Murli du jour du vendredi 24 novembre 2023

24-11-2023 praatahmurli om shanti "baapdaada"' madhuban

“meethe bachche - tumhaari sachchi baat ka teer tab lagega jab dil mein sachchaai saphaai hogi, tumhein satya baap ka sang mila hai isliye sachche bano''

prashn:- tum sab student ho, tumhein kis baat ka khyaal rakhna zaroori hai?

uttar:- kabhi bhi koi galti ho to sach bolna hai, sach bolne se hi unnati hogi। tumhein apni seva doosron se nahin leni hai। agar yahaan seva lenge to vahaan karni padegi। tum student achhi tarah se padhkar doosron ko padhaao to baap bhi khush hoga। baap pyaar ka saagar hai, unka pyaar hi yeh hai jo tum bachchon ko padhaakar oonch martaba dilaate hain।

geet:- kisne yeh sab khel rachaaya…

om shanti। aajkal samaachaar aate hain ki ham geeta jayanti mana rahe hain। ab geeta ko janma kisne diya hai, yeh hai topic। jayanti kehte hain to zaroor janma bhi hua na। unko jab kehte hain shreemad bhagvat geeta jayanti to zaroor unko janma dene vaala bhi chaahiye na। sab kehte hain shreekrishna bhagvaanuvaach। to phir shreekrishna pahle aata, geeta peechhe ho jaati। ab geeta ka rachayita zaroor chaahiye। agar shreekrishna ko kehte to pahle shreekrishna, peechhe geeta aani chaahiye। parantu shreekrishna chhota bachcha tha woh geeta suna na sake। yeh siddha karna hoga ki geeta ko janma dene vaala kaun? yeh hai guhya baat। shreekrishna to maata ke garbha se janma leta hai, woh to satayug ka prince hai। usne svayan prince ka pad paaya hai geeta dvaara raajayog seekhkar। ab geeta ko janma dene vaala kaun? parampita paramatma shiv ya shreekrishna? shreekrishna ko vaastav mein trilokeenaath, trikaaldarshi bhi nahin kah sakte hain। trilokeenaath, trikaaldarshi ek ko hi kahenge। trilokeenaath maana teenon lokon par raajya karte hain। mool, sookshm, sthool in teenon ko kaha jaata hai triloki, inko jaanne vaala trilokeenaath, trikaaldarshi parampita paramatma shiv hai, yeh mahima unki hai, na ki shreekrishna ki। shreekrishna ki mahima hai - 16 kala sampoorn, sarvagun sampanna…। unki bhent karte hain chandrama se। paramatma ki bhent chandrama se nahin karenge। unka kartavya hi alag hai। woh hai geeta ko janma dene vaala rachayita। geeta ke gyaan va raajayog se hi devtaayen create hote hain। manushya ko devta banaane ke liye baap ko aakar knowledge deni padti hai। ab yeh samjhaani dene vaale bade hi hoshiyaar brahmaakumaar-kumaariyaan chaahiye। sabhi ek jaisa samjha nahin sakte। bachchiyaan bhi to sab nambarvaar hain। topic bhi aisi rakhi jaae ki shreemat bhagvat geeta ko janma kisne diya? iske liye contrast samjhaana hai। bhagwan to ek hi hai - parampita paramatma shiv। us gyaan saagar dvaara gyaan sunkar shreekrishna ne yeh pad paaya tha। sahaj raajayog se yeh pad kaise paaya, yeh samjhaani deni pade। brahma dvaara hi pahle baap brahman rachte hain। sabhi vedon-shaastron ka saar sunaate hain। brahma ke saath brahma mukh vanshaavli bhi chaahiye। brahma ko hi trikaaldarsheepne ka gyaan milta hai। triloki arthaat teenon lokon ka bhi gyaan milta hai। teenon kaal aadi, madhya, ant ko milaakar kaha jaata hai aur teenon lok arthaat mool, sookshm, sthoolavtan। yeh akshar yaad karne hain। bahut bachche bhool jaate hain। bhulaaya hai deh ahankaar roopi maaya ne। to geeta ka rachayita parampita paramatma shiv hai, na ki shreekrishna। parampita paramatma hi trikaaldarshi tatha trilokeenaath hain। shreekrishna mein va lakshmi-naaraayan mein yeh knowledge hai hi nahin। haan, jinhonne yeh knowledge baap se paai woh vishwa ke maalik ban gaye। jab sadgati mil gai phir yeh knowledge buddhi se gum ho jaati hai। sabka sadgati daata woh ek hi hai। woh punarjanma lene vaala nahin hai। punarjanma shuru hua satayug aadi se। kaliyug ant tak 84 janma lete hain। yeh samjhaani deni padti hai। sab to 84 janma nahin lete। jisne yeh geeta likhi usko trikaaldarshi nahin kahenge। pahle hi likha ki shreekrishna bhagvaanuvaach। yeh ekdam wrong hai। wrong bhi hona hi hai zaroor। jab sab shaastra wrong hon tab hi baap aakar right sunaaye। barobar brahma dvaara vedon-shaastron ka sachcha saar sunaate hain isliye unhein sat kaha jaata hai। ab tumhaara hai sat ke saath sang, jo tumko sat banaate hain।

