Murli du jour du samedi 10 février 2024

10-02-2024 praatahmurli om shanti "baapdaada"' madhuban

“meethe bachche - aatma-abhimaani banne ka abhyaas karo to daiveegun aate jaayenge, criminal khyaalaat samaapta ho jaayenge, apaar khushi rahegi''

prashn:- apni chalan ko sudhaarne va apaar khushi mein rahne ke liye kaun-si baat sada smriti mein rakhni hai?

uttar:- sada smriti rahe ki ham daivi svaraajya sthaapan kar rahe hain, ham mrityulok ko chhod amarlok mein ja rahe hain - isse bahut khushi rahegi, chalan bhi sudharti jaayegi kyonki amarlok nai duniya mein jaane ke liye daiveegun zaroor chaahiye। svaraajya ke liye bahuton ka kalyaan bhi karna pade, sabko raasta bataana pade।

om shanti। bachchon ko apne ko yahaan ka nahin samajhna chaahiye। tumko maaloom hua hai hamaara jo raajya tha jisko raamraajya va sooryavanshi raajya kehte hain usmein kitni sukh-shanti thi। ab ham phir se devta ban rahe hain। aage bhi bane the। ham hi sarvagun sampanna… daiveegun vaale the। ham apne raajya mein the। abhi raavan raajya mein hain। ham apne raajya mein bahut sukhi the। to andar mein bahut khushi aur nishchay hona chaahiye kyonki tum phir se apni raajdhaani mein ja rahe ho। raavan ne tumhaara raajya chheen liya hai। tum jaante ho hamaara apna sooryavanshi raajya tha। ham raamraajya ke the, ham hi daiveegun vaale the, ham hi bahut sukhi the phir raavan ne hamaara raajya-bhaagya chheen liya। ab baap aakar apna aur paraaye ka raaz samjhaate hain। aadhaakalpa ham raamraajya mein the phir aadhaakalpa ham raavan raajya mein rahe। bachchon ko har baat ka nishchay ho to khushi mein rahen aur chalan bhi sudhre। ab paraaye raajya mein ham bahut duhkhi hain। hindu bhaaratvaasi samajhte hain ham paraaye (foreign) raajya mein duhkhi the, ab sukhi hain apne raajya mein। parantu yeh hai alpakaal kaag vishta samaan sukh। tum bachche abhi sada kaal ke sukh ki duniya mein ja rahe ho। to tum bachchon ko andar bahut khushi rahni chaahiye। gyaan mein nahin hain to jaise thikkar pattharbuddhi hain। tum bachche jaante ho ham avashya apna raajya lenge, ismen takleeph ki koi baat nahin। raajya liya tha phir aadha kalpa raajya kiya phir raavan ne hamaari kala kaaya hi chat kar di। koi achhe bachche ki jab chalan bigad jaati hai to kaha jaata hai tumhaari kala kaaya chat ho gai hai kya? yeh hain behad ki baaten। samajhna chaahiye maaya ne hamaari kala kaaya chat kar di। ham girte hi aaye। ab behad ka baap daiveegun sikhlaate hain। to khushi ka paara chadhna chaahiye। teacher knowledge dete hain to student ko khushi hoti hai। yeh hai behad ki knowledge। apne ko dekhna hai - mere mein koi aasuri gun to nahin hain? sampoorn nahin banenge to sajaayen khaani padengi। parantu ham sajaayen khaayen hi kyon? isliye baap, jisse yeh raajya milta hai usko yaad karna hai। daiveegun jo hamaare mein the woh ab dhaaran karne hain। vahaan yatha raaja-raani tatha praja sabmen daiveegun the। daiveegunon ko to samajhte ho na। agar koi samajhte nahin to laayenge kaise? gaate bhi hain sarvagun sampanna… to purushaartha kar aisa banna hai। banne mein mehnat lagti hai। criminal aai ho jaati hai। baap kehte hain apne ko aatma samjho to criminal khyaalaat ud jaayenge। yuktiyaan to baap bahut samjhaate hain, jismen daiveegun hain unko devta kaha jaata hai, jinmen nahin hain unko manushya kaha jaata hai। hain to donon hi manushya। parantu devtaaon ko poojte kyon hain? kyonki unmein daiveegun hain aur unke (manushyon ke) kartavya bandar jaise hain। kitna aapas mein ladaai-jhagda aadi karte hain। satayug mein aisi baaten hoti nahin। yahaan to hoti hai। zaroor apni bhool hoti hai to sahan karna padta hai। aatma-abhimaani nahin hain to sahan karna padta hai। tum jitna aatma-abhimaani bante jaayenge utne daiveegun bhi dhaaran honge। apni jaanch karni hai ki hamaare mein daivi gun hain? baap sukhdaata hai to bachchon ka kaam hai sabko sukh dena। apne dil se poochhna hai ki ham kisko duhkh to nahin dete hain? parantu koi-koi ki aadat hoti hai jo duhkh dene bigar rah nahin sakte। bilkul sudharte nahin jaise jel birds। woh jel mein hi apne ko sukhi samajhte hain। baap kehte hain vahaan to jel aadi hota hi nahin, paap hota hi nahin jo jel mein jaana pade। yahaan jel mein sajaayen bhogni padti hain। abhi tum samajhte ho ham jab apne raajya mein the to bahut saahookaar the, jo brahman kul vaale honge woh aise hi samjhenge ki ham apna raajya sthaapan kar rahe hain। woh ek hi hamaara raajya tha, jisko devtaaon ka raajya kaha jaata hai। aatma ko jab gyaan milta hai to khushi hoti hai। jeev aatma zaroor kehna pade। ham jeev aatma jab devi-devta dharma ki thi to saare vishwa par hamaara raajya tha। yeh knowledge hai tumhaare liye। bhaaratvaasi thode hi samajhte hain ki hamaara raajya tha, ham bhi satopradhaan the। tum hi yeh saari knowledge samajhte ho। to ham hi devta the aur hamko hi ab banna hai। bhal vighna bhi padte hain parantu tumhaari din-pratidin unnati hoti jaayegi। tumhaara naam baala hota jaayega। sab samjhenge yeh achhi sanstha hai, achha kaam kar rahe hain। raasta bhi bahut sahaj bataate hain। kehte hain tum hi satopradhaan the, devta the, apni raajdhaani mein the। ab tamopradhaan bane ho aur to koi apne ko raavan raajya mein samajhte nahin hain।

