Murli du jour du mardi 8 août 2023

08-08-2023 praatahmurli om shanti "baapdaada"' madhuban

“meethe bachche - sangamayug braahmanon ke liye kalyaankaari hai isliye sada phakhur mein rehna hai, kisi baat ka phikra nahin karna hai''

prashn:- jinki avastha achhi hai, unki nishaaniyaan kya hongi?

uttar:- unhein kisi bhi baat mein rona nahin aayega। murjhaayenge nahin, gam va aphsos nahin hoga। har scene saakshi hokar dekhenge। kabhi kyon, kya ke prashn nahin karenge। kisi ke naam roop ko yaad nahin karenge, ek baba ki yaad mein harshitmukh rahenge।

(maateshvari ke shareer tyaag karne par 25-06-65 ko yeh mahaavaakya baapdaada ne sunaaye hain, kripaya usi dhyaan se padhen)

geet:- maata O maata …

om shanti। meethe bachchon ko pharmaan hai ki behad ke baap ko yaad karte raho। jo bhi naam roop vaale bachche baap ki service mein hain, unse yeh gyaan aur yog sunna hai। woh bhi yahi sunaayenge ki baap ko yaad karo kyonki varsa unse milta hai। mama bhi to vahi sunaati hai, bachche bhi vahi sunaate hain ki shivbaaba ko yaad karo। tum bachche yahaan shivbaaba ki yaad mein baithe ho, tumhein koi phikar nahin karna hai kyonki tum behad ke baap se yeh varsa le rahe ho। inmen koi bhi shareer chhodkar jaate hain to ham kahenge ki yeh bhi bhaavi hai। kalpa pahle bhi yeh hua tha kyonki drama ke oopar bhi to chalna pade na, jisse koi phikra nahin rahe। aaj mama gai, kal aur bhi koi chale jaayenge phir bhi baap ko murli sunaani hai zaroor। baba tum bachchon ko nai-nai points sunaate, unka arth samjhaate rehte hain aur yahi sabko kehte hain ki bachche baap ko yaad karo, koi bhi naam roop mein phason mat। yeh to sab bachchon ke liye gyaan hai। aage chal karke aur bhi bahut kuchh wonderful baaten dekhne ki hain। is samay to hain hi duhkh ki baaten, parantu us duhkh ka humein koi phikar nahin hai। dekho, yeh baba (saakaar) to koi phikar mein nahin hai kyonki jaante hain ki hamko to baba ko hi yaad karna hai, hamko baba se varsa lena hai। baba ne samjhaaya hai ki creation se koi varsa nahin milta hai, creation ko creator se varsa milna hai isliye jo bhi creation (bachche aur bachchiyaan) hain, unhein ek creator ko yaad karna hai। chaahe kuchh bhi ho jaaye। samjho koi bhi aisa vighna padta hai to usmein sanshay ki to koi baat hi nahin hai kyonki ek shivbaaba ko hi yaad karna hai, ismen hi bachchon ka kalyaan hai। agar koi achhi service karte-karte chala jaata hai to samajhna chaahiye ki jo bhi koi jaata hai, use ja karke aur kahaan part bajaana hai। koi na koi kalyaan ke kaaran yeh sab kuchh hota hai kyonki baap kalyaankaari hai aur yeh sangamayug braahmanon ka hai hi kalyaankaari। har ek baat mein kalyaan samajh phakhur mein hi rehna hai kyonki ham eeshvareey santaan hain। eeshvar se varsa lete hain, varsa lete-lete koi chale jaate hain to zaroor unka koi aur part hoga, isse bhi jaasti koi kaarya karna hai।

