Murli du jour du lundi 4 septembre 2023

04-09-2023 praatahmurli om shanti "baapdaada"' madhuban

“meethe bachche - gyaan saagar baap se varsa lena hai to 20 naakhoonon ka jor dekar bhi padhaai zaroor padho, padhaai se hi raajaai va jeevanmukti pad praapta hoga''

prashn:- gyaan maarga mein sada kaayam kaun rah sakta hai? oonch pad ki praapti ka aadhaar kya hai?

uttar:- jinka padhaai ke sivaae doosra kisi bhi baat mein shauk nahin hai, gyaan ki paripakva avastha hai, vahi is gyaan maarga mein kaayam rah sakte hain। baaki dhyaan deedaar ki aash rakhna, khelpaal karna, isse koi faayda nahin, aur hi maaya pravesh kar leti hai phir baap ka haath va padhaai chhod dete hain। oonch pad ke liye padhaai par full attention chaahiye।

geet:- tumheen ho maata…

om shanti। om shanti ka arth to bachchon ko samjhaaya gaya hai। jo bhi religious minded athva dharmaatma purush hote hain, mandir tikaanen mein jaate hain to unke mukh se om shanti akshar nikalta hai। parantu woh arth nahin samajhte। ham bhi kehte hain om shanti, aham aatma। aatma akshar zaroor aata hai। supreme soul athva aatma kehti hai om shanti। main jo aatma hoon, mera svadharma hai shant। aatma apna occupation batlaati hai। baap bhi kehte hain om shanti। ham bhi aatma hain parantu mujhe param aatma kehte hain kyonki main sadaiv paramdham mein rehta hoon। main janma-maran mein nahin aata hoon। baap sammukh aakar kehte hain tum punarjanma mein aate ho, tum dehdhaari ho। sookshm vatan vaale bhi sookshm dehdhaari hain। mai inse bhi pare hoon। mujhe koi sthool shareer nahin hai। sookshm shareerdhaari ko kehte hain - yeh brahma hai, yeh vishnu, yeh shankar hai। naam to shareer ka hua na। aatma ka to nahin hai। aatma shareer dhaaran karti hai, tab shareer par naam padta hai। koi marte hain to kahenge phalaane ka shareer chhoot gaya। naam to shareer par rah jaata hai phir doosra shareer lete hain। parampita paramatma ke liye to aise nahin kahenge ki woh ek shareer chhod doosra lete hain। sabka shareer par naam padta hai। tum bachche mere bante ho to tumko bhi doosra naam deta hoon। jaise guru log naam dete hain na। aajkal kanya shaadi karti hai to unka bhi naam badalta hai। purush ka nahin badalta kyonki purush ko to dhandha karna hai apne naam se। maataaon ka to dhandha hai nahin, isliye unka naam badal sakta hai। purushon ka insurance dhandhe aadi mein naam hai। ab baap samjhaate hain - sab yaad to karte hain tum maat-pita ho aur saathi ho, khivaiya ho, tum hamko saath le chalte ho। dekho, kitne sambandhon mein aate hain। shareer chhodkar phir aapke saath chalna hai। tum bachche jaante ho - khivaiya hamko saath mein le jaayenge।

baap ki kitni mahima hai! phir woh kab aayenge? kab aakar saathi banenge? yeh nahin jaante। kehte hain jab bhakti maarga ka ant hota hai tab bhakton ki raksha karne mujhe aana padta hai। mujhe khivaiya ban vaapis le jaana hai। tum jaante ho kaise aakar maat-pita bane hain। inko hi khivaiya, guru kaha jaata hai। chhi-chhi duniya, jeevanbandha se jeevanmukti mein le jaate hain isliye unko patit-paavan khivaiya kaha jaata hai। nai duniya kaha jaata hai - satayug ko। duniya to yahi hai, sirf puraani duniya ka vinaash hota hai। jaise puraane ghar mein rahkar naya banaae phir puraana ghar chhodna hota hai na, yeh bhi jab sthaapna ho jaati hai to phir puraani duniya ka vinaash hota hai। trimoorti ka bhi arth samjhaaya hai। brahma dvaara svarga ki sthaapna karna - yeh parampita paramatma ka hi kaam hai। unhon dvaara karaate hain kyonki karnakraavanhaar hai। baap aakar sammukh samjhaate hain। brahma dvaara sahaj raajayog aur gyaan tum brahma mukh vanshaavli ko baith sikhlaata hoon। bhavishya 21 janma ke liye tum so devi-devta pad paayenge, nambarvaar purushaartha anusaar।

