Murli du jour du mardi 11 juillet 2023

11-07-2023 praatahmurli om shanti "baapdaada"' madhuban

“meethe bachche - antarmukhi ban padhaai mein tatpar raho, shreemat par sada chalte raho to tumhaari takdeer bahut oonch ban jaayegi, yeh samay hai apni takdeer banaane ka''

prashn:- tum bachchon ki oonchi takdeer kaun si hai jiske aadhaar par tum saare srishti ki takdeer ko jaan lete ho?

uttar:- svadarshan chakradhaari banna - yeh hai sabse oonche te oonchi takdeer। tum brahman abhi svadarshan chakradhaari bane ho। tum apni bhi takdeer ko jaante ho to saare srishti ki bhi takdeer ko jaante ho। baba aaye hain tum bachchon ki heere samaan takdeer banaane। smriti mein rahe svayan bhagwan hamaari takdeer banaane liye padha rahe hain to takdeer banti rahegi।

geet:- aane vaale kal ki tum…

om shanti। bachchon ne geet ke do shabd sune। sunne se hi apni takdeer ka nasha chadh jaana chaahiye। yeh hai avinaashi nasha, utarna nahin chaahiye। koi manushya saahookaar padmapti hote hain to unko raat-din nasha rehta hai - ham bade dhanvaan, jaageervaan hain। nasha chadhta hi hai sampatti ka। to baap hai takdeer banaane vaala। abhi to takdeer phooti hui hai। kaudi misal takdeer hai va heere misal takdeer hai, yeh tum judge kar sakte ho। behad ka baap sammukh baith takdeer banaate hain। so tum dekhte ho, jaante ho। parampita paramatma ko dekhte ho va jaante ho? bachche jaante hain ham aatma hain। bhal aatma ko dekhte nahin hain parantu nishchay hai ham aatma hain, star misal hain। bhrakuti ke beech mein rehte hain। is samay tum bachchon ko aatma-abhimaani banna hai। is deh mein rahne vaale ko aatma dehi kaha jaata hai। aatma ko abhimaan hai ki hamko parampita paramatma aakar mila hai। bachche baap ke paas janma lete hain to vaaris hote hain। phir koi to paai paise ki takdeer pa lete hain, koi to kuchh bhi nahin paate। sirf janma hi paate hain। koi koi hain jinke 5-6 bachche hain। talab (naukri) kam milti hai to samajhte hain hamaari takdeer mein yeh tha। auron ko dekhte hain - unhon ki takdeer mein kitne mahal-maadiyaan, taaj va takhta hain। manushya ke takdeer ki variety hai na। to ab tum apni takdeer ko jaante ho ki kis takdeer ke liye ham purushaartha kar rahe hain। dhan ke liye, sukh ke liye। manushya purushaartha to karte hi hain। dhanvaan manushya beemaar padte hain to achhe-achhe doctor ki davaai karte hain। samajhte hain dhan se achhi davaai hogi। to dhan ki baat hai na। tum badi jabardasta takdeer banaate ho shreemat se। bachche jaante hain baba oonch te oonch takdeer banaate hain kyonki khud oonch te oonch hai। ab tum unke sammukh baithe ho na। maa-baap ke ghar mein baithe hain। koi raaja-raani hai to samajhte hain hamne aise karma kiye hain jo raajaai ki takdeer mili hai। ab tum jaante ho ham jo yeh lakshmi-naaraayan ka chitra dekhte hain unhonne bhi zaroor agle janma mein takdeer banaai hai। tumko yeh buddhi mili hai। manushyon ki buddhi mein yeh nahin aata। itne dhanvaan manushya hain, unhon ko yeh takdeer kaise mili? kahenge past janma mein aise karma kiye hain jo itna dhanvaan bane hain। karmon ka phal hai na। gaate bhi hain karmon ki gati nyaari hai। manushya past ke karmon anusaar hi bhogte hain। abhi tum bade te bade lakshmi-naaraayan ke takdeer ki bhent karte ho। yeh jo satayug ke maalik banen unhon ki aisi karma gati kisne banaai jo vishwa ke maalik banen। tum saare chakra ko jaan chuke ho।

