Murli du jour du vendredi 13 octobre 2023

13-10-2023 praatahmurli om shanti "baapdaada"' madhuban

“meethe bachche - dheeraj rakho ab tumhaare duhkh ke din poore hue, sukh ke din aa rahe hain, nishchay buddhi bachchon ki avastha dhairyavat rehti hai''

prashn:- kisi bhi haalat mein murjhaais na aaye iski sahaj vidhi kya hai?

uttar:- brahma baap ka sample sada saamne rakho। itne dher bachchon ka baap, koi sapoot bachche hain to koi kapoot, koi service karte, koi disservice, phir bhi baba kabhi murjhaate nahin, ghabraate nahin phir tum bachche kyon murjha jaate ho? tumhein to kisi bhi haalat mein murjhaana nahin hai।

geet:- dheeraj dhar manua…

om shanti। dheeraj dhar manua manushya ko nahin kaha jaata। man-buddhi aatma mein hain। yeh aatma ko kaha jaata hai। aatma ko sivaae parampita paramatma ke aur koi kah na sake ki dhairya dharo kyonki adheerya ko hi dhairya diya jaata hai। agar eeshvar sarvavyaapi hai to usko adheerya kaha nahin ja sakta। manushya is samay sab adheerya hain, duhkhi hain isliye dhairya dene ke liye, sukh dene ke liye baap aaye hain। kehte hain ab dhairya dharo। baap ke mahaavaakya sirf tumhaare liye nahin hain, vaastav mein saari duniya ke liye hain। saari duniya aahiste-aahiste sunti rahegi। jo sunte hain woh aate rehte hain। sabka sadgati daata, duhkh harta ek baap hi hai। yeh hai hi duhkh ki duniya। bachche samajhte hain abhi hamaare mukti-jeevanmukti ke din va kaliyug patit duniya se chhutkaara paane ke din hain। tumhaari buddhi mein yeh hai, so bhi nambarvaar purushaartha anusaar। sabko yeh dhairya nahin hai ki abhi ham is duhkh ki duniya se chhutkaara paae apne sukhdhaam jaayenge। tum bachchon ko bhi sthaai nishchay rehna chaahiye। hamaare sukh ke din ab aa rahe hain, agar shreemat par chalte rahenge to। ismen aasheervaad va kripa aadi ki baat nahin hai। baap baith padhaate hain, sahaj svaraajya yog sikhlaate hain। padhaai ko knowledge bhi kaha jaata hai। tum bachchon ko shreshtha mat de rahe hain। pahle-pahle to atal nishchay chaahiye, phir kabhi woh neeche-oopar nahin ho sakte। gaate hain parvaah thi paar brahm mein rahne vaale ki, woh pa liya to baaki kya chaahiye। yeh to nishchay hai - us baap se svarga ka varsa milna hai। to dhairya pahle hi sthaai mil jaata hai। yeh hai avinaashi dhairya। certain hai ham shreemat par shreshtha te shreshtha, shreshthaachaari raajya bhaagya sthaapan kar rahe hain, bigar koi ladaai-jhagde। to phir murjhaane ki kya darkaar। bhal ghar mein 10-12 bachche hon। baba ko to dekho, hajaaron-laakhon bachche hain। kai bachche hangaama bhi machaate hain। koi sapoot bachche hain, koi kapoot hain, koi service karte hain, koi to dis service bhi karte hain। phir baba kabhi ghabraata hai kya? to bachchon ko bhi ghabraana nahin chaahiye। grihastha vyavhaar mein bhi rehna hai। ek taraph hai hathayog karma sannyaas। tumhaara hai behad ka sannyaas। yeh hai raajayog। tumhein grihastha vyavhaar mein rehte baap se varsa paana hai। bahut sahaj hai। abhi to apne sukh-dhaam ke jhaad dikhaai pad rahe hain। paroksha-aproksha buddhi se jaante hain। saakshaatkaar ho, na ho। purushaartha karte hain bhavishya sva-raajdhaani ke liye। em object saamne hai na। lakshmi-naaraayan ka chitra dekh rahe ho na। aise nahin ki hamko saakshaatkaar ho to maanen। yeh to buddhi se samajhne ki baat hai। in aankhon se chitra dekh rahe ho na। in aankhon se phir bhi yahi dekhenge। raajayog hai na। buddhi bhi kehti hai barobar chitra rakhe hain phir saakshaatkaar kya karaayen? shreekrishna satayug ka maalik hai na। shiv paramdham mein rahne vaala hai। tum lakshmi-naaraayan ban sakte ho, yeh hai tumhaari em object। to aaine mein dekho ki woh daiveegun hamaare mein kahaan tak aaye hain? baap dhairya to bahut achha dete hain।

