Murli du jour du samedi 25 novembre 2023

25-11-2023 praatahmurli om shanti "baapdaada"' madhuban

“meethe bachche - gyaan ki bulbul ban saara din gyaan ki tiklu-tiklu karte raho to laukik aur paarlaukik maat-pita ka show kar sakenge''

prashn:- kahaavat hai - “apni ghot to nasha chadhe'' iska bhaavaartha kya hai?

uttar:- apni ghotna arthaat buddhiyog idhar-udhar na bhatkaakar ek baap ko yaad karna। ek baap buddhi mein yaad rahe to nasha chadhe। parantu ismen deh-abhimaan bahut vighna daalta hai। thodi-si beemaari hui to pareshaan ho jaate hain, mitra-sambandhi yaad padte hain, isliye nasha nahin chadhta। yog mein rahen to darda bhi kam ho jaae।

geet:- toone raat ganvaai soke…

om shanti। yeh sab baaten shaastron mein bhi likhi hui hain। ek-do ko samjhaate bhi hain। anek prakaar ki maten guru log dete hain। bahut achhe-achhe bhakta kothri mein baith, ek gaumukh kapda hota hai, usmein andar haath daal maala pherte hain। yeh bhi sikhlaaya hua fashion hai। ab baap kehte hain - yeh sab chhodo। aatma ko to simran karna hai baap ka। ismen maala simarne ki baat nahin। sabse achha geet hai shivaae namah ka। ismen hi samjhaaya jaata hai tum maat-pita ho। bhagwan ko hi rachta baap kehte hain। ab rachta kaha jaata hai to kya create karte hain? zaroor yeh to sab samajhte hain nai duniya hi rachenge। gaate bhi hain tum maat-pita ham baalak tere… to pahla - eeshvar sabka father thahra। father hai to mother bhi zaroor chaahiye। mother ke sivaae create kar na saken। sirf yeh koi nahin jaante ki create kaise karte hain? doosra - aapas mein sab bhaai-behen ho gaye। phir vikaar ki drishti ja na sake। ek maat-pita hai na। to yeh pvaaint bahut achhi hai samajhne aur samjhaane ke liye। teesra - zaroor baap ne srishti rachi hogi। ham baalak the ab phir bane hain। 84 janmon ka chakra poora hone ke baad phir ab maat-pita ke bane hain। jiska hi bhakti maarga mein gaayan chalta hai। maat-pita srishti rachte hain, unke baalak bante hain to zaroor sukh ghanere dete honge। yeh koi bhi nahin jaante ki paramatma maat-pita bhi bante hain। teacher bhi hai, satguru bhi hai।

ham brahma ki aulaad aapas mein bhaai-behen thahre। kahlaate bhi hain brahmaakumaar-kumaariyaan, unko bhi rachne vaala woh hai। sukh ghanere paane ke liye maat-pita se raajayog seekh rahe hain। sukh ghanere tab milte hain jabki ham duhkh mein hain, aise nahin ki bhavishya sukh mein aakar shiksha denge। jab ham duhkh mein hain tab shiksha milti hai sukh mein jaane ki। vahi maat-pita aakar sukh dete hain। Adam aur Eve to mashhoor hain। woh bhi zaroor god ki santaan thahre। to god phir kaun?

bachche yeh to jaante hain ki baap jo knowledge dete hain yeh sab dharma vaalon ke liye hai। saari duniya ka us baap se buddhiyog toota hua hai। maaya ghost buddhiyog lagaane nahin deti hai aur hi buddhiyog todti hai। baap aakar ghost par jeet pahnaate hain। aajkal duniya mein riddhi-siddhi vaale bhi bahut hain। yeh hai hi ghost ki duniya। kaam vikaar roopi ghost ek-do ko aadi, madhya, ant duhkh dete hain। ek-do ko duhkh dena ghost ka kaam hai। satayug mein ghost hota nahin। to yeh bhi samjhaaya hai ghost naam Bible mein hai। raavan maana ghost, yeh hai hi ghost ka raajya। satayug raamraajya mein ghost hota nahin। vahaan sukh ghanere hote hain।

