Murli du jour du mercredi 29 mars 2023

29-03-2023 praatahmurli om shanti "baapdaada"' madhuban

“meethe bachche - tumhaari yaad uncommon hai, jise tum in aankhon se dekhte nahin, use yaad karte ho aur uski yaad se tumhaare vikarma vinaash ho jaate hain''

prashn:- kis ek aadat ka tyaag karo to sab gun svatah aate jaayenge?

uttar:- aadhaakalpa se deh-abhimaan mein aane ki aadat jo pakki ho gai hai, ab is aadat ka tyaag karo। shivbaaba jo most beloved hai, use yaad karo। koi bhi dehdhaari ki yaad na rahe to sab qualification aa jaayengi, defect nikal jaayenge। aatma pavitrata ka saagar ban jaayegi। khushi ka paara chadha rahega। sab gun svatah aate jaayenge।

geet:- om namo shivaae…

om shanti। bachchon ne apne behad ke baap ki mahima suni aur bachchon ke aage woh behad ka baap sammukh baitha hai। har ek bachche ki buddhi mein yeh zaroor aana chaahiye ki ham us shivbaaba, jiski yeh mahima hai, uske sammukh baithe hain aur unse ham 21 janmon ke liye sada sukh ka varsa le rahe hain। yeh yaad aane se hi khushi ka paara chadhna chaahiye। aise nahin, jis samay saamne sunte ho us samay yaad rahe aur phir bhool jaao। nahin, bhoolna nahin chaahiye। bachche jaante hain ham phir se apna raajya-bhaagya le rahe hain। to buddhi chali jaati hai us niraakaar baap ki taraph। unko buddhi se jaana jaata hai। din-raat buddhi mein yeh yaad rehna chaahiye - ham behad ke baap se bhavishya 21 janmon ka varsa le rahe hain। nishchay to pakka hota hi hai। laukik maa-baap mein nishchay baitha phir unmein sanshay thode hi ho sakta hai। parantu yeh nai baaten hain। buddhi se baap ko jaana jaata hai। bachche jaante hain ki ham shivbaaba ke bane hain unse hi varsa milna hai। ham kalpa-kalpa us baap se varsa paate hain। buddhi mein yaad aata hai। baba aap dvaara hamko phir se raajaai mil rahi hai। ham hakdaar hain। jabki hakdaar hain to zaroor baap ko yaad karna hoga। laukik baap se varsa lete hain। woh to bahut yaad pad jaata hai। ismen uncommon baat yeh hai jo baap ko yaad karne se hamaare paap bhasma honge isliye baap ko yaad karna padta hai। laukik baap ki yaad to automatically rehti hai। in aankhon se dekhte hain। bachcha paida hota aur mama baba kehta rehta। yeh baap in aankhon se dikhaai nahin padta। buddhi se yaad karna hai। ham shivbaaba ki brahma dvaara santaan bane hain aur 21 janmon ka varsa paane ke liye shreemat par purushaartha karte rehte hain। ismen pahle-pahle mukhya hai pavitrata। jitna yaad karenge buddhi pavitra hoti jaayegi। aise nahin samajhna ham to bachche hain hi hain। baap ko yaad nahin karenge to vikarma vinaash nahin honge। bahut bachche samajhte hain ham to bachche hain aur baap ko yaad nahin karte। kehte hain na - mukh se raam-raam kaho। parantu is raam ka (shivbaaba ka) chitra to hai nahin, isliye manushyon ka buddhiyog chala jaata hai us raam taraph। sadgati daata shiv ko to sabhi bhoole hue hain।

