Murli du jour du samedi 14 octobre 2023

14-10-2023 praatahmurli om shanti "baapdaada"' madhuban

“meethe bachche - aagyaakaari bano, baap ki pahli aagya hai - apne ko aatma samajh baap ko yaad karo''

prashn:- aatma roopi bartan ashuddha kyon hua hai? usko shuddh banaane ka saadhan kya hai?

uttar:- vaahyaat baaton ko sunte aur sunaate aatma roopi bartan ashuddha ban gaya hai। isko shuddh banaane ke liye baap ka farmaan hai hear no evil, si no evil… ek baap se suno, baap ko hi yaad karo to aatma roopi bartan shuddh ho jaayega। aatma aur shareer donon paavan ban jaayenge।

geet:- jo piya ke saath hai .........

om shanti। om shanti ka arth to bachchon ne samjha hua hai। bachchon ko ghadi-ghadi points di jaati hain। jaise ghadi-ghadi kaha jaata hai baap aur varse ko yaad karo। yahaan koi manushya ki yaad nahin hai। manushya, manushya ki va kisi devta ki yaad dilaayenge। paarlaukik baap ki yaad koi dila na sake kyonki baap ko koi jaante nahin। yahaan tumko ghadi-ghadi kaha jaata hai apne ko aatma samajh baap ko yaad karo। jaise baap ko bachche hote hain to sab samajh sakte hain yeh baap se varsa lene aaya hai। phir unko baap aur varsa yaad rehta hai। yahaan bhi aise hai। zaroor bachche baap ko jaante nahin hain isliye baap ko aana padta hai। jo baap ke saath hain unhon ke liye yeh gyaan barsaat hai। ved shaastron mein jo gyaan hai woh sab hai bhakti maarga ki saamagri। jap, tap, daan, punya, sandhya, gaayatri aadi jo kuchh karte hain woh sab hai bhakti maarga ki saamagri। sannyaasi bhi bhakta hue। pavitrata bigar koi shantidham mein ja nahin sakte isliye woh gharbaar chhod jaate hain। parantu saari duniya to aise nahin karegi। unhon ke is hathayog ki bhi drama mein noondh hai। tum bachchon ko raajayog sikhlaane kalpa-kalpa ek hi baar aata hoon। mera aur koi avtaar hota nahin hai। reincarnation aaph god। woh hua oonch te oonch। phir reincarnation aaph jagat amba aur jagat pita bhi zaroor hone chaahiye। vaastav mein reincarnation akshar sirf baap se hi lagta hai। sadgati daata ek hi baap hai। yoon to har ek cheez phir se reincarnate hoti hai। jaise abhi bhrashtaachaar hai to kahenge bhrashtaachaar reincarnate hua hai। phir se bhrashtaachaar hua hai, phir se shreshthaachaar aayega। reincarnate to har cheez ka hota hai। abhi puraani duniya hai phir nai duniya aayegi। nai duniya ke baad kahenge phir se puraani duniya aani hai। yeh sab baaten baap baith samjhaate hain। jab yahaan baithte ho to hamesha aise samjho - main aatma hoon, mujhe baap ka farmaan mila hua hai mujhe yaad karo। bachchon ke sivaae to aur koi ko baap ka farmaan mil na sake। phir bachchon mein koi to aagyaakaari hote hain, koi aagya na maanne vaale bhi hote hain। baap kehte hain - he aatmaayen, tum mere saath buddhi ka yog lagaao। baap aatmaon se baat karte hain, aur koi viddhaan-pandit aadi aise nahin kahenge ki main aatmaon se baat karta hoon। woh to aatma so paramatma samajh lete hain। woh hai wrong। tum bachche jaante ho ki shivbaaba is shareer dvaara humein samjha rahe hain। shareer bigar to act ho na sake। pahle-pahle to yeh nishchay chaahiye। nishchay bigar to kuchh bhi buddhi mein nahin baithega। pahle nishchay chaahiye ki ham aatmaon ka baap woh niraakaar parampita paramatma hai aur saakaar mein hai prajaapita brahma, ham hain brahmaakumaar-kumaariyaan। shiv ke to sab aatmaayen bachche hain isliye shivkumaar kahenge, kumaari nahin। yeh sab baaten dhaaran karni hai। dhaarna tab hogi jab nirantar yaad karte rahenge। yaad karne se hi buddhi roopi bartan shuddh hoga। vaahyaat baaten sunte-sunte bartan ashuddha ban gaya hai, usko shuddh banaana hai। baap ka farmaan hai mujhe yaad karo to tumhaari buddhi pavitra hogi। tumhaari aatma mein khaad pad gai hai, ab pavitra banna hai। sannyaasi kehte hain aatma nirlep hai। baap kehte hain aatma mein hi khaad padi hai। shreekrishna ki aatma aur shareer donon pavitra hain। donon pavitra sirf satayug mein hi hote hain। yahaan to ho nahin sakte। tum aatmaayen nambarvaar pavitra hoti ja rahi ho। abhi pavitra bani nahin hai। koi bhi pavitra nahin hai। sab purushaartha kar rahe hain। ant mein nambarvaar sabki result niklegi।

