Murli du jour du lundi 1 mai 2023

01-05-2023 praatahmurli om shanti "baapdaada"' madhuban

“meethe bachche - apni unnati ke liye amritvele uth baap ko yaad karo, savere ka samay kamaai ke liye bahut-bahut achha hai''

prashn:- sada salaamat rahne ka aadhaar kya hai? sada salaamat kise kahenge?

uttar:- baap ki shreemat hi sada salaamat banaati hai। kabhi bhi koi duhkh aur takleeph nahin hogi। tum bachche itne takdeervaan bante ho jo kabhi kisi prakaar ki chot nahin lag sakti। nirogi kaaya ban jaayegi। tum apni takdeer ki mahima gaate raho। jo uthte-baithte baap ki yaad mein rehte hain - woh hain takdeervaan bachche। unhein hi sada salaamat kahenge।

geet:- raat ke raahi…

om shanti। meethe-meethe purushaarthi bachche is geet ka arth to svayan jaante honge, nambarvaar purushaartha anusaar। jo yaatra par upasthit hain ve hi yathaartha arth samajh sakte hain। ab yeh yaatra hai raat ki aur jismaani yaatraayen hoti hain din ki। amarnaath, badreenaath par jaate hain to din ko saphar (musaaphiri) kar raat ko so jaate hain। aur tum bachchon ki musaaphiri hai raat ki। din mein to tumko shareer nirvaah arth kaam karna padta hai। naukri par jaate hain aur maataayen ghar sambhaalti hain। sabse jyaada unnati raat ko hoti hai, jabki sab manushya soye hue hote hain। tumhaari us samay badi achhi yaatra ho sakti hai। bhakta log bhi savere amritvele yaad mein rehte hain। bachche apni unnati karna chaahte ho to baap raay dete hain - neend ko jeetne vaale bano। 5 hazaar varsha pahle bhi kaha tha। bhal savere so jaao। kahaavat hai “savere sona savere uthna'' - yeh gun manushyon ko bada banaata hai। barobar tum kitne saahookaar bante ho, jo kabhi tumko paise ki parvaah nahin rehti! tumko 21 janma ke liye varsa mil jaata hai shivaalay mein। yahaan to tum janma by janma purushaartha karte ho aur abhi ka tumhaara purushaartha 21 janmon ka ban jaata hai। wonder hai na। aisa koi bhi purushaartha karaane vaala hai nahin। avinaashi baap avinaashi purushaartha karaate hain। yahaan to paise ke liye kya nahin karte hain - baap bachchon ko, bachche baap ko bhi maar daalte hain।

