Murli du jour du mardi 14 mars 2023

14-03-2023 praatahmurli om shanti "baapdaada"' madhuban

“meethe bachche - shivbaaba alaukik musaaphir hai jo tumhein khoobsoorat (sundar) banaata hai, tum is musaaphir ko yaad karte-karte first-class ban jaate ho''

prashn:- har ek godly students ko sangamayug par kaun sa purushaartha karne ki shreshtha mat milti hai?

uttar:- godly students ko shreemat milti hai ki is samay paavan ban raajaai pad paane ka purushaartha karo। harek apna phikra karo aur doosron ko kaho ki behad ke baap ka varsa lene ke liye is antim janma mein pavitrata ki raakhi baandho, is mrityulok mein vriddhi karna banda karo। baap ka bankar svarga ke laayak bano। baap ki mat par is samay viceless banne se tum 21 janma ke liye viceless ban jaayenge।

geet:- O door ke musaaphir…

om shanti। yeh record to sab sun rahe hain door ke musaaphir hamko bhi saath le chal। tum jaante ho hamaara maat-pita woh hai door ka rahne vaala। yeh maat-pita najdeek ke rahne vaale hain। sab manushya us door ke musaaphir ko yaad karte hain। door ka musaaphir paristaan sthaapan karte hain, jisko svarga, heaven kaha jaata hai। viceless world kaha jaata hai। vahaan duhkh hai hi nahin। he door ke musaaphir - yeh kaun pukaarte hain? agar sabmen paramatma hai to woh to nahin pukaarenge ki he paramatma aao। yeh zaroor hai ki sab door ke musaaphir hain, sabko musaaphiri karni hai vahaan se yahaan aane ki। vaastav mein sab manushyon ki aatmaayen vahaan paramdham mein rahne vaali hain। yahaan aai hain part bajaane। lambi-chaudi musaaphiri hai। parantu aatma pahunchti hai second mein। aeroplane aadi bhi itna jaldi nahin ja sakta। aatma to second mein sookshm vatan, mool vatan ud jaati hai। aatma ek shareer chhod doosre shareer mein jaati hai va jo oopar se nai aatmaayen aati hain, time ek hi lagta hai। nai aatmaayen aati to rehti hain na। vriddhi ko paati rehti hain। aatma jitni teekhi daudi koi laga na sake।

tum jaante ho baap ko bhi musaaphiri karni padti hai। woh ek hi baar aakar bachchon ko saath le jaate hain। bhakta bhi jaante hain bhagwan aakar hamko apne paas le jaayega। yahaan aakar milega, to bhi vaapis le jaane liye। gaate bhi hain - hamko patit se paavan banaane aao। hamko bhi saath le chalo। tum jaante ho jo-jo achhi reeti baap ko yaad karenge vahi najdeek aayenge। wonder hai na। vahi tumhaara baap bhi hai, teacher bhi hai, satguru bhi hai। nahin to baap ko alag, teacher ko alag yaad kiya jaata hai। saari aayu baap bhi yaad rehta hai, teacher bhi yaad rehta hai। aajkal chhotepan se hi guru kara lete to maat-pita, teacher aur phir guru ko yaad karenge। phir jab apni rachna rachte hain to apni stri aur bachchon ko bhi yaad karne lag padte hain। phir maat-pita aadi ki yaad kam hone lagti hai। ab tumko yaad hai, us ek musaaphir ki। aatma pure hai, agar woh naya shareer le to woh bahut first class milega। paramatma kehte hain hamko to naya shareer milta nahin। main aata hoon tumko khoobsoorat banaane ke liye। vaikuntha mein to sab cheezen hoti hi khoobsoorat hain। makaan bhi heere-javaahron se saje hue rehte hain। yeh musaaphir kitna alaukik hai! parantu tum ghadi-ghadi unko bhool jaate ho kyonki tumhaari hai maaya ke saath ladaai। maaya tumko yaad karne nahin deti hai। baap kehte hain tum mujhe kyon nahin yaad karte ho? kehte hain baba kya karen parvash arthaat maaya ke vash ho jaate hain। aapko bhool jaate hain phir woh khushi nahin rehti hai। raaja ke paas janma lete hain to bachche bade khush hote hain। parantu dvaapar ki raajaai mein bhi sukh-duhkh to hota hi hai। koi ne gussa kiya to duhkh hua। aise nahin raajaai mein gussa nahin karte। prince princess ko bhi kabhi gusse mein ulta-sulta kah denge। bachcha laayak nahin hoga to phir takhta par baith nahin sakega। bada bachcha agar laayak nahin hota hai to phir chhote ko bitha dete hain। yahaan baap kehte hain shreemat par chalte raho। main tum bachchon ko 21 janmon ke liye bhaarat ka raaja banaata hoon। yeh bhaarat daivi raajasthaan tha arthaat devi-devtaaon ka raajya tha। yeh sirf tum hi jaante ho jo eeshvareey santaan bane ho brahma dvaara।

