Murli du jour du jeudi 25 janvier 2024

25-01-2024 praatahmurli om shanti "baapdaada"' madhuban

“meethe bachche - tumhein wonder khaana chaahiye ki humein kaisa meetha baap mila hai jise koi bhi aash nahin aur daata kitna jabardasta hai, lene ki jara bhi tamanna nahin।''

prashn:- baap ka wonderful part kaun sa hai? 100 pratishat nishkaami baap kis kaamna se srishti par aaya hai?

uttar:- baba ka wonderful part hai padhaane ka। woh service ke liye hi aate hain। paalna karte hain। puchkaar dekar kehte hain meethe bachche yeh karo। gyaan sunaate hain, lete kuchh nahin। 100 pratishat nishkaami baap ko kaamna hui hai main apne bachchon ko jaakar raasta bataaoon। srishti ke aadi-madhya-ant ka samaachaar sunaaoon। bachche gunvaan banen… baap ki yahi kaamna hai।

om shanti। meethe-meethe roohaani bachchon ko roohaani baap aisa mila hua hai jo kuchh leta nahin, kuchh khaata nahin। kuchh peeta nahin। to unko koi aash va ummeed nahin hai aur manushyon ko koi na koi aash zaroor hoti hai। dhanvaan banen, phalaana banen। unko koi aash nahin, woh abhokta hai। tumne suna tha ek saadhu kehta hai main kuchh khaata peeta nahin। yeh to jaise kaapi karte hain। saare vishwa mein ek hi baap hai jo kuchh leta karta nahin। to bachchon ko khyaal karna chaahiye ki ham kiske bachche hain। baap kaise aakar inmen pravesh karte hain। khud ki koi tamanna nahin। khud to gupta hai। unki jeevan kahaani ko tum bachche hi jaante ho। tumhaare mein bhi thode hain jo poori reeti samajhte hain। dil mein aana chaahiye ki hamko aisa baap mila hai jo na kuchh khaata, na peeta, na leta। kuchh bhi unko darkaar nahin। aisa to koi ho nahin sakta। ek hi niraakaar oonch te oonch bhagwan hi gaaya hua hai। unko hi sab yaad karte hain। woh tumhaara baap bhi abhokta, teacher bhi abhokta to satguru bhi abhokta। kuchh bhi lete nahin, lekar woh kya karenge! yeh bhi wonderful baap hai। apne liye jara bhi aash nahin। aisa koi manushya hota nahin। manushya ko to khaana kapda aadi sab chaahiye। mujhe kuchh nahin chaahiye। mujhe to bulaate hain ki aakar patiton ko paavan banaao। main hoon niraakaar, main kuchh nahin leta। mujhe to apna aakaar hi nahin। main sirf ismen pravesh karta hoon। baaki khaati peeti inki aatma hai। meri aatma ko kuchh bhi aash nahin। ham service ke liye hi aate hain। soch karna hota hai, kaisa wonderful khel hai। ek baap sabka pyaara hai। unko zara bhi aash nahin। sirf aakar padhaate hain, paalna karte hain, puchkaar dete hain - meethe bachche yeh karo। gyaan sunaate hain, lete kuchh bhi nahin। karnakraavanhaar baap hi hai। samjho kuchh shivbaaba ko diya। woh kya karenge। toli lekar khaayenge? shiv-baba ko shareer hi nahin। to leve kaise? aur service dekho kitni karte hain। sabko achhi-achhi mat dekar gul-gul banaate hain। bachchon ko wonder khaana chaahiye। baap to hai hi daata। daata bhi kitna jabardasta aur koi tamanna nahin। brahma ko bhal phurna hai, itne bachchon ki sambhaal karni hai, khilaana pilaana hai, paisa jo bhi aata hai woh shivbaaba ke liye hi aata hai। hamne to sab kuchh svaaha kar diya। baap ki shreemat par chal apna sab kuchh saphal kar bhavishya banaate hain। baap to 100 percent nishkaami hai। sirf yahi phurna hai ki sabko jaakar raasta bataaoon। srishti ke aadi-madhya-ant ka samaachaar sunaaoon aur to koi jaante nahin। tum bachche hi jaante ho। baap teacher ke roop mein padhaate hain। fee aadi kuchh lete nahin। tum shivbaaba ke naam par lete ho। vahaan return mein milta hai। baba mein yeh tamanna hai kya ki ham nar se naaraayan banen? baap to drama anusaar padhaate hain। aisa nahin ki unko aash hai ki ham oonch te oonch takhtansheen banen। nahin। saara madaar hai padhaai par, daivi gunon par। aur phir auron ko bhi padhaana hai। baap dekhte hain drama anusaar kalpa pahle misal inki jo act chalti hai, saakshi hokar dekhte hain। bachchon ko bhi kehte hain tum saakshi hokar dekho। apne ko bhi dekho, ham padhte hain va nahin। shreemat par chalte hain va nahin। auron ko aap samaan banaane ki ham service karte hain va nahin। baap to inke mukh ka loan lekar bolte hain। aatma to chaitanya hai na। murde mein to bol na saken। zaroor chaitanya mein hi aayenge। to baap kitna nishkaami hai, koi aash nahin। laukik baap to samajhte hain bachche bade honge phir mujhe khilaayenge। inki to koi tamanna nahin। jaante hain mera drama mein part hi aisa hai, sirf aakar padhaata hoon। yeh bhi noondh hai। manushya drama ko bilkul nahin jaante।

