Murli du jour du dimanche 5 février 2023

05-02-23 praatahmurli om shanti ''avyakt-baapdaada'' revise 09-12-93 madhuban

ekaagrata ki shakti se dridhta dvaara sahaj saphalta ki praapti

aaj brahman sansaar ke rachta apne chaaron or ke brahman parivaar ko dekh harshit ho rahe hain। ye chhota-sa nyaara aur ati pyaara alaukik brahman sansaar hai। saare drama mein ati shreshtha sansaar hai kyonki brahman sansaar ki har gati-vidhi nyaari aur vishesh hai। is brahman sansaar mein brahman aatmaayen bhi vishwa mein se vishesh aatmaayen hain isliye hi ye vishesh aatmaon ka sansaar hai। har brahman aatma ki shreshtha vritti, shreshtha drishti aur shreshtha kriti vishwa ki sarva aatmaon ke liye shreshtha banaane ke nimitta hai। har aatma ke oopar ye vishesh jimmevaari hai to har ek apne is zimmevaari ko anubhav karte ho? kitni badi jimmevaari hai! saare vishwa ka parivartan! na sirpha aatmaon ka parivartan karte ho lekin prakriti ka bhi parivartan karte ho। ye smriti sada rahe ismen nambarvaar hain। sabhi brahman aatmaon ke andar sankalp sada rehta hai ki ham vishesh aatma number one banen lekin sankalp aur karma mein antar pad jaata hai। iska kaaran? karma ke samay sada apni smriti ko anubhvi sthiti mein nahin laate। sunna, jaanna, ye donon yaad rehta hai lekin svayan ko us sthiti mein maankar chalna, ismen majority kabhi anubhvi aur kabhi sirpha maanne aur jaanne vaale ban jaate hain। is anubhav ko badhaane ke liye do baaton ke vishesh mahatva ko jaano। ek svayan ke mahatva ko, doosra samay ke mahatva ko। svayan ke prati bahut jaante ho। agar kisi se bhi poochhenge ki aap kaun-si aatma ho? va apne se bhi poochhenge ki main kaun? to kitni baaten smriti mein aayengi? ek minute ke andar apne kitne svamaan yaad aa jaate hain? ek minute mein kitne yaad aate hain? bahut yaad aate hain na। kitni lambi list hai svayan ke mahatva ki! to jaanne mein to bahut hoshiyaar ho। sabhi hoshiyaar ho na? phir anubhav karne mein antar kyon pad jaata hai? kyonki samay par us sthiti ke seat par set nahin hote ho। agar seat par set hai to koi bhi, chaahe kamjor sanskaar, chaahe koi aatmaayen, chaahe prakriti, chaahe kisi bhi prakaar ki royal maaya upset nahin kar sakti। jaise shareer ke roop mein bhi bahut aatmaon ko ek seat par va sthaan par ekaagra hokar baithne ka abhyaas nahin hota to woh kya karega? hilta rahega na। aise man aur buddhi ko kisi bhi anubhav ke seat par set hona nahin aata to abhi-abhi set hoga, abhi-abhi upset। shareer ko bithaane ke liye sthool sthaan hota hai aur man-buddhi ko bithaane ke liye shreshtha sthitiyon ka sthaan hai। to baapdaada bachchon ka yeh khel dekhte rehte hain abhi-abhi achhi sthiti ke anubhav mein sthit hote hain aur abhi-abhi apne sthiti se halchal mein aa jaate hain। jaise chhote bachche chanchal hote hain to ek sthaan par jyaada samay tik nahin sakte। to kai bachche yeh bachpan ke khel bahut karte hain। abhi-abhi dekhenge bahut ekaagra aur abhi-abhi ekaagrata ke bajaay bhinna-bhinna sthitiyon mein bhatakte rahenge। to is samay vishesh attention chaahiye man aur buddhi sada ekaagra rahe।

ekaagrata ki shakti sahaj nirvighna bana deti hai। mehnat karne ki aavashyakta hi nahin hai। ekaagrata ki shakti svatah ‘ek baap doosra na koi' ye anubhooti sada karaati hai। ekaagrata ki shakti sahaj ekras sthiti banaati hai। ekaagrata ki shakti sada sarva prati ek hi kalyaan ki vritti sahaj banaati hai। ekaagrata ki shakti sarva prati bhaai-bhaai ki drishti svatah bana deti hai। ekaagrata ki shakti har aatma ke sambandh mein sneh, sammaan, svamaan ke karma sahaj anubhav karaati hai। to abhi kya karna hai? kya attention dena hai? ‘ekaagrata'। sthit hote ho, anubhav bhi karte ho lekin ekaagra anubhvi nahin hote। kabhi shreshtha anubhav mein, kabhi madhyam, kabhi saadhaaran, teenon mein chakkar lagaate rehte ho। itna samartha bano jo man-buddhi sada aapke order anusaar chale। svapna mein bhi second maatra bhi halchal mein nahin aaye। man, maalik ko parvash nahin banaaye।