tumhein ab avinaashi baap se avinaashi varsa lena hai, to avinaashi baap aur varse ko yaad karna hai। aur koi takleeph nahin, sirf do akshar hain। isko mahaamantra kaha jaata hai। bas, yeh do akshar yaad karne se tumko raaj-tilak mil jaata hai। ab is yaad mein hai bal। jitna jo yaad karenge। yog aur gyaan। shaastron aadi ke gyaan ki yahaan baat nahin। do akshar yaad karne ke liye kehte hain to phursat nahin rehti hai। kah dete hain ham yaad nahin kar sakte, ghadi-ghadi bhool jaate hain। do akshar ki yaatra nahin kar sakte! tum log geet, kavita, dialogue banaate ho, yaad karte ho, vaastav mein in sabki yahaan darkaar nahin hai। yahaan to chup rehna hai। kya tum beej aur jhaad ko nahin samajh sakte ho। beej ko haath mein lene se hi saara jhaad saamne aa jaayega। ismen chaar yug aur chaar varna hain। yeh sab buddhi mein laana, deri nahin lagti hai। second mein svarga ki baadshaahi mil jaati hai। sirf yaad mein rehna hai। second mein saakshaatkaar karaaya jaata hai। us samay jaise svarga va krishnapuri mein hain। sirf do baaten yaad karni hain - ek to baap ki yaad, doosra yeh knowledge bahut oonch hai manushya se devta banne ki। devtaayen to pavitra hote hain। knowledge hamesha brahmacharya mein padhi jaati hai। jab padhkar ghar sambhaalne laayak banen tab baad mein shaadi karni hoti hai। apne ghar vaalon ko creator sambhaalenge, isliye apni kamaai chaahiye na। to brahmacharya mein kamaai hoti hai। aajkal to dhan ke bhookhe ho gaye hain। thodi aamadni hui phir doosra course karte hain। ab baap kehte hain - bachchon, yeh course bahut sahaj hai sirf shreemat par raat ko jaagkar practice karo। raat ko buddhi ki yaatra karna bahut sahaj hai aur madad bhi bahut milegi। do teen baje amritvela kaha jaata hai। savere uthkar svadarshan chakra phiraana hai। yeh buddhi ka kaam hai। baap ka pharmaan hai - nirantar mujhe yaad karo to tumhaare vikarma vinaash hote jaayenge। nahin to tum sajniyon ko kaise le jaayenge। tum sajniyaan ho patit, sabke pankh toote hue hain। ab sirf yaad karo to pavitra ban jaayenge। savere uthne ka prayatna karo। din mein to yaad na bhi thahre, raat ko purushaartha karna sahaj hai aur madad bhi bahut milegi। mukhya hai yaad। tum jaante ho ham aatma hain। hamko parampita paramatma padha rahe hain। unse padhna hai। woh baap bhi hai, unka banna hai। tum jaante ho ham aatmaayen aakar shivbaaba se mili hain। aatma paramatma alag rahe bahukaal... jeev aatmaayen aakar baap se milti hain। to zaroor paramatma ko bhi jeev aatma banna pade। woh to supreme aatma hai। aatma paramatma ka roop ek hi hai। jaise stars chamakte hain, aatma mein 84 janmon ka part bhara hua hai। baap kehte hain main bhi actor hoon। main bhi drama ke bandhan mein baandha hua hoon। yeh duniya nahin jaanti ki kalpa-kalpa sangamayug ke sivaae kab aa nahin sakta hoon। aaphten aadi to bahut aati rehti hain। baap kehte hain main aata hi tab hoon jab sab patit ban jaate hain। main hi nai duniya ka rachayita hoon। aata hi patit duniya mein hoon। patit pahle aatma banti hai। aatma jaanti hai ham pahle paavan the, ab patit bane hain। yeh shiksha tumko hi milti hai। teacher ke saamne jo student hote hain unko hi shiksha milti hai। tumko yeh shiksha pahle-pahle milti hai। in 5 vikaaron ko jeeto। yog agni se vikarmon ko bhasma karo। is vish (vikaar) ne hi tumko kabradaakhil kar diya hai, isko poison kaha jaata hai। gyaan amrit se tum pavitra ban jaate ho।

