Murli du jour du jeudi 10 août 2023

10-08-2023 praatahmurli om shanti "baapdaada"' madhuban

“meethe bachche - jab tum baap ki god mein aate ho to yeh duniya hi khatma ho jaati hai, tumhaaraaagla janma nai duniya mein hota hai isliye kahaavat hai - aap muye mar gai duniya''

prashn:- kis ek rasma ke aadhaar par baap ke avatran ko siddha kar sakte ho?

uttar:- bhaarat mein har varsha pitra khilaane ki rasma chali aai hai, kisi brahman mein aatma ko bulaate hain, phir unse baaten karte hain, uski aash poochhte hain। ab shareer to aata nahin, aatma hi aati hai। yeh bhi drama mein noondh hai। jaise aatma pravesh kar sakti hai vaise hi paramatma ka bhi avatran hota hai, yeh tum bachche siddha kar samjha sakte ho।

geet:- marna teri gali mein…

om shanti। yeh bhi gaayan hai is samay ka, jo phir bhakti maarga mein chala aata hai। is samay jabki tum baap ke paas jeete ji marte ho to barobar saari duniya hi khatma ho jaati hai। agyaan kaal mein manushya marte hain to is hi duniya mein janma lete hain। duniya kaayam hai। kahaavat hai - aap muye mar gai duniya। parantu unke marne se duniya ka vinaash to nahin ho jaata। is hi duniya mein phir janma lena padta hai। tum marenge to yeh duniya bhi khatma ho jaayegi। tum jaante ho ham phir nai duniya mein aayenge। yeh sirf tum brahman hi jaante ho। eeshvar ka bachcha hone se hamko satayug ka birth right milta hai, svarga ki baadshaahi milti hai। narka khatma ho jaata hai। ismen koi mehnat nahin hai। sirf baap ko yaad karna hai। manushya jab koi marte hain tab usko kehte hain raam-raam kaho। pichhaadi mein uthaate samay kehte hain - raam naam satya hai। yeh bhagwan ko hi kehte hain। raam-naam sat hai arthaat parampita paramatma jo sat hai, uska hi naam lena chaahiye। maala bhi raam-raam kah simarte hain। yeh raam naam ki dhuni aisi lagaate hain jaise koi saaz bajta hai। tum bachchon ko baap samjhaate hain ki koi bhi aavaaz nahin karna hai, sirf buddhi se yaad karna hai। tum jaante ho jeete ji eeshvar ki god mein aane se phir yeh duhkh roopi duniya khatma ho jaati hai। baba, ham aapke gale ka haar ban jaayenge। gaaya bhi jaata hai rudra maala। raam maala nahin kaha jaata hai। tum rudra maala mein pirone ke liye is rudra gyaan yagya mein baithe ho, kalpa pahle muaaphik। doosra koi satsang nahin, jahaan aise samajhte ho ki ham eeshvar baap ke gale mein piroyenge। baap se to zaroor varsa milega। baap kaun kehta hai? aatma। aatma mein hi buddhi hai na। buddhi samajhti hai phir kehti hai, pahle sankalp aata hai phir karmendriyon se kaha jaata hai। barobar ham baba ke bane hain, baba ke hi hokar rahenge। is antim janma mein god father kehte hain na। phir poochho tumhaare mein god father ki knowledge hai? to kahenge god to sarvavyaapi hai। bolo, tumhaari aatma kehti hai parampita, to pita sarvavyaapi kaise hoga? bachche mein baap aa gaya kya? baap ko sarvavyaapi kehna bilkul wrong hai। yeh baaten bahut achhi reeti samajhkar phir samjhaana hai।

