Murli du jour du dimanche 11 février 2024

11-02-24 praatahmurli om shanti ''avyakt-baapdaada'' revise 24-02-98 madhuban

baap se, seva se aur parivaar se muhabbat rakho to mehnat se chhoot jaayenge

aaj chaaron or ke bachche apne baap ki jayanti manaane ke liye aaye hain। chaahe sammukh baithe hain, chaahe aakaari roop mein baap ke saamne hain। baap sabhi bachchon ko dekh rahe hain - ek taraph milan manaane ki khushi hai doosre taraph seva ka umang-utsaah hai ki jaldi se jaldi baapdaada ko pratyaksha karen। baapdaada chaaron or ke bachchon ko dekhte hue arab-kharab guna mubaarak de rahe hain। jaise bachche baap ki jayanti manaane ke liye kone-kone se, door-door se aaye hain, baapdaada bhi bachchon ka janma din manaane aaye hain। sabse door desh vaale kaun? baap ya aap? aap kahenge - ham bahut door se aaye hain lekin baap kehte hain main aapse bhi doordesh se aaya hoon। lekin aapko samay lagta hai, baap ko samay nahin lagta hai। aap sabko plan ya train leni padti hai, baap ko sirf rath lena padta hai। to aise nahin ki sirf aap baap ka manaane aaye hain lekin baap bhi aadi saathi brahman aatmaayen, janma ke saathi bachchon ka birth de manaane aaye hain kyonki baap akela avatrit nahin hote lekin brahma brahman bachchon ke saath divya janma lete arthaat avatrit hote hain। sivaae braahmanon ke yagya ki rachna akela baap nahin kar sakta। to yagya racha, brahma dvaara brahman rache tab aap sab paida hue hain। to chaahe do varsha vaale ho, do maas vaale ho lekin aap sabhi ko bhi divya brahman janma ki mubaarak hai। kitna yeh divya janma shreshtha hai। baap bhi har ek divya janmadhaari brahman aatmaon ke bhaagya ka sitaara chamakta hua dekh harshit hote hain। aur sada yahi geet gaate rehte - “vaah heere tulya jeevan vaale brahman bachche vaah''। vaah-vaah ho na? baap ne vaah-vaah bachche bana diya। yeh alaukik janma baap ka bhi nyaara hai to aap bachchon ka bhi nyaara aur pyaara hai। yeh ek hi baap hai jiska aisa janma va jayanti hai jo aur kisi ka bhi aise janma din na hua hai, na hona hai। niraakaar aur phir divya janma; aur sabhi aatmaon ka janma apne-apne saakaar shareer mein hota hai lekin niraakaar baap ka janma parkaaya pravesh se hota hai। saare kalpa mein aisa is vidhi se kiska janma hua hai? ek hi baap ka aisa nyaara janma din hota hai jisko shiv jayanti ke roop mein bhagat bhi manaate aate hain isliye is divya janma ke mahatva ko aap jaante ho, bhagat bhi jaante nahin hain lekin jo suna hai usi pramaan oonche te ooncha samajhte hue manaate aate hain। aap bachche sirf manaate nahin ho lekin manaane ke saath svayan ko baap samaan banaate bhi ho। alaukik divya janma ke mahatva ko jaante ho। aur kisi bhi baap ke saath bachche ka, saath-saath janma nahin hota lekin shiv jayanti arthaat baap ke divya janma ke saath bachchon ka bhi janma hai, isliye diamond jubilee manaai na। to baap ke saath bachchon ka bhi divya janma hai। sirf isi jayanti ko heere tulya jayanti kehte ho lekin heere tulya jayanti manaate svayan bhi heere tulya jeevan mein aa jaate ho। is rahasya ko sabhi bachche achhi tarah se jaante bhi ho aur auron ko bhi sunaate rehte ho। baapdaada samaachaar sunte rehte hain, dekhte bhi hain ki bachche baap ke divya janma ka mahatva kitna umang-utsaah se manaate rehte hain। baapdaada chaaron or ke sevaadhaari bachchon ko himmat ke return mein madad dete rehte hain। bachchon ki himmat aur baap ki madad hai।

aajkal baapdaada ke paas sabhi bachchon ka ek hi sneh ka sankalp baar-baar aata hai ki ab baap samaan jaldi se jaldi banna hi hai। baap bhi kehte hain he meethe bachche banna hi hai। har ek ko yeh dridh nishchay hai aur bhi underline kar do ki ham nahin banenge to aur kaun banega। ham hi the, ham hi hain aur ham hi har kalpa mein bante rahenge। yeh pakka nishchay hai na?