tum bachchon ko yeh nishchay hai baap hi hamko padhaate hain। yeh brahma bhi padhte hain। zaroor yeh sabse achha padhte honge। yeh bhi achha madadgaar hai - shivbaaba ka। hamaare paas to kuchh dhan hai nahin। bachche hi dhan dete hain aur lete hain। do mutthi dete hain aur bhavishya mein lete hain। koi ke paas kuchh hai nahin, to kuchh dete nahin। baaki haan achha padhte hain to bhavishya mein achha pad paate hain, yeh bhi bahut thode hain, jinko yaad rehta hai ki ham nai duniya ke liye padh rahe hain। yeh yaad rahe to bhi manamnaabhav hai। parantu bahut hain jo duniyaavi baaton mein samay barbaad karte hain, baba kya padhaate hain, kaise padhaate hain, kitna oonch pad paana hai, yeh sab kuchh bhool jaate hain। aapas mein hi ladte jhagadte time vesta karte rehte hain। jo bada imtahaan paas karte hain, woh kabhi apna samay vesta nahin karte। achhi tarah padhenge, shreemat par chalenge। shreemat par to chalna pade na। baap kehte hain tum to naapharmaanbardaar ho। shreemat deta hoon, baap ko yaad karo to bhool jaate ho। yeh to kamjori kahenge। maaya ekdam naak se pakadkar, daskar sir par baith jaati hai। yeh yuddha ka maidaan hai na। achhe-achhe bachchon par maaya jeet pa leti hai। phir naam kiska badnaam hota hai? shivbaaba ka। gaayan bhi hai guru ka nindak thaur na paaye। aise maaya se haraane vaale phir thaur kaise paayenge। apne kalyaan ke liye buddhi chalaani chaahiye ki ham kaise purooshaartha kar baba se varsa loon। achhe-achhe mahaarthiyon jaisa bankar sabko raasta bataaoon। baba service ki yuktiyaan to bahut sahaj batlaate hain। baap kehte hain tum mujhe bulaate aaye ho, ab main kehta hoon ki mujhe yaad karo to paavan ban jaayenge। paavan duniya ke chitra hain na। yeh hai mukhya। yahaan em object rakhi jaati hai। aise nahin ki daaktari padhni hai to doctor ko yaad karna hai। bairistari padhni hai to koi barrister ko yaad karna hai। baap kehte hain sirf mujh ek ko yaad karo। bas main tumhaari sab manokaamna poorn karne vaala hoon। tum sirf mujhe yaad karo। bhal maaya tumko kitna bhi hairaan kare, phir bhi yuddha hai na। aise nahin phat se jeet pa lenge। is samay tak ek ne bhi maaya par jeet nahin paai hai, jeet paane se phir jagatjeet hone chaahiye। gaate hain main gulaam, main gulaam tera…। yahaan to maaya ko gulaam banaana hai। vahaan maaya kabhi duhkh nahin degi। aajkal to duniya hi badi gandi hai। ek do ko duhkh dete hi rehte hain। to kitna meetha baba hai, jisko apne liye koi tamanna nahin। aise baap ko yaad nahin karte va koi kahe ham shivbaaba ko maante hain, brahma baba ko nahin। parantu yeh donon ikatthe hain, bigar dalaal sauda ho na sake। baba ka rath hai, inka naam hi hai bhaagyashaali rath। yeh bhi jaante ho sabse number one ooncha hai yeh। class mein monitor ka bhi maan hota hai। regard rakhte hain। number one sikeeldha bachcha to yeh hai na। vahaan bhi sab raajaaon ko inka (shri naaraayan ka) regard rakhna hai। yeh jab samjhen tab regard rakhne ka akla aaye। yahaan jab regard rakhna seekho tab vahaan bhi rakho। nahin to baaki milega kya? shivbaaba ko yaad bhi nahin kar sakte। baap kehte hain yaad se hi tumhaara beda paar hota hai। behad ki raajaai dete hain। aise baap ko kitna yaad karna chaahiye। andar mein kitna love hona chaahiye। inka dekho baap se kitna love hai। love ho tab to sone ka bartan bane, jinka bartan sone ka hoga unki chalan badi first class hogi। drama anusaar raajdhaani sthaapan honi hai। unmein to sab prakaar ke chaahiye।

