Murli du jour du jeudi 23 mars 2023

23-03-2023 praatahmurli om shanti "baapdaada"' madhuban

“meethe bachche - dehi-abhimaani bano to puraane jagat se naata todne aur naye jagat se naata jodne ki khoobi sahaj aa jaayegi, ek baap se lav jut jaayega''

prashn:- kin bachchon ka buddhiyog paarlaukik maat-pita se sada juta hua rah sakta hai?

uttar:- jo jeete ji markar eeshvareey service par tatpar rehte hain। grihastha vyavhaar mein rehte bhi sabhi ka buddhiyog baap se judaane ki seva karte hain, baap se jo roshni mili hai woh doosron ko dete hain, svarga ka maalik banaane ke liye paavan banne ki yukti bataate hain - unka buddhiyog svatah baap se juta rehta hai।

geet:- kaun hai pita, kaun hai maata…

om shanti। geet ka arth kya hai? kehte hain jagat ke (laukik) maata-pita ko, mitra sambandhiyon aadi sabko chhodo aur buddhiyog apne sachche maat-pita, jo srishti ke rachayita hain, unse lagaao। yeh jo maata, pita, mitra-sambandhi aadi hain, unse ab naata todna hai aur ek se naata jodna hai। unko bhi maat-pita kaha jaata hai। tum maat-pita ham baalak tere.. woh sab ek ko kehte hain, woh laukik maa baap to sabke alag-alag hain। yeh saare bhaarat athva saari duniya ka maat-pita hai। to paarlaukik maat-pita ka banna aur laukik maat-pita, mitra-sambandhiyon ko chhodna - iske liye dehi-abhimaani banne ka gyaan chaahiye। jab tak dehi-abhimaani nahin bante hain tab tak chhootna bada mushkil hai। is puraane jagat se naata todna hai aur naye jagat se naata jodna hai - yahi khoobi hai। had ke ek ghar se naata tod had ke doosre ghar se naata jodna to bahut sahaj hai। har janma mein todna aur jodna hota hai। ek maat-pita, mitra-sambandhiyon ko chhoda doosra liya। ek shareer chhoda to phir maat-pita, mitra-sambandhi, guru aadi sab naye milte hain। yahaan to hai jeete ji marne ki baat। jeete ji paarlaukik maat-pita ki god mein aana hai। is kaliyugi jagat ke maat-pita aadi sabko bhulaana hai। yeh baap to hai phir maata bhi kaise hai? yeh hai guhya baat। baap yeh shareer dhaaran kar inse phir apna bachcha banaate hain। parantu kai bachche yeh baat ghadi-ghadi bhool jaate hain। agyaan kaal mein kabhi maa-baap ko bhoolte nahin hain। is maa-baap ko bhool jaate hain kyonki yeh hai nai baat। is maat-pita se buddhiyog jodna hai phir service mein tatpar rehna hai। jaise baap ko service ka phurna rehta hai, aise bachchon ko bhi rehna chaahiye। kehte hain bhagwan ko phurna hua nai duniya rachen। to yeh kitna bada phurna hai! behad ke baap ko behad ka phurna rehta hai - sabko paavan banaana hai। us paavan duniya svarga ke liye raajayog sikhaana hai। kitne ko sikhlaana hai! sabka buddhiyog baap ke saath jodna hai। yahi dhandha ham bachchon ka hai। baap kehte hain grihastha vyavhaar mein rehte tum bachche service karke dikhaao।

sannyaasiyon ko phurna rehta hai ham koi ko kaag vishta samaan sukh se chhudaaven, pavitra banaayen। un par bhi responsibility rehti hai - kisko vairaagya dilaae pavitra banaayen। woh samajhte hain gharbaar chhodna hai। yeh nahin samajhte ki patit duniya ko chhodna hai। yeh to jab baap aakar paavan duniya ka saakshaatkaar karaate hain tab ham patit duniya se naata todte hain। phir bhi woh apne ko javaabdaar samajh gharbaar chhod kitne ko vairaagya dilaakar pavitra banaate hain। mahima to unhon ki bhi gaai jaati hai। yeh sannyaas dharma nahin hota to bhaarat aur hi kaam chita par jalkar bhasma ho jaata। ab woh rajoguni sannyaas sthaapan karne vaala kaun aur yeh satopradhaan sannyaas sthaapan karne vaala kaun - yeh baap baith samjhaate hain। unka head tha shankaraachaarya, unke bhi kitne followers honge! laakhon karodon ki andaaj mein honge। woh pavitra nahin hote to unki praja bhi vriddhi ko nahin paati। to yeh sannyaasiyon ne bhi achha hi kiya hai। pahle number mein devtaayen gine jaate hain, doosre number mein sannyaasi। saara madaar hai hi pavitrata par। duniya ko pavitra se apvitra phir apvitra se pavitra banna hi hai। satayug se lekar jo bhi drama mein past hua hai, woh noondh hai। bhakti maarga mein saakshaatkaar aadi jo kuchh hota hai second by second, woh phir kalpa baad hoga। drama mein yeh sab noondh hai। drama chakra ko samajhna hai। aise nahin baith jaana hai ki drama mein jo hoga। drama mein actors to sab hain। to bhi har ek apni aajeevika ke liye purushaartha zaroor karte hain। purushaartha bigar rah na saken। bhal kai manushya samajhte bhi hain yeh naatak hai, ham paramdham se aaye hain part bajaane। parantu vistaar se samjha nahin sakte hain। pahle kis dharma vaale aate hain, srishti kaise rachi jaati hai, jaante nahin। srishti nai rachi jaati hai va puraani srishti ko baap aakar naya banaate hain - yeh maaloom na hone kaaran unhon ne pralay dikhaakar phir nai srishti dikha di hai। baap aakar in baaton ki roshni dete hain। phir tum bhi auron ko roshni dene ke responsible ho। kitni service hai! jaise baap ne tumko mukti-jeevanmukti mein aane ka maarga bataaya hai, jis maarga ke liye hi aadhaakalpa bhakti maarga mein thokren khaai hain। to behad ke baap ko phurna rehta hai ki ham apni salvation army ki vriddhi kaise karen? sabhi ko raasta kaise bataayen?