tum bachche baap ki poori biography ko jaante ho। baaki koi bhi manushya unki biography ko nahin jaante। ham god father kyon kehte hain, yeh bhi nahin jaante। pukaarte kislie hain? hamko apna varsa do। parantu woh kaise milta hai, yeh to koi jaante nahin। varsa to baap se hi milega। baap hai musaaphir। yeh jo sab haseen (sundar) the, unko maaya ne kaala kaudi tulya bana diya hai। musaaphir aur haseena ki bhi ek kahaani hai। yeh musaaphir kitnon ko haseen banaate hain aur kitna oonch banaate hain! baap hamko svarga ka maalik banaate hain। ham baap ke bane hain, woh hamko bhagwan-bhagavti banaate hain। kehte hain tumhaari aatma chhi-chhi bani hai isliye shareer bhi aise milte hain। ab mujhe yaad karne se aatma ko pavitra banaayenge to shareer bhi naya milega। tum sooryavanshi, chandravanshi mahaaraaja-mahaaraani the, ab maaya ne ganda bana diya hai। mere ko bhi bhula diya hai। yeh bhi khel hai। ab tum jaante ho har ek musaaphir ko paristaan athva svarga ka maalik bana rahe hain। to unki mat par chalna hai। aise nahin baapdaada ko koi bachchon ki mat par chalna hai। nahin, bachchon ko shreemat par chalna hai। baap ko apni mat nahin deni hai। brahma ki mat mashhoor hai। woh hua jagat pita to zaroor jagat maata bhi aise hi hogi। jagdamba ki mat se sabki manokaamnaayen svarga ki poori hoti hain। aise nahin is jagdamba ko bhi kisi manushya ki mat par chalna hai। nahin। manushya to jagdamba, jagatpita ki mat ko jaante nahin। kehte hain brahma bhi utar aaye to bhi tum sudhar na sako। jagdamba ke liye kyon nahin kehte? manushyon ko bilkul pata nahin ki yeh kyon pooje jaate aur yeh kaun hain? yeh abhi tum jaante ho। dekho, mama sab taraph jaati hai mat dene ke liye। ek din government bhi is maat-pita ko jaan jaayegi। parantu pichhaadi mein phir tu-let ho jaayenge। is samay raaja-raani ka raajya to hai nahin। duniya yeh nahin jaanti ki yeh sab drama repeat ho raha hai। aage ham thode hi jaante the ki ham actor hain। karke kehte hain aatma nangi aati hai phir chola dhaaran kar part bajaati hai। parantu drama ke aadi-madhya-ant ko koi nahin jaante ki kaun number one poojya so pujaari bante hain। kuchh bhi nahin jaante।

abhi tum jaante ho yeh musaaphir paramdham ka bada anokha hai, inki mahima aparmaapaar hai। yeh to hai hi patit duniya, jo patit se paavan banenge vahi nai duniya ke maalik banenge। saari duniya to svarga mein nahin chalegi। raajayog koi saari duniya nahin seekhegi। saari duniya paavan honi hai isliye saphaai chaahiye। phir tumko paavan duniya mein aakar raajya karna hai isliye saari duniya ki saphaai ho jaati hai। satayug mein kitni saphaai thi! sone-chaandi ke mahal hote hain। athaah sona hota hai। ek kahaani bhi sunaate hain - sookshm vatan mein sona bahut dekha, kaha - thoda le jaaoon parantu yahaan thode hi le aa sakenge। abhi tum divya drishti se vaikuntha dekhte ho jo ab sthaapan ho raha hai। jiska rachayita baap hai। maalik hai na। maalik dhani ko kaha jaata hai। jab koi nidhanke hote hain to kaha jaata hai inka koi dhani dhoni nahin hai। dhani bigar ladte-jhagadte hain।

ab tum bachche jaante ho ham paramdham se aaye hain, ham pardeshi hain। yahaan sirf part bajaane aaye hain। baap ko zaroor aana padta hai। ab ham patit se paavan ban oonch pad paane ka purushaartha kar rahe hain। baap hamko padha rahe hain। ham god fatherly students hain। yeh bhi sun rahe hain। jaise yeh paavan ban raajaai pad paane ka purushaartha karte hain vaise hi tum sab karte ho। sab pukaarte ho - he door ke musaaphir aakarke hamko duhkh se chhudaao, sukhdhaam mein le chalo। paavan duniya hai satayug। woh hai viceless world, vahi world phir vicious world ban gaya hai। viceless world mein viceless rehte hain। yahaan sab vikaari hain naam hi hai duhkhadhaam, narka। baap aakar puraani duniya ko naya banaate hain, phir se tum bachchon ko raajya bhaagya dena - yahi to baap ka kaam hai। unko kaha jaata hai door ka musaaphir। aatma unko yaad karti hai he parampita paramatma। jaante hain ham bhi vahaan paramdham mein parampita ke paas rahne vaale the। yeh baap ne samjhaaya hai ham 84 janma bhog ab patit bane hain। pukaarte rehte hain door ke musaaphir aao। ham to tamopradhaan patit ban gaye hain, aap aa karke hamko satopradhaan banaao। tamopradhaan se satopradhaan bante hain, phir satopradhaan se tamopradhaan banenge। woh door ka musaaphir aakar inke dvaara tumko padhaate hain - manushya ko devta banaane ke liye। to purushaartha karna chaahiye na। baap aakar pravritti maarga banaate hain aur kehte hain yeh ek antim janma pavitra bano to pavitra duniya ke maalik banenge। is pavitrata par hi jhagda chalta hai। ablaaon par atyaachaar hote hain। tum bachchon ko to ab shreemat par chalna hai। ab sabhi ki hai vinaash kaale vipreet buddhi। baap ko jaante hi nahin, unse vipreet hain। kah dete paramatma to sarvavyaapi hai। sarvavyaapi kahne se to koi preet rahi nahin।

