Murli du jour du vendredi 31 mars 2023

31-03-2023 praatahmurli om shanti "baapdaada"' madhuban

“meethe bachche - apna mijaaz bahut meetha banaao, bhoole-chooke bhi kisi ko duhkh mat do, bure vachan kehna, krodh karna, daantana… yeh sab duhkh dena hai''

prashn:- maaya bachchon ki pareeksha kis roop mein leti hai? us pareeksha mein adol rahne ki vidhi kya hai?

uttar:- mukhya pareeksha aati hai kaam aur krodh ke roop mein। yeh donon mushkil hi peechha chhodte hain। krodh ka bhoot ghadi-ghadi darvaaja khadkaata hai। dekhta hai yeh kahaan bhaun-bhaun to nahin karte। anek prakaar ke toofaan deepak ko hilaane ki koshish karte hain। in pareekshaaon mein adol rahne ke liye ek sarvashaktimaan baap se yog rakhna hai। andar khushi ke nagaade bajte rahen। gyaan aur yogbal hi in pareekshaaon se paas kara sakta hai।

geet:- nirbal ki ladaai balvaan se...

om shanti। bachche samajhte hain aur baap bhi samjhaate hain ki tum phir se aaye ho paarlaukik baap ke paas aur sab hain laukik baap। yahaan hain sab aasuri buddhi, satayug mein hain daivi buddhi। aasuri ke baad phir daivi zaroor banna hai। aasuri aur daivi, patit aur paavan mein farka bahut hai। tum jaante ho ham paavan the phir raavan ne patit banaaya hai। abhi phir baap dvaara ham phir se paavan duniya ka varsa le rahe hain, satayugi raajya-bhaagya ka - woh bhi 21 janmon ke liye। jab baba bachchon ko kehte hain tab yaad karte hain, phir bhool jaate hain। jo baat yaad rehti hai woh phir auron ko samjhaane ke liye dil tapakti hai। yaad nahin hogi to dil tapkegi nahin। phir woh khushi ki uchhal nahin aayegi। murjhaai hui shakla dikhaai degi। abhi tum jaante ho ham phir se gavaaya hua satayug ka raajya-bhaagya le rahe hain। woh jo Christian se raajya ganvaaya tha woh to le liya। parantu maaya ne hamaara raajya chheena hai, yeh koi ko pata nahin hai। Christian se to raajya le liya hath se, bhookh hadtaal aadi karke। yahaan to woh koi baat nahin। tumhaari dil mein hai ham 5 hajaar varsha pahle muaaphik phir se raajya-bhaagya praapta karte hain, baap ki shreemat par chalne se। ismen talvaar aadi kuchh bhi chalaane ki mat nahin dete। kehte hain bachche sweet temper bano। bahut meethe bano। satayug mein sher bakri bhi ikatthe jal peete the। ek do ke pyaar mein rehte the। duhkh ka vaar nahin hota। yahaan duhkh ka vaar bahut hota hai। kaam kataari chalaana, yeh bhi duhkh ka vaar hai। kisko bure vachan kehna va krodh karna, daantana yeh bhi duhkh dena hai। baap kehte hain kisko bhi yeh duhkh nahin dena hai। apna mijaaz bahut meetha banaao। bhoole-chooke bhi duhkh dene ka kaam nahin karo। shreekrishna ke liye kehte hain itni raaniyon ko bhagaaya। to bhi kehte hain bhagaaya sukh dene ke liye। abhi tum samajh gaye ho shreekrishna ki baat nahin hai। bhaagvat ke saath geeta ka, geeta ke saath phir mahaabhaarat ladaai ka connection hai। abhi vahi sangamayug hai। shreekrishna ka to naam hi nahin। shreekrishna ki raajdhaani hai satayug mein। shreekrishna ne koi patit ko paavan banaane ke liye kabhi raakhi nahin baandhi। yeh hai patit ko paavan banaane ka utsav। so to patit-paavan paramatma hi hai na ki shreekrishna। shreekrishna ka janma to satayug mein hua। vahaan to kans, raavan, soopankha aadi ho na saken। yeh is samay hain aasuri sampradaay। in sab baaton ko tum abhi samajhte ho। tumhaari buddhi mein hai hamne behad ke baap se anek baar raajayog seekha aur 21 janma raajya pad paaya hai phir maaya se raajya-bhaagya ganvaaya hai। jo mo baap daade ke dil par chadhe hue bachche hain, vahi takhtansheen banenge। jo pharmaanbardaar nahin woh kya pad paayenge। pad paana chaahiye sooryavanshi। nahin to paai paise ke daas daasi jaakar banenge। baapdaada ki aagya par nahin chalte hain। brahma ki mat bhi mashhoor hai। shivbaaba ki shreemat bhi mashhoor hai। to brahma aur shivbaaba ke saath unhon ke aulaad ki bhi mat mashhoor honi chaahiye। tumko shivbaaba aur brahma donon ki mat par chalna chaahiye tab to shreshtha banenge। maat-pita bhi shreshtha banne ke liye kitni achhi dhaarna karte hain, sab bachchon ko padhaate hain। murli sab bachchon ke paas jaati hai। inka part hi hai padhaane ka। kai bachche aise bhi hain jo mo baap se bhi achha padhaate hain। shivbaaba ki to baat hi oonch thahri। parantu mama baba se bhi is samay hoshiyaar bachche hain। bhal sampoorn to koi bana nahin hai। kuchh na kuchh kaante bhi lagte hain, maaya ka vaar hota hai। deeve ko toofaan lagte hain। jitna gyaan aur yog mein rahenge to is ghrit se tumhaari jyoti jagi rahegi। koi deepak mein ghrit thoda kam ho jaata hai to light kam ho jaati hai। koi ka deeva bahut achha jalta rehta hai। aatma roopi deeve ko hi toofaan lagta hai। toofaan to lagenge, baba kehte hain number one anubhvi main hoon। rustam se zaroor maaya rustam hokar ladegi।