tum brahman abhi svadarshan chakradhaari bane hue ho। doosre brahman to svadarshan chakradhaari nahin honge। woh bhi brahman, tum bhi brahman ho। parantu tum jaante ho ki ham hain sachche brahman। brahma ki mukh vanshaavli। zaroor brahma bhi kiska bachcha hoga। woh hai shivbaaba ka bachcha। shivbaaba to rachayita hai, uska koi baap nahin। to ab tumhaari takdeer parampita paramatma banaate hain। baap se hi takdeer banti hai। kaaka, chaacha, maama aadi se nahin banti। haan, koi ki ban sakti hai। agar woh adopt kare to। tum bachchon ko bhi adopt kiya hai, drama anusaar kalpa pahle muaaphik। unse ooncha koi hai nahin। prajaapita brahma ko itne bachche hain, dher ke dher। unko baap se kya varsa milta hoga। tum samajhte ho ki shivbaaba hai sabhi aatmaon ka baap aur brahma hai sabhi jeev aatmaon ka baap। tum ismen bhaai-behen ho jaate ho। baap to tum bachchon ko kehte hain - dekha, tumhaari takdeer kitni oonchi hai! ham tumko padhaakar kitna takdeervaan banaata hoon। barobar satayug aadi mein shri lakshmi-naaraayan va in svargavaasiyon ki raajdhaani thi। kitni unhon ki oonch takdeer banaai hai। yeh tum bachchon ki buddhi mein raaz hai ki shivbaaba ne hi unhon ki oonch takdeer banaai thi। woh takdeer bhog 84 janma poore kiye। ab phir vahi takdeer bana rahe hain। yeh tumhaari buddhi mein gyaan hai। gyaan saagar shivbaaba ke sivaae koi bhi samjha na sake। aisa baap kitna lovely hai। baap bhi kehte hain tum bhi lovely bachche ho। tumko main farmaan karta hoon ki nirantar mujhe yaad karne ka abhyaas karo to tumhaare vikarma vinaash ho jaayenge। tum jaante ho ki shivbaaba abhi is brahma tan mein sammukh hain। baap ne samjhaaya hai main to sadaiv niraakaar hoon। mera naam shiv hi hai। main saakaar mein aakar punarjanma nahin leta hoon। abhi main aaya hua hoon। tum jaante ho kaun baat kar raha hai! tumhaari buddhi oopar mein chali jaati hai। woh niraakaar parampita paramatma gyaan ka saagar hai। vahi takdeer banaane vaala hai। heavenly god father heaven ki sthaapna karega na। tum jaante ho baap kaise brahma tan mein sammukh baat kar rahe hain। kehte hain - laadle bachche, ab drama poora hua। aatma sunti hai। aatma hi jaanti hai ki yeh yathaartha baat hai। baap kehte hain jitna ho sake mujhe yaad karo aur saare srishti chakra ki knowledge tumko hi di hai। koi ko achhi reeti dhaarna hoti hai, koi bhool jaate hain। abhi tum baithe ho, tumko yeh gyaan amrit de rahe hain athva knowledge padha rahe hain। sammukh shivbaaba baitha hai। woh janma-maran mein nahin aata hai। tumhaara to janma by janma naam, roop, desh, kaal badalta jaata hai। features sadaiv nyaare milte hain। yeh kitni guhya sookshm baaten hain। tumhaari aatma ghadi-ghadi ek shareer chhod doosra leti hai। is samay jo tumhaara roop hai, doosre janma mein yeh nahin rahega। ek na mile doosre se। aatma ek shareer chhod doosra leti hai to unki activity, khyaalaat aadi sab badal jaate hain। aatma ko kitna bhinna-bhinna part bajaana padta hai। bhinna naam, roop, desh, kaal activity se part bajaati hai। activity bhi badalti rehti hai - kabhi raaja ki, kabhi rank ki। aise nahin kabhi kutta-billi bhi banenge। nahin। abhi tum jaante ho ham bhavishya mein prince-princess banne ke liye purushaartha karte hain। manushya se devta ban rahe hain। yeh mama-baba bhi purushaartha kar rahe hain। phir bhavishya mein jaakar lakshmi-naaraayan banenge। ham bhi jitna apni takdeer banaane liye purushaartha karenge utna bahut sukh milega। kitni jabardasta kamaai hai! woh to karke alpakaal sukh ke liye padhkar isi hi janma mein barrister aadi banenge। doosre janma ki baat hi nahin। so bhi banen, na bhi bane, ho sakta hai। tum to samajhte ho ki ham bhavishya mein svarga mein zaroor jaayenge। phir vahaan devi-devta kahlaayenge। yeh kabhi bhoolna nahin hai ki baap se ham svarga ke taausi takhta ka varsa lekar hi chhodenge। oonch te oonch bankar hi dikhlaayenge। god father padhaate hain woh bhi to buddhi mein aata hai। ham achhi reeti padhkar 21 janma ke liye apni praalabdha banaate hain। is samay jitna purushaartha karenge utna oonch takdeer banaayenge। woh takdeer kalpa-kalpa kaayam rahegi isliye is samay takdeer ke liye achha purushaartha karna chaahiye। badi bhaari takdeer hai। bahut sukh hai। bhal yahaan koi ke paas karod hain parantu paai ka bhi sukh nahin hai। vahaan to bilkul shanti aaraam se praalabdha bhogenge। yahaan to kitni aaphten aati rehti hain। thode time mein bahut devaala nikaalenge। marte jaayenge। bhal insure karte hain parantu insurance company bhi kya kar sakegi? hiroshima ka kya haal hua! kitne aadmi mare! insure company ne bhi devaala maara। yahaan bhi aise hi hoga। sab khatma ho jaayenge। insurance vaale kisko paisa denge? kaun ek-do ka deeva jalaayenge?

