho। tum jaante ho abhi ghor andhiyaara hai। jab ant ka samay aata hai, to bahut haahaakaar hota hai। duniya badalti hai to aise hota hai। jab raajaai badli hoti hai to bhi ladaai maaraamaari hoti hai। bachche jaante hain ki ab nai raajdhaani sthaapan ho rahi hai। ghor andhiyaare se phir ghor sojhra ho raha hai। tum is saare chakra ki history-geography ko jaante ho to tumko phir auron ko bhi samjhaana hai। bahut maataayen athva bachchiyaan hain jo school mein padhaati hain woh bhi bachchon ko baith agar behad ki history-geography samjhaayen to ismen koi government naaraaz nahin hogi। unhon ke badon ko bhi samjhaana chaahiye to aur hi khush honge। unhon ko samjhaana chaahiye ki jab tak is behad ki history-geography ko nahin samjha hai tab tak bachchon ka kalyaan nahin ho sakta। duniya mein jayjaykaar nahin ho sakti। bachchon ko service karne ka ishaara diya jaata hai। teacher hai to apne college mein agar yeh world ki history-geography baith samjhaaye to bachche trikaaldarshi ban sakte hain। aur trikaaldarshi banne se chakravarti bhi ban sakte hain। jaise baap ne tumko trikaaldarshi, svadarshan chakradhaari banaaya hai to tumko phir auron ko aap samaan banaana hai, auron ko samjhaana hai ki ab yeh puraani duniya badal rahi hai। tamopradhaan duniya badal satopradhaan ban rahi hai। satopradhaan banaane vaala ek hi parampita paramatma hai jo sahaj raajayog aur svadarshan chakra ka gyaan dete hain। chakra ko samjhaana to bada sahaj hai। agar yeh chakra saamne rakha jaae to bhi manushya aakar samajh saken ki satayug mein kaun-kaun raajya karte the। phir dvaapar se kaise anek dharmon ki vriddhi hoti hai। aisa achhi reeti samjhaaya jaae to buddhi ke kapaat zaroor khulenge। yeh chakra saamne rakh tum achhi reeti samjha sakte ho। topic bhi rakh sakte ho। aao to ham tumko trikaaldarshi banne ka raasta bataayen, jisse tum raajaaon ka raaja ban sakte ho। tum brahman hi is chakra ko jaante ho tab to chakravarti raaja bante ho। parantu banenge woh jo is chakra ko buddhi mein phiraate rahenge। baap to hai hi gyaan ka saagar, woh baith bachchon ko srishti ke aadi madhya ant ka gyaan sunaate hain। aur manushya to kuchh bhi nahin jaante। eeshvar sarvavyaapi kahne se gyaan ki baat hi nahin uthti। eeshvar ko jaanne ka bhi koi purushaartha nahin kar sakte hain phir to bhakti bhi chal na sake। parantu jo kuchh kehte hain woh kuchh samajhte nahin। kachche samjha bhi nahin sakenge ki sarvavyaapi kaise nahin hai। koi ek ne kah diya bas sabhi ne maan liya। jaise koi ne aadi dev ko mahaaveer kaha to woh naam chala diya। jisne jo naam besamjhi se rakha woh chala aata hai। ab baap baith samjhaate hain ki tum manushya hokar drama ke rachayita aur rachna ko nahin jaante ho, devtaaon ki pooja karte ho parantu unhon ki biography ko nahin jaante ho to isko blind faith kaha jaata hai। itne devi-devta raajya karke gaye hain to zaroor woh samajhdaar the tab to poojya bane। ab tum brahma mukh vanshaavli yeh gyaan sunkar samajhdaar bante ho। baaki to saari duniya ko raavan ne jel mein daal rakha hai। yeh hai raavan ka jel jismen sabhi shok vaatika mein pade hain। conference karte rehte hain ki shanti kaise ho? to zaroor ashaanti duhkh hai, goya sabhi shok vaatika mein baithe hain। abhi shok vaatika se ashok vaatika mein koi phat se nahin jaata hai। is samay koi bhi shanti va sukh ki vaatika mein nahin hain। ashok vaatika kahenge satayug ko, yeh to sangamayug hai tumko koi sampoorn pavitra kah na sake। his holiness koi bi.ke. apne ko kahla nahin sakte va likhva nahin sakte। his holiness va har holiness satayug mein hote hain। kaliyug mein kahaan se aaye! bhal aatma yahaan pavitra banti hai parantu shareer bhi to pavitra chaahiye tab his holiness kah sakte, isliye badaai leni nahin chaahiye। abhi tum purushaarthi ho। baap kehte hain shri shri va his holiness sannyaasiyon ko bhi kah nahin sakte। bhal aatma pavitra banti hai parantu shareer pavitra kahaan hai? to adhoore hue na। is patit duniya mein his va har holiness koi ho nahin sakta। woh samajhte hain aatma paramatma sadaiv shuddh hai parantu shareer bhi shuddh chaahiye। haan, lakshmi-naaraayan ko kah sakte hain kyonki vahaan shareer bhi satopradhaan tatvon se bante hain। yahaan tatva bhi tamopradhaan hain। is samay kisi ko bhi sampoorn paavan nahin kahenge। aise pavitra to chhote bachche bhi hote hain। devtaaen sampoorn nirvikaari the।