om namo shivaae ka geet bahut achha hai। shiv hai maat-pita। brahma, vishnu, shankar ko maat-pita nahin kahenge। shiv ko hi father kahenge। Adam-Eve arthaat brahma-sarasvati yahaan hue hain। vahaan Christian log god father se praarthana karte hain। yeh bhaarat to maat-pita ka gaanv hai। unka janma hi yahaan hai। to samjhaana hai tum maat-pita gaate ho to aapas mein bhaai-behen thahre na। prajaapita brahma dvaara rachna rachte hain। woh to adopt karte hain। sarasvati bhi adopt hui hai। prajaapita brahma ne adopt kiya hai, tab to itne brahmaakumaar-kumaariyaan bane hain। shivbaaba adopt karaate jaate hain। nai srishti brahma dvaara hi rachi jaati hai। samjhaane ki bahut yuktiyaan hain। parantu poora samjhaate nahin hain। baba ne bahut baar samjhaaya hai - yeh shivaae namah ka geet jahaan-tahaan bajaao। ham maat-pita ke baalak kaise hain? woh baith samjhaate hain। brahma dvaara nai srishti sthaapan ki thi। ab kaliyug ka ant hai phir se satayug sthaapan kar rahe hain। buddhi mein dhaarna karni hai। knowledge badi sahaj hai। maaya ke toofaan gyaan-yog mein thaharne nahin dete hain। buddhi chakrit ho jaati hai। hamesha samjhaana chaahiye bhagwan rachta to sabka ek hai, father to sab kahenge na। woh niraakaar to janma-maran rahit hai। brahma, vishnu, shankar ko sookshm chola hai। manushya 84 janma yahaan hi lete hain, sookshm vatan mein to nahin lete। tum jaante ho ham maat-pita ke baalak hain। ham hain naye bachche। baap ne adopt kiya hai। jab prajaapita brahma hai to kitni praja hogi? zaroor adopt kiya hoga। brahma ko bhujaayen bahut dikhaate hain, arth to kuchh bhi samajhte nahin। jo bhi chitra nikle hain athva shaastra nikle hain - yeh sab drama ke oopar aadhaar rakhna padta hai। brahma ka din tha phir bhakti maarga shuru hua hai, woh chala aa raha hai। yeh raajayog baap hi aakar sikhlaate hain। yeh smriti mein rehna chaahiye।

kehte hain na - apni ghot to nasha rahe। parantu buddhiyog baap ke saath chaahiye। yahaan to bahuton ka buddhiyog bhatakta rehta hai। puraani duniya ke mitra-sambandhi aadi ke taraph ya deh-abhimaan mein phanse rehte hain। thodi beemaari hoti hai, pareshaan ho jaate hain। are, yog mein rahenge to darda aadi bhi kam hoga। yog nahin to beemaari aadi kaise chhoote? khyaal karna chaahiye - maat-pita jo number one paavan bante hain vahi phir sabse jaasti neeche utarte hain। unko to bahut bhogna bhogni pade। parantu yog mein rahne ke kaaran beemaari hatti jaati hai। nahin to inko sabse jaasti bhogna chaahiye। parantu yogbal se duhkh door hote hain aur bahut khushi mein rehte hain - baba se ham svarga ke sukh ghanere lete hain। bahut bachche apne ko aatma samajhte nahin। saara din deh ka hi dhyaan hai।

baba aakar gyaan ki tiklu-tiklu sikhlaate hain। to tumhein gyaan ki bulbul banna hai। baahar mein bahut achhi chhoti-chhoti bachchiyaan hain, gyaan ki tiklu-tiklu karti hain। bheeshma pitaamah aadi ko bhi kumaariyon ke dvaara gyaan diya hai। chhote-chhote bachchon ko khada karna hai। chhote bachche laukik-paarlaukik maat-pita ka show karte hain। lok-parlok suhaila hota hai na। to laukik maat-pita ko bhi uthaana pade। yeh bhi tum dekhenge chhoti-chhoti bachchiyaan maa-baap ko uthaayengi। kumaari ka maan hota hai। kumaari ko sab naman karte hain। shiv shakti sena mein sab kumaariyaan hain। bhal maataayen hain parantu woh bhi kahlaati to kumaari hain na। kumaariyaan badi achhi-achhi niklengi। chhoti-chhoti bachchiyaan hi bada show karengi। koi-koi chhoti bachchiyaan badi achhi hain। parantu koi-koi mein moh bhi bahut hai na। yeh moh bada kharaab hai। yeh bhi ek bhoot hai, baap se bemukh kar deta hain। ghost maaya ka dhandha hi hai parampita paramatma se bemukh karna।

