Murli du jour du vendredi 28 juillet 2023

28-07-2023 praatahmurli om shanti "baapdaada"' madhuban

“meethe bachche - paavan banne ke liye apne svadharma mein raho aur ashareeri ban ek baap ko yaad karo''

prashn:- kis vidhi se naye students par gyaan ka rang lag sakta hai?

uttar:- unhein pahle-pahle saat roz ki bhatthi mein bithaao। kaayda hai - jab koi bhi aata hai to unse form bharaao। pahle saat roz bhatthi mein pade tab poora rang lage। tum bhramriyaan gyaan ki bhoon-bhoon kar aap samaan banaati ho। tum jaanti ho - abhi devta dharma ki sapling lag rahi hai। jo is gharaane ki aatmaayen hongi woh mahaarogi se nirogi banne ke purushaartha mein lag jaayengi।

geet:- mahphil mein jal uthi shama…

om shanti। bachchon ko om shanti ka arth to samjhaaya hua hai। om arthaat aham। aham kaun? aatma aur mera shareer karmendriyaan। aatma ka svadharma hai hi silence। aatma kiski santaan hai? kahenge parampita paramatma ki। woh bhi silence hai। aatmaayen silence world shantidham mein rehti hain। phir part bajaane talkie world mein aati hain। ab behad ka baap kehte hain - he bachche, apne svadharma mein raho। ashareeri hokar baitho। baap ko yaad karo। us baap ko shama bhi kehte hain। ab yeh hai mahphil patit manushyon ki। is samay yeh patit duniya hai। manushya maatra patit hain। samjhaaya gaya hai - satayug mein bhaarat paavan tha। grihastha dharma kaha jaata hai, jisko sukhdhaam kehte hain। bhaarat paavan tha, abhi patit hai। duhkhadhaam hai। yeh chakra phirta rehta hai। abhi yeh hai kalyaankaari sangamayug, jabki patit manushya-srishti par baap ko aana padta hai - patit manushya srishti ko paavan banaane। puraani duniya se nai duniya baap rachta hi banaate hain, jisko parampita paramatma kaha jaata hai। sab bhakton ka bhagwan ek hai। to baap kehte hain - mujhe bhi patit duniya, patit shareer mein aana padta hai। paramdham se ek hi baar aata hoon - bhaarat ko paavan daivi raajya banaane। is world ki history-geography ko koi nahin jaante kyonki sab naastik hain। ek bhi aastik manushya nahin। baap ko na jaanne ke kaaran nidhan ke ban pade hain। aapas mein ladte-jhagadte rehte hain। ghar-ghar mein kitni ashaanti hai! satayug aadi mein one almighty authority devi-devta raajya tha, sukhdhaam tha phir duhkhadhaam kaise bana - yeh koi nahin jaante।

gyaan hai brahma ka din। bhakti hai brahma ki raat। sannyaasi log kehte hain - gyaan, bhakti aur vairaagya। ab woh to gharbaar chhod jangalon mein chale jaate hain। vairaagya aa jaata hai। woh hai rajoguni sannyaas, yeh hai satopradhaan sannyaas। is paap aatmaon ki duniya mein ek bhi punya aatma nahin। to yeh khel saara bhaarat par hai। bhaarat sone ki chidiya tha। bhaarat mein sona aur heere bahut athaah the। sone ke mahal bante the aur heere-javaahron ki jadat hoti thi। abhi to bhaarat kaudi jaisa bana hua hai। phir unko heere jaisa baap hi banaate hain। tum jaante ho - ham manushya se devta ban rahe hain। abhi woh baap patiton ki mahphil mein aaye hain। manushya samajhte hain - patit-paavni ganga hai, snaan karne jaate hain। phir bhi koi paap aatma se punya aatma nahin bante। phir saal by saal jaakar ganga snaan karte hain। is samay koi bhi paavan nahin hai। jab tak paavan banaane vaala baap na aaye tab tak paavan ban na saken। paavan banaate hain geeta ka bhagwan। woh bhagwan to sabhi aatmaon ka baap ek hi hai। aise nahin ki sab bhakta bhagwan hain va sarvavyaapi bhagwan hai। yeh to bhagwan ki glaani karte hain isliye yada yadaahi........ yeh bhaarat ke liye hi gaaya hua hai। jo baap aakar bhaarat ko heere jaisa banaate hain unki kitni ninda karte hain। rishi-muni phir kehte aaye - rachta aur rachna beanta hai athva neti-neti hai, ham nahin jaante। aur aajkal ke manushya phir kah dete sarvavyaapi hai। baap kehte hain - aise jab ban jaate hain tab main aakar paap aatma se punya aatma, devta banaata hoon। sabka sadgati daata hai hi ek। vahi aakar patit se paavan banaae laayak banaate hain। bachchon ko varsa dete hain। laukik baap se mila hai alpakaal ka varsa। behad ka baap kehte hain - main tumko 21 janmon liye varsa deta hoon pavitrata, shanti aur sukh ka, jo laukik baap de na sake। woh baap bhi hai, shikshak bhi hai, gyaan ka saagar bhi hai। baap ki mahima badi oonch hai, manushya srishti ka beejroop bhi hai। yeh manushya srishti ka variety dharmon ka jhaad hai। aadi sanaatan devi-devta dharma hai satayug ka। unse phir aur dharma emerge hote hain। abhi tum brahman dharma ke bane ho। inse pahle shoodra dharma ke the। abhi brahman se phir so devta phir so kshatriy banenge। yeh 84 ka chakra lagaana padta hai। satayug mein bhi pahle-pahle tum aayenge। gaaya bhi jaata hai - aatma paramatma alag rahe........। geet mein bhi suna - chaaron taraph lagaaye phere phir bhi hardam door rahe arthaat baap se mil na sake।

