Murli du jour du vendredi 22 mars 2024

22-03-2024 praatahmurli om shanti "baapdaada"' madhuban

“meethe bachche - jitna samay mile antarmukhi rahne ka purooshaartha karo, baaharmukhta mein na aao, tab hi paap katenge''

prashn:- chadhti kala ka purooshaartha kya hai jo baap har bachche ko sikhlaate hain?

uttar:- 1. bachche chadhti kala mein jaana hai to buddhiyog ek baap se lagaao। phalaana aisa hai, yeh aisa karta hai, ismen yeh avgun hain - in baaton mein jaane ki darkaar nahin। avgun dekhne se munh mod lo। 2. kabhi bhi padhaai se roothna nahin। murli mein jo achhi-achhi points hain, unhein dhaaran karte raho, tab hi chadhti kala ho sakti hai।

om shanti। abhi yeh hai gyaan ka class aur savere yog ka class। yog kaun-sa? yeh bahut achhi reeti samjhaana hai kyonki bahut manushya hathayog mein phanse hue hain। jo hathayog manushya sikhlaate hain। yeh hai raajayog, jo paramatma sikhlaate hain kyonki raaja to koi hai nahin jo raajayog sikhlaave। yeh lakshmi-naaraayan bhagavti-bhagwan hain, raajayog seekhe tab to bhavishya mein bhagavti-bhagwan banen। yeh hai hi purooshottam sangamayug ki samjhaani। isko kaha jaata hai purooshottam। puraani aur nai duniya ka beech। puraane manushya aur naye devtaayen। is samay sabhi manushya puraane hain। nai duniya mein nai aatmaayen, devtaayen hote hain। vahaan manushya nahin kahenge। bhal hain manushya parantu daiveegunon vaale hain, isliye devi-devta kaha jaata hai। pavitra bhi rehte hain। baap bachchon ko samjhaate hain kaam mahaashatru hai। yeh raavan ka pahla-pahla bhoot hai। koi bahut krodh karte hain to kaha jaata hai - bhaun-bhaun kyon karte ho! yeh do vikaar bade shatru hain। lobh-moh ke liye bhaun-bhaun nahin kahenge। manushyon mein science ghamanda ke kaaran krodh kitna hai - yeh bhi bahut nuksaankaarak hai। kaam ka bhoot aadi, madhya, ant duhkh dene vaala hai। ek-do par kaam kataari chalaate hain। yeh sab baaten samajhkar phir auron ko samjhaani hain। tumhaare sivaae baap se varsa lene ka sachcha raasta to koi batla na sake। tum bachche hi bata sakte ho। behad ke baap se itna bada varsa kaise milta hai! jo kisko samjha nahin sakte to zaroor padhaai par dhyaan nahin hai। buddhiyog kahaan bhatakta hai। yuddha ka maidaan hai na। aise koi mat samjhe - sahaj baat hai। man ke toofaan va vikalpa dher ke dher na chaahte hue bhi aayenge, ismen moonjhana nahin hai। yogbal se hi maaya bhaagegi, ismen purooshaartha bahut hai। dhandhe-dhori mein kitne thak jaate hain kyonki deh-abhimaan mein rehte hain। deh-abhimaan ke kaaran bahut baatcheet karni padti hai। baap kehte hain dehi-abhimaani bano। dehi-abhimaani banne se jo baap samjhaate hain vahi auron ko samjhaayenge। apne ko aatma samajh baap ko yaad karo। baap hi shiksha denge ki bachche baaharmukhi nahin hona chaahiye। antarmukhi hona hai। bhal kahaan baaharmukhi hona bhi pade, phir bhi jitni phursat mile koshish kar antarmukhi hona chaahiye, tab hi paap katenge। nahin to na paap katenge, na oonch pad paayenge। janma-janmaantar ke paap sir par hain। sabse jaasti paap braahmanon ke hain, unmein bhi nambarvaar hain। jo bahut oonch bante hain, vahi bilkul neech bhi bante hain। jo prince bante hain unko hi phir beggar bhi banna hai। drama ko achhi reeti samajhna hai, jo pahle aaye hain woh pichhaadi mein aayenge। jo pahle paavan bante hain vahi pahle patit bante hain। baap kehte hain main bhi aata hi hoon inke bahut janmon ke ant mein, so bhi jab vaanaprastha avastha hai। is samay chhote-bade sabki vaanaprastha avastha hai। baap ke liye gaayan bhi hai sarva ki sadgati karne vaale। woh hoti hi hai purooshottam sangamayug par। yeh purooshottam sangamayug bhi yaad rakhna chaahiye। jaise manushyon ko kaliyug yaad hai, sangamayug sirf tumko yaad hai। tumhaare mein bhi nambarvaar hain। bahuton ko to apna gorakhdhandha hi yaad rehta hai। baahar se munh hata hua ho to dhaarna bhi ho jaae। ek kahaavat hai - antakaal jo stri simre… jo geet va shlok achhe-achhe hain, jinka hamaare gyaan se connection hai, woh rakhne chaahiye। jaise chhi-chhi duniya se jaana hi hoga। doosra, nain heen ko raah dikhaao… aise-aise geet apne paas rakhne chaahiye। banaaye to manushyon ne hain, jinko is sangam ka pata hi nahin hai। is samay sab gyaan nainheen andhe hain। jab paramatma aaye tab aakar raah dikhaaye। akele ko to nahin dikhaayenge। yeh hai unki shiv shakti sena। yeh shakti sena kya karti hai? shreemat par nai duniya ki sthaapna। tum bhi raajayog seekhte ho jo bhagwan ke sivaae koi sikhla na sake। bhagwan to niraakaar hai, unko to apna shareer hai nahin, baaki jo bhi hain sab shareerdhaari hain। oonch te oonch to ek baap hi hai, jo tumko padhaate hain। yeh to tum hi jaano। tumhaare mein bhi nambarvaar hain to tumko warning deni chaahiye। bade-bade akhbaar mein daalna chaahiye। manushya jo yog sikhlaate hain, woh hai hathayog। raajayog ek parampita paramatma baap hi sikhlaate hain, jisse mukti-jeevanmukti milti hai। hathayog se donon nahin milte। woh hai hathayog jo ki parmapra se chala aata hai, puraana hai। yeh raajayog sirf sangamayug par baap sikhlaate hain।

