Murli du jour du mercredi 14 juin 2023

14-06-2023 praatahmurli om shanti "baapdaada"' madhuban

“meethe bachche - tumhaara hai satopradhaan sannyaas, tum deh sahit is saari puraani duniya ko buddhi se bhoolte ho''

prashn:- tum brahman bachchon par kaun si javaabdaari bahut badi hai?

uttar:- tumhaare par javaabdaari hai paavan bankar saare vishwa ko paavan banaane ki। iske liye tumhein nirantar shivbaaba ko yaad karte rehna hai। yaad hi yog agni hai jisse aatma paavan banti hai। vikarma vinaash ho jaate hain।

geet:- duhkhiyon par raham karo…

om shanti। bachchon ne geet suna ki ham bachche hain। tumhaara zaroor woh baap hai। ab baap ko bachche kabhi bhi sarvavyaapi nahin kehte। laukik baap ke bachche kabhi aise nahin kahenge ki hamaara baap sarvavyaapi hai। yeh behad ka baap baith samjhaate hain tum sab bachche ho, tumhaara baap hai, jisko parampita kehte hain। paramatma ko supreme soul bhi kehte hain। param maana supreme, aatma maana soul। to zaroor sab bachche hain aur ek baap hai। sab bhakta ek bhagwan ko yaad karte hain jisko yaad kiya jaata hai unka zaroor naam, roop, desh, kaal hota hai। unko beanta nahin kaha ja sakta। manushya eeshvar baap ko beanta kehte aaye hain, unka koi ant pa nahin sakte hain aur phir kehte hain sarvavyaapi hai। yeh to bada anartha ho gaya। patthar-thikkar sabmen eeshvar hai unko phir beanta kehte hain। bachche baap ko bhool gaye hain isliye saari manushya srishti naastik patit kahi jaati hai। har ek nar-naari patit hain tab to patit se paavan banaane vaale ko yaad karte hain। is duniya mein koi ko bhi mahaan aatma nahin kaha ja sakta। pavitra aatma patit duniya mein ho nahin sakti। baapu gaandhi ji bhi kehte the patit-paavan seetaaraam - yeh manushya ke liye kehte, paani ki ganga ke liye to nahin kaha। yeh hai jhooth। jhoothi maaya, jhoothi kaaya, hai hi jhooth khanda। sachkhanda tha jabki nai duniya mein naya bhaarat tha। ab vahi bhaarat puraana ho gaya hai। bhaarat jab naya tha to unko svarga kaha jaata hai, jisko 5 hajaar varsha hue। treta mein do kalaayen kam hui। is samay to kaliyug hai, inko kaha jaata hai puraani duniya। puraani duniya mein puraana bhaarat। world nai bhi hoti hai to puraani bhi hoti hai। ab hai puraani duniya, sab manushya naastik hain, isliye duhkhadhaam kaha jaata hai। phir is duhkhadhaam ko sukhdhaam to ek hi baap bana sakte hain। bhaarat jo paavan tha patit ban gaya hai, jab purity thi to pees prosperity thi। bhaarat ki aayu average badi thi। abhi to bahut chhoti hai। bhaarat rogi kab se bana hai - duniya nahin jaanti। aise nahin kahenge ki parampara se rogi hai। bhakti shuru hi dvaapar se hoti hai। kaliyug ka jab ant hota hai tab baap aakar gyaan dete hain। gyaan hai hi gyaan saagar ke paas। gyaan ka saagar knowledgeful - yeh us baap ki hi mahima hai। manushya srishti ka beejroop hai। sarvavyaapi kahne se baap-bachche ka lav nahin rehta। yeh hai orphan duniya। sab aapas mein ladte rehte hain isliye isko raurav narka kaha jaata hai। bhaarat svarga tha, ab narka hai। yeh kisko bhi pata nahin padta hai ki ham narkavaasi hain to zaroor narka se transfer honge। parantu aise nahin ki narkavaasi punarjanma phir svarga mein le sakte hain। woh punarjanma sab narka mein hi lete hain। narka ko hi patit duniya kaha jaata hai। nirvaandhaam aatmaon ke rahne ka sthaan hai jisko niraakaari duniya kaha jaata hai। aatma star immortal hai। shareer mortal hai। aatma ko ek shareer chhod doosra lena padta hai। 84 janmon ka bhi gaayan hai। 84 laakh janma kehna bhi gapoda hai। baap samjhaate hain jo bhi aatma part bajaane aati hai, aakar organs mein pravesh karti hai। parantu sabke 84 janma bhi nahin ho sakte। satayug mein jo devi-devta honge unhon ke hi 84 janma honge। baap kehte hain aage bhi kaha tha tum apne janmon ko nahin jaante ho, main batlaata hoon। tum ho brahmaakumaar kumaariyaan। achha, brahma ka baap kaun hai? shiv। brahma-vishnu-shankar hai shivbaaba ke bachche। unhon ko bhi apna sookshm shareer hai। parampita paramatma ko apna shareer nahin hai। baap kehte hain mera naam hi shiv hai। bhal koi roodra bhi kehte, koi somnaath kehte hain। hoon to main niraakaar। barobar bhaarat mein shiv ke mandir bhi hain। gyaan ka saagar parampita paramatma ko hi kaha jaata hai, shreekrishna ko nahin kahenge। woh to satayug ka prince hai। unmein yeh aadi-madhya-ant ka gyaan nahin hai। satayugi devtaaon mein bhi yeh gyaan nahin hai। tum jaante ho abhi ham heere tulya ban rahe hain। parampita paramatma ke sivaae koi raajayog sikhla na sake। shreekrishna ko paramatma nahin kah sakte। paramatma sirf ek niraakaar ko hi kaha jaata hai। us baap ko hi sab bhoole hue hain।