abhi hai raavan raajya। raam raajya hai deity raajya। manushya to samajhte hain - svarga-narka yahaan hi hai। parantu aise ho nahin sakta। manushya marta hai to kehte hain svargavaasi hua to zaroor narka mein tha। to zaroor punarjanma narka mein hi lena pade। manushyon ki to anek maten hain। ek na mile doosre se। anek prakaar ki dvet maten hain। aadhaakalpa bhaarat mein hoti hai daivi mat। ab hai aasuri mat। bhaaratvaasi jis bhagwan ko yaad karte hain, us paarlaukik baap ko to jaanna chaahiye na। abhi bhaarat kaudi misal hai। unko heere jaisa banaana hai। gaandhi athva nehru bhi chaahte the - bhaarat mein world almighty authority raamraajya ho। samajhte hain - koi samay bhaarat mein tha, abhi nahin hai isliye raamraajya ki koshish karte hain। parantu yeh koi manushya ke haath mein nahin hai। tum ho brahman, prajaapita brahma ki santaan। niraakaar aatmaayen hain parampita paramatma ki santaan। varsa hai brahmaakumaar kumaariyon ko। brahma ko bhi varsa shivbaaba se milta hai। yeh bhi bhaai ho gaya। bachche sab hain bhaai-bhaai to zaroor ek baap hai sab aatmaon ka। abhi tum brahma ki mukh vanshaavli brahman aapas mein bhaai-behen thahre। tumko varsa milta hai daade se। daade ke varse par sabhi aatmaon ka hak hai। chaahe stri, chaahe purush ke chole mein ho। laukik daade ka varsa sirf bachchon ko milta hai। yeh to behad ka baap hai na। bhaaratvaasiyon ko satayug-treta mein behad ke baap se 21 peedhi ka bahut sukh mila hua hai। tum 84 ke chakra ko abhi samajh gaye ho। baap kehte hain - main guide bankar aaya hoon tum sabko le jaane। tum hi pahle-pahle aaye the। abhi last mein bhi tum ho। phir pahle-pahle tum hi manushya se devta banne vaale ho। devi-devta dharma vaale hi 84 janma lete hain। phir nambarvaar sabke kam janma hote jaate hain। aur dharma vaalon ke zaroor kam janma honge। abhi woh aadi sanaatan devi-devta dharma nahin hai। phir se sthaapan ho raha hai। tum jaante ho ibraaham phir kab aayega? Christ kitne samay baad aayega? yeh world ki history-geography manushya hi to jaanenge na। baap sam-jhaate hain - jab sabhi paap aatma ban jaate hain tab main aakar punya aatma banaata hoon। jo kalpa pahle bane the unka sapling laga raha hoon। satayug mein tha hi ek dharma। abhi to kaliyug mein anek dharma hain। patit aatmaon ki mahphil hai। baap aate hain sabko paavan banaane। sadgati dene vaala vahi ek hai। maaya raavan durgati karti hai isliye devtaaon ke aage jaakar gaate hain - main nirgun haare mein koi gun naaheen। baap aakar patit se paavan banaae daivi gunon vaala banaate hain। abhi tum daivi gun dhaaran karte jaate ho। phir bhaarat mein daivi raajya ban jaayega। abhi yeh duniya badal rahi hai।

