Murli du jour du samedi 29 avril 2023

29-04-2023 praatahmurli om shanti "baapdaada"' madhuban

“meethe bachche - shreemat hi shreshtha banaayegi, parmat va manmat shraapit kar degi, isliye shreemat ko kabhi bhi bhoolo mat''

prashn:- satopradhaan purushaarthi kaun aur tamopradhaan purushaarthi kaun? donon ka antar kya hoga?

uttar:- satopradhaan purushaarthi baap se poora varsa lene ka purushaartha va pratigya karte hain, woh yaad mein rahne ki race karte hain aur number one jaane ka lakshya rakhte hain। tamopradhaan purushaarthi kehte - jo takdeer mein hoga, achha, praja banenge to praja hi sahi। unke aage maaya ka aisa vighna aata jo race se hi baahar nikal jaate।

geet:- mujhko sahaara dene vaale…

om shanti। bachche jab sammukh baithte hain to jaante hain ham jeev aatmaayen hain। yahaan to jeev aatmaayen hi hongi na। jab aatma ko shareer nahin hai to nangi hai, use ashareeri kaha jaata hai। tum to shareer sahit baithe ho। aatma va param aatma jab tak shareer mein na aaye tab tak bol nahin sakte। tum jeev aatmaayen jaanti ho - ab baap ke sammukh baithe hain। hoobhu jaise 5 hajaar varsha pahle sammukh aaye the। bachche zaroor baap se hi varsa lenge। jaante hain - ham apne parampita paramatma behad ke baap ke sammukh baithe hain। kyon baithe hain? baap se behad ka varsa lene। jaise school mein samajhte hain ham teacher dvaara injeeniyri seekhte hain, bairistari seekhte hain। yeh em object rehti hai। tum bachche samajhte ho parampita paramatma hamko brahma ke tan se baith raajayog sikhaate hain। bhagvaanuvaach - yeh to bachchon ko samjhaaya hai ki bhagwan niraakaar ko kaha jaata hai। jeevaatma punarjanma zaroor leti hai। koi bhi sannyaasi se tum poochho - manushya punarjanma lete hain? to aise nahin kahenge ki nahin lete hain। nahin to 84 laakh janma kaise kehte। poochho - tum punarjanma ko maante ho? yeh to barobar hai, aatma sanskaaron anusaar ek shareer chhod phir doosra leti hai। aise-aise karte manushya 84 laakh janma nahin, parantu 84 janma lete hain। isse siddha hota hai pahla janma zaroor bahut achha satopradhaan hoga। last mein chhi-chhi tamopradhaan honge। 16 kala se phir 14 kala, 12 kala hoti jaayengi। punarjanma zaroor lete hain। poochhna chaahiye - achha, parampita paramatma ne punarjanma liya hai ya janma-maran rahit hain? dekho, yeh point bahut sookshm hai। agar kahenge janma-maran rahit hai to phir shiv jayanti siddha nahin hoti। kahenge shiv jayanti to manaai jaati hai। samjhaaya jaata hai - haan, shiv jayanti hai parantu janma ke saath phir marna jisko kaha jaata, woh nahin hai। agar mare to phir punarjanma leve। baap kabhi punarjanma nahin lete। woh is tan mein ek hi baar aate hain, bas। phir punarjanma mein nahin aate। parampita paramatma punarjanma rahit hain, woh kab satopradhaan se tamo nahin bante। aatmaayen to sab janma-maran mein aate-aate patit ban jaati hain, phir baap aate hain paavan banaane। isse siddha hota hai aatma hi patit hoti hai। aatma paavan aati hai phir maaya patit bana deti hai।

baap kabhi bhi bachchon ko gandi mat nahin de sakte। is samay ke patit manushya, patit mat dete hain। ab paavan baap kehte hain ki patit nahin bano arthaat vikaaron mein nahin jaao। raavan ki mat se duhkhadhaam ban gaya hai। pahle sukhdhaam tha, aise nahin baap hi sukh-duhkh dete hain, nahin। baap kabhi bachchon ko duhkh ki mat de nahin sakte। maaya hi duhkh deti hai। us maaya par jeet paane se hi tum jagat jeet bante ho। manushya maaya ka arth nahin samajhte, woh dhan ko maaya kah dete hain। kehte hain na inko maaya ka nasha bahut hai। parantu maaya 5 vikaaron ko kaha jaata hai। agar 5 vikaaron ka nasha hai to maaya ekdam kha jaati hai। satayug treta mein maaya ka nasha hota nahin। vahaan raavan ka but banaakar jalaate nahin। but kade dushman ka banaaya jaata hai। raavan raajya shuru hota hai aadhaakalpa se। deh-ahankaar aane se phir aur vikaar aa jaate hain। shaastron mein koi yeh baaten nahin hain। likha hua hai - devtaayen vaam maarga mein arthaat vikaaron me jaate hain। maaya ke vash hone se parvash ho jaate hain। parmat par chalte rehte hain। abhi tum chalte ho shreemat par। parmat maana maaya ki mat। shri arthaat shreshtha mat hai baap ki। woh hai parmat raavan ki mat isliye baap ne kaha hai aasuri sampradaay sab raavan ki janjeeron mein duhkhi hain।