tum jaante ho ham kitne svachchha the, ab tuchchha bane hain। punarjanma lete-lete paarasbuddhi se pattharbuddhi ban pade hain। ab ham apna raajya sthaapan kar rahe hain to tumko uchhalna chaahiye, purushaartha mein lag jaana chaahiye। jo kalpa pahle lage honge ve ab bhi lagenge zaroor। nambarvaar purushaartha anusaar ham apna daivi raajya sthaapan kar rahe hain। yeh bhi tum ghadi-ghadi bhool jaate ho। nahin to andar bahut khushi rahni chaahiye। ek-do ko yahi yaad dilaao ki manamnaabhav। baap ko yaad karo jisse hi ab raajaai lete hain। yeh koi nai baat nahin hai। kalpa-kalpa hamko baap shreemat dete hain, jisse ham daiveegun dhaaran karte hain। nahin to sajaayen khaakar phir kam pad lenge। yeh badi bhaari lottery hai। ab purushaartha kar oonch pad paaya to kalpa-kalpaantar paate hi rahenge। baap kitna sahaj samjhaate hain। pradarshani mein bhi yahi samjhaate raho ki tum bhaaratvaasi hi devtaaon ki raajdhaani ke the phir punarjanma lete-lete seedhi neeche utarte-utarte aise bane ho। kitna sahaj samjhaate hain। supreme baap, supreme teacher, supreme guru hai na। tum kitne dher student ho, daudi lagaate rehte ho। baba bhi list mangaate rehte hain kitne nirvikaari pavitra bane hain?