rudra gyaan yagya to mashhoor hai। rudra hai niraakaar। shreekrishna to saakaar hai। aakhreen bhagwan kisko kaha jaaye? shreekrishna ko to nahin kah sakte। manushya to bahut bhole hote hain। kah dete hain - god is omni present। baap to apne ghar mein hi rehta hai, aur kahaan rahega? ab baap is behad ke ghar mein aaya hua hai। yahaan viraajmaan hai। kehte hain ki mainne ismen pravesh kiya hai। jaise braahmanon mein pitron ko bulaate hain। samjho, koi apne baap ke pitra ko khilaate hain to aatma kahegi ki main inmen aaya hua hoon। mainne ismen pravesh kiya hua hai, kuchh poochhna ho to poochho। aage pitron ko bulaane ka bahut rivaaj tha। pitra to aatma hai na। pitra ko yaani aatma ko khilaaya jaata hai। kahenge aaj hamaare daade ka pitra hai, aaj phalaane ka pitra hai। to aatma ko bulaaya jaata hai, khilaaya jaata hai। samjho kiska stri se pyaar hai, shareer chhod diya to uski aatma ko bulaate hain। kehte hain hamne heere ki phulli pahnaane ka vaayda kiya tha, to brahman ko bulaakar unko heere ki phulli pahnaate hain। bulaaya to aatma ko। shareer thode hi aayega। yeh rasma bhaarat mein hi hai। jaise tum sookshm vatan mein jaate ho, koi mar gaya, unka bhog lagaate ho to sookshm vatan mein woh aatma aati hai। yeh hai bilkul nai baaten। jab tak koi achhi reeti samajh na jaaye tab tak manushyon ko sanshay padta hai ki yeh kya karte hain?, braahmanon ki rasma-rivaaj dekho kaisi hai! sabhi mandiron aadi mein bhog lagaate hain। pitra ko bhog lagaate hain। gurunaanak ki aatma ko bhog lagaaya, ab woh kahaan hai? yeh samajh nahin sakte। tum to jaante ho jinhonne dharma sthaapan kiya hua hai, woh sab yahaan hain। jaise baba kehte hain main to brahman dharma sthaapan karta hoon। yeh to patit-paavan hai। paavan aatma hi aakar dharma sthaapan karti hai। parantu satopradhaan aatma ko phir sato, rajo, tamo mein aana hi hai। is samay sabhi aatmaayen kabradaakhil hain। baba to hai hi patit-paavan। woh kabhi kabradaakhil nahin hote। manushya ko patit-paavan nahin kahenge। patit-paavan maana saari duniya ka patit-paavan। patit duniya ko paavan banaane vaala ek baap ke sivaae koi ho nahin sakta। woh to aate hain apne-apne dharma sthaapan karne। Christian dharma ka saara sijra vahaan hai। pahle Christ aaya phir unke pichhaadi sab aate rahenge, vriddhi ko paate rahenge। woh koi patit ko paavan nahin banaate। nambarvaar unhon ki sankhya aati hai। patit-paavan to is samay chaahiye, jabki sabhi kabradaakhil ho jaate hain। sabko paavan banaane vaala ek vahi hai।

yeh tum samajhte ho barobar is samay saari duniya jadajdeebhoot hai। banyan tree ka misaal dete hain, bahut bada jhaad hai, uska foundation sada hua hai, baaki taal-taaliyaan saari khadi hain। yeh bhi jhaad hai। devi-devta dharma ka jo foundation hai, unki jad ekdam kat gai hai। baaki sab hain। beej ho to phir se sthaapan kare na। baap kehte hain, main phir se aakar sthaapna karaata hoon। brahma dvaara sthaapna, shankar dvaara vinaash। barobar anek dharmon ka vinaash hua tha। mahaabhaarat ladaai ke samay jo raajayog seekhe, unki phir raajdhaani sthaapan ho gai। tum jaante ho abhi ham baap ke paas jaayenge phir nai duniya mein aayenge। phir jhaad vriddhi ko paata jaayega। devi-devta dharma jo tha woh praayahlop ho gaya hai। baap kehte hain main phir se aakar aadi sanaatan devi-devta dharma ki sthaapna karta hoon। bhaarat jo oonche te oonch tha unko ab grahan laga hua hai। kaam chita par baithne se is samay tumhaari aatma kaali ho gai hai। ab phir tum gyaan chita par baith gore bante ho। tum jo shyaam ban gaye the, shyaam ko sundar gora banaane vaala hai parampita paramatma। unki shreemat milti hai। parampita paramatma ki aatma ever pure gori hai। aatma mein hi khaad padti hai। (sone ka misaal) abhi tum jaante ho - is puraani duniya ka vinaash hona hai, sabhi ka maut hai। phir tumko kahne vaala koi nahin rahega ki raam-raam kaho। ab dekho, nehru mara to unki raakh ko sab jagah giraaya। samjha, achhi khaad milegi। jhaad mein keeda aadi pad jaata hai to usmein raakh daalte hain। abhi is saari prithvi ko kitni raakh milegi। bade-bade sannyaasi-mahaatmaaen marte hain to unhon ki raakh aise nahin daalte hain। sabse uttam hain sannyaasi। abhi to kitne marenge! kitni khaad milegi! to kyon nahin srishti first class anaaj aadi degi। satayug mein sab hare bhare sabja hote hain। is srishti ko naya banaane mein time lagta hai। tum sookshm vatan mein jaate ho, kitne bade-bade phal tumko dikhaate hain, shoobi-ras pilaate hain। tum vichaar karo - kitni khaad milegi! so bhi khaas bhaarat ko। vahaan kitni achhi-achhi cheejen niklengi nai duniya ke liye। khaad padkar saari duniya nai ho jaayegi। sookshm vatan mein baikuntha ka shoobeeras tumko pilaate hain। bageeche aadi ka saakshaatkaar karaate hain। bachchon ne saakshaatkaar kiya hai। shoobeeras peekar aate hain। prince-princess bageeche se phal le aate the। ab sookshm vatan mein to bageecha ho na sake। zaroor baikuntha mein gaye honge। ek-ek ko saakshaatkaar nahin karaayenge। jo nimitta bante hain, unko saakshaatkaar karaate hain। ho sakta hai agar tum yaad mein rahenge, baba ke bachche bankar rahenge to pichhaadi mein tumko bhi saakshaatkaar hoga। yeh to pahle gaooshaala banni thi, bhatthi mein pakna tha to bahut aa gaye।

