Murli du jour du jeudi 12 octobre 2023

12-10-2023 praatahmurli om shanti "baapdaada"' madhuban

“meethe bachche - shreemat par chalo to tumhaare sab bhandaare bharpoor ho jaayenge, tumhaari takdeer oonchi ban jaayegi''

prashn:- is kaliyug mein kis cheez ka devaala nikal chuka hai? devaala nikalne se iski gati kya hui hai?

uttar:- kaliyug mein pavitrata, sukh aur shanti ka devaala nikal chuka hai isliye bhaarat sukhdhaam se duhkhadhaam, heere se kaudi jaisa ban gaya hai। yeh khel saara bhaarat par hai। khel ke aadi-madhya-ant ka gyaan abhi baap tumhein suna rahe hain। takdeervaan, saubhaagyashaali bachche hi is gyaan ko achhi reeti samajh sakte hain।

geet:- bholenaath se niraala …

om shanti। bhagvaanuvaach। kaun-sa bhagwan? bholaanaath shiv bhagvaanuvaach। baap bhi samjhaate hain, teacher ka bhi kaam hai samjhaana। satguru ka bhi kaam hai samjhaana। shivbaaba ko hi sat baba, bholaanaath kaha jaata hai। shankar ko bhola nahin kahenge। unke liye to kehte hain aankh kholi to srishti ko bhasma kar diya। bhola bhandaari shiv ko kehte hain arthaat bhandaara bharpoor karne vaala। kaunsa bhandaara? dhan-daulat, sukh-shanti ka। baap aaye hi hain pavitrata-sukh-shanti ka bhandaara bharpoor karne। kaliyug mein pavitrata-sukh-shanti ka devaala hai kyonki raavan ne shraap diya hua hai। sab shok vaatika mein rote peette rehte hain। bholaanaath shiv baith srishti ke aadi-madhya-ant ka raaz samjhaate hain arthaat tum bachchon ko trikaaldarshi banaate hain। drama ko to aur koi jaante nahin। maaya ne bilkul hi besmajh bana diya hai। bhaarat ka hi yeh haar-jeet, duhkh-sukh ka naatak hai। bhaarat heere jaisa solvent tha, ab kaudi jaisa insolvent hai। bhaarat sukhdhaam tha, ab duhkhadhaam hai। bhaarat heaven tha, ab hell hai। hell se phir heaven kaise banta hai, uske aadi-madhya-ant ka gyaan sivaae gyaan saagar ke koi samjha na sake। yeh bhi buddhi mein nishchay hona chaahiye। nishchay unko hota hai jinki takdeer khulni hoti hai, jo saubhaagyashaali banne vaale hain। durbhaagyashaali to sab hain hi। durbhaagyashaali maana takdeer bigdi hui hai। bhrashtaachaari hain। baap aakar shreshthaachaari banaate hain। parantu us baap ko bhi koi mushkil samajh sakte hain kyonki unko deh nahin hai। supreme aatma baat karti hai। paavan aatmaayen hoti hi hain satayug mein। kaliyug mein sab patit hain। anek manokaamnaayen lekar jagdamba ke paas jaate hain, jaante kuchh bhi nahin phir bhi baap kehte hain jo-jo, jis-jis bhaavna se pooja karte hain to main unko alpakaal kshanbhangur liye phal de deta hoon। jad moorti kabhi uska phal nahin de sakti। phal dene vaala, alpakaal sukh dene vaala main hi hoon aur behad ke sukh ka daata bhi main hi hoon। main duhkhadaata nahin hoon। main to duhkh harta sukh karta hoon। tum aaye ho sukhdhaam mein svarga ka varsa paane। ismen parhej bahut hai। baap samjhaate hain aadi mein hai sukh, phir madhya mein bhakti maarga shuru hota hai to sukh poora ho duhkh shuru hota hai। phir devi-devta vaam maarga, vikaari maarga mein gir padte hain। jahaan se hi phir bhakti shuru hoti hai। to aadi mein sukh, madhya mein duhkh shuru hota hai। ant mein to mahaan duhkh hai। baap kehte hain ab sarva ka shanti, sukh daata main hoon। tumko sukhdhaam mein chalne liye taiyaar kar raha hoon। baaki sab hisaab-kitaab chuktu kar shantidham mein chale jaayenge। sajaayen to bahut khaayenge। tribunal baithti hai। baba ne samjhaaya hai kaashi mein bhi bali chadhte the। kaashi kalvat kehte hain na। ab kaashi mein hai shiv ka mandir। vahaan bhakti maarga mein shivbaaba ki yaad mein rehte hain। kehte hain - bas, ab aapke paas aaoon। bahut ro-ro kar shiv par bali chadhte hain to alpakaal kshan bhangur thoda phal mil jaata hai। yahaan tum bali chadhte ho arthaat jeete ji shivbaaba ka bante ho 21 janma ka varsa paane ke liye। jeevghaat ki baat nahin। jeete ji baba main aapka hoon। woh to shiv par bali chadhte hain, mar jaate hain, samajhte hain ham shivbaaba ka ban jaaoonga। parantu bante nahin hain। yahaan to jeete ji baap ka bane, god mein aaye phir baap ki mat par chalna pade, tab hi shreshtha devta ban sakte hain। tum ab ban rahe ho। kalpa-kalpa tum yeh purushaartha karte aaye ho। yeh koi nai baat nahin।

