Murli du jour du samedi 10 juin 2023

10-06-2023 praatahmurli om shanti "baapdaada"' madhuban

“meethe bachche - ashareeri banne ki drill number one drill hai, isse vaayumandal mein sannaata chha jaata hai, baap ka direction hai - isi drill ka abhyaas karo''

prashn:- duniya ke anek vighnon ke beech mein rehte hue ekras aur khushi mein kaun rah sakte hain?

uttar:- jo kisi bhi vighna ki parvaah nahin karte। tumhaare dushman to anek hain, vighna daalenge, kalank lagaayenge, gaali denge - lekin yaad rahe ki kalank lagne se hi tum kalangeeghar bante ho। kehte hain shreekrishna ne chauth ka chandrama dekha isliye us par kalank lage। lekin abhi tum bachchon par bahut kalank lagte hain। ant mein tum kahenge - he bhaaratvaasiyon, dekho tumne bahut kalank lagaaye aur ham abhi kalangeedhar bante hain।

om shanti। bachchon prati shivbaaba ka pharmaan hai। shivbaaba kehte hain main drill teacher hoon na। kehte hain ashareeri bhav। bachche, svadharma mein tik jaao। manamnaabhav, maamekam yaad karo। yeh to jaante ho ab dharma ki glaani hai। geeta mein hai - yada yadaahi … yeh shlok janma-janmaantar ham gaate aaye hain। jabse bhakti maarga shuru hua geeta ka paath karte aaye hain। shivbaaba ki pooja karte aaye hain। vahi shivbaaba ab kehte hain maamekam yaad karo। tum par phir se maaya ka parchhaaya pad gaya hai। ab main aaya hoon maaya par jeet pahnaane ke liye isliye manamnaabhav kyonki tumko vaapis jaana hai mere paramdham mein। agar shreekrishna hota to kehte - madhyaajeet bhav। shreekrishna ko krishnapuri mein yaad karo। gyaan ka daata koi shreekrishna nahin hai। woh to hai shiv। shiv ki hi pooja hoti hai, unko paramatma kaha jaata hai। to ham aatmaon ko vahaan jaana hai, isliye baba drill sikhlaate hain। yeh hai number one drill - manamnaabhav, ashareeri bhav। tum sab brahman unko yaad karenge, agar koi shoodra yahaan aur koi khyaalaat mein baitha hoga to vaayumandal ko kharaab kar dega। us ek ko jab sabhi yaad karenge to sannaata chha jaayega। jaise koi marta hai to sannaata ho jaata hai। aatma ke ashareeri hone ka prabhaav padta hai। to ab baba kehte hain - tum sab aatmaon ko vaapis le jaaoonga। kaal to ek aatma ko le jaata hai। main to kaalon ka kaal hoon। main sabko lene aaya hoon। aur main aata hoon saadhaaran brahma tan mein। main manushya srishti ka beejroop chaitanya hoon। maine hi geeta sunaai thi। dekho, tumhaare par ab kalash rakha hai na। shreekrishna ki gopiyon ko bhi kalash dikhaate hain। kehte hain - shreekrishna ne matki todi। ab woh matki kaahe ki? tumhaare sir par jo vikaaron ki matki hai, unko todte hain aur gyaan amrit ka kalash dete hain। baaki satayug mein thode hi koi aisi baat ho sakti hai। gopiyaan tum ho। gopi vallabh ki gopiyon par jo jahar ka kalash tha - woh phod gyaan amrit ka kalash rakhte hain। to ismen buddhi bahut achhi chaahiye tab dhaarna ho sakegi। gopiyon ka vallabh (baap) to hai shivbaaba। shreekrishna ko vallabh nahin kah sakte। likha hai ki gopiyon ko bhagaaya। ab baap thode hi bhagaayenge। yeh to kaayda nahin hai। baba samjhaate hain jab koi mahaatma kahe ki shivoham to bolo ki ek taraph kehte ho mahaatma yaani mahaan aatma phir apne ko paramatma athva shivoham kyon kehte ho? mahaan aatma to pavitra aatma thahre। yeh raaz samjhaana hai। isko gyaan ka dharma yuddha kaha jaata hai। unhon ke paas hai shaastron ki mat aur tumhaare paas hai shreemat। baba kehte hain - main aata hi tab hoon