Murli du jour du jeudi 21 septembre 2023

21-09-2023 praatahmurli om shanti "baapdaada"' madhuban

“meethe bachche - jab tak aatma part mein hai tab tak use 100 percent rest mil nahin sakti, rest milti hai nirvaandhaam mein, vahaan koi part nahin''

prashn:- jo bachche chalte-chalte padhaai se thak jaate hain unhein phir kaun se sankalp aate hain jo vikalpa ka roop le lete hain?

uttar:- 1. unhein baap ko chhod dene ke arthaat phaarakti dene ke sankalp aate hain। baba kehte - yeh sankalp aana bhi vikalpa hai। aisa sankalp karna bhi paap hai। padhaai na padhna maana hi thak jaana। aise bachche apna khaana kharaab kar dete hain। 2. agar kisi baat ke kaaran koi maat-pita se rooth jaate hain to woh 21 janmon ki baadshaahi ganva dete hain।

geet:- aaj andhere mein hain insaan…

om shanti। yeh hai bhakti ka geet va praarthana। kiske paas praarthana karte hain? bhagwan ke paas। parantu ghor andhiyaare mein hone kaaran bhagwan ko jaante hi nahin। to ab sune kaun? jab bhagwan unhon ki pukaar sune tab aakar jyoti jagaaye। parantu bachche bhagwan ko jaante hi nahin to sunenge phir kaise? abhi tum sammukh baithe ho, bhagwan tumko ghor andhiyaare se ghor sojhre mein le ja rahe hain। gaate bhi hain brahma ki raat aur brahma ka din। raat mein dar-dar bhatakte bhi bahut hain। pahaadon par, tikaane, mandiron, masjidon me jaate hain। parantu bhagwan milega kahaan? bhagwan ka janma bhi bhaarat mein manaate hain। shiv raatri kehte hain na। barobar unki yaadgaar pratimaayen bhi bhaarat mein hain। parantu samajhte nahin ki woh kab aate hain! bilkul ghor andhiyaare mein hain। abhi tum ghor andhiyaare mein nahin ho। tum nambarvaar purushaartha anusaar sojhre mein aate jaate ho। tum bachche jaante ho yeh saari srishti ki rachna kaun aur kaise karte hain।

tum yahaan aaye ho - eeshvareey vishvavidyaalay mein, jahaan eeshvar padhaate hain, manushya se devta banaate hain। yeh knowledge tumhaare mein bhi nambarvaar samajhte hain। koi to achhi reeti samajhte hain, koi poora nahin samajhne vaale bhaaganti ho jaate hain, maat-pita se rooth padte hain। jinke liye gaaya hua hai - aashcharyavat aise maat-pita se rooth padte hain। pashanti, kathanti phir rooth padanti.... jaante hain maat-pita se hamko 21 janma liye svarga ki baadshaahi milti hai, phir bhi bhool jaate hain। baba ne samjhaaya hai - jisko shanti kaha jaata hai woh milti hi hai shantidham athva nirvaandhaam mein, usko muktidhaam bhi kaha jaata hai। agar koi kahe ham 100 percent rest mein hain, parantu yeh akshar koi hai nahin। saare din mein koi na koi karma zaroor chalta hai। haan, alpakaal ke liye raat ke neend ko rest kehte hain kyonki aatma kehti hai main saara din kaam karke thak gayi hoon, ab rest leti hoon। apne ko detach kar dete hain। yeh to jaante ho - baap rehte hi hain shanti-desh mein ya aise samajhte ho ki parampita paramatma vahaan rest mein rehte hain। paramatma rest mein tab rehte hain jab unka part nahin hai। muktidhaam mein koi kaam nahin karte hain। yeh badi samajhne ki baaten hain। abhi tumhaari buddhi ka taala khulta jaata hai। baap kehte hain tumko pata hai main rest mein kab rehta hoon? jabki tum bachche svarga mein, sukh mein rehte ho। vahaan tumko sukh-shanti hai। usko rest nahin kaha jaayega। rest mein tab kahen jab tumhaara koi part nahin hai। tum jab svarga mein ho to mujhe koi mehnat nahin karni padti। main vahaan (ghar mein) shant mein rehta hoon, shanti ka doosra akshar vahaan rest kahenge। yahaan to rest mein rah nahin sakte hain। aatma kehti hai - main rest mein tab hoon jabki raat ko neend karti hoon, us samay rest mein hoon ya shant mein hoon - baat ek hi hai। raat ko ashareeri ban jaate hain, shant ho jaate hain। phir uthte hain to karma mein aate hain phir bhi an-rest hai। karma karte an-rest bhaasti hai। satayug mein an-rest ka savaal nahin, an-rest karti hai maaya। vahaan aise nahin kahenge ki ham rest mein rehte hain। kaam-kaaj sab karte hain parantu ashaanta nahin rehte hain। baaki rest akshar hai nahin। samjho koi kehte hain ham shimla jaate hain rest ke liye, parantu rest ka arth nahin। sachchi rest tab hai jab ham nirvaandhaam mein rehte hain, vahaan chup rehte hain। baaki rest koi ko nahin hai। koi kahe hamko 100 percent rest hai to yeh wrong hai। isko agyaan kaha jaae। haan, yeh zaroor kaha jaayega - padhaai nahin padhne chaahte to rest lete hain। na padhna, rest lena yeh to phir thakna ho gaya। apna hi khaana kharaab karte hain।