tum bachche sabko bataao ki baap aaya hua hai raajayog sikhlaane, kalpa pahle muaaphik। jisko hi shivaae namah kehte hain। jo hai sabhi se oonch te oonch paramdham mein rahne vaala। ham sabhi aatmaayen bhi vahaan nivaas karti hain। aatma ko hamesha immortal kaha jaata hai। woh kab jalti-marti nahin। har ek aatma mein part bhara hua hai। apni aatma ko dekho va jo mukhya hain unko dekho। jhaad ko jab dekha jaata hai to mukhya foundation aur taal-taaliyon ko bhi dekha jaata hai। patte to athaah hote hain unko ginti nahin kiya ja sakta। taal-taaliyaan ginti kar sakte hain। to barobar is jhaad mein foundation ham devi devtaaon ka hai। abhi foundation hi sad gaya hai। jaise banyan tree jhaad ka foundation sad gaya hai। phir bhi shaakhaayen kitni nikli hui hain! shaakhaaon se bhi patte nikalte rehte hain। to yeh bhi behad ka kitna bada jhaad hai! tum bachche bhi nambarvaar purushaartha anusaar jaante ho। aise nahin ki saara din kiski buddhi mein yeh chintan chalta hai। sabhi points ek hi samay buddhi mein phirna mushkil hai। phir bhi jo vichaar saagar manthan karne vaale hain unki buddhi mein to tapakta hi hoga। jhaad buddhi mein hai to beejroop baap bhi yaad rehta hai। ham bhi vahaan ke rahne vaale hain phir is jhaad mein ham hi all-round aate hain, aadi se ant tak। jab tum patit jadajdeebhoot avastha mein aate ho to saara jhaad aa jaata hai। pahle-pahle jo the woh bhi ab puraane hain। pichhaadi vaali taal taaliyaan bhi puraani hain। jo serviceable hain unhon ko ona rehta hai ham baba ke madadgaar hain, manushyon ko phir se so devta banaane ke liye। yeh samjhaana padta hai। tum so devta the, so kshatriy banen। 84 janmon ki janmapatri tum hi bata sakte ho। to yeh baaten jab buddhi mein tapakti rahengi tab kisko samjha sakenge। chintan chalna chaahiye - ham bachche baba ke saath madadgaar hain। to buddhi mein aana chaahiye ki ham kisko drama ka raaz kaise samjhaayen? unhon ka yog baap ke saath kaise jutaayen? manushya se devta banaane ka purushaartha karaayen arthaat baap se behad ka varsa lene ka maarga bataayen। jinko baap dvaara maarga mila hoga vahi bataayenge। baap hi aakar raajayog sikhlaate hain athva mukti-jeevanmukti ke gates kholte hain। aise saara din vichaar saagar manthan karna chaahiye aur svabhaav bhi bahut meetha dhaaran karna hai। kiske bhaav-svabhaav mein jalna va marna nahin hai। sahan karna hai। apni service karni hai। jitna ho sake service mein time dena chaahiye। apne se poochhna hai ham baba-baba kehte hain, baba ko to behad service ka ona rehta hai, main baba ka bachcha kya kar raha hoon! mujhe kitni service karni chaahiye? time to bahut milta hai। taras padna chaahiye। bichaare sabhi baap se bichhude hue hain। dhakka khaate rehte hain। paap karte rehte hain। baap se bemukh kar sabko munjhaate rehte hain।