manushyon ne satayug ki aayu laakhon varsha samajh li hai। to tum hisaab-kitaab bataate ho 5 hajaar varsha kaise hain। Christ ko do hazaar varsha hua, buddha ko 2250 varsha hua, phir islaami ko 2500 varsha hue। sabko milaakar aadhaakalpa hua। inke pahle to devtaaon ka raajya tha phir devtaaon ko laakhon varsha kaise kah sakte। itne varsha hote phir to manushya bahut ho jaate। itne to hain nahin। 5 hajaar varsha mein hi karodon manushya ho jaate hain। kehte bhi hain Christ se 3 hazaar varsha pahle bhaarat mein aadi sanaatan devi-devta dharma tha। 5 hazaar varsha poore ho jaate hain, naatak poora to hota hai na। in baaton ko koi jaante nahin hain। main jo hoon, jaisa hoon, yeh chakra kaise phirta hai। koi jaan na sake। baap hi samjhaate hain yeh hai geeta। baap ne aakar sahaj raajayog sikhaaya tha, tab unka naam geeta rakha hai। jaise Christ ne sikhaaya to unka naam Bible rakha hai, yeh anaadi naam rakhe hue hain। woh repeat hote hain। baba budhiyon ko bhi samjhaate hain, yeh bahut sahaj baat hai। sirf baap aur varse ko yaad karo। bachcha paida hua goya vaaris paida hua। tum samajhte ho ham baba ke vaaris hain। 5 hazaar varsha baad phir se milne aaye hain। ghadi-ghadi paanch hazaar varsha hi kahenge। 2-3 varsha peechhe aane vaale bhi kahenge ham 5 hazaar varsha baad phir se aaye hain। yeh badi guhya baaten hain। baba poochhte hain aage kab mile ho? kehte hain - haan baba। aatma is mukh dvaara kehti hai - ham 5 hazaar varsha pahle aapse mile the। aap is tan dvaara shiksha dene aaye the। jo pakke-pakke bachche hain samajhte hain ham baap se behad ka varsa lene baithe hain। ham behad ke baap ke bane hain brahma dvaara। baap kehte hain mujhe pahchaante ho? main tumhaara baap hoon। kahenge haan baba ham aatmaon ka aap parampita paramatma baap ho। baap hi kehte hain - tumko hamne svarga mein bheja tha, varsa diya tha phir maaya ne chheen liya phir ab main deta hoon। maaya varsa chheenti hai, baap dilaate hain। yeh to anek baar khel ho chuka hai, hota rahega। iska ant nahin hai। baap ke bante hain phir koi sage, koi lage। koi sautele, koi maatele bante hain। kachche pakke to hain na। pakkon ko bhi maaya ekdam jeet leti hai। bachche kehte hain baba ham jahaan tak jiyenge aap se varsa lete rahenge। vikarmon ka bojha sir par bahut hai to jitna tum yaad mein rahenge, us yog agni se tum aatma paapaatma se punyaatma banti jaayengi। aag cheez ko pavitra karti hai। tumhaari hai yog agni।

