Murli du jour du mercredi 15 mars 2023

15-03-2023 praatahmurli om shanti "baapdaada"' madhuban

“meethe bachche - service mein kabhi susta nahin banna hai, vichaar saagar manthan kar baba jo sunaate hain, use act mein laana hai''

prashn:- baap kin bachchon par sada hi raazi rehte hain?

uttar:- jo apni service aapehi karte hain। baap ko follow karte hain, sapoot hain। baap ke bataaye hue raaste par chalte rehte hain। aise bachchon par baap raazi rehta hai। baba kehte bachche kabhi bhi apne oopar akripa nahin karo। apne ko saavdhaan karne ke liye apni em object ka chitra pocket mein rakho aur baar-baar dekhte raho to bahut khushi rahegi। raajaai ke nashe mein rah sakenge।

geet:- om namo shivaae…

om shanti। jiski mahima tum bachche sun rahe ho woh tumhaare sammukh baith tumko raajayog sikha rahe hain। jo koi kuchh karke jaate hain to unke peechhe unki mahima gaai jaati hai। jaise shankaraachaarya apne sannyaas dharma ko sthaapan karke gaye hain to unki mahima yahaan hi ab zaroor hogi। sannyaasiyon ki dynasty nahin kahenge। anya dharmon mein to dynasty raajaaon ki chalti hai। sannyaasiyon mein raajaaon ki dynasty nahin chalti। jaise Christian ki raajaai chalti hai। dharma bhi hai, raajaai bhi hai। vaise yeh (devtaaon ka) dharma bhi hai aur raajaai bhi hai, jiske chitra bhi bane hue hain। neeche raajayog ki tapasya kar rahe hain aur oopar mein raajaai ka chitra hai। raajaai mein tumhaara yahaan ka hi chitra diya jaata hai। bhavishya ka chitra usi naam roop vaala to haath aa na sake। tum jaante ho ham abhi raajayog seekh rahe hain। phir taaj sahit raajaai karenge। woh naam roop aadi sab badal jaayenge। yeh chitra bhi bachchon ko apne paas rakhna chaahiye। jo bachche samajhte hain ham bhavishya raajaai pad paayenge। har ek jo bhi brahman kul bhooshan hain aur jinko nishchay hai। nishchay to sabhi ko hota hi hai। kehte hain ham shri naaraayan ko varenge to raajayog ka chitra aur oopar mein raajaai ka chitra aur unke oopar shivbaaba ka chitra ho। is par contrast dikhaaya jaae - woh shankaraachaarya, yeh hai bhagwan shivaachaarya। yeh gyaan ka saagar hai। shankaraachaarya gyaan sunaane vaala gyaanvaan hai। woh kislie gyaan sunaate hain? hathayogi karma sannyaasi banaane। unka chitra hi alag hai। unka aasan alag hota hai to unka bhi chitra banaana chaahiye। hathayogi aasan, geru kaphni, maatha muda hua.... aise chitra dikhaane chaahiye। to contrast siddha ho। unhon ka punarjanma yahaan hi hota hai। in baaton par vichaar saagar manthan kar tum bahut kaam va service kar sakte ho। parantu virla koi aisa purushaartha karte hain। maaya service mein bahut susta banaati hai, bahut dhokha deti hai। to sannyaas dharma ka bhi chitra banaae likh dena chaahiye - shankaraachaarya dvaara sthaapan kiya hua hathayog, karma sannyaas kab shuru hua, kab poora hone vaala hai। tum koi bhi dharma ki tithi, sanvat sahit aayu nikaal sakte ho। sabka math panth athva dharma poora ek hi samay hota hai। to aisi-aisi baaton par vichaar saagar manthan kar phir act mein aana chaahiye। contrast dikhaana hai। woh shankaraachaarya ki sthaapna, yeh bhagwan shivaachaarya ki sthaapna। yeh raajayog aadhaakalpa chalta hai। shivbaaba aate hi tab hain jabki hathayog ka vinaash ho aur raajayog ki sthaapna honi hai। to aise yukti se chitra banaane chaahiye। woh hathayog dvaapar se kaliyug ant tak chalta hai। raajayog ki 21 janma raajdhaani chalti hai। phir likhna hai - woh hai hathayog, usmein gharbaar chhodna padta hai, ismen saari puraani srishti ka sannyaas karna padta hai। apne to har ek chitra mein likhat hai। aur koi ke bhi chitra aisi likhat se nahin hote hain। tum tithi-taareekh sabhi jaan sakte ho। to ghar mein bhi apna raajayog aur raajaai ka chitra dekh nasha chadhega। tumko devtaaon ke chitra ko haath jodne ki darkaar nahin hai। tum to svayan woh bante ho। to saamne chitra dekh khushi ka paara chadhega aur dil darpan mein apna munh bhi dekhenge, ham aise shri naaraayan ko va shri lakshmi ko varne ke laayak hain? nahin honge to sharma aayegi। jo yog mein rah vikarma vinaash karte hain, vahi itna oonch pad pa sakte hain। yeh hai bhavishya ke liye padhaai aur sab padhaaeeyaan hoti hain is duniya, is janma ke liye। tumhaari bhavishya ke liye padhaai hai। yeh buddhi mein rehna chaahiye। manushya jinki bhakti karte hain to unka chitra pocket mein rakhte hain। jaise baba shri naaraayan ka chitra rakhta tha। parantu yeh gyaan nahin tha ki ham aise banenge। ab to jaante hain ham yeh banenge। baba kehte hain tum nar se naaraayan ban sakte ho। to yeh chitra pocket mein pada ho। mitra sambandhiyon aadi ko chitra par samjhaane se woh bahut khush honge। un par bhi raham karna hai। phir koi samjhe ya na samjhe। apna kaam hai har ek ko samjhaana। hamko bhagwan raajayog sikhaate hain, sivaae unke aur koi raajayog se lakshmi-naaraayan bana nahin sakta। to chitra dekhne se khushi ka paara chadhega।