baap samjhaate hain bachche tumhein kabhi bhi gussa nahin aana chaahiye। samajhna chaahiye ham agar service nahin karte to goya time vesta karte rehte hain। shivbaaba ke yagya ki koi service nahin karenge to milega kya? serviceable hi oonch pad paayenge। apna kalyaan karne ke liye shauk rakhna chaahiye। nahin karte to pad bhrashta karte। student achha padhte hain to teacher bhi khush hoga, samjhenge yeh hamaara naam baala karenge। inke kaaran hamko ijaapha milega। baap teacher aadi sab khush honge। achhe sapoot bachchon par maa baap bhi kurbaan jaate hain, jo bahut achhi service karte hain, to baap bhi sunkar khush hote hain। jo bahuton ki service karte hain, unka zaroor naamaachaar hoga। oonch pad bhi vahi pa sakenge। raat din unko service ka hi ona rehta hai। khaan paan ki parvaah nahin rakhte। samjhaate-samjhaate gala ghut jaata hai। aise sikeeldhe, serviceable bachchon ko hi oonch pad paana hai। yeh to 21 janmon ki baat hai, so bhi kalpa-kalpaantar ke liye। jab result niklegi tab samjhenge, kisne service ki। kitnon ko raasta bataaya। characters ko bhi sudhaarna zaroori hai। mahaarthi, ghodesvaar, pyaade naam to hai na। service nahin karte to samajhna chaahiye ham pyaade hain। aisa koi na samjhe ki hamne dhan se madad ki hai, isliye hamaara pad ooncha hoga। yeh bilkul bhool hai। saara madaar service aur padhaai par hai। baap to bahut achhi reeti samjhaate rehte hain ki bachche padhkar ooncha pad paayen। kalpa-kalpa ka apne ko ghaata na daalen। baba dekhte hain yeh apne ko ghaata daal rahe hain, inko pata nahin padta, ismen hi khush ho jaate hain ki hamne paise diye hain isliye maala mein nazdeek aayenge। parantu bhal paisa diya lekin knowledge nahin dhaaran ki, yog mein nahin rahe to woh kya kaam ke! agar raham nahin karte to baaki baap ko kya follow karte hain। baap to aaye hi hain bachchon ko gul-gul banaane। jo bahuton ko gul-gul banaayenge un par baap bhi balihaar jaayenge। sthool service bhi bahut hai। jaise bhandaari ki baba bahut mahima karte hain, unko bahuton ki aasheervaad milti hai। jo jitni service karte hain, woh apna hi kalyaan karte hain, apni haddiyaan service mein dete hain। apni hi kamaai karte hain। bahut haddi pyaar se service karte hain। jo khitpit karte hain, woh apni hi takdeer kharaab karte hain, jinmen lobh hoga unhein woh sataayega। tum sab vaanaprasthi ho, sabko vaani se pare jaana hai। apne se poochhna chaahiye saare din mein ham kitni service karte hain। kai bachchon ko to service bigar sukh nahin aata। koi-koi ko grahchaari baithti hai - buddhi par va padhaai par। baba to sabko ekras padhaate hain, buddhi koi ki kaisi hoti, koi ki kaisi hoti hai। phir bhi purooshaartha to karna chaahiye। nahin to kalpa-kalpaantar ka pad aisa ho jaayega। pichhaadi mein jab result niklegi to sab saakshaatkaar karenge। saakshaatkaar karke phir transfer ho jaayenge। shaastron mein bhi hai ki pichhaadi mein bahut pachhtaate hain ki muphta samay vesta kiya। kalpa-kalpaantar ka bahut dhokha khaaya। baap to saavdhaan karte rehte hain। shivbaaba ki to yahi tamanna hai ki bachche padhkar oonch pad paayen aur koi apni tamanna nahin hai। unke kaam ki bhi koi vastu nahin hai। baap samjhaate hain bachche antarmukhi bano। duniya to saari baahyamukhi hai। tum ho antarmukhi। apni avastha ko dekhna hai aur sudhaarne ka bhi purooshaartha karna hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) saakshi hokar svayan ke part ko dekho - ham achhi reeti padhkar doosron ko padhaate hain ya nahin? aap samaan banaane ki seva karte hain? apna samay duniyaavi baaton mein barbaad mat karo।