jab raajayog sikhlaana hai। bhaarat ke oopar hi yeh saara khel hai। hero-heroine ka part bhaaratvaasiyon ko mila hua hai। vaastav mein vande maatram bhi in maataaon ko kaha jaata hai। woh log to bhoomi ko maatram kehte hain। bhoomi to tatva hai, unko thode hi maata kaha ja sakta hai। is dharni mein rahne vaali tum maataayen ho। tumko vande maatram kaha jaata hai। woh bhoomi ko vande maatram kehte hain, to bhoot pooja ho gai। abhi tum bachche yogbal se apni baadshaahi lete ho। sab mehnat karte rehte hain - pavitra ban baadshaahi lene liye। jis taraph saakshaat sarva samartha sarvashaktimaan hai, unki hi jeet honi hai। paramatma ki mahima bilkul alag hai। woh aakar drill sikhlaate hain ki maamekam yaad karo। aur sab tumko duhkh dene vaale hain। sabhi dushman ban vighna daalte hain। yeh koi nai baat nahin hai। hamko koi duniya ki parvaah thode hi hai। shreekrishna ke liye kehte hain - chauth ka chandrama dekha tab itni gaali khaai। kalank jin par lagaate hain vahi phir kalangeedhar banenge। phir ant mein kahenge - are bhaaratvaasiyon, tumne humein kitni gaali di! dekho, ham yeh ban rahe hain, raajya-bhaagya le rahe hain। ladaai ke maidaan par to bahut sahan karna padta hai। to jo raajya-bhaagya dete hain, un par balihaar jaana padta hai। yeh shivbaaba samjha rahe hain। yeh daada apne ko bhagwan nahin samajhte hain isliye shivbaaba kehte hain - bachche, yeh tumhaara kalpa-kalpa ka part hai। tum bhi kahenge jab-jab dharma ki glaani hoti hai tab baba aate hain। ab baba aaya hua hai aur ham baba se varsa le rahe hain। nimantran patra mein bhi laukik baap ke had ke varse aur paarlaukik baap ke varse vaali point bahut achhi likhi hui hai। behad ke baap se hi behad ka varsa milta hai। lakshmi-naaraayan ko behad ka varsa kisne diya? baba ne। to yeh sab samajhne ki baaten hain। hamaara yeh sitam sahan karne ka bhi part hai। 21 janmon ke liye baadshaahi milti hai। to ismen mehnat karni padti hai। gaaya jaata hai san shows father, student shows teacher। ab tumhaara real part hai। tum samjha sakte ho vahi hamaara baap, teacher, satguru hai। vahi manushya srishti ka beejroop rachayita hai। sab jeev aatmaon ka baap hai। unko sarvavyaapi kaise kahenge! baap to oopar rahne vaala hai tab to duhkh mein unko yaad karte hain। woh aate tab hain jab dharma glaani hoti hai। baba kehte hain hamaari janma bhoomi bhaarat ke rahvaasi jab duhkhi hote hain tab mujhe aana padta hai। paramatma ki janma bhoomi bhaarat hai। yeh akshar koi ke mukh se kabhi niklega nahin। agar sab paramatma hon to sabki janma bhoomi bhaarat hogi। baba kehte hain sabhi preceptors ko bhi main muktidhaam le jaata hoon। jab unhon ko yeh maaloom pade ki hamko mukti dene vaala baba hai, woh bhaarat mein janma lete hain to bhaarat bahut bada bhaari teertha ban jaaye। samjho, sabhi ko maaloom pade parantu aa kaise saken! sabhi to bhaarat mein aa na saken। itna to anna nahin hai bhaarat mein। yeh sunkar bahut-bahut khush honge ki oho, hamaara baba, jo in gurooon aadi ko bhi mukti dete hain unka janma bhaarat mein hota hai! pahchaanenge to knowledge se na aur kya dekhenge! braahmanon mein jab kiski soul aati hai to unke bhi bolne se pahchaante hain na। bigar bolne pahchaan kaise ho sakti? baat karne se maaloom padega - barobar phalaani aatma hai। shivbaaba bhi jab knowledge den tab samjhen ki shivbaaba bolte hain। gyaan yeh to de na saken। yeh sivaae baap ke koi samjha na sake।