prajaapita brahma aur unki mukh vanshaavli yeh jagdamba sarasvati। prajaapita brahma ke sabhi bachche aapas mein bhaai-behen thahre। kahaan bhi mandiron mein jaakar bhaashan karna chaahiye। ghoomne-phirne bhi vahaan bahut aate hain। ek ko samjhaaya to satsang lag jaayega। shamshaan mein bhi jaana chaahiye। vahaan manushyon ko vairaagya hota hai। parantu baba kehte mere bhakton ko samjhaane se woh phat se samjhenge। to shivbaaba ke mandir, lakshmi-naaraayan ke mandir mein jaana pade। lakshmi-naaraayan ko baba mama nahin kehte। shiv ko baba kehte hain zaroor mama bhi hogi, woh hai gupta। shivbaaba jo rachayita hai, unko maat-pita kaise kehte hain, yeh gupta baat koi bhi jaan na sake। lakshmi-naaraayan ko ek hi apna bachcha hoga। baaki inka naam hai prajaapita brahma। vishnu aur shankar ko oonch nahin rakhte। oonch trimoorti brahma ko rakhte hain। jaise rachta shiv paramatma ko kehte hain, aise hi brahma ko bhi rachta kaha jaata hai। woh to avinaashi hai hi। rachta akshar kahenge to poochhenge - kaise racha? woh to rachta hai hi। baaki rachna hoti hai brahma dvaara। ab brahma dvaara paramatma sab aatmaon ko srishti ke aadi-madhya-ant ka knowledge dete hain। ved-shaastra aadi sab hain bhakti maarga ki saamagri। bhakti maarga aadhaakalpa chalta hai, yeh hai gyaan kaanda। jab bhakti maarga poora hota hai tab sab patit tamopradhaan ban jaate hain, tab main baap aata hoon। pahle satopradhaan se sato, rajo, tamo mein aate hain। oopar se jo pavitra aatmaayen aati hain unhonne koi aisa karma nahin kiya hai jo unko duhkh bhogna pade। Christ ke liye kehte hain unko cross par chadhaaya parantu yeh to ho na sake। nai aatma jo dharma sthaapan karne arth aati hai unko duhkh mil nahin sakta kyonki woh to karmaateet avastha vaala messenger dharma sthaapan karne aaya। ladaai mein bhi jab koi messenger bhejte hain to woh saphed jhandi le aate hain jisse ve log samajh jaate ki yeh koi message le aaya hai, unko koi takleeph nahin dete hain। to messenger jo aate hain, unko koi cross par chadha na sake। duhkh aatma hi bhogti hai। aatma nirlep nahin hai, yeh likhna chaahiye। aatma ko nirlep kehna wrong hai। yeh kisne kaha? shiv bhagvaanuvaach। yeh point tumko note karni chaahiye, likhne ke liye badi hi vishaal buddhi chaahiye। samjho pradarshani mein Christian log aate hain to unko bhi bata sakte hain ki Christ ki soul ko