aho saubhaagya! jo hamaara hi part hai kalpa pahle muaaphik baap ke madadgaar banne ka। madadgaar bante-bante koi general bhi mar padte hain। ham samajhte hain drama anusaar hi yeh sab kuchh hota hai, koi gaya to kya hua। humein unke liye kuchh karna nahin hai। hamaara to sab kuchh gupta hai। vaastav mein avastha unki achhi hai, jinhen kabhi aansu na aaye। kabhi aise bhi na samjhe ki mama ka shareer chhoot gaya, ab kya hoga! osu aaye to naapaas ho jaayenge kyonki baap baitha hai na, jo ham sabko varsa de rahe hain। woh to amar hi hai, uske liye kabhi koi osu aane ki darkaar bhi nahin hai। ham to khud bhi khushi se shareer chhodne ke liye purushaartha kar rahe hain। mama ka bhi koi kaarya arth is samay jaane ka tha, yeh bhi drama hai। koi bhi apni avastha anusaar shareer chhode to unka kalyaan hai। bahut achhe ghar mein janma lekarke vahaan bhi kuchh apni khushi denge। chhote-chhote bachche bhi sabko khush kar dete hain। sabhi unki bahut mahima karte hain। to bachchon ka drama ke oopar aur baap ke oopar madaar hai। jo kuchh bhi hota hai, second baay second.. woh drama ki noondh hai, aisa samajh karke khushi mein, sada harshit rehna chaahiye।

koi bhi naam roop mein ham logon ko phansana nahin hai। pata hai yeh shareer hai, isko to jaana hi hai। harek ka part noondha hua hai, ham royenge to kya rone se unka part badal sakta hai, isliye bachchon ko bilkul ashareeri, shant aur phir harshitmukh rehna hai। atal, akhanda raajya lena hai to aisa banna bhi hai। koi bhi itphaak ho jaave to kahenge bhaavi hai drama ki, aphsos ki to koi baat nahin। kalpa pahle bhi aise hi hua tha। itphaak to hone hi hain, chalte-chalte earthquakes ho jaate hain। aise nahin hai ki tumhaare mein se koi nahin marne hain, nahin। koi bhi mar sakte hain, koi bhi itphaak ho sakta hai isliye baba samjhaate hain ki bachche hamesha baap ki yaad mein, fakhur mein raho। ismen jo part jisko mila hua hai woh bajaata hai, usmein hamko kya karna hai। hamaara gyaan hi aisa hai - amma mare tab bhi halua khaana, yaani gyaan ratna dena। samjho baba kehta hai, yeh baba bhi chala jaaye... to tum bachchon ko phir bhi knowledge to mili hui hai ki hamko shivbaaba se varsa lena hai, inse to nahin lene ka hai। baap kehte hain yeh sab bachche jo hain mere se varsa le karke doosron ko raasta bataate hain। tum bachchon ko andhon ki laathi banna hai, baap ka parichay dena hai। harek ke oopar mehar karna hai। tumhaara yahi purushaartha hai ki yeh bichaare duhkhi hain, inko sukh ka raasta bataayen। is duniya mein sivaae ek baap ke aur koi bhi sukh ka raasta bataane vaala hai hi nahin। liberator, duhkh harta sukh karta ek hi hai, unko hi yaad karna hai।

yahaan duhkh ki koi bhi baat nahin honi chaahiye, kuchh bhi ho jaaye। bhale ham jaante hain tumhaari mama serviceable sabse number one gaai jaati hai। unke haath mein sitaar dikhaate hain, barobar jagdamba yaani maateshvari woh bahut achha samjhaati thi। woh bhi kehti thi ki shivbaaba ko yaad karo। mujhe nahin yaad karna। manamnaabhav, madhyaajeebhav - yeh do akshar mashhoor hain। baaki to detail hai।