parvash aatma ki nishaani hai - us aatma ko utna samay sukh, chain, aananda ki anubhooti chaahte hue bhi nahin hogi। brahman aatma kabhi kisi ke parvash nahin ho sakti, apne kamjor svabhaav aur sanskaar ke vash bhi nahin। vaastav mein ‘svabhaav' shabd ka arth hai ‘sva ka bhaav'। sva ka bhaav to achha hota hai, kharaab nahin hota। ‘sva' kahne se kya yaad aata hai? aatmik swaroop yaad aata hai na। to svabhaav arthaat sva prati va sarva prati aatmik bhaav ho। jab bhi kamjori vash sochte ho ki mera svabhaav va mera sanskaar hi aisa hai, kya karun, hai hi aisa… yeh kaun-si aatma bolti hai? yeh shabd va sankalp parvash aatma ke hain। to jab bhi yeh sankalp aaye ki svabhaav aisa hai, to shreshtha arth mein tik jaao। sanskaar saamne aaye ki mera sanskaar..., to socho kya mujh vishesh aatma ke yeh sanskaar hain, jisko mera sanskaar kah rahe ho? mera kehte ho to kamjor sanskaar bhi meraapan ke kaaran chhodte nahin hain kyonki yeh niyam hai jahaan meraapan hota hai vahaan apnaapan hota hai aur jahaan apnaapan hota hai vahaan adhikaar hota hai। to kamjor sanskaar ko mera bana liya to vo apna adhikaar chhodte nahin hain isliye parvash hokar baap ke aage arji daalte rehte ho ki chhudaao-chhudaao। ‘sanskaar' shabd kehte yaad karo ki anaadi sanskaar, aadi sanskaar hi mera sanskaar hai। ye maaya ke sanskaar hain, mere nahin। to ekaagrata ki shakti se parvash sthiti ko parivartan kar maalikpan ki sthiti ki seat par set ho jaao।

yog mein bhi baithte hain, baithte to sabhi ruchi se hain lekin jitna samay, jis sthiti mein sthit hona chaahte hain, utna samay ekaagra sthiti rahe, uski aavashyakta hai। to kya karna hai? kis baat ko underline karenge? (ekaagrata) ekaagrata mein hi dridhta hoti hai aur jahaan dridhta hai vahaan saphalta gale ka haar hai। achha!

chaaron or ke alaukik brahman sansaar ki vishesh aatmaon ko, sada shreshtha sthiti ke anubhav ki seat par set rahne vaali aatmaon ko, sada svayan ke mahatva ko anubhav karne vaale, sada ekaagrata ki shakti se man-buddhi ko ekaagra karne vaale, sada ekaagrata ke shakti se hi dridhta dvaara sahaj saphalta praapta karne vaale sarvashreshtha, sarva vishesh, sarva snehi aatmaon ko baapdaada ka yaad-pyaar aur namaste।

avyakt baapdaada ki personal mulaakaat - udti kala mein jaane ke liye double light bano, koi bhi aakarshan aakarshit na kare