baap aakar sabhi aatmaon ko farmaan karte hain ki mujhe yaad karo, apne ko ashareeri samjho, dehi-abhimaani bano। mool yeh baat baap bigar koi samjha nahin sakte। pahle yeh poora nishchay hoga to vijay paayenge, nishchay nahin hoga to vijay nahin paayenge। nishchay buddhi vijayanti, sanshay buddhi vinshayanti। geeta mein koi-koi akshar bahut achhe hain। isko kaha jaata hai aate mein namak। baap kehte hain main tumko sabhi vedon shaastron ka saar samjhaata hoon ki inmen kya-kya hai? yeh sab hain bhaktimaarga ke raaste। inki bhi drama mein noondh hai। yeh prashn nahin uth sakta ki yeh bhaktimaarga kyon banaaya hua hai? yeh to anaadi bana banaaya drama hai। tumne bhi is drama mein baap se svarga ke maalik banne ka varsa anek baar liya hai aur lete rahenge। kabhi ant nahin ho sakta। yeh chakra anaadi phirta hi rehta hai। tum bachche abhi duhkhadhaam mein ho phir shantidham mein jaayenge, shanti-dhaam se sukhdhaam mein jaayenge phir duhkhadhaam mein aayenge - yeh anaadi chakra chalta hi rehta hai। sukhdhaam se duhkhadhaam aane mein tum bachchon ko 5 hajaar varsha lagte hain। jismen tum 84 janma lete ho। sirf tum bachche hi 84 janma lete ho, sab nahin le sakte। yeh behad ka baap tumko direct samjha rahe hain, aur bachche phir murli sunenge va padhenge ya tape sunenge। tape bhi sab nahin sun sakte। to pahle-pahle tum bachchon ko uthte-baithte is yaad mein rehna hai। manushya to maala pherte raam-raam japte hain। rudraaksha ki maala kehte hain na। ab rudra to hai bhagwan। phir is maala mein meru daana ikattha hai। woh to vishnu ke yugal swaroop hain। woh kaun hain? yeh maat-pita jo phir vishnu ke do roop lakshmi-naaraayan bante hain isliye inko meru kaha jaata hai। phool hai shivbaaba phir meru yeh mama-baba jinko maat-pita kehte ho। vishnu ko maat-pita nahin kah sakenge। lakshmi-naaraayan ko maat-pita to unke bachche hi kahenge। aajkal to sabke aage jaakar kehte hain tvamev maataashcha pita..... bas, koi ek ne mahima ki to unke peechhe follow karne lag padte। yeh hai hi unrighteous duniya। kaliyug ko kaha jaata hai unrighteous, satayug ko kaha jaata hai righteous। vahaan aatma aur shareer donon pavitra hote hain। satayug mein shreekrishna gora hai, phir antim janma mein unki aatma saanvari bani hai। yeh brahma-sarasvati is samay saanvare hain na। aatma kaali ban gai hai to unka jevar bhi kaala ban gaya hai। sone mein hi khaad padti hai, usse jevar bhi jo banta hai woh khaad vaala। satayug mein jab devi-devtaaon ki government hai to yeh jhooth (khaad) hoti nahin। vahaan to sone ke mahal bante hai। bhaarat sone ki chidiya tha, abhi to mulamma hai। aise bhaarat ko phir se svarga baap hi bana sakte hain।

