Murli du jour du mercredi 12 juillet 2023

12-07-2023 praatahmurli om shanti "baapdaada"' madhuban

“meethe bachche - abhi tumhein pavitra jeevaatma banna hai। is samay koi pavitra jeevaatma nahin hain isliye apne ko mahaatma bhi nahin kahla sakte।''

prashn:- satayugi raajaai ka inaam kin bachchon ko praapta hota hai?

uttar:- jo shreemat par yaad ki race mein number one jaate hain, unhein hi raajaai ka inaam milta hai। teekhi race hogi to register mein naam achha hoga aur inaam ke adhikaari banenge। tum bachche dooraadeshi ban badi door ki race karte ho। ek second mein nishaan tak (paramdham tak) pahunch vaapas lautkar aate ho। tumhaari buddhi mein hai pahle ham mukti mein jaayenge phir jeevanmukti mein aayenge। tumhaare jaisi race aur koi kar nahin sakta।

geet:- aakhir woh din aaya aaj…

om shanti। yeh kaun jaante hain ki aakhir woh din aaya aaj? bachche jaante hain aakhir woh din aaya aaj, jo ham baap ke sammukh hue hain। aatma kehti hai is shareer dvaara। abhi tum baithe ho, jaante ho ham aatmaayen abhi parampita paramatma ke sammukh baithi hain। barobar paanch hajaar varsha pahle bhi ham aatmaayen yaani jeev ki aatmaayen, paramatma se sammukh mili thi। aatma kehti hai - mera yeh shareer hai। shareer nahin kahega - meri yeh aatma hai। ham aatmaon ka baap aakhir aaj aaya hai। aana bhi zaroor hai, bhakti ke baad gyaan dene liye। gyaan se sadgati karne liye aakhir aaya hai। yeh saari duniya nahin jaanti। saari duniya ke sammukh ho bhi nahin sakenge। tum bachchon ko bhi nambarvaar purushaartha anusaar nishchay hai। pahle to aatma nishchay karte hain, phir nishchay karte hain hamaara baap phir se aaya hua hai। tum samajhte honge aise sab nishchay karte hain। parantu aise bhi nahin hai। yeh aisa vichitra hai jo ghadi-ghadi bhool jaata hai। ham aatma hain, parampita paramatma ke sammukh hain - yeh bhool jaate hain। yeh to duniya bhi jaanti hai patit jeev aatmaon ko paavan banaane parampita paramatma aate hain। jeev aatmaayen, aatmaon ko pavitra banaane nahin aati। sabhi jeev aatmaayen hain, parampita paramatma ek hi hai, unko jeev nahin kahenge kyonki unko koi sthool-sookshm shareer nahin hai। yeh baap baith samjhaate hain। tum jo bhi naamdhaari dekhte ho, brahma, vishnu, shankar ka chitra dekhte ho ve sookshm vatan mein rehte hain। woh bhi sookshm jeev aatma thahre। yeh badi samajhne ki baaten hain। manushya to bhal kehte hain phalaana mahaatma hai। parantu patit duniya mein mahaatma aa kahaan se sakte! yahaan koi supreme paavan ho na sake। haan, woh supreme baap paavan banaakar gaye hain। satayug aadi mein devi-devta the। yeh to zaroor samjhenge ki pavitra aatmaayen thi, abhi patit jeev aatmaayen hain। paavan jeev aatmaayen bhi thi। barobar satayug aadi se srishti par pavitra jeev aatmaayen thi। unhon ko mahaan aatma kahenge। baap samjhaate hain patit duniya mein koi bhi mahaan aatma ho nahin sakte। sab patit jeev aatmaayen hain। patit jeev aatma zaroor auron ko bhi patit hi banaayengi। vahaan hain pavitra jeev aatmaayen। to kya karenge? aise nahin ki pavitra jeev aatma banaayenge। nahin। vahaan banaane ki baat nahin rehti। is samay sabhi pavitra jeev aatmaayen banti hain। vahaan to hain hi sab paavan। itna paavan banaane vaala kaun? baap baith samjhaate hain tum jab devi-devta the to paavan the। yahaan aakar patit bane ho। yeh hai hi paap jeev aatmaon ki duniya। akshar bilkul clear samjhaana hai - paap jeev aatma kyonki aatma bhi patit hai, shareer bhi patit hai। vahaan phir mahaatma akshar nahin dete। vahaan to hain hi sab pavitra, kehte hi devi-devta hain। sarvagun sampanna, 16 kala sampoorn, ahinsa parmo dharma jeev aatmaayen hain। sampoorn nirvikaari maana sampoorn pavitra। tum bachchon ko samjhaaya jaata hai sannyaasi pavitra rahne liye purushaarthi hain। achhe-achhe sannyaasi pavitra rehte hain, jinko mahaatma kaha jaata hai। pavitra rahne liye alag rehte hain। parantu woh to hain nivritti maarga vaale। unko bhakti maarga mein mahaatma kahenge, gyaan maarga mein nahin। gyaan aur bhakti donon alag-alag gaaye jaate hain। aadhaakalpa satayug-treta mein gyaan ki praalabdha hai, yahaan phir bhakti ki praalabdha kahenge। yeh hai bhakti maarga। pahle bhakti bhi avyabhichaari hoti hai phir ant mein tamopradhaan vyabhichaari bhakti hoti hai। abhi vyabhichaari bhakti ka ant hona hai, tab baap aaye hain। baap ek hi baar aakar gyaan se aadhaakalpa ke liye tumhaari praalabdha banaate hain। tum number one purushaartha karte ho। koi to raaja-raani bante hain, koi phir praja va daas-daasi ban jaate hain kyonki raajdhaani sthaapan ho rahi hai।