tum ho behad ke sannyaasi। unhon ka hai had ka vairaagya। yeh hai behad ka vairaagya। tum saari puraani srishti ko bhool apne baap ko yaad kar varsa lete ho। baap kehte hain - mujhe yaad karenge to us yaad athva yog agni se vikarma vinaash honge। phir tum vikarmaajeet banenge। baba ne samjhaaya hai - jab koi 4-5 ikatthe aate hain to form alag alag bharaao। to maaloom pade ki woh kis dharma ka hai? anek dharma, anek maten hain na। devi-devta dharma vaalon ko hi teer lagega। karaachi mein hamesha alag-alag samjhaate the। form bharaane ka kaayda bhi zaroori hai। 7 roz bhatthi mein padna pade kyonki mahaarogi ban pade hain। (bhramri ka misaal) tum bachche bhramriyaan ho। bhoon-bhoon kar aap samaan banaana padta hai। devta dharma vaalon ki hi sapling lagegi। bachchon ko yuktiyaan bhi seekhni hai। bolo - saat roz jab samjho tab mulaakaat ho sakegi aur tum par rang bhi tab lagega। tum sabhi brahmaakumaar-kumaariyaan ho। manushya itna bhi nahin poochhte itne brahmaakumaar-kumaariyaan kya hain? kaun hain? are, prajaapita brahma ki santaan to zaroor brahmaakumaar-kumaariyaan kahenge na। criminal assault ho na sake। yeh hai raajayog, god fatherly university। bhagvaanuvaach - main tumko raajaaon ka raaja banaata hoon। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vikarmaajeet banne ke liye saari puraani duniya se behad ka vairaagya kar, ise bhool ek baap ki yaad mein rehna hai।

2) bhramri misal gyaan rang lagaane ki seva karni hai। yukti se mahaarogiyon ko nirogi, naastik ko aastik banaana hai।

vardaan:- sada saakshi sthiti mein sthit rah nirlep avastha ka anubhav karne vaale sahajyogi bhav

jo deh ke sambandh aur deh se saakshi arthaat nyaare hain woh is puraani duniya se bhi saakshi ho jaate hain। ve samparka mein aate hue, dekhte hue bhi sada nyaare aur pyaare rehte hain। yeh stage hi sahajyogi ka anubhav karaati hai। isi ko kehte hain saath mein rehte hue bhi nirlep। aatma nirlep nahin hai lekin aatma-abhimaani stage nirlep arthaat maaya ke lep va aakarshan se pare hai। is avastha mein rahne vaale maaya ke vaar se bach jaate hain।

slogan:- shubh bhaavna aur shubh kaamna dvaara sookshm seva karne vaale hi mahaan aatma hain।

maateshvari ji ke mahaavaakya

“paramatma ek hai baaki sarva manushya aatmaayen hain''

ab yeh to saari duniya jaanti hai ki paramatma ek hai vo sarvashaktivaan hai, jaaneejaananhaar hai, aise to saari duniya khud bhi kehti hai ham paramatma ki santaan hain। paramatma ek hai, bhal koi dharma vaala ho vo bhi paramatma ko hi maante hain। vo bhi apne ko paramatma dvaara bheja hua sandeshvaahak samajhte hain, aise hi sandesh lekar apne apne dharma ki sthaapna karte hain। jaise gurunaanak ne bhi paramatma ki itni badaai ki ekonkaar sat naam। ekonkaar ka arth hai paramatma ek hai। sat naam arthaat uska naam satya hai to goya paramatma naam roop vaala bhi hai, avinaashi hai, akaalmoorta bhi hai to phir karta purush bhi hai maana vo khud akarta hote hue bhi kaise brahma tan dvaara karta purush bhi banta hai। ab yeh saari mahima ek paramatma ki hai, ab manushya itna samajhte hue phir bhi kehte hain eeshvar sarvatra hai। aham aatma so paramatma hai, agar sabhi paramatma thahre phir ekonkaar ....yeh mahima kis paramatma ki karte hain? yahi saboot hai ki paramatma ek hai।

“direct eeshvareey gyaan se saphalta''

yeh jo apne ko avinaashi gyaan mil raha hai vo direct gyaan saagar paramatma dvaara mil raha hai। is gyaan ko ham eeshvareey gyaan kehte hain kyonki is gyaan se manushya aadi madhya ant sukh paate hain arthaat janma-janmaantar duhkh ke bandhan se chhoot jaate hain। karmabandhan mein nahin aate iseelie hi is gyaan ko avinaashi gyaan kaha jaata hai। ab yeh gyaan sirf ek hi avinaashi parampita paramatma dvaara humein praapta hota hai kyonki vo khud avinaashi hai। baaki to sab manushya aatmaayen janma maran ke chakra mein aane vaali hain isliye unse mila hua gyaan humein karmabandhan se chhutkaara dene vaala nahin hai। is kaaran unhon ke gyaan ko mithya gyaan athva vinaashi gyaan kahenge। lekin yeh devtaayen sada amar hain kyonki inhonne avinaashi paramatma dvaara yeh avinaashi gyaan praapta kiya hai, to isse saabit hai ki paramatma bhi ek hai to uska gyaan bhi ek hai, is gyaan mein do mukhya baaten buddhi mein rakhni hain, ek to ismen vikaari kaliyugi sangadosh se door hona hai aur doosri baat ki malechchha khaan-paan aadi ki parhez rakhni hai। is parhej rakhne se hi jeevan saphal hoti hai। achha। om shanti।