Murli du jour du samedi 15 juillet 2023

15-07-2023 praatahmurli om shanti "baapdaada"' madhuban

“meethe bachche - baap ko apni avastha ka samaachaar khule dil se do, khuli va sachchi dil mein hi baap ki yaad tik sakti hai''

prashn:- is samay chhote-bade sabki vaanaprastha avastha hote bhi tum kaun-se bol mukh se nahin kah sakte ho?

uttar:- baba, abhi jaldi karo, abhi ham ghar chalen, yahaan to bahut duhkh hai। baba kehte - tum bachche aisa kabhi nahin kah sakte kyonki tum abhi eeshvar ke sammukh baithe ho। abhi tumhein sheetal god mili hai। is samay tum oonche te oonche bane ho। satayug mein degree kam ho jaayegi। daivi santaan banenge, eeshvareey nahin isliye tum jaldi nahin kar sakte।

geet:- tumhaare bulaane ko ji chaahta hai…

om shanti। meethe-meethe bulaane vaale bachchon ne ab jaana। bhakta bhagwan ko bulaate hain। ab tum bhakta to nahin thahre। tum ho bachche। bachche to yaad bhi karte hain। likhte bhi hain ki baba, ham sammukh sunne chaahte hain। nimantran dete rehte hain - baba, aapse sammukh sunen। ab sivaae brahma mukh ke direct sunna to mushkil hai। bachche jaante hain - baba kalpa pahle maaphik aaye hue hain। brahma mukh vanshaavli brahman kul bhooshan naam kitna achha diya hua hai। brahmaakumaar-kumaariyaan to bahut hain। unhon ko gyaan mila hua hai। parampita paramatma jo gyaan ka saagar hai, unko hi sukh ka saagar bhi kaha jaata hai। gaaya bhi hua hai - duhkh harta, sukh karta। woh to shivbaaba hi hai। naam kitne bhinna-bhinna diye hain। gaayan to bahut hain na। gaate hain - har-har arthaat duhkh ko haro। bhagwan ke liye hi gaate hain। parantu bhagwan ka pata na hone kaaran brahma, vishnu, shankar ke liye kah dete hain। dev-dev mahaadev। shiv ko bhool shankar ke liye kah dete - har-har mahaadev........। brahma aur vishnu ko mahaadev nahin kahenge। woh to donon sthool part mein aate hain। shankar sookshm vatan mein hi rehta hai। duhkh harne vaala patit-paavan to ek niraakaar bhagwan hai। shankar ko patit-paavan nahin kahenge। mahima saari ek ki hai। vishnu ke do roop lakshmi-naaraayan va raadhe-krishna hain jinka alag-alag janma hota hai। vishnu avatran bhi gaaya hua hai। chaturbhuj dikhaate hain। parantu yeh kisko pata nahin hai ki pahle lakshmi-naaraayan svarga mein prince-princess raadhe-krishna bante hain। yeh tum hi jaante ho। yeh bhi jaante ho - maaya ka bada bhaari toofaan sookshm mein aata hai। maaya bhula deti hai। bahut toofaan laati hai। koi bhi baat khuli dil se bachche poochhte rahen to prashn ka uttar mil sakta hai। toofaan bhi anek prakaar ke aate hain। svapna, chhi-chhi vikalpa anek prakaar ke aate hain। aandhi, toofaan ko kaha jaata hai। ab yeh brahma to naami-graami hai। baaki bhi baba ne pravesh kiya hai to bahut naameegraami ho gaya hai। jaisa-jaisa manushyon ka desh vaisa vesh bhi hota hai। abhi to dekho koi loole-langade, koi kubja, kiski aankh nahin hogi। vahaan to natural beauty hai kyonki paanch tatva bhi satopradhaan hain। to yeh gyaan sammukh sunne ke liye bachchiyaan bulaati hai। geeton mein bhi kuchh na kuchh theek hai। jaise devta dharma praayahlop hai phir bhi mandir yaadgaar to hain na। yaadgaar sabhi dharma vaalon ka hai। yeh tum bachche hi samajhte ho barobar oonch te oonch ek niraakaar bhagwan ko kaha jaata hai। unka hi gaayan hai aur hai bhi sangamayug, jab aatmaayen aur paramatma milte hain। aatmaayen to bahut hain na। vriddhi hoti rahegi। abhi tum bachche sammukh sun rahe ho auron ki bhi dil hoti hai sammukh sunen। yahaan aa nahin sakte। baandheliyaan hain। aur koi bhi satsangon mein jaane liye kabhi kisko mana nahin karte। bambai mein geeta sunaate hain, koi bhi dharma vaale ja sakte hain। fees nahin hai। bhinna-bhinna guru paas jaate rehte hain ki kahaan se sahaj raasta mil jaaye। mukti aur jeevanmukti ke raaste ka kisko pata nahin hai isliye bahut dhoondhate hain। yahaan to koi guru-gosaai hain nahin। brahmaakumaar aur kumaariyaan, bas। mahaatma koi nahin। jaise tum ho vaise yeh (daada) hai। farka kuchh nahin hai। vesh aadi mein koi farka nahin hai। yeh shawl aadi bhi kabhi utaar deta hoon। parantu draamaanusaar yeh jaise official dress hai। dress ko to dekhna nahin hai। buddhi shivbaaba taraph chali jaati hai। aur sabhi manushya shareer ko dekhenge। tum apne shareer ko bhi bhoolte ho aur is daada ke shareer ko bhi bhoolte ho। dehi-abhimaani banna hai। inke shareer ko nahin yaad karna hai। shivbaaba in dvaara hamko raajayog sikhlaate hain। vahi knowledgeful, trikaaldarshi hai। aadi-madhya-ant ka raaz is samay baith sunaate hain।