double videshi bhi shiv jayanti manaane aaye hain? achha hai, haath uthaao double videshi। baapdaada dekh rahe hain ki double videshiyon ko sabse jyaada yahi umang-utsaah hai ki koi bhi vishwa ka kona rah nahin jaaye। bhaarat ko to kaaphi samay seva ke liye mila hai aur bhaarat ne bhi gaanv-gaanv mein sandesh diya hai। lekin double videshiyon ko bhaarat se seva ka samay kam mila hai। phir bhi umang-utsaah ke kaaran baapdaada ke saamne seva ka saboot achha laaya hai aur laate rahenge। bhaarat mein jo vartamaan samay vargeekran ki sevaayen aarambha hui hain, uske kaaran bhi sabhi vargon ko sandesh milna sahaj ho gaya hai kyonki har ek varga apne varga mein aage badhna chaahte hain to yeh vargeekran ki invention achhi hai। isse bhaarat ki seva mein bhi vishesh aatmaon ka aana achhi raunak lag jaati hai। achha lagta hai na! vargeekran ki seva achhi lagti hai? videsh vaale bhi apne achhe-achhe group le aate hain, retreat karaate hain, tareeka achha rakha hai। jaise bhaarat mein vargeekran se seva mein chance mila hai, vaise inhon ki bhi yeh vidhi bahut achhi hai। baapdaada ko donon taraph ki seva pasanda hai, achha hai। jagdeesh bachche ne invention achhi nikaali hai aur videsh mein yeh retreat, dialogue kisne shuru kiya? (sabhi ne miljulkar kiya) bhaarat mein bhi miljulkar to kiya hai phir bhi nimitta bane hain। achha hai har ek ko apne hamjinsa ke sangathan mein achha lagta hai। to donon taraph ki seva mein anek aatmaon ko sameep laane ka chance milta hai। result achhi lagti hai na? retreat ki result achhi rahi? aur vargeekran ki bhi result achhi hai, desh-videsh koi na koi nai invention karte rehte hain aur karte rahenge। chaahe bhaarat mein, chaahe videsh mein seva ka umang achha hai। baapdaada dekhte hain jo sachchi dil se nihsvaartha seva mein aage badhte jaate hain, unhon ke khaate mein punya ka khaata bahut achha jama hota jaata hai। kai bachchon ka ek hai apne purushaartha ke praalabdha ka khaata, doosra hai santushta rah santushta karne se duaaon ka khaata aur teesra hai yathaartha yogayukta, yuktiyukta seva ke return mein punya ka khaata jama hota hai। yeh teenon khaate baapdaada har ek ka dekhte rehte hain। agar koi ka teenon khaate mein jama hota hai to uski nishaani hai - woh sada sahaj purushaarthi apne ko bhi anubhav karte hain aur doosron ko bhi us aatma se sahaj purushaartha ki svatah hi prerna milti hai। woh sahaj purushaartha ka symbol hai। mehnat nahin karni padti, baap se, seva se aur sarva parivaar se muhabbat hai to yeh teenon prakaar ki muhabbat mehnat se chhuda deti hai।