duniya puraani hoti hai। phir zaroor nai chaahiye na। bhaarat naya sukhdhaam tha, ab puraana duhkhadhaam hai। manushya itne pattharbuddhi hain jo yeh nahin samajhte ki srishti ek hi hai। woh sirf nai aur puraani hoti hai। maaya ne buddhi ko taala lagaae bilkul hi tuchchha buddhi bana diya hai, isliye occupation jaanne bigar hi devtaaon ki pooja karte rehte hain, isko blind faith kaha jaata hai। deviyon ki pooja mein karodon roopaya kharcha karte hain, unki pooja kar khila-pilaakar phir samudra mein dubo dete hain to yeh gudiyon ki pooja hui na। isse kya phaayda? kitna dhoomdhaam se manaate hain, kharcha karte hain, haphta baad jaise shamshaan mein daphan karte hain vaise yeh phir saagar mein dubo dete hain। bhagvaanuvaach - yeh aasuri sampradaay ka raajya hai, main tumko daivi sampradaay banaata hoon। koi ko nishchay baithna bada kathin hai kyonki saakaar mein nahin dekhte। aagaakhaan saakaar mein tha to unke kitne followers the, unko sone-heeron mein vazan karte the। itni mahima koi baadshaah ki bhi nahin hoti। to baap samjhaate hain - isko andhashradha kaha jaata hai kyonki sthaai sukh to nahin hai na। bahut gande bhi hote hain, bade-bade aadmiyon se bade paap hote hain। baap kehte hain main gareeb nivaaj hoon। gareebon se itne paap nahin honge। is samay sab paap aatmaayen hai। abhi tumko behad ka baap mila hai phir bhi ghadi-ghadi unko bhool jaate ho। are, tum aatma ho na! aatma ko bhi kabhi koi ne dekha nahin hai। samajhte hain star misal bhrakuti ke beech rehti hai। jab aatma nikal jaati hai to shareer khalaas ho jaata hai। aatma star misal hai to zaroor mujh aatma ka baap bhi hamaare jaisa hoga। parantu woh sukh ka saagar, shanti ka saagar hai। niraakaar varsa kaise denge? zaroor bhrakuti ke beech aakar baithenge। aatma ab gyaan dhaaran kar durgati se sadgati mein jaati hai। ab jo karega so paayega। baap ko yaad nahin karte to varsa bhi nahin paayenge। koi ko aap samaan varsa paane laayak nahin banaate hain to samajhte hain paai-paise ka pad pa lenge। shreshthaachaari aur bhrashtaachaari kisko kaha jaata hai, yeh baap baith samjhaate hain। bhaarat mein hi shreshthaachaari devtaayen hokar gaye hain। gaate bhi hain heavenly god father........ parantu jaante nahin hain ki heavenly god father kab aakar srishti ko heaven banaate hain। tum jaante ho, sirf poora purushaartha nahin karte ho, woh bhi drama anusaar hona hai, jitna jiski takdeer mein hai। baba se agar koi poochhe to baba jhat bata sakte hain ki is chalan mein agar tumhaara shareer chhoot jaae to yeh pad paayenge। parantu poochhne ki bhi himmat koi nahin rakhte hain। jo achha purushaartha karte hain woh samajh sakte hain ham kitne andhon ki laathi bante hain? baap bhi samajh jaate hain - yeh achha pad paayenge, yeh bachcha kuchh bhi service nahin karta to vahaan bhi daas-daasi jaakar banenge। jhaadu aadi lagaane vaale, shreekrishna ki paalna karne vaale, mahaaraani ka shrringaar karne vaale daas-daasiyaan bhi hote hain na। woh hain paavan raajaayen, yeh hain patit raajaayen। to patit raajaayen paavan raajaaon ke mandir banaakar unhon ki pooja karte hain। jaante kuchh bhi nahin।