abhi tum jaante ho shivbaaba aaya hua hai। pahle to zaroor rachayita shivbaaba aaya hoga tab hi svarga ki rachna rachi hogi। unke baad phir raam ka raajya chala। ab tum satayug treta mein raajya karne ke liye baap se varsa le rahe ho। yeh buddhi mein chalna chaahiye। parampita paramatma shiv aate hi ek baar hain। raam-seeta, lakshmi-naaraayan aadi bhi ek hi baar aate hain। bhal punarjanma lete hain parantu naam, roop, desh, kaal sabhi badal jaata hai। raam seeta bhi praalabdha bhogne liye punarjanma lete hain। yeh gyaan saara buddhi mein tapakna chaahiye to khushi rahegi। koi ko bhi samjhaana bahut sahaj hai। svarga ke rachayita baap se tumko is samay varsa mil sakta hai। behad ke baap ko yaad to sabhi karte hain। baap nai srishti rachta hai to sabhi sukhi ho jaate hain। is samay to sabhi duhkhi hain। yeh drama hi sukh duhkh ka bana hua hai। sukh mein kaun raajya karte hain? lakshmi-naaraayan, phir treta mein raam seeta.. tum jaante ho itne varsha is gharaane ka raajya chalta hai। Christian samjhenge hamaare Christ ne raajaai rachi। phir Edward di first, Edward di second raajya karte aaye। past hota jaata hai na। bhaaratvaasiyon ko to kuchh bhi pata nahin hai। tum bachche jaante ho satayug mein lakshmi-naaraayan ka raajya tha jisko hi heaven svarga kaha jaata hai, jo baap hi sthaapan karte hain। patit duniya mein aaye tab to paavan banaaye। yeh yaad rehna chaahiye। ham us baap se behad ka varsa le rahe hain shreemat par aur dhaarna kar rahe hain। yeh bhoolna nahin chaahiye। barobar shivbaaba kalpa pahle bhi aaya tha, jiska yaadgaar bhi hai। ab woh phir se aaya hua hai। pahle aate hain niraakaar shivbaaba, woh aakar tumko devi-devta banaate hain। satayug mein lakshmi-naaraayan practical mein raajya karenge। phir bhakti maarga mein pujaari ban chitra aadi banaayenge। lakshmi-naaraayan ka is samay koi accurate chitra to nahin hai phir practical mein aayenge। ab shiv-baba tumko practical mein padha rahe hain brahma dvaara। kitni seedhi baat hai। aur koi bhi school mein aise nahin kahenge tumhaari aatma padhti hai, teacher ki aatma hamko padhaati hai। woh sab manushya, manushya ko padhaate hain। vaastav mein padhaati aatma hai। aatma hi organs dvaara padhti hai। aatma kehti hai main ab barrister ban gaya hoon। knowledge se barrister bante hain। yahaan to hai wonderful baat। niraakaar shivbaaba niraakaar aatmaon se baat kar rahe hain। aatma mein sanskaar rehte hain। manushya yeh bhool jaate hain। niraakaar baap in dvaara samjhaate hain। unka ek hi naam shiv hai। tum bhi kehte ho shivbaaba, buddhi oopar chali jaati hai। laukik baap ko yaad karne se shareer yaad aa jaayega। shivbaaba ka shareer to hai nahin। paramatma ka mandir hi niraakaari roop ka hai। aakaari devtaayen hain, saakaari manushya hain। woh hai hi niraakaar shiv, tumhaari aatma ab knowledgeful ban rahi hai। baap kehte hain main niraakaar hoon। mere mein srishti ke aadi-madhya-ant ka knowledge hai। main tumko padhaata hoon is mukh dvaara। tum bhi mere samaan knowledgeful ban jaao। yeh knowledge sivaae niraakaar baap ke koi de nahin sakta। niraakaar paramatma ko hi knowledgeful, blissful, patit-paavan kaha jaata hai। baba kehte hain puraani duniya ko badal nai duniya main hi banaata hoon। jaise mujh niraakaar mein saare jhaad ki knowledge hai vaise tum aatmaon ko bhi banaata hoon। tumhaari aatma bhi aisi knowledgeful banti hai, tumko aap samaan banaata hoon। is srishti ke aadi-madhya-ant ki knowledge sunne se tum chakravarti raaja-raani banenge। manushya, manushya ko devta bana na saken।