yeh om namo shivaae vaala geet sabse achha hai। inse hi akshar milte hain tum maat-pita… aksar karke raadhe-krishna ke mandir mein joda hi dikhaate hain। geeta mein shreekrishna ke saath raadhe ka naam hai hi nahin। shreekrishna ki mahima alag hai - sarvagun sampanna, 16 kala sampoorn........, shiv ki mahima alag hai। shiv ki aarti par kitni mahima gaate hain। arth kuchh bhi nahin samajhte। pooja karte-karte thak gaye hain। tum jaante ho mama-baba aur ham brahman sabse jaasti pujaari bane hain। abhi phir aakar brahman bane hain। unmein bhi nambarvaar hain। karma bhog bhi hota hai, unko to yog se mitaana hai। deh-abhimaan ko todna hai। baap ko yaad kar bahut khushi mein rehna hai। maat-pita se hamko bahut sukh ghanere milte hain। yeh brahma kahenge na - baba se humein varsa milta hai। baba ne hamaara rath loan liya hai। ab baba to is rath ki khaatiri karenge। pahle to samajhta tha - main aatma is rath ko khilaata hoon। yeh bhi rath hai na। ab kahenge inko vahi khilaane vaala hai। is rath ki sambhaal karni hai। ghode par saaheb log chadhte hain to ghode ko haath se khilaayenge, kabhi peeth par haath pherenge। bahut khaatiri karte hain kyonki un par savaari karte hain। baba is par savaari karte hain to kya baba khaatiri nahin karte honge? baba jab snaan karte hain to samajhte hain ham bhi snaan karte hain, baba ko bhi karaana hai kyonki usne bhi is rath ka loan liya hai। shivbaaba kehte hain main bhi tumhaare shareer ko snaan karaata hoon, khilaata hoon। main nahin khaata hoon, shareer ko khilaata hoon। baba khilaate hain, khaate nahin hain। yeh sab kisma-kisma ke khyaalaat chalte hain - snaan ke samay, ghoomne ke samay। yeh to anubhav ki baat hai na। baba khud hi kehte hain - bahut janmon ke ant ke janma mein pravesh karta hoon। yeh apne janmon ko nahin jaante hain, main jaanta hoon। tum kehte ho baba phir hamko gyaan de rahe hain। varsa lena hai svarga ka। satayug mein to raaja, praja aadi sab hain। purushaartha karna hai baap se poora varsa lene ka। ab nahin lenge to kalpa-kalpa miss karte rahenge, itna oonch pad pa nahin sakenge। janma-janmaantar ki baaji hai to kitna shreemat par chalna chaahiye! kalpa-kalpa nimitta banenge। kalpa-kalpa varsa lete aaye hain। kalpa-kalpa ke liye yeh padhaai hai। ismen bahut dhyaan dena padta hai। 7 roj lakshya lekar phir murli to ghar mein bhi padh sakte hain। bilkul sahaj kar dete hain। drama to buddhi mein rehna chaahiye na।

isko world university kaha jaata hai। to kahaan bhi America aadi taraph chale jaao, baap se varsa le sakte ho। sirf ek haphta dhaarna karke jaao। bhagwan ke bachche hain to bhaai-behen thahre na। prajaapita brahma hai to unke sab bachche aapas mein bhaai-behen thahre। zaroor grihastha vyavhaar mein rehte aapas mein bhaai-behen hokar rahenge to pavitra ho rah sakenge। bahut sahaj hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svany ko maaya ghost se bachaane ke liye gyaan-yog mein tatpar rehna hai। moh roopi bhoot ka tyaag kar baap ka show karna hai। gyaan ki tiklu-tiklu karni hai।

2) padhaai par poora dhyaan dekar baap se varsa lena hai। kalpa-kalpa ki is baaji ko kisi bhi haalat mein ganvaana nahin hai।

vardaan:- samay pramaan roop-basanta arthaat gyaani va yogi tu aatma banne vaale sva shaasak bhav

jo sva-shaasak hain woh jis samay chaahen roop ban jaaen aur jis samay chaahen basanta ban jaaen। donon sthiti second mein bana sakte hain। aise nahin ki banne chaahen roop aur yaad aati rahen gyaan ki baaten। second se bhi kam time mein full-stop lag jaae। powerful brake ka kaam hai jahaan lagaao vahaan lage, iske liye practice karo ki jis samay jis vidhi se jahaan man-buddhi ko lagaana chaahen vahaan lag jaae। aisi controlling va ruling power ho।

slogan:- shaantidoot woh hai jo toofaan machaane vaalon ko bhi shanti ka tohpha de।

maateshvari ji ke madhur mahaavaakya

“manushyaatmaaon ki paramatma se maangani aur praapti''

tum maat-pita ham baalak tere tumhari kripa se sukh ghanere... ab yeh mahima kiske liye gaai hui hai? avashya paramatma ke liye gaayan hai kyonki paramatma khud maata pita roop mein aae is srishti ko apaar sukh deta hai। zaroor paramatma ne kab sukh ki srishti banaai hai tabhi to unko maata pita kahkar bulaate hain। parantu manushyon ko yeh pata hi nahin ki sukh kya cheez hai? jab is srishti par apaar sukh the tab srishti par shanti thi, parantu ab vo sukh nahin hain। ab manushya ko yeh chaahna uthti avashya hai ki vo sukh humein chaahiye, phir koi dhan padaartha maangate hain, koi bachche maangate hain, koi to phir aise bhi maangate hain ki ham pativrata naari banen, sada suhaagin banen, chaahna to sukh ki hi rehti hai na। to paramatma bhi koi samay unhon ki aash avashya poorn karenge। to satayug ke samay jab srishti par svarga hai to vahaan sada sukh hai, jahaan stri kabhi duhaagin (vidhva) nahin banti, to vo aash satayug mein poorn hoti hai jahaan apaar sukh hai। baaki to is samay hai hi kaliyug। is samay to manushya duhkh hi duhkh bhogte hain। achha।