birla mandir kitna bada hai। kitne lakshmi-naaraayan ke mandir banaate hain, parantu jaante nahin ki lakshmi-naaraayan kaun hain? phir unko kitna faayda milega? alpakaal ka sukh। jagat amba ke paas jaate hain, yeh thode hi jaante ki yeh jagat-amba hi lakshmi banti hai। is samay tum jagat amba se vishwa ki sab manokaamnaayen poori kar rahe ho। vishwa ka raajya le rahe ho। jagat amba tumko padha rahi hai। vahi phir lakshmi banti hai। jisse phir varsha-varsha bheekh maangate hain। kitna farka hai! lakshmi se har varsha paise ki bheekh maangate hain। lakshmi ko aise nahin kahenge hamko bachcha chaahiye ya beemaari door karo। nahin, lakshmi se sirf dhan maangate hain। naam hi hai lakshmi-poojan। jagat amba se to bahut kuchh maangate hain। woh sab kaamnaayen poori karne vaali hai। abhi tumko jagat amba se milti hai - svarga ki baadshaahi। lakshmi se har varsha kuchh na kuchh dhan ka phal milta hai, tab to har varsha pooja karte hain। samajhte hain dhan dene vaali hai। dhan se phir paap karte rehte। dhan praapti ke liye bhi paap karte hain।

abhi tum bachchon ko milte hain avinaashi gyaan ratna, jisse tum maalaamaal ban jaayenge। jagat amba se svarga ki raajaai milti hai। vahaan paap hota nahin। kitni samajh ki baaten hain। koi to achhi reeti samajhte hain, koi to kuchh samajhte nahin hain kyoki takdeer mein nahin hai। shreemat par nahin chalte to shreshtha thode hi banenge। phir pad bhrashta ho jaata hai। saari raajdhaani sthaapan ho rahi hai - yeh samajhna hai। god father heavenly kingdom sthaapan kar rahe hain phir bhaarat heaven ban jaayega। isko kaha jaata hai kalyaankaari yug। yeh hai bahut se bahut 100 varsha ka yug। aur sabhi yug 1250 varsha ke hain। ajmer mein vaikuntha ka model hai, dikhlaate hain svarga kaisa hota hai। svarga to zaroor yahaan hi hoga na। thoda bhi suna to svarga mein aayenge, parantu padhenge nahin to jaise bheel hain। praja bhi nambarvaar hoti hai na। parantu vahaan gareeb, saahookaar sukh sabko rehta hai। yahaan to duhkh hi duhkh hai। bhaarat satayug mein sukhdhaam tha, kaliyug mein duhkhadhaam hai। yeh world ki history-geography repeat honi hai। god ek hai। world bhi ek hai। nai world mein pahle hai bhaarat। abhi bhaarat puraana hai jisko phir naya banna hai। yeh world ki history-geography aise repeat hoti rehti hai aur koi in baaton ko nahin jaante। sab to ek jaise nahin hote hain। martabe to vahaan bhi rahenge। vahaan sipaahi log hote nahin kyonki vahaan dar hota nahin। yahaan to dar hai isliye sipaahi aadi rakhte hain। bhaarat mein tukde-tukde kar diye hain। satayug mein partition hota nahin। lakshmi-naaraayan ka ek hi raajya chalta hai। paap koi hota nahin। ab baap kehte hain - bachche, mere se sada sukh ka varsa lo, meri mat par chalkar। sadgati ka maarga ek hi baap dikhaate hain। yeh hai shiv shakti sena, jo bhaarat ko svarga banaati hai। yeh tan-man-dhan sab is seva mein lagaate hain। us baapu ji ne Christian ko bhagaaya, yeh bhi drama mein tha। parantu unse koi sukh nahin hua। yeh milega, yeh hoga........। milna hai sirf baap se। baaki yeh to sab khatma ho jaayega। kehte hain birth control karo, uske liye maatha maarte rehte hain, hoga kuchh bhi nahin। abhi thodi ladaai shuru ho jaae to famine pad jaayega। ek-do mein maaraamaari ho jaayegi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jeete ji baap par bali chadhna hai arthaat baap ka bankar baap ki hi shreemat par chalna hai। aap samaan banaane ki seva karni hai।

2) avinaashi gyaan ratnon ka daan kar jagdamba samaan sarva ki manokaamnaayen poorn karne vaala banna hai।

vardaan:- sevaaon mein sada sahayogi ban sahjayog ka vardaan praapta karne vaale visheshta sampanna bhav

brahman jeevan visheshta sampanna jeevan hai, brahman banna arthaat sahajyogi bhav ka vardaan praapta karna। yahi sabse pahla janma ka vardaan hai। is vardaan ko buddhi mein sada yaad rakhna-yeh hai vardaan ko jeevan mein laana। vardaan ko kaayam rakhne ki sahaj vidhi hai - sarva aatmaon ke prati vardaan ko seva mein lagaana। seva mein sahayogi banna hi sahajyogi banna hai। to is vardaan ko smriti mein rakh visheshta sampanna bano।

slogan:- apne mastak ki mani dvaara svayan ka swaroop aur shreshtha manzil ka saakshaatkaar karaana hi light house banna hai।