tum ab dooraadeshi buddhi bante ho। dooraadeshi buddhi ko trikaaldarshi kaha jaata hai। jinhen teenon lokon, teenon kaalon ka gyaan hai unhein trikaaldarshi kaha jaata hai। tum ab teenon lokon ko jaante ho। mool vatan, sookshm vatan aur sthoolavtan teen lok hue na। tum ab dooraadeshi ban gaye ho। tumhaari buddhi aadi se ant tak jaati hai - nambarvaar purushaartha anusaar। koi kamjor hote hain jo race mein peechhe rah jaate hain। yeh to bahut badi dooraadeshi race hai। aatmaon ki race kabhi suni nahin hogi। tum aatmaayen jaanti ho ham student hain, hamaari ye race hai। phalaane nishaan tak pahunch kar phir lautna hai। tum aatmaon ki yeh badi door ki race hai। buddhi jaanti hai ham vaastav mein vahaan ke rahne vaale hain। ek second mein ham vahaan pahunch jaayenge, jeevanmukta ban jaayenge। ham asul paramdham ke nivaasi hain। yathaartha reeti buddhi jaanti hai - ham paramdham jaayenge phir aayenge। jaise race mein nishaan tak pahunchkar phir lautte hain। ham bhi baba ke paas jaayenge phir vaapis aayenge। ab aatmaayen race seekh rahi hain। tum sabko kehte ho manamnaabhav, buddhi ka yog apne baap aur paramdham se rakho, jahaan tum ashareeri rehte ho। yeh sirf tumhaari buddhi mein hi yathaartha reeti hai। teenon kaalon, teenon lokon ki knowledge tumhaari buddhi mein hai। 84 janmon ka gyaan aur koi mein ho nahin sakta। tum jaante ho hamko is chhi-chhi duniya se, chhi-chhi shareer se mukta hokar jaana hai। ham ja rahe hain। baap roz yeh race sikhlaate hain। tumhaari race avinaashi hai। baap ko jitna jaasti yaad karenge utna tumhaara register mein naam achha rahega। kahenge inki buddhi ki yaatra bahut teekhi hai। yaad se hi vikarma vinaash honge। yaad nahin karte hain, to vikarma vinaash na hone ke kaaran pichhaadi mein rah jaate hain। praja va daas-daasi banna yeh koi prize nahin hai। nar se naaraayan, naari se lakshmi banna isko inaam kaha jaata hai। baap raajaai ka inaam dete hain, agar unki mat par chal daudi lagaai to। koi to do qadam bhi daudi nahin lagaate hain। agar praja vaale honge to bilkul kam darja pa lenge। yahaan rahne vaale bhi honge to bhi raajaai mein bahut kam pad paayenge। tumhaari kitni vishaal buddhi hui hai।