manushya naukri par jaate hain to raaste mein kahaan mandir dekhte hain to haath jodte hain। woh hai bhakti। tumko to gyaan hai, ham yeh hain। ham jagdamba ke bachche hain। jagdamba nar se naaraayan banaane ka kartavya karti hai। tum bhi karte ho na। tum bhi master jagdamba ho na। tumhaara yaadgaar mandir bhi hai। tum chaitanya yahaan baithe ho। samjhaani aisi clear ho jo manushya samjhen। delvaada mandir bhi kitna achha yaadgaar bana hua hai, neeche tapasya ke chitra oopar mein vaikuntha banaaya hai। kaisa achha mandir bana hua hai। to yeh chitra banaakar apne daphtar mein bhi rakh sakte ho, jisse yeh smriti aayegi। manamnaabhav aur svadarshan chakra ki bhi smriti aayegi। shivbaaba hamko yeh padhaate hain phir ham yeh raaja raani banenge। aapehi chitra banaae apne ko saavdhaan karte raho। ham pujaari se so poojya bante hain 21 janmon ke liye, to chitra se apni bhi service hogi, doosre ko bhi samjhaane ki service hogi। aise bachchon par baap bhi raazi rahega। bachche follow nahin karenge, sapoot nahin banenge to baap naaraaz hoga। kahenge bachche apne oopar akripa karte hain। baap ke bataaye hue raaste par nahin chalne se pad bhrashta ho jaayega। to aise-aise chitron se bhi tumko bahut achhi madad milegi। tum bahut achhi reeti kisko samjha sakenge। woh hai hathayog, yeh hai raajayog। woh guru log to yeh raajayog sikhla na sake। ham behad ke sannyaasi hain। sannyaas ka arth hi hai 5 vikaaron ka sannyaas। woh pavitra bante hain, jangal mein jaakar। ham grihastha vyavhaar mein rehte kamal phool samaan pavitra rehte hain isliye yeh alankaar vishnu ko dikhaate hain। ham aise bante hain, samjhaane mein badi achhi chaturaai chaahiye, baap bhi chatur hai na। tumhein phir daiveegun bhi dhaaran karne hai। bahut sweet temper (mijaaz) hona chaahiye। baap ke temper ko dekho kitna pyaara hai। bhal unko kaalon ka kaal bhi kehte hain, parantu woh kada thode hi hai। woh to samjhaate hain main aakar sabko le jaata hoon, ismen darne ki to koi baat hi nahin। tum bachchon ko gul-gul (phool) banna hai shreemat par। tum sab aatmaon ko bhi puraana shareer chhudaae vaapis le jaaoonga। drama anusaar tumko jaana hi hai। tumko ab aise karma sikhlaata hoon, jo karma kootna na pade phir tum sabko le jaata hoon। yeh bhi bataayenge - kaise jaate hain, kaun rehte hain। aage jab najdeek honge to sab bataayenge। jab tak jeete hain nai-nai yuktiyaan samjhaate rahenge। baap ke direction par amal hota hai to baap ko khushi hoti hai। sabko service mein madad milegi। khushi ka paara chadhega। baba yuktiyaan to bahut bataate hain। bade chitra bhi banaae centre par tum rakh sakte ho to manushya contrast dekhen। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani bachchon ko roohaani baap ki namaste।