cross par nahin chadhaaya gaya। baaki jismen usne pravesh kiya, us aatma ko duhkh hua। to aisi baaten sunkar wonder khaayenge। us pavitra aatma ne aakar dharma sthaapan kiya। god father ke direction anusaar। yeh bhi drama। drama ko bhi kai log samajhte hain parantu uske aadi, madhya, ant ko nahin jaante। aisi-aisi baaten sun woh log kuchh samajhne ki koshish karte hain। krishna ko bhi koi gaali de na sake। barobar gaaliyaan abhi hi mil rahi hain kisko? shivbaaba ko nahin, is saakaar ko। teacher to baba hai pure soul aur yeh hai impure, jo pure ban raha hai। jo samajh gaye hain woh bit-bit nahin karenge। nahin to samjhenge ki yeh to sikhaaya hua hai। phir woh baat koi ko janchati nahin। teer nahin lagta। sachchaai-saphaai bahut chaahiye। jo khud vikaari hoga woh auron ko kahe kaam mahaashatru hai to teer lag nahin sakta। jaise pandit ka misaal - raam-raam kahne se nadi va saagar paar kar jaayenge। yeh abhi ki baat hai। shivbaaba kehte hain mujhe yaad karne se tum is vishay saagar se paar ho jaayenge। kaun-sa saagar? yeh pandit nahin jaante। veshyaalay se shivaalay mein chale jaayenge। badi achhi reeti se shreemat par chalna hai। kehte hain na ki baba chaahe pyaar karo, chaahe thukraao........। yahaan to sirf samjhaani di jaati hai, to bhi kai murde ban jaate hain। bachchon ko to likhna-padhna padta hai। baap pyaar ka saagar hai arthaat padhaakar oonch martaba dilaate hain। yahi pyaar hai। baap jab padhaata hai to padhkar auron ko bhi padhaana hai। baap ko khush karna hai। baap ki service mein tatpar rehna hai। baap ki yahi service hai ki apne tan-man-dhan se bhaarat ki sachchi seva karo। tumhein to bulanda aavaaz se samjhaana chaahiye। sabhi nambarvaar hain, raajdhaani mein bhi nambarvaar honge। teacher samajh jaate hain ki yeh daivi raajdhaani mein kya number lenge। service se samajh sakte hain, kaun-kaun mukhya banenge। khud bhi samajhte hain ki ham baba-mama jitni service nahin karte to daas-daasiyaan banna padega। aage chalkar tum sabko saara hi maaloom padega। ham shreemat par na chale, sab clear ho jaayega। tum bachche is samay student ho, is samay tum apni daasiyaan banaayenge to khud bhi daasi banna padega। yahaan mahaaraani banna deh-abhimaan hai। sach kehna chaahiye ki baba yeh bhool hui। abhi sampoorn to sabhi bane nahin hain। imtahaan mein jab naapaas hote hain to sharmaate bhi hain।

