Murli du jour du jeudi 30 mars 2023

30-03-2023 praatahmurli om shanti "baapdaada"' madhuban

“meethe bachche - sangadosh sanshaybuddhi banaata isliye sangadosh mein phansakar kabhi padhaai nahin chhodna, kaha jaata - sang taare kusang bore''

prashn:- baap ki kaun si shreemat tumhein kaudi se heere jaisa bana deti hai?

uttar:- baap ki shreemat hai bachche ghar grihastha mein rehte hue kamal phool samaan raho। jaise kamal phool ko keechad aur paani touch nahin karta, aise vikaari duniya mein rehte hue vikaar touch na karen। yeh tumhaara antim janma hai, nirvikaari duniya mein chalna hai isliye pavitra bano। isi ek shreemat se tum kaudi se heere jaisa ban jaayenge। svarga ka maalik ban jaayenge।

geet:- mujhko sahaara dene vaale…

om shanti। baap ne samjhaaya hai ki bhagwan ek hi hai jisne bhagavti ko racha। barobar bhagvaanuvaach hai। jaise barrister-vaach, surgeon-vaach.. yeh phir hai bhagvaanuvaach। bhagwan kehte hain main tumhein svarga ka maalik raajaaon ka raaja banaaoonga। yeh hai geeta। parantu manushya bhool gaye hain ki geeta ka bhagwan kaun tha। shreekrishna to tha svarga ka number one prince। itni oonch praalabdha kisne praapta karaai? oonch te oonch praalabdha hai raadhe-krishna athva lakshmi-naaraayan ki। yeh baat koi bhi samajh nahin sakte hain। raadhe-krishna svayanvar ke baad lakshmi-naaraayan bante hain। unhon ko yeh oonch pad kisne diya? shreekrishna kaun tha, shreenaaraayan kaun tha? yeh baaten tum hi jaanon। shreekrishna ko pyaar to bahut karte hain, jayanti bhi manaate hain phir jisse shreekrishna ka svayanvar hua unki bhi to mahima hogi। raadhe-krishna ko to ikttha hi dikhaate hain। unhon ko aisa kisne banaaya? rachayita ek niraakaar ko hi kaha jaata hai। saakaar ko kabhi creator nahin maanenge। incorporeal god father kehte hain। lakshmi-naaraayan satayug aadi mein the। abhi to hai kaliyug। yahaan manushya duhkhi kangaal hain। raaja raani to hain nahin। svarga ki to bahut mahima hai। koi marta hai to kehte hain phalaana svargavaasi hua। svarga yaad aata hai to zaroor svarga koi achhi cheez thi। narka mein jo marte hain, unko punarjanma zaroor narka mein hi lena pade। jaisa karma karte hain us anusaar yahaan janma lena padta hai। ab bhagwan hai niraakaar gyaan ka saagar, jisko sabhi maante hain। unka yaadgaar mandir bhi shiv ka hai। brahma vishnu shankar ka chitra denge to kahenge yeh brahma hai, yeh vishnu hai। bhagwan brahma va bhagwan vishnu nahin kahenge। bhagwan ek niraakaar ko kahenge। woh shiv hi hai।