tum jaante ho ham maat-pita se padh rahe hain, yeh hai hi eeshvareey vishwa-vidyaalay। agar padhaai ko chhod denge to samjha jaayega inki takdeer mein nahin hai। school to chalna hi hai। baba aakar is brahma tan dvaara padhaate hain। to bachche bhal kahaan bhi hon, kisi bhi centre par hon, jaante ho gyaan saagar paarlaukik parampita paramatma se hamko jeevanmukti ka athva raajaai ka varsa paana hai। agar ham padhaai chhod denge to varsa pa nahin sakenge। baap to aaye hain saath le jaane। nai duniya sthaapan ho jaayegi phir sabko khivaiya le jaayenge। tum khivaiya ko bhi jaante ho aur jin dvaara sthaapna, vinaash, paalna karaate hain unhon ko bhi tum jaante ho। phir is padhaai se jo lakshmi-naaraayan ban raajya karte hain unko bhi tum jaante ho। samajhte ho ham barobar is padhaai se raajaai pad praapta kar rahe hain। jitna jo padhenge...... padhaai nahin padhenge to pad bhrashta ho padega। yeh hai raajayog ki padhaai। bahut bachche padhaai padhte-padhte thak jaate hain। nahin padhna maana thak jaana। kehte hain - bas, aage ham nahin padh sakte hain। is padhaai mein kharche ki baat to nahin hai। us padhaai mein gareeb bichaare padhaai ka paisa nahin de sakte hain to padhna chhod dete hain। parantu jinko padhaai ka achha shauk hota hai to government ko apply karte hain ki ham padhna chaahte hain parantu paisa nahin hai। phir unko government paisa deti hai। kaise bhi karke request karte hain ki main padhna chaahta hoon, mere baap ke paas paisa nahin hai, humein madad karo। government paas paisa na hone kaaran refuse kar deti hai। samajhte hain hamko padhna to zaroor hai phir kya karenge? bade saahookaar va daani purush ke paas jaayenge। hamaare maat-pita gareeb hain ham padhkar service karna chaahte hain, aap humein madad kar sakenge? religious minded jo honge woh madad de denge। kanyaayen aise request nahin kar sakti, purush kar sakte hain। padhaai se income bahut hoti hai। yahaan yeh padhaai bhi hai aur yeh sauda bhi hai। baap saudaagar, ratnaagar hai aur phir gyaan saagar hai।