2) antarmukhi ban apne aapko sudhaarna hai। apne kalyaan ka shauk rakhna hai। service mein busy rehna hai। baap samaan merciful zaroor banna hai।

vardaan:- har samay apni drishti, vritti, kriti dvaara seva karne vaale pakke sevaadhaari bhav

sevaadhaari arthaat har samay shreshtha drishti se, vritti se, kriti se seva karne vaale, jisko bhi shreshtha drishti se dekhte ho to woh drishti bhi seva karti hai। vritti se vaayumandal banta hai। koi bhi kaarya yaad mein rahkar karte ho to vaayumandal shuddh banta hai। brahman jeevan ka shvaans hi seva hai, jaise shvaans na chalne se moorchhit ho jaate hain aise brahman aatma seva mein busy nahin to moorchhit ho jaati hai isliye jitna snehi, utna sahayogi, utna hi sevaadhaari bano।

slogan:- seva ko khel samjho to thakenge nahin, sada light rahenge।

avyakti silence dvaara double light pharishta sthiti ka anubhav karo

sada double light sthiti mein rahne vaale nishchay buddhi, nishchinta honge। udti kala mein rahenge। udti kala arthaat ooche se oonchi sthiti। unke buddhi roopi paanv dharni par nahin। dharni arthaat deh bhaan se oopar। jo deh bhaan ki dharni se oopar rehte hain, woh sada pharishte hain। unke samparka mein jo bhi aatma aayegi woh thode samay mein bhi sheetalta va shanti ki anubhooti karegi।