baba ka raatri mein khyaal chala ki manushya 21 janma kehte, gaayan bhi karte, abhi yeh eeshvareey janma ek alag hai। 8 janma satayug mein, 12 janma treta mein, 21 janma dvaapar mein, 42 janma kaliyug mein। yeh tumhaara eeshvareey janma sabse oonch janma hai jo adopted hai। tum braahmanon ka hi yeh saubhaagyashaali janma hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) pyaar ke saagar baap ke pyaar ka return karna hai, achhi tarah padhkar phir padhaana hai। shreemat par chalna hai।

2) sachchaai aur saphaai se pahle svayan mein dhaarna kar phir doosron ko dhaarna karaani hai। ek baap ke sang mein rehna hai।

vardaan:- nimitta aatmaon ke direction ke mahatva ko jaan paapon se mukta hone vaale sensible bhav

jo sensible bachche hain vo kabhi yeh nahin sochte ki yeh nimitta aatmaayen jo direction de rahi hain shaayad koi ke kahne se kah rahi hain। nimitta bani hui aatmaon ke prati kabhi yeh vyartha sankalp nahin uthaane chaahiye। maano koi aisa phainsala bhi de dete hain jo aapko theek nahin lagta hai, lekin aap usmein jimmevaar nahin ho, aapka paap nahin banega kyonki jisne inhen nimitta banaaya hai woh baap, paap ko bhi badal lega, yeh gupta rahasya, gupta machinery hai।

slogan:- aanesta woh hai jo prabhu pasanda aur vishwa pasanda hai, aaraam pasanda nahin।

maateshvari ji ke madhur mahaavaakya -“manushya ka 84 janma hai, na ki 84 laakh yoniyaan''

ab yeh jo ham kehte hain ki prabhu ham bachchon ko us paar le chalo, us paar ka matlab kya hai? log samajhte hain us paar ka matlab hai janma maran ke chakra mein na aana arthaat mukta ho jaana। ab yeh to hua manushyon ka kehna parantu baap kehte hain bachchon, sachmuch jahaan sukh shanti hai, duhkh ashaanti se door hai usko koi duniya nahin kehte। jab manushya sukh chaahte hain to vo bhi is jeevan mein hona chaahiye, ab vo to satayugi vaikuntha devtaaon ki duniya thi jahaan sarvada sukhi jeevan thi, usi devtaaon ko amar kehte the। ab amar ka bhi koi arth nahin hai, aise to nahin devtaaon ki aayu itni badi thi jo kabhi marte nahin the, ab yeh kehna unhon ka wrong hai kyonki aise hai nahin। unki aayu koi satayug treta tak nahin chalti hai, parantu devi devtaaon ke janma satayug treta mein bahut hue hain, 21 janma to unhonne achha raajya chalaaya hai aur phir 63 janma dvaapar se kaliyug ke ant tak total unhon ke janma chadhti kala vaale 21 hue aur utarti kala vaale 63 hue, total manushya 84 janma lete hain। baaki yeh jo manushya samajhte hain ki manushya 84 laakh yoniyaan bhogte hain, yeh kehna bhool hai। agar manushya apni yoni mein sukh duhkh donon part bhog sakte hain to phir jaanvar yoni mein bhogne ki jaroorat hi kya hai। ab manushyon ko yeh knowledge hi nahin, manushya to 84 janma lete hain, baaki srishti par jaanvar pashu, panchhi aadi total 84 laakh yoniyaan avashya hain। anek kisma ki jaise paidaaish hai, usmein bhi manushya, manushya yoni mein hi apna paap punya bhog rahe hain। aur jaanvar apni yoniyon mein bhog rahe hain। na manushya jaanvar ki yoni leta aur na jaanvar manushya yoni mein aata hai। manushya ko apni yoni mein (janma mein) bhogna bhogni padti hai to duhkh sukh ki mahsoosta aati hai। aise hi jaanvar ko bhi apni yoni mein sukh duhkh bhogna hai। magar unhon mein yeh buddhi nahin ki yeh bhogna kis karma se hui hai? unhon ki bhogna ko bhi manushya feel karta hai kyonki manushya hai buddhivaan, baaki aise nahin manushya koi 84 laakh yoniyaan bhogte hain। jaise dekho gurunaanak saahab ne aise mahaavaakya uchchaaran kiye hain - antakaal mein jo putra simre aisi chinta mein jo mare suar ki yoni mein val val utre .. parantu is kahne ka matlab yeh nahin hai ki manushya koi sookar ki yoni leta hai parantu sookar ka matlab yeh hai ki manushyon ka kaarya bhi aisa hota hai jaise jaanavron ka kaarya hota hai। baaki aise nahin ki manushya koi jaanvar bante hain। ab yeh to manushyon ko daraane ke liye shiksha dete hain। to apne ko is sangam samay par apni jeevan ko paltaae paapaatma se punyaatma banna hai। achha - om shanti।