Murli du jour du mardi 21 mars 2023

21-03-2023 praatahmurli om shanti "baapdaada"' madhuban

“meethe bachche - bhagwan aaya hai sabhi bhakton ko bhakti ka phal mukti-jeevanmukti ka thikaana dene, tum bhakta se abhi vaaris (bachche) bane ho''

prashn:- tum bachche kis smriti mein raho to dil mein khushi ke dhol-baaje bajte rahenge?

uttar:- sada smriti rahe ki most beloved baba aaya hai humein vishwa ka maalik, shaahon ka shaah banaane। ham abhi sooryavanshi raaja raani ban rahe hain। baba humein 21 janmon ke liye ever healthy, wealthy bana raha hai। hamaare satayugi raajya mein sab cheejen first class hongi। tatva bhi satopradhaan honge। aatma aur shareer donon gul-gul (phool samaan) honge। isi smriti se dil mein khushi ke dhol-baaje bajte rahenge।

om shanti। bachche jaante hain ki baap paramdham mein rahne vaala hai। woh baap khud bachchon ko kehte hain ab tum bhakta nahin ho। abhi to tum bhagwan ke bachche ho। bhakta, bhagwan ko dhoondhate rehte hain। bhakta ko bhagwan nahin kah sakte। bhakta anek hain, bhagwan ek hai। ab bhakta manushya hain to zaroor bhagwan ko bhi manushya roop mein aana pade। gaaya jaata hai bhagwan ghar baithe aate hain। kiske ghar? manushyon ke ghar। bhagwan ko zaroor manushya roop dhaaran karna pade। niraakaar parampita paramatma ek hai, bhakta anek hain। sabhi manushya is samay bhakta hain, bhagwan ko yaad karte hain। samajhte hain koi samay bhagwan ko aana zaroor hai। woh hai svarga ka rachayita to zaroor ek hi hoga na। anek to nahin ho sakte। bhagwan aakar manushya roop mein bhakton ko samjhaate hain। aadhaakalpa to mujhe yaad karte hain। drama anusaar zaroor bhaktimaarga mein yaad karna hi hai। phir main bhagwan manushya ka roop dharkar bhakton ke paas aata hoon। bhakta bhi manushya hain to hamko milna bhi manushyon se hi hai। zaroor manushya ka roop dhaaran karna pade, koi kachchha machchha ka nahin। baap kehte hain main aakar bachchon ko apna parichay deta hoon। mera paar koi pa na sake isliye main hi aakar apna parichay deta hoon ki main aaya hua hoon। tum bachche jaante ho baap manushya tan lekar aate hain। woh bhi samjhaate hain ki main kis bhakta ke tan mein pravesh karta hoon। yeh (brahma) hai sabse bada bhagat। ek to bhakta nahin hai। jo bhi puraane bhakta hain unka hisaab bataate hain। vahi praacheen devi-devta jo satayug aadi mein the, phir woh bhakti maarga mein aate hain to bhakti shuru kar dete hain। to woh hue sabse puraane bhakta। unhon ne hi poori bhakti ki hai। vahi aaye hain bhagwan se milkar devi-devta pad ko praapta karne। phir aakar sammukh milte hain। tum jaante ho ham bhakta the, saari duniya bhakta hai। bhagwan aaya hua hai bhakton ki raksha karne kyonki bhagat bahut duhkhi hain। bhakton ko yeh pata nahin hai ki shanti aur sukh kahaan hota hai? bhagwan aakar samjhaate hain main jab aata hoon to saugaat lekar aata hoon bachchon ke liye। behad ka baap zaroor behad ki saugaat lekar aayenge। abhi tum samajhte ho ham bhakta nahin hain। bhagwan ne aakar apna hi vaaris banaaya hai। bhakta vaaris nahin hote। woh aisa nahin samajhte ki ham bachche hain। baap se hamko varsa lena hai। woh to sarvavyaapi kah dete hain to phir bhagwan kahaan se aaye। ab tumko varsa zaroor chaahiye isliye mujhe yaad karte ho। varsa bhi first class chaahiye। second, third class nahin। sabhi bhakta bhagwan ko yaad karte hain ki jaakar unse mile। parantu jaante nahin ki kaise unke paas jaayen। to bhagwan ko aana padta hai। padhaate bhi hain, tum jaante ho bhagwan aaya hua hai sabko bhakti ka phal dene athva sabko sukhi karne। bhagwan ko abhi hi aana hota hai। woh hai roohaani panda। vaastav mein manushyon ka sachcha-sachcha teertha hai mukti aur jeevanmuktidhaam। svarga mein rahne vaale devtaaon ke jad chitra yahaan hain। un jad chitron paas jaate hain yaatra karne। woh ho jaati hai jismaani yaatra। delvaada mandir mein va jagat amba ke paas yaatra karne jaate hain, woh hai bhakti। bhagwan aakar in yaatra ke dhakkon se chhuda dete hain। bhagat bhagwan ko milte hain to bhagwan bhakti ke duhkhon se chhudaakar thikaane laga dete hain। baap kehte hain jo bhi sab dharma vaale hain, sab manushya-maatra ko abhi thikaane lagaane aaya hoon। asul thikaana hai mukti jeevanmuktidhaam। sabhi ko apne dhaam va svarga dhaam mein le jaate hain। tum bachchon ki buddhi mein hai baba paramdham se aaya hua hai। aatma hi chaahti hai ki ham bhagwan ke paas jaayen। yaad kaun karte hain? aatma yaad karti hai in organs dvaara। baap kehte hain ab tumko dehi-abhimaani banna hai। tumhaari buddhi mein gyaan tapakta rehta hai। barobar draamaanusaar baba aaya hua hai। bachchon ko raavan ke duhkh se chhudaakar apne saath le jaayenge। guide bankar aaye hain। tumko roohaani teerthon par jahaan jaana hai vahaan se phir lautkar nahin aana hai। yahaan to hai alpakaal ke liye jismaani teertha। yeh jad teertha banda ho jaate hain। phir tum sabhi teerthon par jaate ho। sachcha teertha ek hai muktidhaam, doosra hai jeevanmuktidhaam। un sabhi teerthon par jaane liye bhi bhagat jismaani teertha karte rehte hain। barobar jismaani teertha janma-janmaantar karne baad phir unse chhootkar ham roohaani teerthon par chale jaayenge, phir yahaan mrityulok mein aana hi nahin hai। muktidhaam mein jaakar baithenge, aana-jaana banda ho jaayega। phir svarga mein jaayenge to vahaan aana-jaana hota rahega। svargavaasi ban jaayenge। tum jaante ho ki baba hamko svargavaasi bana rahe hain। ham taiyaari karte hain svarga mein jaane ki। duniya mein to kisko pata hi nahin hai, bilkul buddhu hain। shaastra aadi padhne se bhi koi faayda nahin। abhi ki bhent mein to aise hi kahenge। alpakaal ke sukh ko jara sa kahenge। jaasti mithaai aur jari (thodi) mithaai mein farka to hai na।