samjhaaya jaata hai - he raat ke raahi, svarga ki raah par chalte-chalte thak mat jaana, rooth nahin jaana। maat-pita ko faarakti dene ka to sankalp bhi nahin uthaana chaahiye। yeh sankalp uthaaya to usko vikalpa kaha jaata hai। aise maat-pita jisse svarga ki raajaai milti hai, uske liye sankalp bhi kyon uthaayen! likhte hain kabhi-kabhi sankalp aata hai - chhod den, kuchh samajh mein nahin aata। are, samajhne ka to yeh time hai na। samajhna arthaat padhna, tum jaante ho ham padh rahe hain। parampita paramatma jo gyaan saagar hai, oonch te oonch hai unko koi bhi jaante nahin। bhal brahma-vishnu-shankar athva lakshmi-naaraayan ko jaante hain parantu bhaaratvaasiyon ko yeh pata nahin ki lakshmi-naaraayan ne raajya kab liya aur kisne diya? maaya ne bilkul hi ghor andhiyaare mein daal diya hai। baap aakar samjhaate hain - rachta baap manushya srishti ki rachna kaise karte hain? yeh to koi bhi nahin jaante। baap hi baith samjhaate hain prajaapita brahma ko creator nahin kahenge। bhal prajaapita kaha jaata hai parantu woh rachta nahin। manushya kehte hain hamko allaah ne paida kiya। niraakaar father ko hi rachta kahenge। rachta baap ko zaroor manushya hi jaanenge, jaanvar to nahin jaanenge। jaanvar to mukh se nahin kahega ki hamko paramatma ne racha hai। manushya kahenge hamko bhagwan ne racha hai। to baap baith samjhaate hain - tum dekho yeh rachna kaise rachi? pahle-pahle rachna hoti hai mukh vanshaavli ki। bachche ko bada hokar phir baap banna hai। yeh behad ka baap kehte hain - dekho, main bhi kaise rachna rachta hoon। inmen pravesh kar inko mukh dvaara kehta hoon - he aatma, tum meri ho, main tumhaara baap hoon। phir inke dvaara tum bachchon ko rachta hoon। tum ho mukh vanshaavli। agyaan kaal mein bhi kehte hain na jaise hain, taise hain, mere hain। baap bhi aise kehte hain। tum brahma ke bachche ban jaate ho। to abhi tum ho mukh vanshaavli phir tum kukh vanshaavli bhi banenge। baap kehte hain tum mere ho phir tum daivi gharaane mein jaayenge। baap yeh eeshvareey rachna kaise rachte hain - yeh koi bhi samajh nahin sakte। baap samjhaate hain yeh (brahma) bhi kehte hain main bhi mukh vanshaavli banta hoon। baap ke saath maa zaroor chaahiye। tum kehte ho ham prajaapita brahma ke mukh vanshaavli hain, shivbaaba ne hamko apna banaaya hai। unko shareer to chaahiye na। shivbaaba ko to shareer nahin hai। shareer ka loan lete hain। phir kehte hain tum mere ho, isko kaha jaata hai mukh vanshaavli। shivbaaba is mukh se, is vanni (stri) dvaara kehte hain ki tum mere bachche ho। baap hi samjhaate hain aur koi shaastron aadi mein yeh baaten hain nahin। tum abhi sunte ho phir praayahlop ho jaayega।

is samay hai ghor andhiyaara। baap aakar roshni karte hain tab to brahma ki raat, brahma ka din gaaya hua hai। kuchh to hai na। gaaya hua hai jhooth to jhooth, sach ki ratti nahin। parantu baap kehte hain - praayah kuchh na kuchh rehta hai, pralay nahin ho jaati। thode rahenge phir jhaad vriddhi ko paata hai। manushyon ne phir mahaapralay dikhaai hai। parantu mahaapralay kabhi hoti nahin। aise nahin hota jo saagar mein bachcha peepal ke patte par aaye, yeh sab gapode hain। baap ne samjhaaya hai tum jab garbha mahal se aate ho to vahaan aanand mein rehte ho। vahaan duhkh, paap karma hota nahin। woh hai hi punya aatmaon ki duniya, yeh hai paap ki duniya। yahaan sab kuchh tyaag kar tum sada punya aatma bante ho। tum itna punya karte ho jo aadhaakalpa tumko koi paap aatma nahin kahenge। tum avinaashi punya aatma ban jaate ho। yahaan phir aadha-kalpa paap aatma kahenge। ghadi-ghadi daan-punya karte rehte hain। bhaarat ko complete dharmaatma kaha jaata hai। bhaarat mein daan-punya karte hain। tum jaante ho yeh duniya ham chhodne vaale hain, phir aana nahin hai। is duniya ki saamagri tum transfer karte ho nai duniya ke liye। manushya eeshvar arpanam karte hain arthaat transfer karte hain doosre janma ke liye। yahaan tum transfer karte ho - 21 janmon ke liye। to bahut chaahiye na। tumse saari kichad-patti lekar naya dete hain। puraana lekar sone ka dete hain। tum sachchaai se baap ko dete ho, baap bhi tumko sab kuchh dete hain। tumhaara part jo chalta aaya hai - yeh drama mein tha, sabne gharbaar chhoda। nahin to gaooshaala kaise bane? manushya to nahin jaante, bhatthi kaise banti hai! woh to dikhaate hain - billi ke poongare aadi the।