ab padhna hai। raajaai ke liye gyaan chaahiye। woh baap de rahe hain। aai.si.S. vaalon ko sabse jaasti nasha rehta hai - ham bade se bada officer banenge। yoon to dhandhe-vyavhaar mein bhi karodapti ban jaate hain। baba phir tumko yeh dhandha sikhlaate hain - satta matta ka। tum baap ko kaudiyaan dete ho, unke evaj mein 21 janmon ke liye baba tumko svarga ka maalik banaate hain। yeh saudaagri bhi hai to padhaai bhi hai। sirf saudaagri se kaam nahin, world ki history-geography ka bhi knowledge chaahiye na। svadarshan chakradhaari bhi banna hai। jitna padhenge utna oonch pad paayenge। svarga ka maalik to praja, naukar-chaakar bhi hogi। abhi bhi sab kehte hain na - bhaarat hamaara desh hai। parantu raaja aur praja mein to bahut farka hai। baap kehte hain jitna ho sake - oonch te oonch pad paao, maat-pita samaan purushaartha karo। samjha jaata hai sab to gaddi par nahin baithenge। phir bhi race karaani padti hai। nambarvaar purushaartha anusaar hi raajaai paayenge। jinka jo purushaartha kalpa pahle vaala hai woh saakshi ho dekhte hain। phir kisi ka purushaartha thanda dekhte hain to teevra banaaya jaata hai। tumhaara to purushaartha bahut thanda dikhaai padta hai। tumhaara mamatva laga hua hai। trustee banaaya phir mamatva kyon? tum shreemat par chalo। poochhte hain - baba, makaan banaau? haan, kyon nahin banaao, bhal aaraam se baitho। baaki thode roz yeh chhi-chhi duniya hai, bhal aaraam karo, bachchon aadi ki shaadi karaao। baap koi paisa nahin lete hain। woh to daata hai। shivbaaba ne is samay bachchon ke rahne liye yeh makaan banaaya hai। apne rahne liye to yeh shareer nimitta banaaya hai, jeev aatmaon ko to zaroor rahne ke liye makaan chaahiye। to tum bachchon ke liye bana rahe hain। baba bhi is makaan mein baithe hain na। yeh tum jaante ho - hamaara woh hai aatmaon ka baap aur yeh hai shareer ka baap। tumko adopt kiya hai। tum hamaare bachche ho। mama-baba kehte ho na, isko god lena kaha jaata hai। prajaapita brahma ko itne bachche hain to zaroor god ke hi bachche honge। tum bachchon ko adopt karte hain। sarasvati bhi beti hai na। yeh hai badi guhya baaten samajhne ki। geeta-bhaagvat aadi to tum bhi padhe ho, yeh baba bhi padha hai। parantu ab to shreemat milti hai, drama anusaar। jo kuchh kaha so drama anusaar। usmein zaroor kalyaan hi hoga। nuksaan hota hai, usmein bhi kalyaan hi hai। har baat mein kalyaan hai। shivbaaba hai hi kalyaankaari। unki mat achhi hai। agar us par koi shanka rahi to shreemat par na chal apni mat par chalte hain, isse dhokha khaayenge। phir shivbaaba kya kare। qadam-qadam par raay poochhna hai। supreme panda to baitha hai na। bahut bachche yeh baat bhool jaate hain kyonki yog mein nahin rehte hain। yog athva yaad ko hi yaatra kaha jaata hai। yaad nahin karte to samjhen ham rest le rahe hain। yaatra par jaakar koi rest lete hain। tum bhi agar rest lete ho, yaad nahin karte ho to vikarma bhi vinaash nahin honge aur aage bhi nahin badhenge। yaad nahin karte to nazdeek nahin jaate। aatma thak jaati hai। baap ko bhool jaati hai। baap kehte hain tum yaatra par chal rahe ho। raat ko to tum rest lete hi ho। aise nahin ki raat ko tum neend mein ho to yaatra par ho। nahin, woh rest hai। jab jaagte ho tab yaatra par ho। neend mein koi vikarma vinaash nahin honge। baaki haan, doosre koi vikarma hote nahin hain। to baap sabhi baaten samjhaate hain parantu koi amal mein bhi jab laaye। dher point batlaate rehte hain। bairistari ki points tab buddhi mein aati hain jab woh bairistari padhte hain। doktari va engineering padhte hain phir woh doctor athva engineer aadi bante hain। jo jaisa course karte hain, vaisa bante hain।