abhi tum bachche jaante ho ham phir se lakshmi-naaraayan, bhagwan bhagavti ban rahe hain। kis dvaara? bhagwan dvaara। creator baap hai woh svarga ka rachayita hai। zaroor usne praalabdha di jo yeh svarga ka maalik banen। chitra to tum bachchon ke paas hain। yeh bhi manushya samajhte hain lakshmi-naaraayan satayug ke maalik the। sirf yeh bhool gaye hain ki lakshmi-naaraayan chhotepan mein raadhe-krishna the। satayug mein mahaaraaja mahaaraani the to zaroor unhon ka bachpan bhi hoga। unhon ki yeh praalabdha zaroor svarga ke rachayita ne banaai hogi। woh kab aaya - kisko bhi yeh pata nahin। shiv ka ling to hai। yeh shiv ka bada roop karke rakha hai। vaastav mein koi itna bada to nahin hai na। woh to star hai, unka koi chitra to samajh na sake। yeh sirf pooja ke liye bada chitra banaaya hai। to yeh devi-devta dharma kisne sthaapan kiya? naam chaahiye। Christian, bauddhi aadi sabko maaloom hai ki hamaara dharma phalaane ne sthaapan kiya। unka dharma shaastra yeh hai। pahle-pahle mukhya baat hi yeh hai isliye baba chitra banvaate hain। samjhaane ke liye hi banvaate hain। aage vaale chitron mein koi likhat thode hi thi। yeh to samjhaaya hai svarga ka rachayita hai parampita paramatma। svarga mein hai sada sukh। kya itne sab manushya vahaan honge? jhaad pahle chhota hota hai phir badhta jaata hai। svarga mein bahut thode honge। narka mein bahut hain। svarga mein sirf devi-devtaaon ki raajdhaani thi। yeh aur koi nahin jaante। poochhna chaahiye yeh srishti ka chakra kaise phirta hai? 5 hajaar varsha pahle barobar yahaan lakshmi-naaraayan ka raajya tha, usko svarga kaha jaata tha। woh past ho gaya। nai duniya jo thi, woh ab puraani narka ho gai hai। achha phir kya hoga? phir svarga aayega। bhakta yaad karte hain svarga va muktidhaam ko। kyon yaad karte hain? kyonki yahaan duhkhi hain। svarga mein to sadaiv sukh hota hai। baap thode hi bachchon ko rachkar duhkhi banaayenge। yeh to ho nahin sakta। tum jaante ho satayug se treta, dvaapar, kaliyug hona hai। satayug ka ant, treta ke aadi ka sangam koi kalyaankaari nahin hai kyonki satayug mein jo 16 kala sampoorn hain, vahi devi-devta phir 14 kala ban jaate hain। to woh kalyaankaari yug thode hi hua। phir treta ke ant, dvaapar yug ke aadi ka bhi sangam hua parantu usmein bhi kalaayen kam hoti hain। satopradhaan se sato, rajo, tamo mein girte hain। tamopradhaan banna hi hai। to is samay saari duniya duhkhi hai। isko kaha jaata hai orphans ki duniya। koi dhani dhoni nahin। ghar mein maa-baap nahin hote hain to sabhi aapas mein ladne lag padte hain। to kaha jaata hai tum to nidhan ke ho। woh hai had ki baat। abhi yeh hai behad ki baat। saari duniya ka koi dhani dhoni nahin hai। manushya, manushya mein ladte hain। jaanvar bhi ladte hain। koi dhani dhoni nahin hai। dhani hai baap rachayita। unke aane se hi sab bachche dhanke ban jaate hain। baap bachchon ko shantidham aur phir sukhdhaam le jaate hain। pahle satopradhaan phir sato, rajo, tamo। har ek cheez aise hi hoti hai। chhote bachche bhi satopradhaan hain isliye priy lagte hain। vahi bachche agar shiksha nahin milti hai to maa baap ko tang karne lag padte hain। tang to hote hain na। ladte-jhagadte beemaar ho padte hain। koi ko nuksaan padta hai to yeh bhi duhkh hota hai na। satayug mein koi bhi duhkhi nahin hota। woh hai hi sukhdhaam। baap bachchon ke liye svarga rachte hain, vahaan sadaiv sukh hai।

tum jaante ho yeh behad ki duniya nai thi, ab puraani hai। dehli puraani aur nai hai na। puraani alag hai, nai alag hai। nai dehli kitni achhi dekhne mein aati hai! aise nahin ki puraane ko koi uda denge, phir rahenge kahaan? yahaan nai-puraani donon hain phir yeh puraani toot karke nai banegi jisko hi svarga kaha jaata hai। dehli ko hi paristaan kehte hain। is samay hai kabristaan। satayug mein lakshmi-naaraayan ka raajya tha। dehli paristaan thi, svarga thi। ab narka hai। baap khud svarga ka maalik nahin bante hain, bachchon ko banaate hain। tum kehte ho baba hamko phir se svarga ka maalik bana rahe hain। itne sab nishchaybuddhi hain to dekhkar nishchaybuddhi banna chaahiye। koi london dekhkar aave aur varnan kare to aise thode hi kahenge ki ham jab dekhen tab maanen। yahaan to itne sab bachche kehte hain hamko bhagwan padhaate hain to jhooth to nahin bol sakte। parantu bhaagya mein nahin hoga to buddhi mein baithega nahin।