tum braahmanon ka kaam hi hai sabko gyaan sunaae sammukh laana। tum brahman ho geeta ke bhagwan ke sachche-sachche bachche। tumko authority mili hui hai। tumhaari buddhi mein geeta ka hi gyaan hai। jo samjha nahin sakte unko ham brahman nahin kah sakte। half caste va quarter caste kahenge। naam brahman hai, dhandha shoodrapne ka karte hain। buddhi shoodrapne ki hai। ajmer mein pushkarni brahman rehte hain to woh geeta shaastra aadi sunaane vaale hote hain। unhon ka dhandha hi yeh hai। dhaama khaana unka kaam nahin hai। unka sirf kaam hai shaastra sunaae dakshina lena। ab tum to ho sachche-sachche brahman, behad baap ke bachche। prajaapita brahma behad praja ka baap hai na aur shivbaaba hai sabhi aatmaon ka baap। unka nivaas sthaan hai paramdham mein। vahi patiton ko paavan banaane vaala hai, isliye saari duniya unko yaad karti hai, O god kehte hain to niraakaar hi buddhi mein aata hai। parantu gurooon ki janjeeron mein phanse hue hain। jin devtaaon ki pooja karte hain unke occupation ka pata nahin hai। woh bhi jaise gudde gudiyaan samajh pooja karte hain। occupation jaante nahin isliye gudiyon ki pooja kaha jaata hai। to kitna farka rehta hai! dher ke dher moonjhe hue hain। devtaaon ki soorat aur seerat, manushya ki soorat aur seerat mein din-raat ka farka hai। manushya gaate hain - aap sarvagun sampanna. .. ham neench paapi hain। agar aisa kehte hain to bhala unko aisa banaane vaala kaun tha? abhi to barobar narka hai phir svarga ka maalik kya ham ban sakte hain? yeh khyaal kabhi manushyon ko uthta nahin hai। tum bachchon ko kabhi yeh khyaal thode hi utha hoga ki ham aise kab banenge? sirf bhakti karte rahe। abhi tum jaante ho hamko so devta banna hai। raajdhaani mein oonch pad paana hai isliye purushaartha karte hain। andar aana chaahiye agar hamaara shareer chhoot jaae to ham kis pad ko paayenge? tum poochh bhi sakte ho - agar ham mar jaayen to kya pad paayenge? to baba jhat bata denge - tum paai paise ka pad paayenge va 8 aane ka, 12 aane ka va kaudi ka pad paayenge। praja ko kaudi pad kahenge। dil darpan mein apni shakla dekho - koi bandarapna to nahin hai? ashuddha ahankaar hai number one। kaam-krodh ko bhi jeet leve parantu deh-abhimaan hai pahla number dushman। dehi-abhimaani banne se hi phir aur vikaar thande honge। dehi-abhimaani tab banen, jab baap ke saath lav jute। deh-abhimaani ka lav jut na sake। to deh-abhimaan chhodne mein badi mehnat chaahiye। dehi-abhimaani bade harshit rehte hain। deh-abhimaani ka chehra murdon jaisa rehta hai। to pahli mukhya baat hai dehi-abhimaani banna, tab baap bhi madad karega। nirvikaari to bahut rehte hain parantu main aatma hoon, baap ki yaad rahe, yeh ghadi-ghadi bhool jaata hai। ismen fail ho jaate hain। ashareeri nahin banenge to vaapis kaise jaayenge? service ka bahut phurna rehna chaahiye - jisse bahut manushyon ka kalyaan ho, deh-abhimaani kahaan bhi jaayega to fail ho aayega। dehi-abhimaani kuchh na kuchh teer lagaakar aayega। mahsoos karenge ki phalaane ne baat to theek kahi thi। yog jut jaae to service ka phurna bhi ho। usmein pahle-pahle to alpha par samjhaana hai। jaasti teek-teek se tang ho jaayenge। pahle shivaae namah, teen tabka bhi samjhaana hai। ek niraakaari duniya jahaan parampita paramatma aur aatmaayen rehti hain। baaki hai sthool aur sookshm vatan। svarga mein lakshmi-naaraayan ka raajya tha, ab nahin hai, phir history repeat hogi। aage kaliyug tha phir satayug hua ab phir kaliyug ki history repeat ho rahi hai। to ab phir satayug ki history bhi repeat hogi na। ismen hi maja hai। bahut achhi points hain। achha!

brahman kul bhooshan sabhi bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kiske bhaav-svabhaav mein jalna marna nahin hai। apna svabhaav bahut-bahut meetha banaana hai। sahansheel banna hai।

2) baap ka khidmatgaar banne ke liye vichaar saagar manthan karna hai। buddhi mein gyaan ka hi chintan karte rehna hai। dehi-abhimaani rahne ki mehnat karni hai।

vardaan:- sarva sambandh ek baap se jodkar maaya ko vidaai dene vaale sahajyogi bhav

jahaan sambandh hota hai vahaan yaad svatah sahaj ho jaati hai। sarva sambandhi ek baap ko banaana hi sahajyogi banna hai। sahajyogi banne se maaya ko sahaj vidaai mil jaati hai। jab maaya vidaai le leti hai tab baap ki bandhaaeeyaan bahut aage badhaati hain। jo har kadam mein parmaatma duaayen, brahman parivaar ki duaayen praapta karte rehte hain woh sahaj udte rehte hain।

slogan:- sada busy rahne vaale businessman bano to kadam-kadam mein padmon ki kamaai hai।