sabhi apne ko vartamaan samay ke pramaan teevra gati se udne vaale anubhav karte ho? samay ki gati teevra hai va aatmaon ke purushaartha ki gati teevra hai? samay aapke peechhe-peechhe hai ya aap samay ke pramaan chal rahe ho? samay ke intazaar mein to nahin ho na ki ant mein sab theek ho jaayega। sampoorn ho jaayenge, baap samaan ho jaayenge? aise to nahin hai na! kyonki drama ke hisaab se vartamaan samay bahut teevra gati se ja raha hai, ati mein ja raha hai। jo kal tha usse aaj aur ati mein ja raha hai। yeh to jaante ho na? jaise samay ati mein ja raha hai, aise aap shreshtha aatmaayen bhi purushaartha mein ati teevra arthaat faasta gati se ja rahe ho? ki kabhi dheele, kabhi tez? aise nahin ki neeche aakar phir oopar jaao। neeche-oopar hone vaale ki gati kabhi ekras faasta nahin ho sakti। to sada sarva baaton mein shreshtha va teevra gati se udne vaale ho। vaise gaayan hai ‘chadhti kala sarva ka bhala' lekin abhi kya kahenge? ‘udti kala, sarva ka bhala'। abhi chadhti kala ka samay bhi samaapta hua, abhi udti kala ka samay hai। to udti kala ke samay koi chadhti kala se pahunchna chaahe to pahunch sakega? nahin। to sada udti kala ho। udti kala ki nishaani hai sada double light। double light nahin to udti kala ho nahin sakti। thoda bhi bojh neeche le aata hai। jaise plen mein jaate hain, udte hain to agar machinery mein ya petrol mein zara bhi kachra aa gaya to kya haalat hoti hai? udti kala se girti kala mein aa jaata hai। to yahaan bhi agar kisi bhi prakaar ka bojh hai, chaahe apne sanskaaron ka, chaahe vaayumandal ka, chaahe kisi aatma ke sambandh-samparka ka, koi bhi bojh hai to udti kala se halchal mein aa jaata hai। kahenge vaise to main theek hoon lekin ye kaaran hai na iseeliye ye sanskaar ka, vyakti ka, vaayumandal ka bandhan hai। lekin kaaran kaisa bhi ho, kya bhi ho, teevra purushaarthi sabhi baaton ko aise cross karte hain jaise kuchh hai hi nahin। mehnat nahin, manoranjan anubhav karenge। to aisi sthiti ko kaha jaata hai udti kala। to udti kala hai ya kabhi-kabhi neeche aane ka, chakkar lagaane ka dil ho jaata hai। kahin bhi lagaav nahin ho। zara bhi koi aakarshan aakarshit nahin kare। rocket bhi tab ud sakta hai, jab dharti ki aakarshan se pare ho jaaye। nahin to oopar ud nahin sakta। na chaahte bhi neeche aa jaayega। to koi bhi aakarshan oopar nahin le ja sakti। sampoorn banne nahin degi। to check karo sankalp mein bhi koi aakarshan aakarshit nahin kare। sivaae baap ke aur koi aakarshan nahin ho। paandav kya samajhte hain? aise teevra purushaarthi bano। banna to hai hi na। kitne baar aise bane ho? anek baar bane ho। aap hi bane ho ya doosre bane hain? aap hi bane ho। to nambarvaar mein to nahin aana hai na, number one mein aana hai। maataayen kya karengi? number one ya nambarvaar bhi chalega? 108 number bhi chalega? 108 number banenge ki pahla number banenge? agar baap ke bane hain, adhikaari bane hain to poora varsa lena hai ya thoda kam? phir to number one banenge na। daata full de raha hai aur lene vaala kam le to kya kahenge? isliye number one banna hai। number one chaahe ek hi ho lekin number one divizan to bahut hain na। to second mein nahin aana hai। lena hai to poora lena hai। adhoora lene vaale to peechhe-peechhe bahut aayenge। lekin aapko poora lena hai। sabhi poora lene vaale ho ya thode mein raazi hone vaale ho? jab khula bhandaar hai aur akhut hai to kam kyon len? behad hai na, had ho ki 8 hajaar isko milna hai, 10 hajaar isko milna hai to kahenge bhaagya mein itna hi hai, lekin baap ka khula bhandaar hai, akhut hai, jitna lena chaahe le sakte hain phir bhi akhut hai। akhut khazaane ke maalik ho। baalak so maalik ho। to sabhi sada khush rahne vaale ho na ki thoda-thoda kabhi duhkh ki lahar aati hai? duhkh ki lahar svapna mein bhi nahin aa sakti। sankalp to chhodo lekin svapna mein bhi nahin aa sakti। isko kaha jaata hai number one। to kya kamaal karke dikhaayenge? sabhi number one aakar dikhaayenge na?

vaise bhi dilli ko dil kehte hain। to jaisa dil hoga vaisa shareer chalega। aadhaar to dil hota hai na। dil hai dilaaraam ki dil। to dil ki gaddi yathaartha chaahiye na, neeche-oopar nahin chaahiye। to nasha hai na ki ham dilaaraam ka dil hain। to abhi apne shreshtha sankalpon se svayan ko aur vishwa ko parivartan karo। sankalp kiya aur karma hua। aise nahin, socha to bahut tha, sochte to bahut hain, lekin hota bahut kam hai, ve teevra purushaarthi nahin hain। teevra purushaarthi arthaat sankalp aur karma samaan ho tab hi baap samaan kahenge। khush hain aur sada khush rahenge। yeh pakka nishchay hai na। khush rahne vaale hi khushanseeb hain। yeh pakka hai ya thoda-thoda kachcha ho jaata hai? kachchi cheez achhi lagti hai? pakke ko pasanda kiya jaata hai। to poora hi pakka rehna hai।

roz amritvele yeh paath pakka karo ki kuchh bhi ho jaaye khush rehna hai, khush karna hai। achha aur koi khel nahin dikhaana। yahi khel dikhaana, aur-aur khel nahin karna। achha!

vardaan:- bhaagya aur bhaagya vidhaata baap ki smriti mein rah bhaagya baantane vaale phraakdil mahaadaani bhav

bhaagya vidhaata baap aur bhaagya donon hi yaad rahen tab auron ko bhi bhaagyavaan banaane ka umang-utsaah rahega। jaise bhaagyavidhaata baap brahma dvaara bhaagya baantate hain aise aap bhi daata ke bachche ho, bhaagya baantate chalo। ve log kapda baantenge, anaaj baantenge, koi gift denge.. lekin usse koi tripta nahin ho sakte। aap bhaagya baanto to jahaan bhaagya hai vahaan sab praaptiyaan hain। aise bhaagya baantane mein phraakdil, shreshtha mahaadaani bano। sada dete raho।

slogan:- jo eknaami rehte aur economy se chalte hain vahi prabhu priy hain।