baapdaada sabhi bachchon se yahi shreshtha aasha rakhte hain ki sabhi bachche sahaj purushaarthi sada raho। 63 janma bhakti mein, ulajhnon mein bhatakne ki mehnat ki hai, ab yeh ek hi janma hai mehnat se chhootne ka। agar bahutkaal se mehnat karte rahenge to yeh sangamayug ka vardaan muhabbat se sahaj purushaarthi ka kab lenge? yug samaapta, vardaan bhi samaapta। to sada is vardaan ko jaldi se jaldi le lo। koi bhi bade te bada kaarya ho, koi bhi bade te badi samasya ho lekin har kaarya, har samasya aise paar ho jaise aap log kehte ho maakhan se baal nikal gaya। kai bachchon ka thoda-thoda baapdaada khel dekhte hain, harshit bhi hote hain aur bachchon ko dekhkar raham bhi aata hai। jab koi samasya ya koi bada kaarya bhi saamne aata hai to kabhi-kabhi bachchon ke chehre par thoda sa samasya va kaarya ki lahar dikhaai deti hai। thoda sa chehra badal jaata hai। phir agar koi kehta hai kya hua? to kehte hain kaam hi bahut hai na! vighna-vinaashak ke aage vighna na aave to vighna-vinaashak title kaise gaaya jaayega? thoda sa chehre par thakaavat ya thoda sa mood badalne ke chinha nahin aane chaahiye। kyon? aapke jad chitra jo aadhaakalpa pooje jaayenge usmein kabhi thoda sa bhi thakaavat ya mood badalne ke chinha dikhaai dete hain kya? jab aapke jad chitra sada muskaraate rehte hain to woh kiske chitra hain? aapke hi hain na? to chaitanya ka hi yaadgaar chitra hai isliye thoda sa bhi thakaavat va jisko kehte ho chidchidaapan, woh nahin aana chaahiye। sada muskaraata chehra baapdaada ko aur sabhi ko bhi pasanda aata hai। agar koi chidchidepan mein hai to uske aage jaayenge? sochenge abhi kahen ya nahin kahen। to aapke jad chitron ke paas to bhagat bahut umang se aate hain aur chaitanya mein koi bhaari ho jaae to achha lagta hai? abhi baapdaada sabhi bachchon ke chehre par sada pharishta roop, vardaani roop, daata roop, merciful, athak, sahaj yogi va sahaj purushaarthi ka roop dekhne chaahte hain। yeh nahin kaho baat hi aisi thi na। kaisi bhi baat ho lekin roop muskaraata hua, sheetal, gambheer aur ramneekta donon ke balance ka ho। koi bhi achaanak aa jaae aur aap samasya ke kaaran va kaarya ke kaaran sahaj purushaarthi roop mein nahin ho to woh kya dekhega? aapka chitra to vahi le jaayega। koi bhi samay, koi bhi kisi ko bhi chaahe ek maas ka ho, do maas ka ho, achaanak bhi aapke face ka chitra nikaale to aisa hi chitra ho jo sunaaya। daata bano। levta nahin, daata। koi kuchh bhi de, achha de va bura bhi de lekin aap bade te bade baap ke bachche badi dil vaale ho agar bura bhi de diya to badi dil se bure ko apne mein sveekaar na kar daata ban aap usko sahayog do, sneh do, shakti do। koi na koi gun apne sthiti dvaara gift mein de do। itni badi dil vaale bade te bade baap ke bachche ho। raham karo। dil mein us aatma ke prati aur extra sneh emerge karo। jis sneh ki shakti se woh svayan parivartit ho jaae। aise badi dil vaale ho ya chhoti dil hai? samaane ki shakti hai? sama lo। saagar mein kitna kichda daalte hain, daalne vaale ko, woh kichde ke badle kichda nahin deta। aap to gyaan ke saagar, shaktiyon ke saagar ke bachche ho, master ho।

to suna baapdaada kya dekhne chaahte hain? majority bachchon ne lakshya rakha hai ki is varsha mein parivartan karna hi hai। karenge, sochenge nahin, karna hi hai। karna hi hai ya vahaan jaakar sochenge? jo samajhte hain karna hi hai woh ek haath ki taali bajaao। (sabhi ne haath hilaaya) bahut achha। sirf yeh haath nahin uthaana, man se dridh sankalp ka haath uthaana। yeh haath to sahaj hai। man se dridh sankalp ka haath sada saphalta swaroop banaata hai। jo socha woh hona hi hai। sochenge to positive na! negative to sochna nahin hai। negative sochne ka sada ke liye raasta banda। banda karna aata hai ya khul jaata hai? jaise abhi toofaan laga na to darvaaje aapehi khul gaye, aise to nahin hota? aap samajhte ho banda karke aa gaye, lekin toofaan khol de, aisa dheela nahin karna। achha।