yeh hai behad ka yagya, jo behad ke seth ne racha hai। itna samay koi bhi yagya nahin chalta hai। 5-7 roz va ek maas yagya rachte hain। tumhaara yagya to kitne varsho se chala aata hai। baap sunaate hi rehte hain। kehte hain bhool mat jaana। sirf mujhe yaad karo to tumhaara janma-janmaantar ke vikarmon ka bojha katta jaayega। koi sannyaasi, vidvaan aadi ko aise kahne aayega nahin। bhagvaanuvaach - mujh baap ko yaad karo। zaroor aaya hua hai tab to kehte hain na। baap kehte hain - ab tumko vaapis jaana hai। tumhaari aatma is samay bahut patit hai। ab tum jaante ho yog se ham paavan bante jaayenge। baap kehte hain gyaan amrit peekar paavan svarga ka maalik bano। yeh saajan tum sab sajniyon ko paavan banaane aaye hain, kehte hain mujhe nirantar yaad karo। tumhaari hi pratigya hai ki aap jab aayenge to aur sang tod tum sang jodenge। tum par vaari jaayenge। stri purush par, purush stri par balihaar hote hain। yahaan hai baap par balihaar jaana। shaadi mein ek do par balihaar jaate hain na। ab baap kehte hain - manushya par balihaar nahin jaana hai। tumhaari pratigya hai aap par balihaar jaayenge। aap hamaare par balihaar hona। baap kehte hain tum balihaar jaao to 21 janma tumko sada sukhi bana doonga। kitna bhaari varsa hai! ab baap kehte hain - main tumko var arthaat varsa deta hoon, sirf tum nirantar mujhe yaad karo। shreemat se hi tum shreshtha banenge, yeh bhoolo mat। yeh lakshmi-naaraayan ka chitra bhi ghar mein rakh do। ham baap se phir se varsa le rahe hain। baap paramdham se aaya hua hai। parantu maaya cheel bhi kam nahin hai, panja maar deti hai। sabki baat nahin hai, nambarvaar hain। koi to ekdam bhool jaate hain ki ham baap se varsa lete hain। yahaan baithe hain to nasha chadhta hai। yahaan se baahar nikla aur bhoola। phir subah ko refresh hote hain, phir saara din bhool jaate hain। 4-5 varsha achhi service karne vaale bhi aaj dekho hain nahin। kuchh avagya ki to maaya ne jor se thappad maara aur chale gaye। baba kah dete hain bachche maaya bahut kadi hai। avagya karne se maaya ekdam gira deti hai isliye gaaya jaata hai chadhe to chaakhe prem ras... dekhte ho kaise chaknaachoor ho jaate hain। vaikuntha mein to zaroor chalenge। parantu pad to nambarvaar hai na। bhal vahaan sab sukhi rehte hain phir bhi martabe to hain na। school mein martaba paane liye hi purushaartha karte hain। aise nahin, praja hi sahi, jo takdeer mein hoga.....। nahin, isko tamopradhaan purushaartha kaha jaata hai। satopradhaan unko kahenge jo baap se poora varsa lene ka purushaartha va pratigya karte hain। yeh ghuddaud hai na। sab number one to nahin jaayenge। yeh human race hai। maaya aisa vighna daalti hai jo ekdam race se nikaal deti hai। tumhaari human race hai। aatma kehti hai ham bahut duhkhi hue hain। shareer lete-lete bahut tang hue hain। kehte hain ab baba ke paas jaayen। baba ne yukti to batlaai hui hi hai। baba ham aapki yaad mein rahenge। jitna time nikaal sako utna achha hai। jaise government ki service mein bhi 8 ghanta rehte hain na। to ismen bhi to 8 ghanta raho। srishti ko svarga banaana kitni bhaari service hai। sirf baap ko yaad karo aur sukhdhaam ko yaad karo। bas, 8 ghanta service ki to poora varsa paayenge। aise yaad karte-karte tumhaare vikarma vinaash honge। aath ghanta tum is service mein do। baaki 16 ghanta tum free ho। jitna ho sake ghadi-ghadi yaad karo। yaad to kahaan bhi baithe kar sakte ho। sabse achha time tumko savere milega। sindhi mein kehte hain - savel suman, savel uthan (savere (jaldi) sona, savere uthna... yeh gun manushyon ko bada karta hai) agyaani log 8 ghanta neend karte hain। tumhaari neend aadhi honi chaahiye। 4 ghanta neend bas। karmayogi ho na। raat ko 10 baje so jaao, 2 baje utho। shivbaaba ko yaad karo। 2 baje nahin uth sakte to 3 baje utho, 4 baje utho। woh first class samay hai। ekdam shanti rehti hai। sabhi ashareeri ban jaate hain। us samay sannaata bahut hota hai, jaise ki mool vatan ho jaata hai। aise lagta jaise sab mare pade hain। us samay tum baba ko yaad karenge to phir woh yaad pakki ho jaayegi। amritvele ki yaad achha asar karti hai। baba bahut karke raat ko jaagte rehte hain। sthool kaam mein aane se maatha bhaari hota hai। sookshm service mein thakaavat nahin hoti hai। kamaai thode hi thakaayegi। kamaai se to khushi hogi। to savere-savere uthkar yaad karne se badi kamaai hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) savere amritvele uth ashareeri ban baap ko yaad karne ka abhyaas karna hai। poora varsa lene ke liye yaad ki race karni hai। kam se kam 8 ghanta yaad zaroor karna hai।

2) ek baap par poora balihaar jaana hai। parmat va manmat par na chal ek baap ki shreshtha mat par chalna hai।

vardaan:- roohaani exercise dvaara wait (bojh) ko samaapta karne vaale samaan aur sameep bhav

roohaani exercise arthaat abhi-abhi niraakaari, abhi-abhi avyakt pharishta, abhi-abhi saakaari karmayogi। abhi-abhi vishwa sevaadhaari। aisi exercise roz karo to vyartha ka jo bojh hai vo samaapta ho jaayega। jab bojh (wait) samaapta ho, maashook samaan double light bano tab jodi achhi lagegi। yadi maashook halka ho aur aashik bhaari ho to jodi achhi nahin lagegi। roohaani maashook aashikon ko kehte hain samaan bano, sameep bano।

slogan:- apne jeevan roopi guldaste dvaara divyata ki khushbu phailaana hi gunmoorta banna hai।