yahaan to ek hi course hai। chalte chalo, tumhaare sir par janma-janmaantar ke paapon ka bojha bahut hai। unko vinaash karne ka upaay ek hi hai - baap ko yaad karna। nahin to pad bhrashta ho padenge। maala bani hui hai na। 9 ratnon ka bhi gaayan hai। yeh kahaan se aaye, so manushya nahin jaante hain। 8 ratna hain jo rudra ki maala bante hain। to purushaartha achha karna chaahiye। students achha padhte hain to register se maa-baap ko bhi pata lagta hai। yahaan to baap hi teacher bhi hain to vahi jaane। tum padhte hi ho baap ke paas। register ka bhi unko pata padta hai। tum bhi apne register ko samajh sakte ho - kahaan tak hamaare mein gun hain, main auron ko kahaan tak aap samaan banaata hoon? itni taakat hai jo koi saamne dekhe unko shareer bhula den? kaha jaata hai himmate marda madde khuda। baap bahut madad dete hain। tum bhi madad dete ho yog ki। baap ko chaahiye hi pavitrata ki madad। saari patit duniya ko paavan banaana hai yogbal se। jitna-jitna jo yog ki madad denge utna baba khush honge। yeh baba ke liye madad hai va apne liye? tum jitna padhenge utna oonch pad paayenge। jitna yaad karenge utna mujhe pavitrata ki madad karenge। main aaya hoon patit ko paavan banaane, paavan duniya ke liye। patit aur paavan yahaan bante hain। woh to hai hi niraakaari duniya। gaate bhi hain patit-paavan aao। samajhte nahin ki paavan duniya kisko kaha jaata hai। seeta ko raavan ki jel se, duhkh se chhudaaya to phir sukh chaahiye। auron ko shanti bahut milti hai, sukh thoda milta hai। tumko sukh bhi bahut milta hai to duhkh bhi bahut milta hai। pichhaadi mein jo aatmaayen aati hain thoda part bajaae vaapis chali jaati hain। ek-do janma bhi lete hain, thoda samay aaya yeh gaya। tumhaare to 84 janmon ki baat hai। unki ek-do janma ki baat hai। tum 84 janmon ko jaante ho, chakra ko jaanne se chakravarti raaja bante ho। woh thode hi ban sakenge। unke liye yeh gyaan nahin hai। yeh gyaan tumhaare liye hai, jinhonne kalpa pahle bhi gyaan liya hai। ab tumko purushaartha karna hai। purushaartha ka samay abhi hai aur tumhaare liye hi purushaartha ki baat hai। devi-devta dharma bahut sukh dene vaala hai, itna sukh aur koi de na sake।

yeh anaadi drama bana hua hai। sabhi ko to hero-heroine ka part nahin mil sakta। kisma-kisma ke manushya hain। unmein bhi achhe-bure anek prakaar ke hain। shreshtha te shreshtha devi-devta hain। shreshtha unhon ko hi kaha jaata hai। woh to satayug mein hi hote hain। unhon ke chitra bhi hain। parantu woh kaise bane yeh nahin jaante hain। koi to phir kehte - shreekrishna haazira-hazoor hai। bhagwan bhi haazira-hazoor hai। in sab baaton ko tum bachche samajh gaye ho। yeh em object bahut achhi hai - samjhaane liye। sabko nimantran zaroor dena hai। akhbaar se sabko nimantran mil raha hai। abhi baaki time bahut thoda hai। ab tak bachche yaatra karte-karte thak jaate hain to baith jaate hain। maaya ke toofaan sahan nahin kar sakte hain। yuddha ke maidaan mein maaya to zaroor pakdegi। rustam se rustam hokar ladegi। zor se toofaan aayenge। phir kehte hain jab se gyaan mein aaya hoon to vighna bahut pade hain, dhandhe mein bhi ghaata hua hai। baba kehte hain aise mat samjho - gyaan mein aaye hain tab vighna padte hain। yeh to duniya mein hota hi rehta hai, inse darna nahin hai। kabhi chakra ki dasha, kabhi raahu ki, kabhi kiski dasha baithti hai। chalte-chalte phaan ho jaate hain। raahu ki dasha kadi hoti hai। maaya kha jaati hai to kaale ka kaala ban jaate hain। maaya thappad lagaae ekdam kaala munh kar deti hai। maaya ki bhi jeet hogi। sirf bachchon ki jeet ho phir to jhat raajdhaani sthaapan ho jaae। ustaad ko bhool jaate hain to maaya thappad maarti hai। aise roohaani saajan ko sajni bhool jaati hai, yeh bhi wonder hai na! achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yogbal se patit duniya ko paavan banaane mein baap ka madadgaar banna hai। yaad ki yaatra mein rest nahin leni hai। aisi yaad ho jo saamne vaala apna shareer bhi bhool jaae।

2) shreemat mein kabhi bhi shanka uthaakar apni manmat nahin chalaani hai। har baat mein raay lete usmein apna kalyaan samajhkar chalna hai।

vardaan:- sahayog ki shubh bhaavna dvaara roohaani vaayumandal banaane vaale master daata bhav

jaise prakriti apne vaayumandal ke prabhaav ka anubhav karaati hai, kabhi garmi, kabhi sardi..aise aap prakritijeet sada sahayogi, sahajyogi aatmaayen apni shubh bhaavnaaon dvaara roohaani vaayumandal banaane mein sahayogi bano। woh aisa hai va aisa karta hai, yeh nahin socho। kaisa bhi vaayumandal hai, vyakti hai, mujhe sahayog dena hai। daata ke bachche sada dete hain। to chaahe mansa se sahayogi bano, chaahe vaacha se, chaahe sambandh-samparka ke dvaara। lekin lakshya ho sahayogi zaroor banna hai।

slogan:- ichchha maatram avidya ki sthiti dvaara sarva ki ichchhaaon ko poorn karna hi kaamdhenu banna hai।