double videshiyon ka utsav achha hua na! (10 varshon se adhik samay se gyaan mein chalne vaale kareeb 400 double videshi bhaai-bahinon ka sammaan-samaaroh manaaya gaya) achha laga? jisne manaaya aur achha laga woh haath uthaao। paandav bhi hain। iska mahatva kya hai? manaane ka mahatva kya hai? manaana arthaat banna। sada aise taajdhaari, sva purushaartha aur seva ki jimmevaari kya kahen, mauj hi kahen, seva ke mauj manaane ka taaj sada hi pada rahe। aur golden chunni bhi sabhi ne pahni na! to golden chunni kislie pahnaai? sada golden aged sthiti, silver nahin, golden। aur phir do-do haar bhi pahne the। to do haar kaun se pahnenge? ek to sada baap ke gale ka haar। sada, kabhi gale se nikaalna nahin, gale mein hi piroye rahen aur doosra sada seva dvaara auron ko bhi baap ke gale ka haar banaana, yeh double haar hai। to bahut achha manaane vaale ko bhi laga aur dekhne vaale ko bhi laga। to is utsav manaane ka, sada ke utsav ka rahasya bataaya। aur saath-saath yeh bhi manaana arthaat aur umang-utsaah badhaana। sabhi ke anubhav baapdaada ne to dekh liye। achhe anubhav rahe। khushi aur nasha sabhi ke chehron mein dikhaai de raha tha। bas aisa hi apna shaktishaali, muskaraata hua ramneek aur gambheer swaroop sada emerge rakhte chalo kyonki aajkal ke samay ke haalton ke pramaan jyaada sunne vaale, samajhne vaale kam hain, dekhkar anubhav karne vaale jyaada hain। aapki soorat mein baap ka parichay, sunaane ke bajaae dikhaai de। to achha kiya। baapdaada bhi dekh-dekh harshit ho rahe hain। is varsha ko va is season ko vishesh utsav ki season manaai hai। har samay ek jaisa nahin hota hai।

(drill) sabhi mein ruling power hai? karmendriyon ke oopar jab chaaho tab rule kar sakte ho? sva-raajya adhikaari bane ho? jo sva-raajya adhikaari hain vahi vishwa ke raajya adhikaari banenge। jab chaaho, kaisa bhi vaataavran ho lekin agar man-buddhi ko order do stop, to ho sakta hai ya time lagega? yeh abhyaas har ek ko saare din mein beech-beech mein karna aavashyak hai। aur koshish karo jis samay man-buddhi bahut vyasta hai, aise samay par bhi agar ek second ke liye stop karne chaaho to ho sakta hai? to socho stop aur stop hone mein 3 minute, 5 minute lag jaaen, yeh abhyaas ant mein bahut kaam mein aayega। isi aadhaar par paas with honour ban sakenge। achha।

sada dil ke umang-utsaah ka utsav manaane vaale snehi aatmaayen, sada heere tulya jeevan ka anubhav karne vaale, anubhav ke authority vaale vishesh aatmaayen, sada apne soorat se baap ka parichay dene vaale baap ko pratyaksha karne vaale sevaadhaari aatmaayen, sada gambheer aur ramneek donon ka saath mein balance rakhne vaale sabke blessing ke adhikaari aatmaayen, aise chaaron or ke desh-videsh ke bachchon ko shiv raatri ki mubaarak, mubaarak ho। saath-saath baapdaada ka dilaaraam ka dil va jaan sik va prem se yaadapyaar aur namaste।

vardaan:- apne raajya adhikaari va poojya swaroop ki smriti se daata ban dene vaale sarva khajaanon se sampanna bhav

sada isi smriti mein raho ki main poojya aatma auron ko dene vaali daata hoon, levta nahin, devta hoon। jaise baap ne aap sabko aapehi diya hai aise aap bhi master daata ban dete chalo, maango nahin। apne raajya adhikaari va poojya swaroop ki smriti mein raho। aaj tak aapke jad chitron se jaakar maangani karte hain, kehte hain hamko bachaao। to aap bachaane vaale ho, bachaao-bachaao kahne vaale nahin। parantu daata banne ke liye yaad se, seva se, shubh bhaavna, shubh kaamna se sarva khajaanon mein sampanna bano।

slogan:- chalan aur chehre ki prasannata hi roohaani personality ki nishaani hai।