is samay sab patit tamopradhaan hain। baap kehte hain yeh saara variety manushya srishti ka jhaad hai। tamopradhaan rogi duhkhi hain। bhaarat kitna oonch tha, abhi to kangaal hai। shaastron mein to kalpa ki aayu hi laakhon varsha likh di hai। samajhte hain kaliyug ko abhi 40 hajaar varsha chalna hai। baap samjhaate hain yeh hai ghor andhiyaara। ab gyaan soorya pragta agyaan andher vinaash। baap hai gyaan soorya। woh aakar agyaan ghor andhiyaare ko mitaate hain। abhi hai brahma ki raat। satayug-treta ko brahma ka din kaha jaata hai। to tum ho brahmaakumaar kumaariyaan, brahma ke bachche। brahma to vishwa athva svarga ka rachayita nahin hai। niraakaar heavenly god father ki hi mahima hai। woh baap hi aakar raajayog sikhlaate hain। baap kehte hain - he bachche, aatmaon se baat karte hain। aatma hi sab kuchh sunti hai, dhaaran karti hai aur sanskaar le jaati hai। jaise baba ne samjhaaya hai ladaai ke maidaan mein marte hain to sanskaaron anusaar janma le phir ladaai me chale jaayenge। is samay sabki aatmaayen tamopradhaan hain। sab ek-do ko duhkh dete rehte hain। sabse bada duhkh kaun dete hain? jo tumhein paramatma se bemukh karte hain isliye shivbaaba kehte hain - bachche, tum un sabko chhodo। god is one kaha jaata hai।

tum sab brides ho, main hoon tumhaara bridegroom। he sajniyaan, tum bilkul laayak nahin ho svarga me chalne ke liye। maaya ne tumko bilkul na laayak bana diya hai। yeh hai raavan raajya। satayug mein hai raam raajya। raam shiv ko kaha jaata hai। abhi tum ho brahman, parampita paramatma jo svarga ki sthaapna karte hai unse tum varsa le rahe ho। bhaaratvaasiyon ko svarga ka varsa mil raha hai। kalash maataaon par rakha hai। maata guru bigar kiska kalyaan nahin hota। jiske liye gaate hain tvamev maataashcha pita.. unko phir sarvavyaapi kehna kitni badi bhool hai! maat-pita ko phir beanta kah dete hain। gaate bhi hain tum maat-pita ham baalak tere, tumhaari kripa se sukh ghanere। phir baap par dosh kaise rakhte ho। baap to aakar patit se paavan banaate hain। patit raavan banaate hain। abhi raavan raajya khatma ho raamraajya phir shuru ho jaayega। is chakra ko achhi reeti samajhna hai। behad ki history-geography behad ka baap hi sunaayenge। yeh hai rudra gyaan yagya। shreekrishna ka yagya nahin hai। vahi geeta ka raajayog hai parantu shreekrishna koi gyaan nahin dete hain। yeh hai rudra shiv bhagvaanuvaach। rudra gyaan yagya se hi vinaash jvaala pragat hui hai। ab tum bachche aaye ho maat-pita se svarga ka varsa lene। yeh koi andhashradha nahin hai। university va college mein koi andhashradha hoti nahin। yahaan par andhashradha ki baat nahin। tum baap se behad ka varsa lene manushya se devta banne aaye ho। yeh god fatherly university hai। baap samjhaate hain yeh bhaarat daivi raajasthaan tha। heere javaahron ke mahal bante the। bhakti maarga mein bhi somnaath ka mandir kitna bada banaaya hai। unse pahle kya hoga। abhi to bhaarat kangaal hai। phir sirtaaj banaana baap ka hi kaam hai। abhi tum bachche jaante ho ham maat-pita ke sammukh baithe hain aur 21 janmon ka sukh pa rahe hain। baap kehte hain - he aatmaon, ab tum mujhe yaad karo main tumhaara guide aur liberator hoon। world ki history-geography kaise repeat hoti hai - yeh to bachchon ko samjhaaya jaata hai। ismen andhashradha ki to baat hi nahin। tumhaara hai satopradhaan behad ka sannyaas। tum puraani duniya ko buddhi se chhodte ho isliye baap kehte hain sarva dharmaani.... deh sahit deh ke jo bhi sambandh hain sabko bhool apne ko ashareeri aatma samjho। baap kehte hain is deh ka bhaan chhodo। mujh baap ko yaad karne se hi tumhaare paap bhasma honge। nirantar mujhe yaad karo aur koi upaay nahin। ant tak yaad karna hai। maaya jeete jagat jeet banna hai। maaya par jeet ek shivbaaba hi pahna sakte hain।

