Murli du jour du mercredi 23 août 2023

23-08-2023 praatahmurli om shanti "baapdaada"' madhuban

“meethe bachche - jis maat-pita se tumhein behad ka varsa milta hai us maat-pita ka haath kabhi chhodna nahin, padhaai chhodi to chhora-chhori ban jaayenge''

prashn:- khushanseeb bachchon ka purushaartha kya rehta, unki nishaani sunaao?

uttar:- jo khushanseeb bachche hain - woh dehi-abhimaani rahne ka purushaartha karte hain। jo sunte hain uska auron ko daan dete hain। woh shankhadhvani karne bigar rah nahin sakte। dhaarna bhi tab ho jab daan karen। khushanseeb bachche din-raat seva mein first class mehnat karte hain। kabhi bhi dharmaraaj se don't care nahin rehte। sirf achha-achha khaaya, achha-achha pahna, service nahin ki, shreemat par nahin chale to maaya bahut buri gati kar deti hai।

geet:- bholenaath se niraala…

om shanti। bigdi ko sudhaarne vaala to ek hi hai - yeh duniya nahin jaanti। tum bachche samajhte ho, jo yahaan baithe ho। tumhaare mein bhi nambarvaar purushaartha anusaar jaante hain। bigaadne vaali hai maaya। aasuri mat par chalne vaale hi bigadte hain। ab tum bachche jaante ho bholaanaath shiv ko hi kaha jaata hai। shankar ko bholaanaath nahin kehte hain। bholaanaath unko kaha jaata hai jo bigdi ko banaane vaala hai, bada bhola hai, gareebon ko akhut khajaana dene vaala hai। bachchon ko aadi-madhya-ant ka gyaan dete hain, jiske yeh chitra bane hue hain। aur koi aisa nahin samjhaate ki yeh ulta vriksha hai। bhagvaanuvaach hai ki is jhaad aur drama ka gyaan aur koi bhi ved shaastra mein nahin hai। bhagwan ne hi diya hai। unka hi shaastra hai, jiske liye kaha jaata hai sarva shaastra shiromni bhagvat geeta।

parampita paramatma kitna meetha baba hai parantu uski yaad maaya bhula deti hai। tum shivbaaba ko yaad karne ki koshish karte ho, lekin maaya badi jabardasta hai, woh tumko yaad karne nahin degi। ab baba tumko is rone ki duniya se door le jaate hain, jahaan 21 janma tumko rone ki darkaar hi nahin rehti hai। tumne 63 janma to roya hai। 84 janma nahin kahenge। yeh bhi tum bachche hi jaante ho। bholaanaath baith samjhaate hain। jabse raavan bigaadna shuru karte hain, tab se tum rone lagte ho। manushyon ko samjhaane ke liye hi yeh bada jhaad aur gola banvaaya jaata hai kyonki bade chitron par achhi reeti samjhaaya ja sakta hai। bhal koi bachche apne karmon anusaar itna nahin bhi dhaaran kar sakte hain। sabhi to raaja-raani nahin banenge। achhe karma kiye hain to uska phal aage zaroor milta hai। karmon ki gati hai na। baap kehte hain main karma-akarma-vikarma ki gati ko jaanta hoon aur samjhaata hoon। teacher to sabhi ko ek jaisa hi padhaate hain। phir koi achhe number se paas hote hain, koi naapaas hote hain। kahenge kya karen, karmon ka aisa hi hisaab-kitaab hai jo ham padhte nahin। yahaan bhi aisa hai। koi to achha padhte hain, koi to padhaai athva college ko hi chhod dete hain। college chhoda goya baap-teacher-satguru ko chhoda। chhodne se chhora ban jaate hain। chhora unko kaha jaata hai jinke maa-baap nahin hote hain। to maat-pita, jinse svarga ka varsa milta hai unko chhoda to chhora-chhori ban jaate hain। yahaan bhi kai samajhte hain - yahaan se chhoot puraani duniya mein jaayen। lekin vahaan gyaan to utha nahin sakte। vahaan to naatak, bioscope, ghoomna-phirna, achha kapda aadi milega। jinki takdeer mein nahin hai to phir aise khyaalaat chalte hain। vinaash kaale vipreet buddhi hoti hai to phir puraani duniya taraph chale jaate hain। tum jaante ho puraani duniya to jalda khatma honi hai। saath mein to kuchh nahin chalna hai। tumko is deh-abhimaan ko bhi chhodna hai। deh-abhimaan ke kaaran hi aur sab vikaar aate hain। dehi-abhimaani banne mein bahut mehnat hai। baap kehte hain apne ko aatma samjho। main bhi tempory is tan mein aaya hoon। ham so devta the, ab phir ham so shoodra bane hain। shreemat par chal ham vishwa ko svarga banaate hain। tum bachche kitne khushanseeb ho! jab shivbaaba aate hain tab tum bhaarat maataaon ko hi shakti sena banaate hain isliye hi tumhaara naam pada hai shiv shakti sena। tum shiv se shakti le apna svaraajya sthaapan kar rahe ho। oonch te oonch hai shivbaaba। duniya to bilkul hi ghor andhiyaare mein hai। tumhaare mein bhi nambarvaar purushaartha anusaar sojhre mein hain। koi-koi ki jyot jagti hi nahin hai। woh bhi drama mein noondh hai। kisi ki jyot jagti bhi hai to phir maaya bujha deti hai। chalte-chalte maaya ka toofaan lagne se phir vaise ka vaisa ban jaate hain। is duniya mein koi to bahut saahookaar hain, koi 10 roopaya bhi nahin kamaate। kai manushyon ko bhojan bhi mushkil se milta hai। khaane ke liye kitna pukaarte hain। baba un dvaara (videshon dvaara) sahaayta karva rahe hain। yeh manushya to nahin jaante। yeh bhi drama mein raaz hai। tum jab bahut duhkhi hote ho tab baap aate hain। agar unhon ko prerna nahin milti to tumko madad nahin karte। abhi tumhaari complete raajdhaani sthaapan nahin hui hai।