baap hai gyaan ka saagar, pavitrata ka saagar। bachchon ko aap samaan banaate hain to sab gun hone chaahiye। phir tum devta banenge to qualification badal jaayengi। baap ki qualification alag hai, baap gyaan ka saagar hai, tumko bhi banna hai। baap pavitrata ka saagar hai। ham aadhaakalpa pavitra rehte hain। baap kehte hain drama anusaar tum patit bante ho phir main aakar paavan banaata hoon 21 janma liye। sirf tum shreemat par chalo, ek mujhe yaad karo, doosra na koi। main tumko svarga ka maalik banaata hoon। baap ko bhool aur koi ki yaad mein rahenge to defected ho jaayenge। shivbaaba hai most beloved, sabse pyaara baap hai। tumhaara naam bhi gaaya hua hai vande maatram। tumhaari aatma pavitra banti hai। tum pavitra ban bhaarat ko svarga banaate ho isliye tumhaara naam baala hai shiv shakti paandav sena। tum paandav bhi ho kyonki paramdham ki yaatra par yuddha ke maidaan mein khade ho, maaya par jeet paane liye। bachche jaante hain hamko baap jaisa master gyaan saagar, pavitrata ka saagar banna hai। deh ka ahankaar toot jaana chaahiye। janma-janmaantar deh dhaaran ki hai to woh aadat pakki ho gayi hai। ab is aadat ka tyaag chaahiye। jaise baap niraakaar hai to deh-abhimaan kahaan se aaya? tumko bhi is puraani deh ko chhod mere paas aana hai। vinaash hota hai to kuchh kaaran hoga na। worth not A penny cheez ka hi vinaash hota hai। ab tumko svarga chalne laayak banaate hain। vahaan sadaiv sukh hi sukh hai। sukhdhaam aur shantidham, yeh hai duhkhadhaam। ashaanta kiya hai raavan ne phir shanti dene vaala hai parampita paramatma। koi kehte hain man ki shanti chaahiye। bolo, kaisi shanti chaahiye? yeh to hai duhkhadhaam, kya tumko sukhdhaam chalna hai? baap ko yaad karo to sukhdhaam chalenge। ashaanta karne vaala hai raavan-maaya jo yahaan haazir hai। mukti-jeevanmukti mein ashaanta karne vaala raavan hota nahin isliye ab chalo apne ghar vaapis। agar satayug mein chalna chaahte ho to chalo। har ek aatma jeevanmukti zaroor chaahti hai। aise nahin sab satayug mein, jeevanmukti mein chalenge। woh to sirf tum bachche hi jaate ho। baaki jo aatmaayen oopar se aati hain woh pahle jeevanmukti mein hain। maaya ki parchhaaya nahin lagti hai। satopradhaan ban phir sato, rajo, tamo mein aate hain। maaya ke hote hue bhi aatma ko sukh zaroor bhogna hai। duhkh nahin ho sakta kyonki pavitra hai na। phir apvitra hone se duhkh paayenge, aise nahin aane se hi duhkh paate hain। yeh sukh-duhkh ka khel bana hua hai।

baba ke khyaalaat chalte rehte hain - manushyon ko bheeti dene ke liye board lagaana chaahiye। sirf chitra dekh manushya moonjhate hain। samjho shivbaaba ka chitra rakhte hain aur neeche likh dete hain deity world sovereignty is your god fatherly birth right। manushya chitra dekh kahenge bhagwan aisa thode hi hota hai। bhagwan ka roop kya hai? phir bhi likha hua rehta hai bahnon aur bhaaiyon, aakar behad ke baap se 21 janma sada sukh paane ka purushaartha karo। woh to jab koi sammukh aaye tab samjhaaya jaae। nimantran dete hain। din-pratidin bahut short banaana hota hai। pichhaadi mein short hota jaayega। manamnaabhav, baap ko yaad karo aur unse varsa lo। to likhna chaahiye bahnon-bhaaiyon satayug ki raajaai 21 janmon ke liye baap se aakar praapta karo, is hovanhaar ladaai ke pahle। is ladaai se hi svarga ke dvaar khulte hain। yeh koi duniya nahin jaanti। tum jaante ho is ladaai se hi bhaarat sukhdhaam banega। woh koshish karte hain, ladaai na lage। tum jaante ho is mahaabhaari mahaabhaarat ladaai se hi mahaavinaash hona hai। sab aatmaon ko vaapis zaroor jaana hai kyonki khel poora hua phir se part bajaane aayenge। to yukti se likhna chaahiye।