kabhi-kabhi koi kehte hain - ham shivbaaba se baat karen, parantu unko pahchaanenge kaise? samajh bhi nahin sakenge। buddhi se samajhna chaahiye ki yeh knowledge baba ke sivaae koi de nahin sakta। dekho, kahaan-kahaan bachchiyaan bigar dekhe tadaph rahi hain - shivbaaba se milne। zaroor unki taakat hai jo kheenchati hai, kashish hoti hai। to unhon ko saphed-posh ka saakshaatkaar karaate hain isliye baba kabhi hamaari dress badalne nahin dete hain। to unki knowledge se maaloom padta hai। bahuton ko bhinna-bhinna prakaar ke saakshaatkaar bhi hote hain। parantu unse kya phaayda? tumhaara kaam knowledge se hai। yeh knowledge koi de na sake। to yeh saara gupta part hua। kehte hain - main aatma ka roop dhaaran kar ismen pravesh ho jaata hoon। to yeh knowledge itni baba hi dete hain। ham thode hi jaante the। baba dekho kitni kamaal karte hain! kehte hain - mujhe apna vaaris banaao। main tumhaari itni seva karoonga jo tumhaara bachcha bhi kabhi nahin kar sakega। main tumko 21 janma ke liye raajya-bhaagya doonga। phir bhi agar vaaris na banaave to takdeer kaha jaata। tum bachchiyaan jaanti ho - ham shivbaaba se varsa lene liye yahaan aaye hain। shivbaaba ko aur vaikuntha ko tum sivaae divya drishti ke dekh na sako। gyaan to bilkul clear mil raha hai na। hamko baba raajayog sikhlaate hain। oonch te oonch varsa hai vaikuntha ki baadshaahi। so bhi padhaai se milti hai। koi bhi raajayog sikhla na sake। ham nar se naaraayan bante hain। yeh raajayog sikhlaate hi ant mein hain tab to phir satayug mein raaja-raani banenge। yeh mooslon ki ladaai prasiddha hai। geeta se devi-devta dharma ki sthaapna hui। us samay to aur koi dharma tha nahin। ve sab kahaan gaye? vinaash hua। bilkul sahaj baat hai। train mein to tum bachche bahut service kar sakte ho phir bhi praja to ban jaayegi। gaadi ka dibba hi tumhaari praja ban jaayegi। baithkar sunenge to unko bahut achha lagega। literature haath mein hona chaahiye। saath mein laadla shreekrishna bhi hona chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) 21 janmon ki takdeer banaane ke liye shivbaaba ko apna vaaris banaana hai। har karma se baap, teacher, satguru - teenon ka show karna hai।

2) gyaan clear mil raha hai isliye saakshaatkaar ki aash nahin rakhni hai। saakshaat sarva samartha baap hamaare saath hai - isliye vighnon se ghabraana nahin hai।

vardaan:- “mera baba'' ke smriti swaroop dvaara samarthiyon ka adhikaar praapta karne vaale samartha aatma bhav

kalpa pahle ki smriti aate hi bachche kehte tum mere ho aur baap kehte tum mere ho। is mere-pan ki smriti se naya jeevan, naya jahaan mil gaya aur sada ke liye “mera baba'' is smriti swaroop mein tik gaye। isi smriti ke return mein samarthi swaroop ban gaye, jo jitna smriti mein rehte hain utna unhein samarthiyon ka adhikaar praapta hota hai। jahaan smriti hai vahaan samarthi hai hi। thodi bhi vismriti hai to vyartha hai isliye sada smriti swaroop so samartha swaroop bano।

slogan:- hard worker ke saath-saath sthiti mein bhi sada hard (majboot) bano।

maateshvari ji ke madhur mahaavaakya:- “srishti ki aadi kaise hogi?''

bahut manushya yeh prashn poochhte hain ki paramatma ne srishti kaise rachi hai? aadi mein kaunsa manushya racha ab uska naam roop samajhna chaahte hain। ab us par unhon ko samjhaaya jaata hai ki paramatma ne srishti ki aadi brahma tan se ki hai, pahla aadmi brahma racha hai। to jis paramatma ne srishti ki aadi ki hai to avashya paramatma ne bhi is srishti mein apna part avashya bajaaya hai। ab paramatma ne kaise part bajaaya? pahle to paramatma ne srishti ko racha, usmein bhi pahle brahma ko racha to goya pahle brahma ki pavitra aatma hui vahi jaakar shreekrishna bani, usi tan dvaara phir devi devtaaon ke srishti ki sthaapna ki। to daivi srishti ki rachna brahma tan dvaara karaai, to devi devtaaon ka aadi pita thahra brahma, brahma so shreekrishna banta hai vahi shreekrishna ka phir ant ka janma brahma tan hai। ab aise hi srishti ka niyam chalta aata hai। ab vahi aatma sukh ka part poora kar duhkh ke part mein aati hai to rajo tamo avastha paas kar phir shoodra se brahman bante hain। to ham hain brahma vanshi so shiv vanshi sachche brahman। ab brahma vanshi usko kehte hain - jo brahma ke dvaara avinaashi gyaan lekar pavitra bante hain to isse siddha hai ki is srishti ka aadi pita hai baba brahma। achha। om shanti।