maat-pita behad ka gyaan saagar kehte hain - main kalpa pahle muaaphik tumko raajayog sikhaakar raajaaon ka raaja banaata hoon। sab points dhaaran karni hain। baalig buddhi achhi reeti dhaaran kar sakte hain। buddhi par hi saara madaar hai। koi ki satopradhaan, koi ki sato, koi ki rajo, tamo, buddhi hai। us school mein bhi students jaante hain inki buddhi kaisi hai। satopradhaan buddhi vaale paas with honour hote hain। unhein hi monitor aadi banaate hain। scholarship bhi mil jaati hai। yeh phir behad ka school hai। inmen bhi sato, rajo, tamo buddhi hain। yahaan martaba ek hi hai। yeh hai hi raajayog। eeshvareey padhaai ek hi hai। baap kehte hain main tum sab bachchon ko raajayog sikhaata hoon। to jitna purushaartha karenge utna oonch pad paayenge। oonch pad ko to samajh gaye ho। nambarvaar pad paayenge। baap ka to love sab par hai। sabko maaya ki janjeeron se chhudaane aaye hain। aur koi aise kah nahin sakenge ki kalpa-kalpa ham tumko raajayog sikhlaate hain। yeh baap hi kehte hain kalpa-kalpa, kalpa ke sangamayuge, yuge aata hoon। manushyon ne phir yuge-yuge likh kitni bhool kar di hai। baap kehte hain main patit-paavan hoon। main aata hoon tumko paavan banaane, kaliyug ant aur satayug aadi ke sangam par। is samay baba aaya hua hai to achhi reeti padhna hai, vinaash bhi hone vaala hai। 20 naakhoon ka jor dekar padhna hai, himmat dikhaani hai। padhaai nahin chhodni hai। jo padhaai chhod dete hain woh naapaas ho gir padte hain। bachchon ko saavdhaani milti hai। koi bhi kaam va krodh ka va lobh, moh ka bhoot nahin aana chaahiye। dil darpan mein apne ko dekhte raho - main laayak hoon lakshmi ko varne? naarad ka bhi ek misaal laga diya hai। bhakta to tum sab ho na। bhakti maarga mein males mein naarad uttam gaaya hua hai aur females mein meera। woh hai bhakti maarga। gyaan maarga mein phir dekhte ho - mama-baba ka naam baala hai। phir unki vijay maala bhi bani hui hai। simran unko kiya jaata hai jo sukh dete hain। uska yaadgaar banaate hain। abhi unhon ne kya kiya? koi ne karke college khol, daan-punya bahut kiya, aur kya karenge? abhi phirangiyon se (angrejon se) raajya le congress ne raajya kiya। baap kehte hain yeh to runya ke paani (mrigtrishna) misal raajya hai। bhal kitne bhi sukh hain parantu yeh hain sab runya ke paani misal। baahar ka bhabhka bahut hai। yeh science bhi 100 varsha chalti hai। yeh daada jab baambe mein service par tha to yeh bijli-telephone aadi kuchh nahin tha। abhi science ne kitna kamaal kiya hai। abhi baaki thode varsha hain। science ka ghamanda 100 varsha se shuru hua hai। satayug ke 100 varsha mein to pata nahin kya kar denge। vahaan in sab cheezon mein bal rehta hai jo tum yahaan se le jaate ho। akhanda, atal, sukh-shaantimay raajya karne ke liye tum bal le jaate ho। to padhaai par itna attention dena chaahiye, itna purushaartha karna chaahiye।

tum jaante ho is maat-pita se sukh ghanere milte hain phir agar chalte-chalte chhod dete hain to goya sunte hi nahin। na suna jaakar apne dhandhe-dhori mein laga to khalaas। jo paaya so paaya। haath chhodne baad phir maaya ekdam hap kar leti hai। gaj ko maaya graah ne hap kar liya। yeh to hona hi hai। tum dekhte bhi ho - kaise achhe-achhe, bade-bade nimantran dene vaale, centre kholne vaale bhi padhaai ko chhod dete hain। kahenge - drama anusaar inki takdeer mein itna hi tha। phir unka kya haal hoga? maaya ekdam kha leti hai। kitne khatma hue। bahut dhyaan mein jaane vaale, khel-paal karne vaale aaj hain nahin। yeh dhyaan-deedaar ki aashaayen kabhi nahin rakhni chaahiye। aasha rakhte hain to aasha mein vighna pad jaate hain। maaya ke bhoot bhi pravesh kar lete hain। dhyaan ka kitna part bajaate the। jo 5-7 roz dhyaan mein bachpan ke part mein rehte the, mahaaraani ban jaate the, aaj woh hain nahin। isse koi faayda nahin। gyaan ki paripakva avastha vaale hi kaayam rah sakte hain। kabhi bhi dhyaan mein jaane ki aasha nahin rakhni chaahiye। baba jo padhaate hain woh dhaaran karna hai। jitna padhenge utna oonch pad paayenge। tum bachchon ko bhi yaad rakhna hai hamko parampita paramatma padhaate hain। ham padhkar 21 janma ke liye oonch pad paate hain phir ham hi poojya se pujaari bante hain। jo brahman kul ke bante hain vahi aise kah sakte hain। doosra koi kah na sake। bhaarat ka hi khel bana hua hai। tum kahenge ham poojya so devi-devta bante hain। poojya hi phir girkar poore 84 janma lete hain। bachchon ko yeh sab maaloom hai। shivbaaba ka occupation bhi tum jaante ho। second mein nishchay se tum varsa le sakte ho। kehte hain ham eeshvar ke bane hain phir eeshvar ko phaarakti dena - wonder hai na। school mein padhte hain, achhe number mein paas hua to unko sapoot samjha jaayega। student apne ko bhi sapoot samjhega। baap aur teacher bhi kahenge yeh sapoot hai। yeh to baap, teacher, guru ek hi hai। baap bhi hai phir teacher ban hamko padhaate hain phir saath bhi le jaayenge। baap kehte hain ham saath ikatthe chalenge। tumhaari jyoti bujh gai thi, ab jag rahi hai। hamaari jyoti sadaiv jagi hui hai। hai saari aatma ki hi baat। tum jaante ho ham aatma ashareeri aai phir ashareeri ho jaana hai। hamaara khel poora hokar phir repeat hona hai। yeh tum bachchon ko buddhi mein samajh hai।