baap aur varse ko yaad karna, hai to bahut sahaj। kai bachchiyaan kehti hain baba dhaarna nahin hoti, badi bahnon muaaphik samjha nahin sakte hain। baap kehte hain - bachche, yeh to harek ke karma ka hisaab-kitaab hai। koi to 25-30 varsha rehte hue bhi dhaarna nahin kar sakte hain। tum aatmaon ka to baap paramatma hai। woh svarga ka rachayita hai। baap svarga ka varsa dene hi aaye hain। tum baap ko to yaad karo। bachchon ko bhi hoshiyaar karna hai। tum bachchon ko pahle raham karna chaahiye - apne bachchon par। tum bachche samajhte ho ham is samay apne most beloved parampita paramatma ke sammukh baithe hain। kalpa pahle bhi hamne niraakaar baap se behad ka varsa svarga ka liya tha। baap kehte hain mujhe bhi is shareer ka loan lena padta hai। kiraaye par baithe hain। apna na hone se zaroor kiraaye se hi lenge। yeh rath hai jismen kalpa-kalpa rathi bante hain। rath mein rathi dekh rahe hain na। aage to geeta padhne se kuchh bhi samajh mein nahin aata tha। kahaan woh arjun aur ghodon ka rath baith dikhaaya hai। tumhaara baap rathi hai, bachchon ko kehte hain mujh baap ko yaad karo phir chart rakho। aisa saajan jo 21 janma sukh dete unko kyon nahin yaad karenge। parantu yeh hai gupta। ab baap kehte hain apne ko aatma nishchay kar phir baap ki shreemat par chalna hai, ismen hi maaya bada hairaan karti hai। woh bhi kam ustaad nahin hai। achhe-achhe bachchon ko bhi jeet leti hai। baba svarga ka maalik banaave aur maaya chandaal ke janma mein le jaave kyonki shreemat chhod dete hain। yahaan bachche jaante hain hamko bhagwan padhaate hain। tum godly student ho na। bhal doosra bhi course uthaate phir bhi teacher ko yaad karenge। baap kehte hain - bhal grihastha vyavhaar mein raho, parantu sada sukhi banne ke liye saath mein doosra course uthaao। main tumhein athaah dhan deta hoon jo tum 21 janma kabhi duhkh nahin dekhenge। tumhaare jaisa aklamand srishti bhar mein koi nahin hota। president aadi ki kitni mahima karte hain। parantu tum most wonderful incognito badi authority ho। tumhaare jaisa knowledgeful is duniya mein koi ho nahin sakta। ab tum bachche jaante ho bhaarat ko ham svarga banaae 21 janma ke liye svarga ka maalik ban rahe hain। jagat amba ko kitni badi praapti hai। woh bhi yahi mahaamantra deti hai ki shivbaaba ko yaad karo। baap sammukh kehte hain - laadle bachche, mujhe yaad karo। yeh yaatra bhoolo mat। time vesta na karo। yeh bahut bhaari kamaai hai। buddhiyog vahaan lag jaana chaahiye। ham shivbaaba ke sammukh hain। baap ke ghar aaye hain। abhi to tum haridvaar mein baithe ho। hari paramatma khud baithe hain। vahaan to paani hai। yeh sachcha-sachcha hari ka dvaar hai। har har yaani duhkh harne vaala। yahaan woh duhkh harta sukh karta tumhaare saamne baitha hai। bhakta log jaakar ganga ke kinaare baithte hain, samajhte hain ganga ka tat ho, ganga jal mukh mein ho। jab koi marte hain to gangaajal pilaate hain। ab ganga patit-paavni nahin hai। patit-paavan hai hi shivbaaba। harek ko yaad us shivbaaba ko karna hai to ant mati so gati ho jaayegi। aise nahin, pichhaadi mein koi baith kahenge shiv-baba ko yaad karo। ant mein aapehi shivbaaba ki yaad mein shareer chhodna hai। ab hamko shivbaaba ke paas jaana hai muktidhaam। satayug ko jeevanmuktidhaam kaha jaata hai। dhaam rahne ke sthaan ko kaha jaata hai। nirvaandhaam mein niraakaar aatmaayen brahm tatva mein rehti hain। ab tum aakar hari ke ghar mein baithe ho। duhkh harne vaala ek hi hai। ab tum bachchon ko shivbaaba aur unka sweet hom yaad aayega। baba aaye hain apne ghar le chalne। ab shivbaaba ke sweet hom ko yaad karna hai। yahaan to koi sweet hai nahin।