baba ne samjhaaya hai jab bhaashan karte ho to topics nikaalni chaahiye। parantu aise karte nahin hain। shreemat par chalne vaale bahut thode hain। pahle bhaashan likho phir pakka karo to yaad aayega। tumko orally bhaashan karna hai। tumko padhkar to sunaana nahin hai। vichaar saagar manthan kar bhaashan karne ki taakat usmein rahegi jo apne ko aatma samajhkar phir bolte hain। ham bhaaiyon ko sunaate hain, aise samajhne se taakat rahegi। yeh bahut oonchi manzil hai na। paan ka beeda uthaana maasi ka ghar nahin hai। jitna tum roostam banenge, utna maaya ka vaar hoga। angad va mahaaveer bhi roostam tha, tab kaha raavan bhi hamko hilaakar dikhaaye। yeh sthool baaten nahin। shaastron mein yeh danta kathaayen hain। yeh kaan jo paramatma baap ka sunahri gyaan sunne vaale the woh danta kathaayen sun-sunkar ekdam patthar ban gaye hain। bhakti maarga mein maatha bhi ghisaaya to paisa bhi ganvaaya। seedhi neeche hi utarte aaye। 84 janmon ki bhi kahaani hai na। jo bhi bhakti ki hai, neeche hi utre hain। ab baap oopar chadhna sikhlaate hain। ab tumhaari chadhti kala hai। agar buddhiyog baap ke saath nahin lagaayenge to zaroor neeche hi girenge। baap ko yaad karte ho to oopar chadhte ho। mehnat hai bahut, parantu bachche gaphlat karte hain। dhandhe mein baap ko aur knowledge ko bhool jaate hain। maaya toophaan mein laati hai - phalaana aisa hai, yeh karta hai, yeh braahmani aisi hai, ismen yeh avgun hai। are, ismen tumhaara kya jaata hai! sarvagun sampanna to koi bana nahin hai। koi ka avgun na dekh gun grahan karna hai। avgun dekho to munh mod lo। murli to milti hai woh sunte dhaaran karte raho। buddhi se samajhna hai yeh baba ki baat bilkul theek hai। jo baat theek na lage, chhod deni chaahiye। padhaai se kabhi roothna nahin chaahiye। braahmani se va padhaai se roothna goya baap se roothna। aise bahut bachche hain, jo phir centre par nahin aate hain। bhal koi kaisa bhi hai tumhaara kaam murli se hai, murli jo sunaaye unmein se achhi-achhi points dhaaran karni hai। kisi se baat karne mein maja nahin aata to shant karke murli sunkar chale jaana chaahiye। roothna nahin chaahiye ki ham yahaan nahin aayenge। nambarvaar to hain। yeh bhi achha hai jo subah ko tum yaad mein baithte ho। baba aakar search light dete hain। baba anubhav sunaate hain jab baithte hain to jo ananya hain woh bachche pahle yaad aate hain। bhal vilaayat mein hain, kalkatte mein hain, to pahle ananya ko yaad kar searchlight dete hain। bachche to bhal yahaan bhi baithe hain parantu baba yaad unko karte hain jo service karte hain। jaise achhe bachche shareer chhod jaate hain to unki aatma ko bhi yaad karte hain, bahut service karke gaye hain। to zaroor yahaan hi nazdeek koi ghar mein honge। to unko bhi baba yaad kar searchlight dete hain। hain to sab baba ke bachche। parantu kaun-kaun achhi service karte hain, yeh to sab jaante hain। baba ne kaha - yahaan searchlight do, to dete hain। do engine hain na। yeh bhi itna oonch pad paate hain to zaroor taakat hogi। bhal baba kehte hain hamesha yahi samjho ki shivbaaba padhaate hain to unki yaad rahni chaahiye। baaki yeh to samajhte ho yahaan do batti hain। aur to koi mein do batti nahin hain isliye yahaan do battiyon ke sammukh aate hain to achhi tarah se refresh hote hain। time bhi savere ka achha hai। snaan kar chhat par ekaanta mein chale jaana chaahiye। baba ne isliye badi-badi chhaten banaai hain। paadri log bhi ekdam silence mein jaate hain, zaroor Christ ko yaad karte honge। god ko jaante nahin। agar god ko yaad karte honge to shivling hi buddhi mein aata hoga। apni masti mein jaate hain, to unse gun uthaana hai। dataatrey ke liye bhi kehte hain woh sabse gun uthaate the। tum bachche bhi nambarvaar dattaatrey ho। yahaan ekaanta bahut achha hai। jitni chaaho kamaai kar sakte ho। baahar to gorakhdhandha yaad padega। 4 baje ka time bhi bahut achha hai। baahar kahaan jaane ki jaroorat nahin hai। ghar mein baithe ho, pahra bhi hai। yagya mein pahra bhi rakhna padta hai। yagya ke har vastu ki sambhaal rakhni padti hai kyonki yagya ki ek-ek cheez bahut-bahut valuable hai, isliye safety first। yahaan koi aayenge nahin। samajhte hain yahaan jevar aadi to kuchh hain nahin। yeh mandir bhi nahin hai। aajkal chori sab jagah hoti hain। vilaayat mein bhi puraani cheejen chori karke le jaate hain। jamaana bahut dirty hai, kaam mahaashatru hai। woh sab kuchh bhula deta hai।