to yeh chitra hain kisko samjhaane ke liye। inka bahut mahatva hai। jaise maps (nakshe) hote hain, map ke sivaae kaise pata pade phalaana shahar kahaan hai। yeh maps vahaan nahin honge। yahaan to bhaarat kitna bada hai। vaastav mein bhaarat ki sabse jaasti sankhya honi chaahiye। to rahne liye kitni jagah chaahiye। svarga mein to bahut thode rahenge। tumhaari buddhi mein yeh baaten hain। vinaash hoga to ham baaki bahut thode rahenge। jhaad ka foundation hai na। phir baad mein jhaad vriddhi ko paata rahega। phir nambarvaar aur jhaad lagte rahenge। tumhaare mein bhi bahut thode hain jo in baaton ko samajhte hain aur nashe mein rehte hain। ham baba dvaara knowledgeful bante hain। baba to bahut sahaj batlaate hain। kehte hain sirf is srishti chakra ko dhyaan mein rakho। srishti chakra aur shankh। jo gyaan ka shankh bajaane vaale nahin honge to unko geeta sunaane vaala brahman kaise kahenge? geeta sunaane vaale bhi nambarvaar hote hain। jo achhe pakke vidvaan honge unhon ko nasha rahega। kitne hajaaron manushya baith sunte hain। tumhaari to hain nai baaten। kehte hain inhon ka gyaan na hinduon ka hai, na musalmaanon ka hai, pata nahin kahaan se laaya hai। phir bhi kai to samajhte hain na - bholaanaath baba, bhakton ka rakshak bhagwan, patit-paavan aaya hai। unko aana zaroor hai। baap kehte hain meri yaadgaar ke bhi mandir hain। main aaya hi hoon patiton ko paavan banaane। yeh tum bachche jaante ho - baba aakar hamko 5 hajaar varsha pahle samaan samjha rahe hain। tum kehte ho - baba, ham bhi 5 hajaar varsha pahle aaye the, aapse varsa liya tha। itne dher bachche kehte hain, ismen andhashradha ki koi baat hi nahin। sabhi kehte hain - baba, ham aapke potre, brahma ke bachche hain। koi se bhi poochho to kahenge - haan, shivbaaba ke bachche to sab bhaai-bhaai hain। phir saakaar mein brahma ki aulaad hone se behen-bhaai brahmaakumaar-kumaari ho gaye। to yeh buddhi mein rehna chaahiye। ham brahma ke bachche brahmaakumaar-kumaariyaan thahre, ismen vikaar ki koi baat nahin। ek hi kul ho gaya। prajaapita brahma rachayita hai। zaroor yeh praja hai na। shivbaaba aakar brahma dvaara bachche banaate hain, to zaroor satayug ke pahle aaye honge। jo brahman phir devta bante hain woh zaroor pavitra rahenge। jo-jo pavitra bante hain woh apna raajya-bhaagya lete hain। shivbaaba brahma dvaara yeh rachna rach rahe hain। tum jaante ho ham 5 hajaar varsha pahle bhi sangam par the, ab bhi hain phir ham devta banenge। satayug mein va kaliyug mein koi brahmaakumaar-kumaariyaan nahin hote hain, sangam par hi hote hain। brahmaakumaar-kumaariyaan bhaai-behen bante hain - yeh pavitra rahne ki yukti hai। jo pavitra nahin bante woh to vishwa ka raajya le na sake। brahman hi devta banne vaale hain। baap samjhaate hain - bachche, purushaartha karke dhaaran karo aur doosron ko karaao। jab devta banne laayak ban jaayenge tab vinaash hoga। vinaash saamne khada hai। jo achhe serviceable bachche hain unhon ki buddhi mein thaharta hai। daan nahin karte to buddhi mein thaharta hi nahin hai। kai brahmaakumaar-kumaariyaan achhi first class mehnat karte hain, koi second, koi third class karte hain, to milega bhi aisa hi। sabhi kehte hain hamko first class brahmaakumaari bhejo। ab itni kahaan se laayenge? yeh bhi shivbaaba jaante hain ki first class kaun hain? har ek ki avastha ko jaante hain। bahut bachchiyaan achhi service karti hain।