ab tum bachche kehte ho ham sabhi se preet hataae ek baap se jodte hain to zaroor unse varsa paayenge। baap kehte hain bhal grihastha vyavhaar mein raho parantu agar paristaan ki pari banna hai to viceless bano। nahin to vahaan kaise janma milega? yeh to hai vicious world, narka। viceless world ko svarga kaha jaata hai। srishti to vahi hai sirf nai se puraani, puraani se nai hoti hai। ab baap aaye hain patit duniya ko paavan banaane to zaroor unki mat par chalna pade। shreemat gaai hui hai। bhagwan kehte hain - bachche, main tumko aise bhagavti-bhagwan banaata hoon। vaastav mein tum devi-devtaaon ko bhagavti-bhagwan nahin kah sakte, in sookshm vatan vaasi brahma-vishnu-shankar ko bhi devta kaha jaata hai, bhagwan nahin। sabse oonch hai mool vatan, second number mein sookshm vatan। yeh sthool vatan to third number mein hai। yahaan ke rahne vaalon ko bhagwan kaise kahenge? vicious world ko viceless world banaane vaala ek hi hai। ab jitna jo purushaartha karenge utna oonch pad paayenge। bachche jaante hain ki maat-pita, jagdamba, jagatpita jaakar pahle-pahle mahaaraaja-mahaaraani bante hain। abhi to woh bhi padh rahe hain। padhaane vaala shivbaaba hai। yaad bhi unko karte hain। tum ab unse varsa lete ho। baap kehte hain yeh antim janma meri mat par viceless hokar rahenge to 21 janma tum viceless banenge। purushaartha karne ka yeh sangamayug hai। baap kehte hain main aaya hoon to tum is janma mein meri mat par chal viceless bano। har ek ko apne aapka phikar karna hai aur jo bhi aaye unko kehna hai behad ke baap se varsa lena hai to pavitrata ki raakhi baandho। ab mrityulok mein vriddhi nahin karni hai। yahaan to aadi-madhya-ant duhkh hai। aasuri sampradaay hain। satayug mein to devi-devta raajya karte the। ab narkavaasi unhon ki pooja karte hain। unhon ko yeh pata nahin ki ham hi pavitra poojya the। ab hamko phir pujaari se poojya banna hai। kya tum chaahte ho ki ham bachche paida karen to woh bhi narkavaasi banen? narka mein thode hi bachche paida karna hai। usse to kyon na svarga mein jaakar prince ko janma deven। baap ka banne se tum laayak banenge। aajkal to bachche bhi duhkh dete hain। bachcha janma to khush, mara to duhkh। satayug mein garbha mein bhi mahal, to baahar aane se bhi mahlon mein rehte hain। ab baap tumko narkavaasi se svargavaasi banaate hain।

ham godly students hain। baap ke bachche bhi hain, teacher roop se students bhi hain। guru roop mein followers bhi poore hain। aham aatma followers hain baap ke। baap kehte hain mujhe yaad karo। yaad se tum pavitra ban jaate ho। nahin to saja khaani padti hai। baaki dhandhaadhori to karna hai, nahin to baal-bachche kaise sambhaalenge। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sabhi taraph se buddhi ki preet hataakar ek baap se jodni hai। pavitra ban paristaan ki pari banna hai।

2) maat-pita ki shreshtha mat par humein chalna hai। deh-abhimaan vash unhein apni mat nahin deni hai।

vardaan:- master gyaan soorya ban saare vishwa ko sarva shaktiyon ki kirnen dene vaale vishwa kalyaankaari bhav

jaise soorya apni kirnon dvaara vishwa ko roshan karta hai aise aap sabhi bhi master gyaan soorya ho to apne sarva shaktiyon ki kirnen vishwa ko dete raho। yeh brahman janma mila hi hai vishwa kalyaan ke liye to sada isi kartavya mein busy raho। jo busy rehte hain vo svayan bhi nirvighna rehte aur sarva ke prati bhi vighna-vinaashak bante। unke paas koi bhi vighna aa nahin sakta।

slogan:- jimmevaari sambhaalte hue sab kuchh baap ko arpan kar double light rehna hi pharishta banna hai।