abhi tum samajhte ho ham to sooryavanshi raaja raani bante hain, woh aasha rakhte hain bahut dhanvaan banen। sampatti to zaroor chaahiye tab to sukh hoga। sampatti ke saath phir health bhi chaahiye। health, wealth hai to sukh bahut hai। is duniya mein health, wealth donon mil nahin sakti। ek janma ke liye ek manushya ke paas yeh nahin ho sakti। vahaan to tum sab 21 janmon ke liye healthy, wealthy rehte ho। vahaan to anaadi aadi har cheez ki bahut sastaai hogi। paise ki to darkaar hi nahin hogi। paise badle asharphiyaan dete honge aur cheez first class hogi। tatva bhi satopradhaan ban jaate to unse maal bhi bahut achhe bante honge। khaane aadi mein kitna maja hoga। abhi tumhaare dil mein dhol-baaja bajna chaahiye। most beloved baap aaye hue hain। kehte hain main tumhaara most beloved baap hoon। 63 janma tumne yaad kiya hai। zaroor beloved hai tab to yaad karte hain na। manushyon ko to kuchh bhi pata nahin। baba hamko shaahon ka shaah, svarga ka maalik, vishwa ka maalik banaate hain। devi-devtaayen vishwa ke maalik hain na। parantu un par bhi jhoothe kalank chhotepan se hi laga diye hain। kitni jhoothi baaten laga di hain। maaya bilkul hi 100 percent non-sense buddhi bana deti hai। yeh bhi drama ka khel hai। to ab most beloved baap kehte hain mujhe poora yaad karo to tumhaare poore vikarma vinaash hon। gul-gul (phool) bano। aatma gul-gul hogi to shareer bhi aisa achha milega। tvamev maataashcha pita… yeh kiski mahima hai? kutte billi sabmen eeshvar hai to kya unko kahenge maat pita....? manushyon ki buddhi kya ban padi hai! bhabhka kitna dikhaate hain। isko kaha jaata hai maaya ka pomp। raavan ke raajya mein manushyon ko nasha kitna hai। jaante kuchh bhi nahin। tumhaare mein bhi jo achhe gyaan ki dhaarna karne vaale hain, unhon ko nasha chadhta hai। gyaan ki dhaarna nahin to soorat bhal manushya ki hai parantu seerat bandar ki hai। tum bachche ab samajhte ho ham shreemat par chal bhaarat ke manushya maatra ko shreshtha daiveegundhaari banaate hain arthaat ham bhaarat ko shreshtha daivi raajasthaan banaate hain। jinko yeh nasha hoga vahi aise bolenge। kahaan bhi bhaashan karo to bolo ham shri arthaat shreshtha mat par chal rahe hain। bhagwan hai gyaan ka saagar, aananda ka saagar, ham unki mat par chal rahe hain। yaadav aur kaurav donon hain raavan ki mat par aur ham paandav hain bhagwan ki shreemat par। jeet bhi hamaari hai। shreekrishna koi svarga sthaapan nahin karte hain। bhagwan baap hi sthaapan karte hain। ham bhaarat ko shreshtha banaate hain aur koi bhi aise kah nahin sakega ki ham eeshvareey mat par hain। haan kahenge eeshvar ki prerna se karte hain। baap to kehte hain main is tan mein aakar mat deta hoon। ismen prerna ki to baat hi nahin। to pahle-pahle niraakaar ki mahima karni chaahiye। woh manushya srishti ka beejroop hai, gyaan ka saagar, sukh ka saagar hai। unki mat par ham chalte hain। woh hamaara baap hai। paramdham mein rahne vaala hai। svarga ka rachayita hai, jo jaanta hoga vahi mahima karega। saare srishti ko paavan banaane vaala to ek hi hona chaahiye। anek thode hi hone chaahiye। to sivaae hamaare baaki sab hain raavan ki mat par। ham shreemat se bhaarat ko phir se daivi raajasthaan bana rahe hain। yeh anek dharma sabhi vinaash hone hain। ham jo bi.ke. hain, ham sabhi ne yeh practical anubhav kiya hua hai। ham prajaapita brahma ke bachche