raatri class - 28-3-68

baap ne samjhaaya hai aisi practice karo, yahaan sab kuchh dekhte hue, part bajaate hue buddhi baap ki taraph lagi rahe। jaante hain yeh puraani duniya khatma ho jaani hai। is duniya ko chhod hamko apne ghar jaana hai। yeh khyaal aur koi ki buddhi mein nahin hoga। aur koi bhi yeh samajhte nahin। woh to samajhte hain yeh duniya abhi bahut chalni hai। tum bachche jaante ho ham abhi apni nai duniya mein ja rahe hain। raajayog seekh rahe hain। thode hi samay mein ham satayugi nai duniya mein athva amarpuri mein jaayenge। abhi tum badal rahe ho। aasuri manushya se badal daivi manushya ban rahe ho। baap manushya se devta bana rahe hain। devtaaon mein daiveegun hote hain। woh bhi hain manushya, parantu unmein daiveegun hain। yahaan ke manushyon mein aasuri gun hain। tum jaante ho yeh aasuri raavanraajya phir nahin rahega। abhi ham daiveegun dhaaran kar rahe hain। apne janma-janmaantar ke paap bhi yog-bal se bhasma kar rahe hain। karte ho va nahin woh to harek apni gati ko jaante। harek ko apne ko durgati se sadgati mein laana hai arthaat satayug mein jaane liye purushaartha karna hai। satayug mein hai vishwa ki baadshaahi। ek hi raajya hota hai। yeh lakshmi-naaraayan vishwa ke mahaaraajan hain na। duniya ko in baaton ka pata nahin hai। one-one se inhon ki raajaai shuru hoti hai। tum jaante ho ham yeh ban rahe hain। baap apne se bhi bachchon ko oonch le jaate hain isliye baba namaste karte hain। gyaan soorya, gyaan chandrama, gyaan lucky sitaare। tum lucky ho। samajhte ho baba bilkul theek arth sahit namaste karte hain। baap aakar bahut sukh ghanere dete hain। yeh gyaan bhi bada wonderful hai। tumhaari raajaai bhi wonderful hai। tumhaari aatma bhi wonderful hai। rachayita aur rachna ke aadi madhya ant ka saara knowledge tumhaari buddhi mein hai। tumko aap samaan banaane liye kitni mehnat karni padti hai। harek ki takdeer hai to kalpa pahle vaali, phir bhi baap purushaartha karaate rehte hain। yeh nahin bata sakte ki aath ratna kaun banenge। bataane ka part hi nahin hai। aage chal tum apne part ko bhi jaan jaayenge। jo jaisa purushaartha karega aisa bhaagya banaayenge। baap hai raasta bataane vaala। jitna jo us par chalenge। inko to sookshm vatan mein dekhte hi hai, prajaapita brahma yahaan saath mein baitha hai। brahma se vishnu banna second ka kaam hai। vishnu so brahma banne mein 5,000 varsha lagte hain। buddhi se lagta hai baat to barobar theek hai। bhal trimoorti banaate hain - brahma-vishnu-shankar। parantu yeh koi nahin samajhte honge। abhi tum samajhte ho। tum kitne padmaapdam bhaagyashaali bachche ho। devtaaon ke paanv mein padam dikhaate hain na। padmapti naam bhi baala hai। padmapti bante bhi gareeb saadhaaran hi hain। karodapti to koi aate hi nahin। 