bachchon ko samjhaaya gaya hai ki bhrikuti ke beech mein aatma chamakti hai। baap kehte hain main bhi yahaan aakar baithta hoon। apna part bajaata hoon। mera part hi hai patiton ko paavan banaana। gyaan saagar hoon। bachche paida hote hain, koi to bahut achhe hote hain, koi kharaab bhi nikal padte hain। phir aashcharyavat sunanti, kathanti, bhaaganti ho jaate hain। are maaya, tum kitni prabal ho। phir bhi baap kehte hain bhaaganti hokar bhi kahaan jaayenge? yahi ek baap taarne vaala hai। ek baap hai sadgati daata, baaki is gyaan ko koi to bilkul jaante hi nahin। jisne kalpa pahle maana hai, vahi maanenge। ismen apni chalan ko bahut sudhaarna padta hai, service karni padti hai। bahuton ka kalyaan karna hai। bahuton ko jaakar raasta bataana hai। bahut-bahut meethi jabaan se samjhaana hai ki tum bhaaratvaasi hi vishwa ke maalik the। ab phir tum is prakaar se apna raajya le sakte ho। yeh to tum samajhte ho baap jo samjhaate hain, aisa koi samjha na sake phir bhi chalte-chalte maaya se haar kha lete hain। baap khud kehte hain vikaaron par jeet paane se hi tum jagatjeet banenge। yeh devtaayen jagatjeet bane hain। zaroor unhon ne aisa karma kiya hai। baap ne karmon ki gati bhi bataai hai। raavan raajya mein karma vikarma hi hote hain, raam raajya mein karma akarma hote hain। mool baat hai kaam par jeet paakar jagatjeet banne ki। baap ko yaad karo, ab vaapis ghar jaana hai। hamko 100 percent certain hai ki ham apna raajya lekar hi chhodenge। parantu raajya yahaan nahin karenge। yahaan raajya lete hain। raajya karenge amarlok mein। ab mrityulok aur amarlok ke beech mein hain, yeh bhi bhool jaate hain isliye baap ghadi-ghadi yaad dilaate hain। ab yeh pakka nishchay hai ki ham apni raajdhaani mein jaayenge। yeh puraani raajdhaani khatma zaroor honi hai। ab nai duniya mein jaane ke liye daiveegun zaroor dhaaran karne hain। apne se baaten karni hai। apne ko aatma samajhna hai kyonki abhi hi hamko vaapas jaana hai। to apne ko aatma bhi abhi hi samajhna hai phir kabhi vaapis thode hi jaana hai jo yeh gyaan milega। vahaan 5 vikaar hi nahin honge jo ham yog lagaayen। yog to is samay lagaana hota hai paavan banne ke liye। vahaan to sab sudhre hue hain। phir dheere-dheere kala kam hoti jaati hai। yeh to bahut sahaj hai, krodh bhi kisko duhkh deta hai na। mukhya hai deh-abhimaan। vahaan to deh-abhimaan hota hi nahin। aatma-abhimaani hone se criminal aai nahin rehti। civil aai ban jaati hai। raavan raajya mein criminal aai ban jaati hai। tum jaante ho ham apne raajya mein bahut sukhi rehte hain। koi kaam nahin, koi krodh nahin, is par shuru ka geet bhi bana hua hai। vahaan yeh vikaar hote nahin। hamaari anek baar yeh haar aur jeet hui hai। satayug se kaliyug tak jo kuchh hua woh phir repeat hona hai। baap athva teacher ke paas jo knowledge hai woh tumko sunaate rehte hain। yeh roohaani teacher bhi wonderful hai। oonche se ooncha bhagwan, oonche se ooncha teacher bhi hai aur hamko bhi oonche se ooncha devta banaate hain। tum khud dekh rahe ho - baap kaise Deityism sthaapan kar rahe hain। tum khud hi devta ban rahe ho। abhi to sabhi apne ko hindu kehte rehte hain। unhon ko bhi samjhaaya jaata hai ki vaastav mein aadi sanaatan devi-devta dharma hai aur sabka dharma chalta rehta hai। yeh ek hi devi-devta dharma hai, jo praayahlop ho gaya hai। yeh to bahut pavitra dharma hai। in jaisa pavitra dharma koi hota nahin। ab pavitra na hone kaaran koi bhi apne ko devta nahin kahla sakte hain। tum samjha sakte ho ki ham aadi sanaatan devi-devta dharma ke the tab to devtaaon ko poojte hain। Christ ko poojne vaale Christian thahre, buddha ko poojne vaale bauddhi thahre, devtaaon ko poojne vaale devta thahre। phir apne ko hindu kyon kahlaate ho? yukti se samjhaana hai। sirf kahenge hindu dharma, dharma nahin hai, to bigdenge। bolo, hindu aadi sanaatan dharma ke the to kuchh samjhen ki aadi sanaatan dharma to koi hindu nahin hai। aadi sanaatan akshar theek hai। devta pavitra the, yeh apvitra hain isliye apne ko devta nahin kahla sakte hain। kalpa-kalpa aise hota hai, inke raajya mein kitne saahookaar the। ab to kangaal ban pade hain। woh padmaapadmapti the। baap yuktiyaan bahut achhi dete hain। poochha jaata hai tum satayug mein rahne vaale ho ya kaliyug mein? kaliyug ke ho to zaroor narkavaasi ho। satayug mein rahne vaale to svargavaasi devta honge। aisa prashn poochhenge to samjhenge ki prashn poochhne vaala zaroor khud transfer kar devta bana sakte honge। aur to koi poochh nahin sakte। woh bhakti maarga hi alag hai। bhakti ka phal kya hai? woh hai gyaan। satayug-treta mein bhakti hoti nahin। gyaan se aadha kalpa din, bhakti se aadha kalpa raat। maanne vaale honge to maanenge। na maanne vaale to gyaan ko bhi nahin maanenge to bhakti ko bhi nahin maanenge। sirf paisa kamaana hi jaante hain।

tum bachche to yogbal se ab raajaai sthaapan kar rahe ho shreemat par। phir aadha kalpa ke baad raajya ganvaate bhi ho। yeh chakra chalta hi rehta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) bahuton ka kalyaan karne ke liye apni jabaan bahut meethi banaani hai। meethi jabaan se service karni hai। sahansheel banna hai।

2) karmo ki gahan gati ko samajh vikaaron par jeet paani hai। jagatjeet devta banna hai। aatma-abhimaani ban criminal drishti ko civil banaana hai।

vardaan:- shreshtha karma dvaara divya gun roopi prabhu prasaad baantane vaale pharishta so devta bhav

vartamaan samay chaahe agyaani aatmaayen hain, chaahe brahman aatmaayen hain, donon ko aavashyakta gundaan ki hai। to ab is vidhi ko svayan mein va brahman parivaar mein teevra banaao। ye divya gun sabse shreshtha prabhu prasaad hai, is prasaad ko khoob baanto, jaise sneh ki nishaani ek do ko toli khilaate ho aise divya gunon ki toli khilaao to is vidhi se pharishta so devta banne ka lakshya sahaj sabmen pratyaksha dikhaai dega।

slogan:- yog roopi kavach ko pahankar rakho to maaya roopi dushman vaar nahin kar sakta।