bachchon ko samjhaaya hai sirf koi ko literature dene se samajh nahin sakenge। samjhaane vaala teacher zaroor chaahiye। teacher second mein samjhaayega - yeh tumhaara baba hai, yeh daada hai, yeh behad ka baap svarga ka rachayita hai। sirf koi ko literature diya to dekhkar phenk denge, kuchh bhi samjhenge nahin। itna zaroor samjhaana hai ki baap aaya hai। yeh dhindhora pitvaana tumhaara farja hai। barobar yaadav-kaurav bhi hain, mahaabhaari ladaai bhi saamne khadi hai। zaroor raajayog sikhlaane vaala bhi hoga। zaroor svarga ki sthaapna bhi hogi। ek dharma ki sthaapna, anek dharmon ka vinaash hoga। tum jaante ho ham nar se naaraayan, naari se lakshmi bante hain। yeh hai hamaari em object। manushya se devta kiye karat na laagi vaar। devta sirf sooryavanshi ko kaha jaata hai। chandravanshi ko kshatriy kaha jaata hai। pahle to devta banna chaahiye na। naapaas hone se kshatriy ho jaate hain। to baap kehte hain - meethe-meethe sikeeldhe bachche। kitne dher sikeeldhe bachche hain! dekho, kiska bachcha gum ho jaata hai, 6-8 maas ke baad aakar milta hai to kitna pyaar se aakar milega! baap ko kitni khushi hogi! yeh baap bhi kehte hain - laadle sikeeldhe bachche, tum 5 hajaar varsha ke baad aakar mile ho। laadle bachche, tum bichhud gaye the, ab phir aakar mile ho behad ka varsa lene liye। deity world sovereignty is your god fatherly birth right। baba tumko behad ki baadshaahi dene aaya hai। yeh hai heavenly god father। kehte hain tum bachchon ke liye kitni badi saugaat laai hai! parantu itna laayak banna hai, shreemat par chalna hai। mama-baba kahkar phir agar bhool jaaye ya faarakti de to gale ka haar nahin banenge। bachchon ko kitna pyaar kiya jaata hai! baap bachchon ko sir par rakhte hain। behad ke baap ko kitne bachche hain। baba kitna oonch maathe par chadhaate hain। paanv mein jo gire hue hain unhon ko maathe par chadhaate hain। to kitna khushi mein rehna chaahiye! aur shreemat par chalna chaahiye। ek ki shreemat par chalna hai। apni manmat par chala to yeh mara। shreemat par chalenge to shreshtha te shreshtha manushya arthaat devta banenge। baba poochhte hain na ki kitne number mein paas honge? baap bhi kehte hain sooryavanshi bano। to mama-baba ko follow karna pade। aap samaan svadarshan chakradhaari banaana hai। shivbaaba ke aage le aate hain to baba poochhte hain kitne ko aap samaan banaaya hai? kitne maze ki baaten hain। tum hi samajh sakte ho, naya koi bilkul hi nahin samajh sakega ki yeh koi manushya se devta banne ki college hai। koi ko to 7 roz mein bahut achha rang chadh jaata hai। koi ko bilkul nahin chadhta। bahut mehnat karni padti hai। pahli-pahli baat bachchon ko samjhaai ki pahle sabko bolo ki behad ke baap ko jaante ho? kehte hain - haan, woh mere mein bhi hai, sarvavyaapi hai। phir to poochhne ki darkaar hi nahin hai। jab baap kehte ho to baap tumhaare mein va mere mein kaise ho sakta hai? baap se to varsa liya jaata hai। to pahle-pahle alf par samjhaao।

baap kehte hain - “mere sikeeldhe bachche।'' aise koi saadhu-sannyaasi kah na sake। tum jaante ho barobar ham shivbaaba ke sikeeldhe bachche hain, 5 hajaar varsha ke baad phir aakar mile hain svarga ka varsa lene liye। jaante ho ham hi svarga ke maalik the phir ham hi bante hain। svarga mein jaana zaroor hai। phir purushaartha anusaar oonch pad paana hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maat-pita ko follow kar aap samaan banaane ki seva karni hai। svadarshan chakradhaari banna aur banaana hai।

2) baap ke gale ka haar banne ke liye buddhi se baap ko yaad karna hai, aavaaz nahin karni hai। yaad ki dhun mein rehna hai।

vardaan:- deh-abhimaan ke tyaag dvaara sada svamaan mein sthit rahne vaale sammaandhaari bhav

jo bachche is ek janma mein deh-abhimaan ka tyaag kar svamaan mein sthit rehte hain, unhein is tyaag ke return mein bhaagyavidhaata baap dvaara saare kalpa ke liye sammaandhaari banne ka bhaagya praapta ho jaata hai। aadhaakalpa praja dvaara sammaan praapta hota hai, aadhaakalpa bhakton dvaara sammaan praapta karte ho aur is samay sangam par to svayan bhagwan apne svamaandhaari bachchon ko sammaan dete hain। svamaan aur sammaan donon ka aapas mein bahut gahra sambandh hai।

slogan:- har kadam mein baap ki, brahman parivaar ki duaayen lete raho to sada aage badhte rahenge।