budhiyon aadi ke liye bhi bada sahaj hai। un school mein to budhiyaayen kuchh samajh na saken। yeh sabke liye sahaj hai। baap sirf kehte hain - mujhe yaad karo। jaise manushya marne par hote hain to mantra dete hain - raam-raam kaho, yeh kaho। bahut karke vaanaprastha ke baad hi guru ka mantra lete hain। parantu abhi to baap kehte hain - saari puraani duniya ka vinaash hona hai। budhe, javaan, chhote - sabki vaanaprastha avastha hai। aise to aur koi kah na saken। kahenge - sabka maut laane taiyaar hue ho kya? haan, maut to sabka hona hi hai। koi-koi kehte hain - baba, yahaan ajun kab tak rahenge, ham jaldi jaaven? yahaan bahut duhkh hai। aage chalkar bhi aise-aise kahenge। baba kehte hain - aise kyon kehte ho? are, is samay to tum eeshvar ke sammukh ho। phir to degree degrade ho jaayegi। jaakar daivi santaan banenge। abhi yeh sheetal god achhi hai। vahaan (svarga) to hoga hi sheetal। parantu yahaan to tatte (garam) ko bhi sheetal banaaya jaata hai to woh achha rehta hai। aise nahin ki abhi jaldi karo। abhi to ham oonch te oonch hain। naamaachaar hi saara is samay ka hai। delvaada mandir bhi is samay ka hai। saari srishti ke aatmaon ki dil lene vaala hai baap। dilvaala mandir sabhi ke liye hai। aatma shareer dvaara pukaarti hai - baba, aao, aakar hamko naya banaao, ham puraane ho gaye hain। aatma aur shareer donon hi puraane hain। aatma buddhiheen andhi bani hai। manushya ko thode hi andha kaha jaata hai। aankhe to hain na। parantu buddhi andhi hai। aatma mein jo buddhi hai yaad karne ki woh bilkul bhool gai hai। to gopikaayen koi kahaan, koi kahaan se bulaati hai। baandheli gopikaayen chhote-chhote gaanv se bulaati rehti hain। baap samjhaate hain - bachche, satayug mein grihastha aashram tha, pavitra tha। abhi to vish ke liye kitna hairaan karte hain। yeh nahin samajhte ki yahaan nirvikaari banaaya jaata hai। nirvikaari banne se phir kya banenge - woh bhi pata nahin। sannyaasi bhi pavitra banne liye bhaagte hain। parantu unko yeh pata nahin ki ham pavitra ban pavitra duniya mein jaayenge। in baaton ko woh maante hi nahin। is samay itna duhkh hai jo samajhte hain isse mukti athva moksha achha hai। baap ne samjhaaya hai - drama mein moksha kisko milta hi nahin hai। abhi tum jaante ho। baap kehte hain - sirf itna yaad karo ki 84 janma poore hue, ab baba aaya hai lene liye। baap ko yaad nahin karenge to toofaan bahut lagenge। vivek bhi kehta hai - nirantar yaad karna bada mushkil hai। bhal baba kehte hain - tum karmayogi ho। parantu dekha gaya hai karma karne ke