to baap baith samjhaate hain tum kitne samajhdaar ban rahe ho। tumko chakra ka bhi poora-poora gyaan hai। parampita paramatma jo is chaitanya jhaad ka beej hai, unko saare jhaad ki knowledge hai, vahi tumko knowledge suna rahe hain। is srishti chakra ke gyaan par tum koi ko bhi prabhaavit kar sakte ho। samjhaana chaahiye - tum paramdham se aakar yahaan chola dhaaran kar act kar rahe ho। abhi ant mein sabhi ko vaapis jaana hai phir aakar apna part bajaana hai। yahaan abhi jo purushaartha karega woh aise hi raaje rajvaade va dhanvaan ke paas janma lega। sabhi nambarvaar pad paate hain। nambarvaar transfer hote jaayenge। yeh bhi dikhaaya hua hai - jahaan jeet vahaan janma... abhi in baaton ko uthaaya nahin jaata hai। aage chalkar roshni milti jaayegi, itna to hai abhi jo shareer chhodte hain unko zaroor achhe ghar mein janma milega। jo bachche jaasti purushaartha karte hain unko khushi bhi jaasti chadhti hai। jo service mein tatpar rehte hain unhon ko nasha rehta hai। tumhaare sivaae to sab andhakaar mein hain। ganga snaan aadi karne se to koi ke paap nahin dhul sakte hain। yog agni se hi paap bhasma hote hain। is raavan ki jel se chhudaane vaala ek baap hi hai tab to gaate hain patit-paavan.. parantu apne ko paap aatma samajhte nahin hain। baap kehte hain kalpa pahle bhi inhon ka tum kanyaaon dvaara hi uddhaar karaaya tha। geeta mein bhi likha hua hai parantu koi samajhte nahin hain। tum samjha sakte ho - is patit duniya mein koi bhi paavan nahin hai। parantu samjhaane mein bhi badi himmat chaahiye। tum jaante ho ab duniya badal rahi hai। tum ab eeshvar ki santaan bane ho। yeh brahman kul hai sabse oonch। tumko svadarshan chakra ka gyaan hai। phir jab vishnu ke kul mein jaayenge to tumko yeh gyaan nahin hoga। abhi gyaan hai isliye tumhaara naam rakha hai svadarshan chakradhaari। is guhya baaton ko tumhaare bigar koi nahin jaante। kahne maatra to sab kah dete hain ki eeshvar ki sab santaan hain parantu practical mein tum abhi bane ho। achha!

sabhi meethe-meethe bachchon ko yaadapyaar good morning। baap ka pharja hai bachchon ko yaad karna aur bachchon ka pharja hai baap ko yaad karna। parantu bachche itna yaad nahin karte, agar yaad karte hain to aho saubhaagya। achha-meethe-meethe roohaani bachchon ko roohaani baap ki namaste।

raatri class - 8-4-68

yeh eeshvareey mission chal rahi hai। jo apne devi-devta dharma ke honge vahi aa jaayenge। jaise unhon ki mission hai Christian banaane ki। jo Christian bante hain unko Christian dynasty mein sukh milta hai। vetan achha milta hai, isliye Christian bahut ho gaye hain। bhaaratvaasi itna vetan aadi nahin de sakte। yahaan corruption bahut hai। beech mein rishvat na len to naukri se hi javaab। bachche baap se poochhte hain is haalat mein kya karen? kahenge yukti se kaam karo phir shubh kaarya mein laga dena।