baap samjhaate hain he deeve aise-aise toofaan aayenge, parantu karmendriyon se koi paap karma nahin karna। koi ne kuchh kaha to ek kaan se sun doosre se nikaal diya, aisa abhyaas karna pade। krodh bhi manushya ki poori hi satyaanaash kar deta hai। yeh bhi badi pareeksha hoti hai। krodh ka bhoot aakar darvaaja thokte hain, dekhen bhaun-bhaun karte hain। agar koi bhaun-bhaun karne lag padte hain to deeva bujh jaata hai। maaya sabki pareeksha leti rehti hai। samjha jaata hai inmen to krodh tha nahin। ab phir inmen krodh aa gaya hai। baba ke paas bahut achhe-achhe bachche the, maaya ka toofaan sahan nahin kar sake to gir pade phir kaha jaata hai kismat। ham pareeksha mein thahar nahin sakte। bachchon ko to pareeksha mein bada adol rehna hai, angad misal। yeh bhi ek misaal hai।

tum bachchon ke andar khushi ke nagaade bajne chaahiye। sarvashaktimaan baba ke saath yog rakhne se madad aapehi milti rehti hai। koi hathiyaar panvaar nahin lete। baba sab yukti sikhlaate hain। baap ko yaad karo to vikarma vinaash honge। krodh ki bhi stages hoti hain। kaam ka bhoot to bada kharaab hai। shal koi mein kaam ka bhoot phir se pravesh na kare। unko yogbal se nikaal dena hai। yog se hi krodh ka bhoot bhi nikalta hai। ghadi-ghadi darvaaja khatkaate hain। kahaan margin dekhi aur ghus padte। yeh 5 chor andar bahut ghaata daal dete hain। ham kitne saahookaar the, 5 vikaaron ne kitna kangaal bana diya hai। inka bada sardaar hai kaam, second number hai krodh। kaam bachchu baadshaah hai। bada mushkil se peechha chhodte hain। bada bhaari dushman hai, bahut tang karte hain। bichaari ablaayen kitni maar khaati hain। unhon ki phariyaad suni nahin jaati। yeh phariyaad sirf ek baap hi sunne vaala hai। parantu woh bhi sachche jo honge unhon ki sunenge। jhoothon ki nahin। to yeh vikaar manushya ko ekdam dirty bana dete hain। krodh ki beemaari uthal padi to krodh apni bhi satyaanaash karaate hain, doosre ki bhi khuraak banda ho jaati hai। hangaama hota hai। to baap se jo khuraak lene aate hain unhon ka woh banda ho jaata hai। unhon par bandhan aa jaata hai। phir unki avinaashi bhavishya janma-janmaantar ki aajeevika band ho jaati hai। aise jo parampita paramatma se varsa lene mein vighna daalte hain un par kitna paap padega। baat mat poochho। woh jaise ki apne oopar kripa ke badle shraap daalte hain। koi traitor ban jaate hain to kitne ka nuksaan karte hain। bhavishya heere jaisa jeevan banaane mein rookaavat padti hai isliye baap kehte hain mahaapaapi, maha-besmajh, maha-kambakhta dekhna ho to yahaan dekho। koi akhbaar mein ulta-sulta daal lete hain to bichaari maataaon par kitni aapdaayen aa jaati hain। jaante hue aur phir kuchh karte hain to un par dharmaraaj ki kitni maar padegi। baap kehte hain aisa kaam koi nahin kare jo traitor bane aur ablaaon par atyaachaar ho। unko gaaji bhi kaha jaata hai। maathe mein khoon ka temperature chadh jaata hai to phir talvaar uthaakar maarne lag padte hain। phir unko phaansi par chadha dete hain। yahaan bhi aise ban padte hain। koi mein krodh ka bhoot aa jaata hai to kitnon ki aajeevika banda kar dete hain। baap kehte hain aise ke liye phir bahut kadi saja hai। jo traitor ban vighna daalte hain unke oopar bada paap chadhta hai। chadhe to chaakhe vaikuntha ras, gire to ekdam chaknaachoor..... ya to vaikuntha ka maalik ya to naukar chaakar। aisa kaam jo karega to itna hi paap aatma bhi banega। bahuton ko duhkh dene ke nimitta ban jaate hain। baba ko taras padta hai। maataaon ka to regard rakhna hai। vande maatram gaai jaati hai। baap aakar kalash maataaon par rakhte hain, un par atyaachaar bahut hote hain। to sikeeldhe bachchon ko madad bahut deni chaahiye। agar koi madad ke badle aur hi ulta kaam karte hain to kitna nuksaan ho jaayega। bahut sapoot banna hai। asur ko devta banaana hai।