braahmanon (laukik brahman) ko khaane ka bahut rehta hai, jagah-jagah dhaama khaate rehte hain। bachchon mein bhi koi-koi hain, achha bhojan na mile to aaraam na aaye। baba-mama ka naam badnaam kar dete hain। phir samjhaao to gussa aa jaata hain। kai dharmaraaj ko bhi don't care karne vaale hain। woh phir aashcharyavat bhaaganti ho jaate hain। maaya aisi buri gati kara deti hai, jo shreemat par nahin chalte। phir vikaar ke liye ablaaon par kitne atyaachaar karte hain। atyaachaar bhi aho saubhaagya hai। baap se varsa to le lenge na। bahuton par atyaachaar hote hain kyonki vish bigar rah nahin sakte। yeh hai durgati ki duniya। ismen kiski sadgati ho nahin sakti। mrityulok aur amarlok ko koi nahin jaante। amarlok satayug mein hai aadi, madhya, ant sukh। dikhaate hain amarnaath ne paarvati ko katha sunaai। ab sookshm vatan mein to katha sunne ki darkaar nahin। to yeh kathaayen aadi kahaan se aai? amraktha sunaai phir sookshm vatan se kahaan gaye? kuchh bhi pata nahin। to in baaton ko achhi reeti samjhaana chaahiye। katha sunaane vaale to bahut hain, pahle unhon ki baat sunkar phir samjhaana chaahiye। dashahre par bade-bade aadmi raavan ko dekhne jaate hain। sensible manushya samjhenge ki bandar kaise raam ko sahaayta karenge? kuchh bhi nahin samajhte। is samay to nation (desh), nation se ladte rehte hain। ek Christ ke bachche aapas mein ladte hain। baap kehte hain yeh bhi drama ki bhaavi hai। drama ka maaloom pada hai tab to tum ab purushaartha karte ho। jaante ho ab khel poora hota hai, baba se varsa lena hai। yeh drama ka raaz aur koi ki buddhi mein nahin hain। baba ne aakar sab raaz samjhaaye hain। padhaane vaala, patit-paavan woh baap hai। balihaari unki hai। maaya neench banaati hai। oonch te oonch baap hi aakar oonch banaate hain। kehte hain - bachche, ab mere se suno, puraani deh ka bhaan chhodne ka purushaartha karte raho। abhi to tumko patiyon ka pati mil gaya hai, jo svarga ki baadshaahi dete hain। vahaan hai hi sampoorn nirvikaari। yeh hai sampoorn vikaari duniya। duniya ek hi hai। vahi sampoorn nirvikaari phir sampoorn vikaari bante hain। pahle bhaarat svarga tha, ab narka hai। yeh chitra bade valuable hain। vilaayat mein koi ko samjhaakar do to kahenge ki yeh cheez to badi achhi hai। kaise srishti ka chakra phirta hai, kis-kis ki dynasty chalti hai, sabke chitra inmen hain। koi bhi dharma vaale ko samjhaane se khush honge। haan, aage chal ek-do se sab sunenge - yeh to bahut achhi knowledge hai। vilaayat mein koi sensible jaaye to bahut service ho sakti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) karma-akarma-vikarma ki gati ko buddhi mein rakh shreshtha karma karne hain। padhaai kabhi nahin chhodni hai।

2) gyaan daan karne se hi dhaarna hogi isliye daan zaroor karna hai। kabhi bhi baap ki aagyaaon ko don't care nahin karna hai।

vardaan:- sab vyartha chakron se mukta rah nirvighna seva karne vaale akhanda sevaadhaari bhav

seva to sab karte hain lekin jo seva karte bhi sada nirvighna rehte hain, uska bahut mahatva hai। seva ke beech mein koi bhi prakaar ka vighna na aaye। vaayumandal ka, sang ka, aalasya ka…yadi koi bhi vighna aaya to seva khandit ho gai। akhanda sevaadhaari kabhi kisi vighna mein nahin aa sakte। jara sankalp maatra bhi vighna na ho। sab vyartha chakron se mukta raho tab saphal aur akhanda sevaadhaari kahenge।

slogan:- jo dil aur dimaag se honest hain, vahi baap va parivaar ke pyaar ke paatra hain।