ab baap bachchon ko kehte hain - behad ki raajaai leni hai to raat ko jaagkar yaatra karo। main aata hi hoon ghor andhiyaari raat mein। brahma ki raat poori ho din hona hai। main aata hoon behad ki raat aur behad din ke sangam par। to tum bhi raat mein neend ko jeet yaad karne ka abhyaas karo। 2-3 baje ke samay ko brahm mahoorta kaha jaata hai। baap shiksha dete hain brahma dvaara। raat ko jaag mujhe yaad karo to phir pakke ho jaayenge। maaya bahut sataayegi phir bhi mehnat karo। ismen mehnat saari buddhi ki hai। uthte, baithte, chalte yaad mein rehna hai। baap kehte hain thak mat jaana raat ke raahi। raat ko bahut maja aayega। phir woh nasha din mein bhi chalega। ek to baap ko yaad karo aur apni takdeer ki mahima karo। aur sabki takdeeren phooti hui hain। tumhaari takdeer ab jag rahi hai, auron ki so rahi hai। jinka buddhiyog is samay dhan kamaane mein rehta hai unki takdeer soi hui samjho। sachchi takdeer tumhaari jag rahi hai। pet koi jaasti thode hi khaata hai। bheel log kya khaate hain? mirchi aur makaai chane ka aata milaae roti kha lete hain। yahaan to tumko sab kuchh milta hai। tumko bahut saadhaaran rehna hai। na bahut saahookaari, na bahut gareebi। ab baap kehte hain - he laadle bachche, mujhe yaad karo। main tumko naynon par bithaae le chalta hoon। mere noore ratnon। noorechishma bachchon ko hamesha pyaar kiya jaata hai। shreemat par chalne se sada salaamat rahenge। sada salaamat ka arth bhi bada bhaari hai। tumko chot nahin lagegi, koi takleeph nahin hogi। itna tumko sada salaamat banaata hoon। nirogi kaaya rahegi। na kaal ki taakat hai। agar achhi reeti yaad karenge to madad milegi। jinhonne kalpa pahle purushaartha kar apni praalabdha banaai hai। saakshi ho dekh rahe hain, yeh apne ko insure karte hain! baba bhakti maarga mein bhi insure magnate hai। eeshvar arth nikaalte hain। gareebon ko gupta daan dete hain। koi ko shaadi karaani hoti hai to gupta de aate hain। gupta daan ka phal bhi aisa milta hai। show karne se unki taakat aadhi ho jaati hai। magnate baap ko kehte hain, tum insure karte ho। jo jaisa apne ko insure karte hain vaisa phal milta hai। paap karte hain to uska danda mil jaata hai। punya ka phal achha milta hai। woh hote hain had ke philanthropist। kamaai mein se 8 aana, 4 aana bhi nikaalte hain। ab to tumko complete philanthropist banna hai। full insure kar dena hai। dekho, mama ne sirf tan aur man insure kiya। kanyaaon ke paas to dhan hota hi nahin। unhon ko yeh khyaal nahin rakhna hai। woh phir tan-man se seva kar rahi hain isliye kanyaayen bahut pyaari lagti hain। kanyaayen number one mein aa jaati hain। baba adharkumaar tha। haan, koi kumaar nikalte hain। svayanvar rach pavitra rah dikhaate hain to aho saubhaagya। surrender bhi poora ho। woh bahut achha pad pa sakte hain। baba samjhaate hain karmon ka bhog bhi saara yahaan chuktu karna hai। mama-baba ko bhi karma ka bhog bhogna padta hai। raha hua hisaab-kitaab yahaan hi niklega। aise nahin, eeshvar ka bana hoon phir raksha kyon nahin karte। nahin, karmabhog to zaroor yahaan hi chuktu karna hai। achha।

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) buddhiyog se sachchi yaatra karni hai। vinaashi dhan ke peechhe apni takdeer nahin ganvaani hai। sachchi kamaai karni hai।

2) tan-man-dhan se poora philanthropist (mahaadaani) banna hai। apna sab kuchh 21 janmon ke liye insure kar dena hai।

vardaan:- divya buddhi ke bal dvaara parmaatma touching ka anubhav karne vaala master sarvashaktimaan bhav

divya buddhi ko buddhibal kaha jaata hai is buddhibal dvaara hi baap se sarvashaktiyaan catch kar master sarva-shaktimaan bante ho। jaise science buddhibal hai lekin woh sansaari buddhi hai isliye is sansaar ke prati, prakriti ke prati hi soch sakte hain। aapke paas divya buddhi ka bal hai jo parmaatma praapti ki anubhooti karaata hai। divya buddhi dvaara har karma mein parmaatma pure touching ka anubhav kar saphalta ka anubhav kar sakte ho। divya buddhi ke bal se maaya ke vaar ko haar khila sakte ho।

slogan:- master gyaan soorya ban sarva ko gyaan ki light might dene vaale hi sachche sevaadhaari hain।

is maas ki sabhi murliyaan (eeshvareey mahaavaakya) niraakaar paramatma shiv ne brahma mukhakmal se apne brahmaavatson arthaat brahmaakumaar evan brahmaakumaariyon ke sammukh 18-1-1969 se pahle uchchaaran ki thi। yeh keval brahmaakumaareez ki adhikrit teacher bahnon dvaara niymit BK vidyaarthiyon ko sunaane ke liye hain।