5-7 laakh vaale ko saadhaaran kahenge। is samay 20-40 hajaar to kuchh hai nahin। padmapti koi hai so bhi ek janma ke liye। karke thoda gyaan lenge। samajh kar svaaha to nahin karenge na। sabhi kuchh svaaha karne vaale the jo pahle aaye। phat se sabhi ka paisa kaam mein lag gaya। gareebon ka to lag hi jaata hai। saahookaaron ko kaha jaata hai abhi service karo। eeshvareey service karni hai to centre kholo, mehnat bhi karo। daiveegun bhi dhaaran karo। baap bhi gareeb nivaaz kahlaate hain। bhaarat is samay sabhi se gareeb hai। bhaarat ki hi sabhi se jaasti aadamsumaari hai kyonki shuru mein aaye hain na। jo golden ej mein the vahi iron ej mein aaye hain। ekdam gareeb ban pade hain। kharcha karte karte sabhi khatma kar diya hai। baap samjhaate hain abhi tum phir se devta ban rahe ho। niraakaar god to ek hi hai। balihaari ek ki hai, doosron ko samjhaane ki tum kitni mehnat karte ho। kitne chitra banaate ho। aage chalkar achhi reet samajhte jaayenge। drama ki tik tik to chalti rehti hai। is drama ki tik tik ko tum jaante ho। saari duniya ki act hoobhu accurate kalpa kalpa repeat hoti rehti hai। second by second chalti rehti hai। baap yeh sabhi baaten samjhaate phir bhi kehte hain manmanaabhav। baap ko yaad karo। koi paani va aag se paar ho jaate hain usse phaayda kya। isse koi aayu thode hi badi ho jaati hai। achha!

meethe-meethe sikeeldhe roohaani bachchon ko baap daada ka yaad pyaar goodnight।

dhaarna ke liye mukhya saar:-

1) apna mijaaj (temper) bahut sweet banaana hai। shreemat par baap samaan pyaara ban svayan ko gulgul (phool) banaana hai।

2) apne oopar aapehi kripa karni hai। apne ko saavdhaan karne ke liye em-object ko saamne rakhna hai। mitra-sambandhiyon par bhi raham karna hai।

vardaan:- teertha sthaan ki smriti dvaara sarva paapon se mukta hone vaale punya aatma bhav

madhuban mahaan teertha hai। bhakti maarga mein maante hain ki teertha sthaan par jaane se paap khatma ho jaate hain lekin iska practical anubhav tum bachche abhi karte ho ki is mahaan teertha sthaan par aane se punya aatma ban jaate hain। yeh teertha sthaan ki smriti anek samasyaaon se paar kar deti hai। yeh smriti bhi ek taabeez ka kaam karti hai। koi bhi baat ho yahaan ke vaataavran ko yaad karne se sukh-shanti ke jhoole mein jhoolne lagenge। to is dharni par aana bhi bahut bada bhaagya hai।

slogan:- ramta yogi banna hai to knowledge aur anubhav ki double authority vaale bano।