yahaan sabhi baap ko pukaarte hain ki aakar ham patiton ko paavan banaao, liberate karo, ghar le jaao। baap zaroor ghar le jaayenge na। ghar jaane liye hi itni bhakti aadi karte hain। parantu jab baap aaye tab hi le jaaye। bhagwan hai hi ek। aise nahin sabhi mein bhagwan aakar bolte hain। unka aana hi sangam par hota hai। abhi tum aisi-aisi baaten nahin maanenge। aage maante the। abhi tum bhakti nahin karte ho। tum kehte ho ham pahle pooja karte the। ab baap aaya hai hamko poojya devta banaane liye। sikkhon ko bhi tum samjhaao। gaayan hai na manushya se devta....। devtaaon ki mahima hai na। devtaayen rehte hi hain satayug mein। abhi hai kaliyug। baap bhi sangamayug par purushottam banne ki shiksha dete hain। devtaayen hain sabhi se uttam, tab to itna poojte hain। jiski pooja karte hain woh zaroor kabhi the, abhi nahin hain। samajhte hain yeh raajdhaani past ho gai hai। abhi tum ho gupta। koi jaante thode hi hain ki ham vishwa ke maalik banne vaale hain। tum jaante ho ham padhkar yeh bante hain। to padhaai par poora attention dena hai। baap ko bahut pyaar se yaad karna hai। baba hamko vishwa ka maalik banaate hain to kyon nahin yaad karenge। phir daiveegun bhi chaahiye।

doosra - raatri class 9-4-68

aajkal bahut karke yahi conference karte rehte hain ki vishwa mein shanti kaise ho! unhon ko bataana chaahiye dekho satayug mein ek hi dharma, ek hi raajya, advait dharma tha। doosra koi dharma hi nahin jo taali baje। tha hi raamraajya, tab hi vishwa mein shanti thi। tum chaahte ho vishwa mein shanti ho। woh to satayug mein thi। peechhe anek dharma hone se ashaanti hui hai। parantu jab tak koi samjhe tab tak maatha maarna padta hai। aage chalkar akhbaaron mein bhi padega, phir in sannyaasiyon aadi ke bhi kaan khulenge। yeh to tum bachchon ki khaatiri hai ki hamaari raajdhaani sthaapan ho rahi hai। yahi nasha hai। museum ka bhabhka dekh bahut aayenge। andar aakar wonder khaayenge। naye naye chitron par nai nai samjhaani sunenge।

yeh to bachchon ko maaloom hai - yog hai mukti jeevanmukti ke liye। so to manushya maatra koi sikhla na sake। yeh bhi likhna hai sivaay parampita paramatma ke koi bhi mukti-jeevanmukti ke liye yog sikhla nahin sakte। sarva ka sadgati daata hai hi ek। yeh clear likh dena chaahiye, jo bhal manushya padhen। sannyaasi log kya sikhaate honge। yog-yog jo karte hain, vaastav mein yog koi bhi sikhla nahin sakte hain। mahima hai hi ek ki। vishwa mein shanti sthaapan karna va mukti jeevanmukti dena baap ka hi kaam hai। aise-aise vichaar saagar manthan kar points samjhaani hai। aisa likhna chaahiye jo manushyon ko baat theek janch jaaye। is duniya ko to badalna hi hai। yeh hai mrityulok। nai duniya ko kaha jaata hai amarlok। amarlok mein manushya kaise amar rehte hain, yeh bhi wonder hai na। vahaan aayu bhi badi rehti hai aur samay par aape hi shareer badli kar dete hain, jaise kapda change kiya jaata hai। yeh sabhi samjhaane ki baate hain। achha!

meethe-meethe roohaani bachchon ko roohaani baap va daada ka yaad pyaar, goodnight aur namaste।

dhaarna ke liye mukhya saar:-

1) srishti chakra ke gyaan se svayan bhi trikaaldarshi aur svadarshan chakradhaari banna hai aur doosron ko bhi banaane ki seva karni hai।

2) sangam par shok vaatika se nikal sukh shanti ki vaatika mein chalne ke liye pavitra zaroor banna hai।

vardaan:- gyaan ko ramneekta se simran kar aage badhne vaale sada harshit, khushanseeb bhav

yeh sirf aatma, paramatma ka sookha gyaan nahin hai। bahut ramneek gyaan hai, sirf roz apna naya-naya title yaad rakho - main aatma to hoon lekin kaun si aatma hoon, kabhi artist ki aatma hoon, kabhi businessman ki aatma hoon... aise ramneekta se aage badhte raho। jaise baap bhi ramneek hai dekho kabhi dhobi ban jaata to kabhi vishwa ka rachayita, kabhi obedient servant...to jaisa baap vaise bachche....aise hi is ramneek gyaan ka simran kar harshit raho, tab kahenge khushanseeb।

slogan:- sachche sevaadhaari woh hain jinki har nas arthaat sankalp mein seva ke umang-utsaah ka khoon bhara hua hai।