yeh sab gyaan tum bachchon ko abhi hai। phir vahaan yeh gyaan nahin rahega। ham aise 21 janma raajya karenge phir girenge - vahaan yeh gyaan nahin rehta। trikaaldarsheepne ka part tumhaare mein abhi rehta hai। mukhya hero heroine ka part tumhaara hi hai। aur koi ka part nahin। asur se devta phir devta se asur tum bhaaratvaasi hi bante ho। baaki to hai beech ke by-plots। naatak mein beech mein phir hansi-kudi ka khel bhi karte hain na। aadhaakalpa baad devi-devta dharma praayah lop ho jaata hai। tumhaari buddhi mein yeh saara chakra phirta rehta hai tab to tum samjhaate ho na। parampita paramatma bhi param aatma hai, paramdham mein rahne vaala। baap kehte hain mere mein saara gyaan hai। main manushya srishti ka beejroop chaitanya hoon। woh to jad beej hote hain, shiv to chaitanya hai। unki pratima pooji jaati hai।

aajkal government jhaadon ke sapling lagaati hai। yeh hai chaitanya beej, manushya srishti roopi jhaad ka beej kehte hain - mujhe saare jhaad ki knowledge hai। to jab koi kehte hain 100 percent rest mein hain, to samjhaana chaahiye ki 100 percent rest to kabhi milti nahin। haan, aise kahenge svarga mein 100 percent pavitrata-sukh-shanti rehti hai। naam hi hai svarga। baap ko kehte hain sat shri akaal। sach bolne vaala। unko koi kaal nahin khaata। unko kaha jaata hai kaalon ka kaal। baap kehte hain yeh chhi-chhi duniya hai। is bhambhor ko aag zaroor lagni hai। tum bachche jaante ho yeh mahaabhaarat ladaai maha-kalyaankaari hai। manushya yagya karte hain ki shanti ho jaae, goya samajhte hain svarga ke gates na khulen। tum to taali bajaate ho, bhambhor ko aag lage to ham nai duniya vaikuntha mein jaayen। yeh vinaash jvaala is rudra gyaan yagya se hi prajjavlit hui hai। jo baap ke banenge vahi svarga ke maalik banenge। baaki sabko hisaab-kitaab chuktu kar vaapis jaana hai। tum jaante ho ab vaapis muktidhaam mein jaakar phir apna part repeat karna hai। satayug mein yeh itne sab devi-devta kahaan se aaye? manushya se devta kiye karat na laagi vaar। tumko kaudi se heere jaisa, patit se paavan banaate hain। jitna jo knowledge dhaaran karenge utna pad paayenge। raajdhaani sthaapan ho rahi hai। tum jaante ho ham apne liye svarga ki sthaapna kar rahe hain shreemat par। agar shreemat se koi roothkar apni mat par chale to woh raavan mat ho jaayegi isliye qadam-qadam par tum shreemat lete raho। baap jeete ji tumko trustee banaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) complete daani banna hai। sachchaai se sab baap ko arpan kar nai duniya ke liye transfer kar dena hai।

2) jeete ji trustee banna hai। qadam-qadam par baap se shreemat leni hai। kabhi bhi shreemat se rooth manmat par nahin chalna hai।

vardaan:- combined roopdhaari ban seva mein khudaai jaadu ka anubhav karne vaale khudaai khidmatgaar bhav

svayan ko sirf sevaadhaari nahin lekin eeshvareey sevaadhaari samajhkar seva karo। is smriti se yaad aur seva svatah combined ho jaayegi। jab khuda ko khidmat se juda kar dete ho to akele hone ke kaaran saphalta ki manzil door dikhaai deti hai isliye sirf khidmatgaar nahin, lekin khudaai khidmatgaar hoon - yeh naam sada yaad rahe to seva mein svatah khudaai jaadu bhar jaayega aur asambhav bhi sambhav ho jaayega।

slogan:- karmayogi banna hai to kamal aasandhaari (nyaare aur pyaare) bano।