tum ho roohaani pande, woh hain jismaani dehdhaari pande। tum apne ko videhi aatma deh se alag samajhte ho, tum jaante ho baap ham aatmaon ko le jaayenge। to tumko likhna pade ki behad ke baap se aakar varsa lo। niraakaar akshar zaroor likhna hai। tum jaante ho baba aaya hua hai is karmakshetra par। ham bhi vahaan se aate hain। sabhi aatmaayen jo actors hain, imperishable, immortal aatmaayen hain, kab marti nahin। yeh achhi reeti nishchay ho jaana chaahiye। ham shivbaaba se anek baar varsa le chuke hain, phir bhi lenge। purushaartha se tum jaante ho shiv-baba hamko svarga ka varsa de rahe hain, to kyon nahin unse varsa lete ho? baap aur varse ko yaad karenge to ant mati so gati ho jaayegi। baaki sirf raam-raam kahne se mukti thode hi ho jaayegi। akhbaar mein daalte hain phalaana svargavaasi hua। unse poochhna chaahiye svarga kisko kehte ho? yeh to narka hai, to punarjanma bhi narka mein lenge। svarga hai to punarjanma bhi svarga mein lenge। agar koi shareer chhod narka se svarga gaya, vahaan to unko bahut vaibhav milenge। phir narka ke vaibhav khilaane unko svarga se narka mein kyon bulaate ho? unko narka ka bhojan khilaayenge to aisi buddhi ho jaayegi। jaisa anna vaisa man ho jaayega। svarga mein to doodh-ghi ki nadiyaan bahti hain। tum to ghaaslet ka khaana khilaayenge। shreenaath dvaare mein achhe ghi ka bhog lagta hai kyonki vahaan raadhe-krishna ka chitra hai। to unhon ki yaad mein bhog bhi achhe-achhe vaibhav banaakar lagaate hain। aisa bhog aur kahaan nahin lagta। jagat naath ka bhi mandir hai, vahaan chaaval ka bhog lagaate hain, vahaan vaibhav nahin chadhaate। ab to narka hai to duhkh hai। svarga mein to sukh tha। baap samjhaate to bahut achha hain, parantu dhaarna nambarvaar hoti hai yeh bhi drama mein noondh hai। drama anusaar naukar chaakar bhi banne hain। third class ticket bhi koi to zaroor lenge na। first class hai sooryavanshi raajdhaani, second class chandra-vanshi raajdhaani, third class hai praja। unmein bhi nambarvaar hain। ab jisko jo ticket chaahiye woh leve। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan gyaan ka saagar, pavitrata ka saagar banna hai। videhi banne ka abhyaas karna hai।

2) baap ki yaad se buddhi ko pavitra banaana hai। sada isi nashe mein rehna hai ki behad ke baap se ham 21 janmon ka varsa le rahe hain।

vardaan:- nyaarepan ke abhyaas dvaara paas with honour hone vaale brahma baap samaan bhav

jaise brahma baap ne saakaar jeevan mein karmaateet hone ke pahle nyaare aur pyaare rahne ke abhyaas ka pratyaksha anubhav karaaya। seva va koi karma chhoda nahin lekin nyaare hokar seva ki। yeh nyaara pan har karma mein saphalta sahaj anubhav karaata hai। to seva ka vistaar bhal kitna bhi badhaao lekin vistaar mein jaate saar ki sthiti ka abhyaas kam na ho tab hi double light ban karmaateet sthiti ko praapta kar double taajdhaari, brahma baap samaan paas with honour banenge।

slogan:- svayan ko aisa shakti stambha banaao jo aneko ko nai jeevan banaane ki shakti praapta ho।