samay yaad bhool jaati hai। aisi avastha ko paane mein time lagta hai। ismen bahut purushaartha karna hota hai। college mein purushaarthi bachchon ko raat-din padhne ki hobby rehti hai। koshish karte hain government se scholarship le leven। bahut maatha maarte hain। phir bade khush hote hain। yahaan bhi baap kehte hain - tum achhi reeti padhkar scholarship lo। pahle-pahle takhtansheen ban jaao। daudi lagaani chaahiye। tum jaante ho - abhi baap sammukh baithe hain। direct is rath mein baith bachche-bachche kah baat karte hain। brahma ka tan to mukrar hai। baap kehte hain - main aatmaon se baat karta hoon। tum pukaarte the - baba, aao। ab main aaya hoon। tum aatmaayen bhi niraakaar ho। ham bhi niraakaar hain। tum bhakti maarga mein bhinna-bhinna naam, roop, desh, kaal dhaaran kar yaad karte aaye ho। ab sammukh tumse baat kar raha hoon। tumko to apne shareer ka aadhaar hai। hamko yeh loan lena padta hai। baap bachchon ko kehte hain - ab yeh puraana chola chhodna hai। naatak poora hua, ab nirantar baap ko yaad karne ki koshish karo। agar aur kuchh yaad padta rahega to phir sajaayen khaani padegi। jitna ho sake auron ki yaad nikaal do। yaatra par jaate hain to buddhi mein vahi yaad rehti hai। bas, ham shreenaath dvaare jaate hain। tumhaari hai sachchi roohaani yaatra। aatma paramatma ke saath yog lagaati hai। phir shareer nirvaah arth karma karne liye yahaan aate-jaate hain। kahaan bhi ho yaad rahni chaahiye। tum jaante ho bhagwan sarvavyaapi nahin, woh to baap hai aur baap se to varsa milta hai। sarvavyaapi kahne se koi matlab hi nahin nikalta। baap ko to varsa dena hota hai। unko yeh aash nahin rehti ki mujhe varsa milna hai। aash rahegi - bachchon ko varsa dena hai। is baap ki bhi dil mein hai - hamko varsa dena hai। baap aur bachchon ka sambandh hai। bachchon ko varsa lena hai, baap ko dena hai। baap phir kya lenge! unko dena hota hai। sachchi aatma par saaheb raazi hota hai to kitna sachcha banna chaahiye। parantu sabhi bachche ho na to varsa dene vaale baap ko yaad karna chaahiye। kachche bachchon ko yaad nahin rehta hai। shareer nirvaah arth bhal karma karo phir phursat ke samay baap ko yaad karo। yaad ki yaatra ka register tumhaara theek hota jaayega to khushi rahegi। manushya ko jo aadat padti hai woh vriddhi ko paati hai। buddhi mein rehna chaahiye hamaare 84 janma poore hue। ab naatak poora hua। abhi ham jaate hain apne ghar isliye baap kehte hain - mujhe yaad karo। geeta mein bhi do baar manmanaabhav likha hua hai। kuchh-kuchh baaten aate mein loon hain।