ab Bangalore, madraas ke bachche baithe hain, unhon ko phir madraasi bhaasha mein koi baith samjhaaye। hamaari bhaasha to hindi hai। kalpa pahle bhi aise samjhaaya hoga। kahenge bhagwan sab bhaashaayen kyon nahin jaante! parantu drama mein hai nahin। drama mein hota to main sab bhaashaaon mein bhaashan karta। samjho bhinna-bhinna bhaashaaon vaale baithe hon to kya ham sab bhaashaaon mein baith boloonga kya? yeh to ho nahin sakta। ek-do ko bhi kahaan tak sunaayenge। ghamsaan ho jaae। to samjhaana chaahiye baba ne kalpa pahle jis bhaasha mein samjhaaya tha usi bhaasha mein hi samjhaate hain, isliye hindi ka jor hai। angreji bhi zaroori hai kyonki inhon ka connection angrejon se jaasti hai। Russia, America aadi ki bhaasha apni-apni hai। hain ek hi dharma vaale Christian। parantu bhaashaayen bahut hain। yahaan bhi hain sab bhaaratvaasi aadi sanaatan devi-devta dharma vaale parantu apne dharma ko bhool gaye hain। bhaashaayen kitni ho gai hain। sab mixture hain। jiski jo bhaasha hai usmein phir unko sunaana hai। ismen bhi bada hoshiyaar chaahiye, jo samajhkar aur samjhaaye। saathi aisa saath laana chaahiye jo accurate samjha sake। yeh hai sabse bada chaitanya teertha। woh sab hain jad teertha। saadhu, santa, mahaatma sab vahaan jaate hain। bahut door-door jaate hain। jo bhaarat ko paavan banaakar gaye hain unhon ke mandir mein jaate hain। yeh bhi samajhne ki baaten hain na। baap kehte hain jhaad ki taal, taaliyaan, patte uska vistaar kitna samjhaayen! tum to samajh gaye ho - yeh chhote-chhote taal-taaliyaan hain। taali mein bhi kitne patte honge। athaah math panth hain। tumhaara thur to kitna bada hona chaahiye। kitne patte hone chaahiye। aadi sanaatan devi-devta dharma satayug se lekar chala aaya hai। to hindu kitne honge। parantu hindu bhi nahin rahe hain, aur dharmon mein convert ho gaye hain। yeh hai kalpa vriksha, shuru mein aadi sanaatan devi-devta dharma vaale the। hindu kahlaane vaale bhi vaastav mein hain aadi sanaatan devi-devta dharma ke, parantu convert ho gaye hain। baap kehte hain main aakar phir us devi-devta kahlaane vaale dharma ki sthaapna karta hoon। jo convert ho gaye hain vahi phir se aakar varsa lenge। jab devi-devta kahlaane vaala ek bhi nahin rehta tab hi baap aate hain। aakar samjhaate hain - tumhaare jad yaadgaar khade hain। Christ aate hain to unke dharma ki charcha aadi hoti nahin। yahaan to abhi bhi devtaaon ke mandir aadi nishaani hain। tumhaara jab raajya hoga to Christ aadi ka naam-nishaan nahin hoga। yahaan to sabhi ka naam-nishaan hai। tum jaante ho Christ kab aaya, Christian dharma kaise sthaapan hua? Christ ab kis shareer mein hoga? zaroor patit shareer mein hi hoga। khud to paavan tha na। tum bachchon ki buddhi mein saara gyaan hai। tumko dooraadeshi banaaya hai। ham aatmaayen kahaan rehti hain? kahaan se aati hain? yeh kisko pata nahin hai। rahne ke sthaan ko paramatma maan liya hai। vaastav mein