baba tumhaara jeete ji naya chitra banaate hain। artist log chitra banaate hain na। phir jo bahut achha banaate hain unko inaam milta hai। yeh baap kehte hain main gyaan aur yogbal se tumhaare chitra aise bana raha hoon jo tumko yeh shareer chhodne ke baad ekdam first class shareer mil jaayega। to manushya se devta ban jaayenge। gyaan yogbal se tum kitne gore ban jaate ho। baba jaisa first class kaareegar koi hota nahin। yeh baap ka hi kaam hai manushya ko devta banaana। yeh hai number one service, jisse saari duniya palat jaati hai। us sweet father ko koi jaante nahin। sarvavyaapi kah dete hain। manushyon ki buddhi mein yeh bhi nahin hai ki yeh narka patit duniya hai। yeh sirf tum bachchon ki hi buddhi mein hai। bade-bade karodapti sabka dhan mitti mein mil jaayega। bade duhkhi ho marenge। aajkal to bade-bade aadmiyon ko bhi maarte rehte hain। dushmani kadi ho jaati hai to baat mat poochho। bada kharaab samay aana hai। ab tum bachche purushaartha kar rahe ho bhavishya ke liye aur koi bhi bhavishya ke liye purushaartha nahin karte hain। purushaartha mein phir maaya bhula deti hai phir jaise ke vaise ban jaate hain। maaya ekdam munh pher deti hai, isliye bahut sambhaal karni hai। jitna ho sake khushi se baba ko yaad karna hai। ham baap se 21 janma sukh ka phir se varsa le rahe hain। baap ko yaad karne se khushi hogi। woh in aankhon se mahal aadi dekhte hain tab khushi hoti hai। tum divya drishti se athva gyaan ke teesre netra se jaante ho ki ham baap se sada sukh ka varsa lete hain। agar baap ki mat par chalenge to। saavdhaan to karte rehte hain - bachche shreemat par bahut meethe bano, chup raho aur baap ko yaad karo।

tum bachchon jaisa saubhaagyashaali is srishti par koi nahin hai। tum svarga ka maalik bante ho। vahaan bada sukh hai। yeh bhi jaante hain raajayog vahi seekhenge jo kalpa pahle seekhe honge। tum dekhte ho pande service kar phoolon ko va kaliyon ko baagvaan ke paas le aate hain। phir unhon ko service ki aaphreen bhi milti hai। gyaan hai bahut sahaj। is jeevan ko most valuable kaha jaata hai। patthar se heere jaisa, gareeb se saahookaar bante hain। gaaya hua bhi hai ateendriy sukhmay jeevan gop gopiyon se poochho। kaun se gop gopiyaan? jaise baba ne sunaaya yeh hai badi lottery। baap svarga ka rachayita hai to baap aur svarga ko yaad karna bahut sahaj hai। vishwa ka maalik banna kam baat thode hi hai। vahaan doosra koi dharma hota nahin। bachche jaan gaye hain ki hamne aadhaakalpa anek prakaar ke duhkh dekhe hain। ab bahut achha purushaartha karna chaahiye। is duniya mein koi sukhi ho nahin sakta। vahaan to sab sukhi honge। aise sukh ke raajya mein oonch pad paane mein maja bahut hai। boxing mein ghadi-ghadi thappad khaate girte nahin rehna hai। vikaar mein gira to ekdam jor se chot lag jaati hai। krodh bhi bahut kharaab hai। ghadi-ghadi chot nahin khaani chaahiye, nahin to gir padenge। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aisa koi bhi karma nahin karna hai jo apne oopar kripa ke bajaae shraap aa jaae। koi bhi bhoot ke vash ho traitor kabhi nahin banna hai।

2) shreemat par bahut-bahut meetha banna hai, chup rehna hai। bahut meethe mijaaz se baat karni hai। kabhi kaam ya krodh ke vash nahin hona hai।

vardaan:- saral sanskaaron dvaara achhe, bure ki aakarshan se pare rahne vaale sada harshitmoorta bhav

apne sanskaaron ko aisa easy (saral) banaao to har kaarya karte bhi easy rahenge। yadi sanskaar tight hain to circumstance bhi tight ho jaate hain, sambandh samparka vaale bhi tight vyavhaar karte hain। tight arthaat kheenchaataan mein rahne vaale isliye saral sanskaaron dvaara drama ke har drishya ko dekhte hue achhe aur bure ki aakarshan se pare raho, na achchhaai aakarshit kare aur na buraai - tab harshit rah sakenge।

slogan:- jo sarva praaptiyon se sampanna hai vahi ichchha maatram avidya hai।