baap kehte hain ismen chhodna kuchh bhi nahin hai। yeh hai antim janma। grihastha vyavhaar mein rehte kamal phool samaan pavitra rehna hai। yeh hai mrityulok, woh hai amarlok। gaaya jaata hai sampoorn nirvikaari duniya। vahaan vikaar hota nahin। to maanna chaahiye na। barobar devtaaon ki mahima bhi karte hain sarvagun sampanna.. woh tha hi viceless world। achha, bachche to paida hote honge! zaroor koi yukti hogi? vikaar se nahin hote। vahaan yeh poison hota nahin। yahaan hain sampoorn vikaari, vahaan hain sampoorn paavan। yatha raaja raani tatha praja। ismen tumko sanshay kyon padta hai? vahaan ki jo rasam-rivaaj hogi usi anusaar bachche paida honge। vahaan vikaar hota nahin। yeh nature is mrityulok ka hai। vahaan to koi duhkh dete nahin। jaanvar bhi ek do ko duhkh nahin dete। woh bhi aise hi paida honge। ab tumko chaahiye kya? shanti chaahiye to apne ko aatma samajh baap ko yaad karo to mere paas chale aayenge। jo svarga mein aane vaale honge woh kahenge ham to gyaan zaroor lenge, sukh zaroor lenge। baap se svarga ka varsa lena hai। tum jaante ho ham behad ke baap se behad ka varsa le rahe hain। baap ki shreemat par chal rahe hain। chalte-chalte phir kahaan ulta-sulta toofaan aata hai to nishchay toot padta hai। maaya se haar kha lete hain। baap kehte hain kalpa pahle bhi aise varsa lete-lete haar kha li thi। vikaar mein phans gaya tha। gaaya bhi hua hai sang taare kusang bore। yeh hai sat ka sang। unki shreemat par chalne se ham nai duniya mein aa jaayenge। nishchay mein sanshay aa jaata hai to varsa mil na sake। aise bahuton ko nishchay hote-hote phir sanshay buddhi ho jaate hain। tum maat-pita kehte ho phir unko chhod dete, yeh bhi drama mein noondh hai। shivbaaba ke bane phir aise baap ko phaarakti devanti ho jaate। tumhein eeshvar ka banna hai ya raavan ka? ladaai hai na। koi to maaya par jeet praapta kar samajhte hain baba se varsa zaroor lena hai। shreemat par chalte rehte hain। album bhi tumhaare paas hai, jin sabhi bachchon ne pratigya ki hai ki hamko grihastha vyavhaar mein rehte kamal phool samaan pavitra rehna hai। kamal phool ko paani touch nahin karta hai। tumko vikaari duniya mein rehte hue vikaar mein nahin jaana hai। yeh hai tumhaara antim janma। apne ko nirvikaari banaane se tum nirvikaari duniya mein chale jaayenge। pavitra banna to bahut achha hai। baap kehte hain ki mere dvaara tum pavitra banenge to svarga pavitra duniya ka maalik banenge। patit duniya ab vinaash honi hai। kitna sahaj samjhaate hain - brahma dvaara svarga ki sthaapna। so to ho rahi hai। baaki sab hisaab-kitaab chuktu kar muktidhaam chale jaayenge। satayug mein tumko sachcha sukh milta hai। vaikuntha ka naam to mashhoor hai। barobar lakshmi-naaraayan ka raajya tha। manushyon ko to kuchh bhi pata nahin hai। sannyaasi khud nirvikaari bante hain to vikaari log unki pooja karte hain। vikaari aatma banti hai, paramatma nahin। woh samajhte hain ham nirvikaari ban paramatma ban jaate hain। to bhi do cheez to hain na। aatma aur paramatma। vikaari ko to paramatma nahin kaha jaata। woh samajhte hain ham nirvikaari ban paramatma ban jaayenge। baap kehte hain aise to ho nahin sakta। koi bhi mil nahin sakta। main aakar sabko vaapis le jaaoonga। nishaani bhi hai mahaabhaari ladaai। bachchon ko raajayog sikha raha hoon। mahaabhaari ladaai hai to bhagwan bhi zaroor hona chaahiye, jo sabhi jhanjhaton ko hataaye, sabhi ke jhagde khatma kar de। sarvashaktimaan to baap hai na। kehte hain agar tum meri mat par chalenge to main tumko svarga ka maalik banaaoonga। kalpa-kalpa tum meri shreemat se aise shreshtha bante ho। aadhaakalpa baad jab meri mat poori ho aasuri mat shuru hoti hai to tum kangaal kaudi jaise ban padte ho। ab phir tumko kaudi se heere jaisa banaata hoon, to shreemat par chalna chaahiye na। baba kitna sahaj samjhaate hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi toofaan ke kaaran nishchay mein kami na aaye - iske liye sangadosh se apni sambhaal karni hai। shreemat par poora-poora chalna hai।

2) is antim janma mein shreemat par sampoorn nirvikaari zaroor banna hai। vikaari duniya mein rehte hue vikaar touch na karen, yeh sambhaal karni hai।

vardaan:- apne har karma dvaara divyata ki anubhooti karaane vaale divya jeevandhaari bhav

baapdaada ne har ek bachche ko divya jeevan arthaat divya sankalp, divya bol, divya karma karne vaali divya moortiyaan banaaya hai। divyata sangamayugi braahmanon ka shreshtha shrringaar hai। divya-jeevandhaari aatma kisi bhi aatma ko apne har karma dvaara saadhaaranta se pare divyata ki anubhootiyaan karaayegi। divya janmadhaari brahman tan se saadhaaran karma aur man se saadhaaran sankalp kar nahin sakte। ve dhan ko bhi saadhaaran reeti se kaarya mein nahin laga sakte।

slogan:- dil se sada yahi gaate raho ki paana tha so pa liya...to chehra khushnumah rahega।