hain। ho tum bhi parantu ham practical mein ab hain। phir bhakti maarga mein gaaya jaayega - parampita paramatma ne brahma dvaara manushya srishti rachi। woh samajhte hain shaayad phat se devta ban gaye। parantu nahin, brahma dvaara pahle brahman rache phir varnon mein le aana chaahiye। kahaaniyaan sunaane va drama aadi se koi phaayda nahin। ekdam baap ki shiksha bataani chaahiye। baap hamko kya kehte hain? he meethe bachche, he aatmaayen... saari sabha mein kehna chaahiye, ham shreemat par chal rahe hain - devta banne ke liye। woh hamko raajayog sikhaate hain। geeta ka bhagwan bhi woh niraakaar hi hai। saakaar mein aate hain, prajaapita brahma ke mukh se yeh brahman braahmaniyaan nikalte hain। ham bi.ke. hain। parampita paramatma ne hamko brahma mukh se racha hai। ham shivbaaba ke potre hain। bi.ke. ka parichay dena chaahiye। tum bhi sab aatmaayen shiv ke potre prajaapita brahma ke bachche ho। abhi phir se yeh nai rachna ho rahi hai। aise samjhaana chaahiye। jo samjhen barobar ham bhi shiv ke potre brahma ke bachche hain। ham unke bane hain isliye hamaara naam hai brahmaakumaar brahmaakumaariyaan। kalpa pahle yeh brahman se devta, phir kshatriy, vaishya, shoodra bane the। ab phir brahman bane hain। aise-aise achhi reeti chakra ka raaz buddhi mein bithaana chaahiye। pahle to baap ka poora parichay dena chaahiye। baap ne hamko sunaaya hai, ham phir tumko sunaate hain। yeh drama ka chakra kaise phirta hai, chakravarti raaja kaise banna hota hai - yeh knowledge hai। ismen koi hathiyaar panvaar nahin hain। world ki history-geography ko to zaroor manushya hi jaanenge na। manushya srishti ka chakra kaise phirta hai yeh zaroor jaanna chaahiye। ham baap se sunte hain to chakravarti raaja bante hain। tumko bhi behad ke baap se sukh lena hai to purushaartha karo। behad ka baap hai hi svarga ka rachayita। unse behad ka sukh milta hai to kyon nahin behad ke baap ko yaad karna chaahiye। laukik baap ke varse se raazi nahin hote। ham behad ke baap se 21 janma sukh paate hain। baaki to sab hai bhakti maarga ki saamagri। tum kehte ho shaastra aadi anaadi hain। parantu yeh sab hote hue bhi ab to kaliyug aakar hua hai। duniya patit banti jaati hai। phaayda to kuchh bhi nahin hua hai। abhi baap khud aaye hain, ham unke potre brahma ke bachche brahman hain। vaastav mein to woh tumhaara bhi baap hai। aise-aise achhi tarah se samjhaao to woh bhi paani ho jaae। (pighal jaae) achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) roohaani yaatra par tatpar rah, yaad se aatma aur shareer donon ko gul-gul (phool samaan) banaana hai। vikarma vinaash karne hain।

2) ham direct eeshvar ki mat par bhaarat ko shreshtha, maanav maatra ko daiveegundhaari banaane ki seva ke nimitta hain - is smriti mein rehna hai।

vardaan:- sooryamukhi pushpa ke samaan gyaan soorya ke prakaash se chamakne vaale sada sammukh aur sameep bhav

jaise sooryamukhi pushpa sada soorya ki sakaash se ghira hua rehta hai। uska mukh soorya ki taraph hota hai, pankhudiyaan soorya ki kirnon ke samaan circle mein hoti hain। aise jo bachche sada gyaan soorya ke sameep aur sammukh rehte hain, kabhi door nahin hote - ve sooryamukhi pushpa ke samaan gyaan soorya ke prakaash se svayan bhi chamakte aur doosron ko bhi chamkaate hain।

slogan:- sada himmatvaan bano aur sarva ko himmat dilaao to parmaatma madad milti rahegi।