tum maat-pita....... tumhaari padhaai ki kripa se hamko kitne sukh ghanere milte hain। aise maat-pita ko kabhi bhoolna, chhodna nahin chaahiye। baap kehte hain aise maat-pita, baapdaada ko, jo tumko itna varsa dete hain, chitthi likhte rahenge to baba samjhenge - yaad karte hain। baba ki to roz yaad-pyaar jaati hi hai murli mein। bachchon ki chitthi deri se aayegi to samjhenge poora yaad nahin karte hain। baap ko to likhne ki darkaar nahin hai। baap ki to roz murli jaati hai। yaad-pyaar baba dete hi hain। woh to jaagti jyot hai। bachchon ko samjhaate hain patra zaroor likhte raho। ananya bachchon ki phikra nahin rehti hai। hilne vaalon ko saavdhaani di jaati hai - bhool nahin jaana, padhte rehna। samaachaar to baba ke paas sab aate hain na। register mein naam daakhil rehta hai। poochhte hain yeh bachcha absent kyon hai? roz absent rehte to samjha jaata - mar gaya। baba poochhte hain - phalaane bachche ka koi samaachaar nahin aaya hai? to likhte hain phalaana abhi aata hi nahin hai, sanshaybuddhi ho gaya hai। achha, aage chalkar shaayad nishchaybuddhi ho jaaye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vijay maala mein aane ki himmat dikhaani hai। simran laayak banne ke liye sabko sukh dena hai।

2) sapoot student ban baap-teacher ka naam baala karna hai। kabhi bhi kaam va krodh ke bhoot ke vash ho ulta kaam nahin karna hai।

vardaan:- karnakraavanhaar ki smriti se vighnon ke beej ko samaapta karne vaale samartha aatma bhav

sarva prakaar ke vighnon ka beej do shabdon mein hainh 1-abhimaan aur 2-apmaan। seva ke kshetra mein ya to abhimaan aata ki mainne yeh kiya, main hi kar sakta...ya to mere ko aage kyon nahin rakha gaya, mere ko yeh kyon kaha gaya, yeh mera apmaan kiya gaya। yahi bhaavna bhinna-bhinna vighnon ke roop mein aati hai। jab khudaai khidmatgaar hain, karnakraavanhaar baap hai to abhimaan kahaan se aaya, apmaan kahaan se hua? isliye combined roop ki smriti dvaara samartha aatma bano to vighnon ka beej sada ke liye samaapta ho jaayega।

slogan:- gyaan swaroop banna hai to baap aur padhaai se samaan pyaar ho।