anya dharma vaalon ke koi chitra aadi nahin rehte hain। tumhaare chitra hain। brahma ka bhi ajmer mein chitra hai। braahmanon mein bhi bahut prakaar ke hain। bhinna-bhinna naam rakhe hue hain। bhaashaayen dekho kitni hain! bachche jaante hain - hamaari raajdhaani mein ek hi bhaasha hogi। vahaan ki bhaasha hi aur hai। sanskrit aadi nahin hoti hai। bachchiyaan vahaan ki bhaasha aadi sunaati thi। ab tum bachchon ko khushi rahni chaahiye। ham raajdhaani sthaapan kar rahe hain। phir vahaan apni bhaasha hogi। yahaan ki bhaashaayen vahaan nahin ho sakti। drama ki noondh anusaar phir vahi apne mahal aadi banaayenge। kalpa pahle muaaphik। yahaan yeh British government ne new dehli banaai na। tum jaante ho ham dehli naam nahin rakhenge। yeh puraani duniya to khatma honi hai। hamko naye te nai duniya chaahiye। vahaan to heere-javaahron ke mahal banenge। abhi to woh mahal nahin hain। buddhi kehti hai ham bahut first class mahal banaayenge। yeh to chhi-chhi duniya hai। aisi-aisi aapas mein baaten karni chaahiye। behen ji, bhaai ji ham to jaayenge phir aakar apni raajdhaani sambhaalenge। aise libaas pahnenge। aage jevar aadi sab sachche pahante the। lakshmi-naaraayan ke mandir mein kitne jevar aadi honge। shiv ka mandir kya hoga? shiv ka ling bhi heeron ka banaate hain। yeh bhi samajhne ki baaten hain। hamaare shivbaaba ke mandir ko barobar musalmaanon ne aakar loota hai। jo bhakti maarga ke shuru mein banaaya tha। tum jaante ho dvaaprayug se shivbaaba ke mandir bane hain। aapehi poojya se phir pujaari ban jaate hain। pahle-pahle somnaath ka mandir bana hai। somras kaha jaata hai knowledge ko। knowledge dene vaala baap hai jisse tum dhanvaan bante ho। phir usi dhan se tum baap ka mandir banaate ho। pooja bhi to hogi na। ghar-ghar mein mandir banaate hain। tum jaante ho jab bhakti maarga shuru hoga to phir ham pujaari ban moorti aadi banaayenge। tum bachche jaante ho - ham abhi aashik bane hain maashook paramatma ke, unse varsa lene liye। woh vikaar ke liye aashik hote hain। yeh phir aatma paramatma maashook ki aashik hoti hai। dekhte ho - sabhi bhakta unko yaad karte hain। us maashook ki mahima badi bhaari hai! aashik jo patit ban gaye hain unhon ko paavan banaate hain। aatma hi patit, aatma hi paavan banti hai। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) scholarship lene ke liye achhi reeti padhna hai, takhtansheen banne ki daud lagaani hai। karma karte yaad mein rehna hai।

2) ham roohaani yaatra par hain, isliye aur sabki yaad buddhi se nikaal baap ki yaad mein nirantar rehna hai। yaad ka register theek rakhna hai।

vardaan:- nirantar yogi aur pavitra ban sarva vikaaron ko vidaai dene vaale shakti swaroop, poojya swaroop bhav

baap dvaara sabhi bachchon ko mukhya do vardaan praapta hote hain - ek sada yogi bhav doosra pavitra bhav। jo yeh vardaan jeevan mein sada anubhav karte hain woh do chaar ghante ke yogi nahin hote lekin nirantar ke yogi hote hain। pavitra bhi kabhi-kabhi nahin, sada pavitra aur sarva vikaaron ko vidaai dene vaale। aise nahin kabhi krodh ya moh aa gaya, koi bhi vikaar smriti swaroop banne nahin dega। to aise yogi hi shakti swaroop hain aur sada pavitra rahne vaale poojya swaroop hain।

slogan:- sada gyaan soorya ke sammukh raho to bhaagya roopi parchhaai aapke saath hai।