to koi bhi haalat mein, koi bhi sanshay kisko pade, yeh kya hua, aisa kyon hua... to isse apna hi nuksaan kar denge। tum bachchon ko koi bhi haalat mein duhkh ki mahsoosta nahin aani chaahiye। bhale beemaari ho, kuchh bhi ho... yeh to karmabhog hai। baba se poochhte hain - baba yeh kya hai? baba kahenge yeh tumhaara karmabhog hai। agar koi baat drama mein pahle se bataane ki nahin hai to main kaise bataaoon...! yeh baba bhi saakshi ho karke dekhte hain, to bachchon ko bhi saakshi ho karke dekhna hai aur baap ki yaad mein fakhur mein rehna hai ki ham eeshvar ki santaan hain, eeshvar ke potre aur pautriyaan hain। eeshvar se varsa le rahe hain। barobar ham jaante hain mama ne bhi eeshvar ka varsa lete-lete, shareer chhod diya। ham har ek ko to bas baap aur varse ko yaad karna hai। saara madaar purushaartha par hai। yeh bachche bhi mahsoos kar sakte hain ki jitna ham padhenge utna ooncha pad paayenge। ooncha prince banenge। sooryavanshi bhi prince aur chandravanshi bhi prince and princess hain। to bachchon ko padhaai padhna hi hai, kuchh bhi ho jaaye padhna zaroor hai। aise thode hi hai - koi ka maa/baap marta hai to bachcha padhaai chhod dega, nahin। to tumko bhi padhaai roz padhna hai। tumhein ek din bhi padhaai nahin chhodni hai, service bhi har haalat mein zaroor karni hai। har vakta buddhi mein vahi ek baba yaad rahe। tumhein vahi padha rahe hain aur unse hi varsa lena hai। usne hi hamaari buddhi ka taala khola hai। saare brahmaanda, sookshm vatan aur phir srishti ke aadi madhya ant ka gyaan hamaare buddhi mein hai। isi gyaan se ham chakravarti bante hain। bas, usi nashe mein, mauj mein rah sabko sunaana bhi aise hi hai kyonki tum bachche jo pakke brahman bane ho, tunhen koi phikra nahin hai। ismen koi murjhaane ki, phikra karne ki baat hi nahin hai। aisi achhi avastha chaahiye।

tum samajhte ho ki ant mein vijay hamaari honi hi hai, dher ke dher apna varsa lene ke liye aayenge। kuchh bhi ho, tumhaare service ki vriddhi hoti hi rahegi, sirf tumhaari activity daivi chaahiye। usmein koi bhi aasuri gun nahin chaahiye। kisse ladna, jhagadna, kisse kaduva bolna ya andar mein kuchh laalach, lobh, krodh ..aadi agar hoga to bahut kadi saja khaani padegi isliye koi ko bhi duhkh nahin dena hai। sabko sukh ka raasta bataana hai। koi chhote bachche hain, chanchalta karte hain to bhi chamaat nahin maarni hai। unhein bhi pyaar se chalaana hai। ghar mein bhi bada yukti se chalna hai। kai hain jo yahaan bahut achhi tarah se samajhte hain, ghar mein jaate hain to unhein maaya hairaan karti hai। yeh bhi baap samjhaate hain ki bachche toofaan jor se aate rahenge, dinapratidin toofaan aur vighna padte rahenge, tumhein ghabraana nahin hai। baap kehte hain is hamaare roodra gyaan yagya mein athaah vighna padenge, kyonki yeh nai knowledge hai।

koi poochhte hain tum shaastron ko maante ho? bolo haan, maante hain yeh sab bhaktimaarga ke shaastra hain। yeh gyaan maarga hai। gyaaneshvar baap kehte hain mujhe yaad karo bas, ham bhi tumko kehte hain baap ko yaad karo। karo na karo tumhaari marji। abhi narka hai, raavan raajya hai। ab baap aur svarga ko yaad karo। tum ganga mein snaan to janma-janmaantar karte aaye ho, phir bhi duniya patit banti aai hai। abhi baap kehte hain bas, mujhe yaad karo। jo yahaan ke honge unke sanskaar hi dekhne mein aayenge, woh jhat samajh jaayenge।