aatma jhoothi banne se kaaya bhi jhoothi ban jaati hai। saadhu log kah dete jhoothi maaya, jhoothi kaaya..... baaki aatma to nirlep hai। apne matlab ki baat kah dete hain। aise kyon nahin kehte jhoothi aatma, jhoothi aatma ki kaaya। kaaya ko hi kaai par (arthi par) bithaate hain। aatma ko to kaai (arthi) par nahin bithaate hain। kaai par kaaya ko bithaaya jaata hai। aatma ne to ek kaaya ko chhod doosri kaaya mein jaakar pravesh kiya। yeh samajh ki baat hai। koi bhi saadhu-santa aadi ko tum samjha sakte ho। yahaan patit duniya mein koi bhi mahaatma nahin hai। mahaan aatmaon ko paavan aatma kaha jaata hai। to shareer bhi paavan chaahiye। yeh hai hi iron aged। parantu kanya jab tak vikaar mein nahin gai hai to pooji jaati hai। pavitrata ke liye hi pukaarte hain - aakarke hamko paavan pavitra banaao। jabki pukaarte rehte hain to tum unko mahaan aatma kaise maan sakte ho। mahaatma to koi hai nahin। yeh hai vichitra parampita paramatma। tum jaante ho ham jo paavan jeev aatmaayen devi-devta theen, abhi patit bani hui hain। dharma bhrashta hain। Christian log apne dharma ko jaante hain। jhat kahenge ham Christian hain। tum oonch te oonch dharma vaale apne dharma ko bhool gaye ho। bhool jaane se dharma bhrashta, karma bhrashta ban pade ho। tum shreshthaachaari the, ab raavan ne bhrashtaachaari kar diya hai। yeh arth bhi tum samajh sakte ho। tum bachche abhi apni bhavishya oonch takdeer banaane ke liye dhaarna kar rahe ho। shreemat ka ullanghan karne se takdeer ko lakeer lag jaati hai। yeh bhi bhool jaate hain ki shreemat dene vaala baap hai। to aakhir woh din aaya aaj, yeh tum jaante ho। sabhi accurate nahin jaante। ant mein jaanenge, jab poore samajh jaayenge। abhi to ghadi-ghadi bhool jaate hain। mushkil koi sach batlaate hain। jhooth bolne mein deri nahin karte hain। maaya achhe-achhe roostam bachchon ko thappad laga deti hai। baap to sab jaante hain, batlaate hain - tum bhool karte ho, badi disservice karte ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dooraadeshi ban teenon lokon aur teenon kaalon ko jaan buddhi se race karni hai। is chhi-chhi duniya, chhi-chhi shareer se mukta hona hai।

2) jhooth bolne ki aadat ko mitaana hai। shreemat ka ullanghan kar disservice nahin karni hai।

vardaan:- laukik vritti drishti ka parivartan kar alaukikta ka anubhav karne vaale gyaani tu aatma bhav

laukik sambandhon mein rehte had ke sambandh ko na dekh aatma ko dekho। aatma dekhne se ya to khushi hogi ya raham aayega। yeh aatma bechaari parvash hai, agyaan mein hai, anjaan hai, main gyaanvaan aatma hoon to us anjaan aatma par raham kar apni shubh bhaavna se badalkar dikhaaoongi। apni vritti aur drishti ko badalna hi alaukik jeevan hai, jo kaam agyaani karte woh aap gyaani tu aatma nahin kar sakte। aapke sang ka rang unhein lagna chaahiye।

slogan:- apne shreshtha karma se vishwa pita ka naam baala karna hi vishwa kalyaankaari banna hai।