manushyon mein andha-vishvaas kitna hai! bade aadmi ka show karte hain। rishi-muniyon ko unse bhi bada samajhte hain। bhal religion ko nahin maante, parantu sannyaasiyon ko naman zaroor karte honge। saadhuon ke aage jaakar dandavat pranaam karenge। saadhu unke aage nahin karenge kyonki samajhte hain main oonch pavitra hoon। yeh baap to kehte hain mere laadle bachchon - ham bachchon ko namaste karte hain। tum to hamaare sir ke mor ho। tum vishwa ke maalik banenge। brahmaanda ke bhi tum maalik ho। tum double maalik ho। main single sirf brahmaanda ka maalik hoon। aisi baaten sivaae baap ke koi samjha na sake। to aise baap ko kitna yaad karna chaahiye, jisse aisa varsa milta hai। baap kehte hain - dekho, kitne bachche yahaan se hokar jaate hain। phir 6 maas mein bhi baap ko mushkil patra likhte hain। are, praan dene vaale praanon se pyaare baap ko patra nahin likhte। stri-purush ek-do ko chitthi likhte hain to kehte hain praaneshvar phalaana, vaastav mein woh koi praaneshvar to hai nahin। praaneshvar to ek hi baap hai। sabhi praanon ka eeshvar baap ek hai। woh kehte hain - praaneshvar bachche arthaat praan bachaane vaale eeshvar ke bachche। bachche bhi kehte hain praaneshvar baba, hamaare praan bachaane vaale baba। yahaan se hi yeh naam nikla hua hai। bhaarat mein hi aise praaneshvar, praaneshvari likhte hain। parantu hain nahin। praanon ka daan to baap hi dete hain। baap kehte hain tum mere bante ho to phir tumko koi duhkh de nahin sakte। aatma ko hi duhkh milta hai, aatma feel karti hai baap kitna pyaar se samjhaate hain। yaad bhi unko karti hai, mahima karti hai। mama ko bhi kitna yaad karte। jo bahuton ki achhi service karte hain unko kitna oonch martaba milta hai। phir unke baad second number mein jo service mein baba ko follow karte hain। tumhein bahut merciful banna hai। jaise baba ne hamko banaaya hai, ham phir auron ko banaaven। kitni badi property ki praapti hai - svarga ki raajdhaani! vahaan ham itne saahookaar rehte hain jo sone-heeron ke mahal banaayenge। ek maaya machhandar ka khel bhi dikhaate hain। usne dekha sone ki eeten padi hain, thodi le jaayen। tum saakshaatkaar mein svarga mein heere-javaahron ke mahal dekhte ho। sone ki khaaniyaan dekhte ho to samajhte ho thoda le jaayen। sookshm vatan mein sona nahin milta। sona vaikuntha mein rehta hai। tum jaante ho vahaan khaaniyon se ham vimaanon mein jaakar sona bharkar le aayenge। sone ki badi-badi eeten bhi hoti hain। abhi bhi badon-badon ke paas sona to pada hai na। bhaarat ko sona-chaandi to zaroor rakhna hai। sabke paas badi-badi guphaayen bani hui hain, jahaan koi loot-phoot na sake। aag jala na sake। to woh sab bhavishya mein tumhaare haath aa jaayega। jin aeroplane aadi dvaara abhi bomb aadi giraate hain, vinaash ke liye, vahi cheejen phir sukh ke liye nimitta ban jaayengi। satayug mein yeh sab thi phir praayahlop ho gai। ab phir bani hain। tum jaante ho kaise khaaniyon se jaakar le aate hain। khaaniyaan sab nai ho jaati hain। abhi to puraani hain। to aisi takdeer banaane vaale baap se poori takdeer leni chaahiye। ismen gaphlat nahin karni chaahiye। baap aur varse ko yaad karo। baap kehte hain ek mein moh lagaao। svarga ko yaad karo। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni oonch takdeer banaane mein gaphlat nahin karni hai। shreemat par achhi reeti chal padhaai ke aadhaar se oonchi takdeer banaani hai।

2) praaneshvar baap ki yaad mein rah sabko praan daan dena hai। sabke praan bachaane hain। kisi ko bhi duhkhi nahin karna hai।

vardaan:- maalikpan ki sthiti mein rah prakriti dvaara sahayog ki maala pahanne vaale prakritijeet bhav

prakriti aap maalikon ka ab se aahvaan kar rahi hai, chaaron or prakriti ke tatva halchal karenge lekin jahaan aap prakriti ke maalik honge vahaan prakriti daasi ban seva karegi sirf aap prakritijeet ban jaao to prakriti sahayog ki maala pahnaayegi। jahaan aap prakritijeet braahmanon ka paanv hoga, sthaan hoga vahaan koi bhi nuksaan nahin ho sakta। toofaan aayega, dharni hilegi lekin baahar sooli hoga aur yahaan kaanta। sabhi aapke taraph sthool sookshm sahaara lene ke liye bhaagenge।

slogan:- alaukik sukh va manras ka anubhav karna hai to manamnaabhav ki sthiti mein raho।