tum abhi behad ke buddhivaan ho। sayaane ko buddhivaan kaha jaata hai। to tumhein usi nashe mein rehna hai। baaki gam ki koi baat nahin hai, yeh ham jaan gaye ki drama chal raha hai। tum kahenge vaah! mama gai! woh actor doosra act karne gai। ismen moonjhane ki, rone ki, duhkh ki darkaar nahin hai। woh koi oonchi service karne ke liye gai। tum din-pratidin oonche bante jaate ho। koi shareer chhodega to bhi oonchi service jaake karega, isliye bachchon ko koi bhi duhkh nahin hona chaahiye। mama kya, sabhi jaayenge। hamko bhi baba ke paas jaana hai, hamaara kaam hai baba se। sabka kaam hai baba se, mama ka kaam tha baba se। abhi unse woh knowledge pa karke service karke jaake koi doosri service ke liye doosra part bajaane gai। ham saakshi ho karke dekhte hain। aise nahin ki mama chali gai, phalaani chali gai, yeh chali gai... are aatma service ke liye gai। shareer to sab khaak mein hi milne hain isliye kabhi bhi bachchon ko koi prakaar ka phikra nahin karna hai। haan, yeh satya hai, yeh jo student baba ka tha, yeh bada achha tha। achha samjhaata tha... gaaya jaata hai। agar koi bhi prakaar ka sanshay aaya to yeh khatma hua, pad se bhrashta ho jaayega isliye baba bachchon ko samjhaate rehte hain bachche, koi prakaar ka phikra nahin karo। directions jo milte hain unhein amal mein laate raho। aise mat samjho ki yeh kya ho gaya? phikra unko hoga jo baap ko aur knowledge ko bhoolega। tum bachche sabhi master knowledgeful ho। jiska jo part hai, usmein ham kar hi kya sakte hain?

achha - raatri ko to sab yaad mein baithe, achhi kamaai ho gai। baba yahaan aa karke bachchon ko dekhte hain, khush hote hain ki yeh bageecha ban raha hai। abhi brahman hain, iske peechhe devi-devtaaon ka bageecha banna hai। abhi yahaan sab purushaarthi hain। koshish kar rahe hain achha phool banne ki। kaante ko phool banaane ka show karenge। tumhein yahaan stheriyam hokar baithna hai। baba dekho kitna pakka karaate hain। baba ka pharmaan mila hua hai sirf mujhe yaad karo। koi ne roya to baba kahenge jin roya tin khoya। baba dekh raha hai koi murjhaaya hua phool to nahin hai? nahin। sab mahaaveer hain। aise-aise vighna to aane hi hain। drama hai, bhaavi hai। achha!

meethe-meethe sikeeldhe gyaan sitaaron prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni daivi activity banaani hai। kabhi bhi ladna, jhagadna nahin hai, kaduva nahin bolna hai, lobh laalach nahin rakhna hai। koi ko duhkh nahin dena hai। sabko sukh ka raasta bataana hai।

2) koi bhi vighna mein sanshay nahin uthaana hai, drama ki nishchit bhaavi samajh phakhur mein rehna hai, phikra nahin karna hai।

vardaan:- sachchi dil se baap ko raazi karne aur sada raazi rahne vaale raazayukta bhav

jo bachche sachchi dil se baap ko raazi karte hain, baapdaada unhein svayan ke sanskaaron se, sangathan se sada raazi arthaat raazayukta rahne ka vardaan dete hain। svayan ke va ek do ke sanskaaron ke raaz ko jaanna, paristhitiyon ko jaanna, yahi raazayukta sthiti hai। sachche dil se baap ko apna potaamel dene va sneh ki roohrihaan karne se sada sameepta ka anubhav hota hai aur pichhla khaata samaapta ho jaata hai।

slogan:- sachchi dil se daata, vidhaata, vardaata ko raazi karne vaale hi roohaani mauj mein rehte hain।