achha! ab baap shiv shaktiyon dvaara bhaarat par avinaashi brihaspati ki dasha laate hain। baap kehte hain - main is tan ka loan lekar inka naam brahma rakhta hoon। tum brahmaakumaar kumaariyaan varsa lete ho shivbaaba se। yaad bhi shivbaaba ko hi karna hai। woh kehte hain mera naam ek hi shiv hai। tum bhi aatma ho parantu tum shareer lete aur chhodte ho isliye janma by janma tumhaare naam badalte hain। 84 janma lenge to 84 naam padenge। sabke to 84 janma nahin honge। koi ke 80, koi ke 60, koi ke 5-6 janma bhi ho sakte hain। mera naam ek hi hai shiv। shivbaaba ko yaad karte raho to vikarma vinaash honge। yog agni bigar koi paavan ban nahin sakte। tumne pratigya ki hai - baba, ham pavitra ban bhaarat ko paavan banaae phir raajya karenge। shivbaaba ko yaad nahin karte to goya apne ko patit banaate hain isliye phir dharmaraaj ki bahut kadi saja khaani padegi। tumhaare par badi responsibility hai। baap ko yaad karte rehna, yeh hai roohaani yaatra। achha!

meethe-meethe sikeeldhe bachchon prati nambarvaar purushaartha anusaar maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) nirantar ek baap ki yaad se maayaajeet jagatjeet banna hai। pavitra bankar bhaarat ko pavitra banaana hai।

2) buddhi se behad puraani duniya ka sannyaas karna hai। is deh-bhaan ko bhoolne ka abhyaas karna hai। dehi-abhimaani rehna hai।

vardaan:- kisi se kinaara karne ke bajaae sarva ka sahaara banne vaale vishwa kalyaankaari bhav

saare kalpa mein brahma baap aur eeshvareey parivaar ke sambandh-samparka mein aane vaali aap shreshtha aatmaayen ho, aap kinaara karne vaale nahin lekin vishwa ka sahaara banne vaali vishwa kalyaankaari aatmaayen ho। parivaar ke avinaashi pyaar ke dhaage ke beech se nikal nahin sakte, isliye kabhi kisi bhi baat mein, kisi sthaan se, kisi seva se, kisi saathi se kinaara karke apni avastha achhi banaane ka sankalp nahin karna। yeh aadat daali to kahaan bhi tik nahin sakenge।

slogan:- karmabhog ka varnan karne ke bajaae karmayog ki sthiti ka varnan karo।

maateshvari ji ke madhur mahaavaakya - “om shabd ka yathaartha arth kya hai?''

jab ham om shanti shabd kehte hain to pahle pahle om shabd ke arth ko poorn reeti se samajhna hai। agar koi se poochha jaae om ka arth kya hai? to vo log om ka arth bahut hi lamba chauda sunaate hain। om ka arth onkaar bade chaude aavaaz se sunaate hain, is om par phir lamba chauda shaastra bana dete hain parantu vaastav mein om ka arth koi lamba chauda nahin hai। apne ko to svayan paramatma om ka arth bahut hi saral aur sahaj arth se samjhaate hain। vo bhi arth paramatma se milne ke liye hi samjhaate hain। paramatma saaph kehte hain bachche om ka arth hai main aatma hoon, mera asli dharma shant swaroop hai। ab is om ke arth mein upasthit rehna hai, to om ka arth main aatma paramatma ki santaan hoon। mukhya baat yeh hui ki om ke arth mein sirf tikna hai, baaki mukh se baith om-om ka uchchaaran nahin karo, buddhi mein yeh nishchay rakhkar chalna hai। om ka jo arth hai us swaroop mein sthit rehna hai, baaki vo log bhal om ka arth lamba sunaate hain, magar uske swaroop mein sthit nahin rehte parantu ham to om ka swaroop jaante hain, tab hi us swaroop mein sthit hote hain। ham yeh bhi jaante hain ki paramatma beejroop hai aur us beejroop paramatma ne is saare jhaad ko kaise racha hua hai, uski saari knowledge humein abhi mil rahi hai। achha। om shanti।