baap samjhaate hain, shreemat bhagvaanuvaach hai na। shreekrishna to daiveegunon vaala hai, do bhuja, do taang vaala hai। chitron mein to kahaan naara-yan ko, kahaan lakshmi ko 4 bhujaayen di hain। samajhte kuchh bhi nahin। ‘om' akshar bhi kehte hain, om ka arth bataate hain - om maana main god, jidhar dekhta hoon god hi god hai। parantu yeh to wrong hai। om maana aham aatma। baap bhi kehte hain aham aatma parantu main supreme hoon isliye mujhe paramatma kaha jaata hai। main paramdham mein rehta hoon। oonche te oonch bhagwan phir sookshm vatan mein brahma-vishnu-shankar ki aatma hai। phir neeche aao to yeh manushya lok hai। woh daivi lok, woh aatmaon ka lok jisko mool vatan kaha jaata hai। yeh baaten samajhne ki hain। tum bachchon ko yeh avinaashi gyaan ratnon ka daan milta hai jisse tum bhavishya mein maalaamaal double sirtaaj bante ho। dekho, shreekrishna ko donon taaj hai na। phir vahi bachcha chandravanshi mein aata hai to do kala kam ho jaati hain। phir vaishya vanshi mein aayenge to aur 4 kala kam ho jaayegi। phir light ka taaj ud jaayega। baaki ratna jadit taaj rahega। phir jo achha daan-punya karte hain, unko ek janma ke liye achhi raajaai milti hai। phir doosre janma mein bhi achha daan-punya kiya to phir bhi raajaai mil sakti hai। yahaan to tum 21 janmon ke liye raajaai pa sakte ho, mehnat karni padti hai। to baap apna parichay dete hain, kehte hain - aai em supreme soul isliye unko parampita param aatma arthaat paramatma kaha jaata hai। tum bachche us supreme ko yaad karte ho। tum ho saaligraam, woh hai shiv। shiv ka bada ling aur saaligraam mitti ke banaate hain। yeh kaun si aatmaon ka yaadgaar banaate hain, yeh bhi koi nahin jaante। tum shivbaaba ke bachche bhaarat ko svarga banaate ho isliye tumhaari pooja hoti hai। phir tum devta bante ho tab bhi tumhaari pooja hoti hai। shivbaaba ke saath tum itni service karte ho isliye saaligraamon ki bhi pooja hoti hai। jo uttam se uttam kartavya karte hain, unhon ki pooja hoti hai aur kaliyug mein jo achha kaam karte hai unhon ka yaadgaar banaate hain। kalpa-kalpa baap tum bachchon ko saare srishti chakra ka raaz samjhaate hai arthaat tumko svadarshan chakradhaari banaate hain। svadarshan chakra vishnu ko nahin ho sakta, woh to devta ban gaya। yeh gyaan saara tumko hai। phir lakshmi-naaraayan banenge to yeh gyaan nahin rahega। vahaan to sab sadgati mein hain। tum bachche yeh gyaan abhi hi sunte ho phir raajaai pa lete ho। svarga ki sthaapna ho gai phir gyaan ki darkaar nahin rehti।

baap hi aakar apna aur rachna ka poora parichay dete hain। sannyaasiyon ne maataaon ki ninda ki hai, parantu baap aakar maataaon ko uthaate hain। baap yeh bhi samjhaate hain ki yeh sannyaasi na hote to bhaarat kaam chita par baith ekdam khaak ho jaata। jab devi-devta vaam maarga mein girte hain to us samay earthquake badi jor ki hoti hai phir sab neeche chala jaata hai। aur khanda aadi to hote nahin, bhaarat hi hota hai। islaami aadi to peechhe aate hain to phir woh satayug ki cheejen yahaan rehti nahin। tum jo somnaath ka mandir dekhte ho woh koi vaikuntha ka nahin hai। yeh to bhakti maarga mein bana hai, jisko muhammad gazanvi aadi ne loota। baaki devtaaon ke mahal aadi sab earthquake mein gaayab ho jaate hain। aise nahin ki mahal ke mahal neeche gaye hain vahi phir oopar aa jaayenge। nahin, woh to andar hi toot phoot sad jaate hain। phir usi samay khodte hain to kuchh na kuchh milta hai। abhi to kuchh bhi nahin milta hai। shaastron mein koi yeh baaten nahin hain। sadgati daata hai hi ek baap। pahle-pahle to yeh nishchay chaahiye। nishchay mein hi maaya vighna daalti hai। kehte hain bhagwan kaise aayega? are, shiv jayanti hai to zaroor aaye honge। baap ne samjhaaya hai main behad ke din aur behad ki raat ke sangam par aata hoon। yeh koi nahin jaante ki kis samay aata hoon? tum bachche jaante ho। baap ne hi yeh knowledge di hai aur divya drishti se yeh chitra aadi banvaaye hain। geeta mein bhi kalpa vriksha ka kuchh varnan hai। bachchon ko kehte hain ham tum abhi hain, kalpa pahle bhi the aur phir kalpa-kalpa milte rahenge। main kalpa-kalpa tumko yeh gyaan doonga। to chakra bhi siddha hota hai। parantu tumhaare sivaae koi samajh na sake। yeh saare srishti chakra ka chitra hai, zaroor koi ne banvaaya hai। baap bhi is par, bachche bhi is par samjhaate hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) har baat mein vijay ka aadhaar nishchay hai isliye nishchaybuddhi zaroor banna hai। sadgati daata baap mein kabhi sanshay nahin uthaana hai।

2) buddhi ko pavitra va shuddh banaane ke liye ashareeri banne ka abhyaas karna hai। vaahyaat (vyartha) baaten na sunni hai, na sunaani hai।

vardaan:- behad ke smriti swaroop dvaara had ki baaton ko samaapta karne vaale anubhvi moorta bhav

aap shreshtha aatmaayen direct beej aur mukhya do patte, trimoorti ke saath sameep sambandh vaale tana ho। isi oonchi stage par sthit raho, behad ke smriti swaroop bano to had ki vyartha baaten samaapta ho jaayengi। apne behad ke bujurgapan mein aao to sada sarva anubhveemoorta ho jaayenge। jo behad ke poorvajpan ka occupation hai, usko sada smriti mein rakho। aap poorvajon ka kaam hai amar jyoti ban andhakaar mein bhatakti hui aatmaon ko thikaane par lagaana।

slogan:- kisi bhi baat mein moonjhane ke bajaae mauj ka anubhav karna hi masta yogi banna hai।