to tumhaara savere ek class hota hai ever healthy banne ka aur phir yeh hai ever wealthy banne ka। baap ko yaad bhi karna hai to vichaar saagar manthan bhi karna hai। baap ko yaad karenge to varsa bhi yaad aayega। yeh yukti bahut sahaj hai। jaise baap beejroop hai। jhaad ke aadi-madhya-ant ko jaante hain। tumhaara bhi dhandha yeh hai। beej ko yaad karne se pavitra banenge। chakra ko yaad karenge to chakravarti raaja banenge arthaat dhan milega। raaja vikram aur raaja vikarmaajeet do sanvat mix kar diye hain। raavan aaya to vikram sanvat shuru hua, date badal gai। woh chalta hai ek se 2500 varsha, phir chalta hai 2500 se 5000 varsha tak। hinduon ko to apne dharma ka pata nahin। yeh ek hi dharma hai jo asli apne dharma ko bhool adharmi bane hain। dharma sthaapak ko bhi bhoole hain। tum samjha sakte ho aarya samaaj kab shuru hua। aarya (sudhre hue) satayug mein the। an aarya abhi hain। ab baap aakar tumko sudhaarte hain। tumhaari buddhi mein saara chakra hai। jo achhe purooshaarthi hain woh khud bhi jaante hain, auron ko bhi purooshaartha karaate hain। baap hai gareeb nivaaj। gaanv vaalon ko sandesh dena hai। 6 chitra kaaphi hain। 84 ke chakra ka chitra bahut achha hai। us par achhi tarah samjhaao। parantu maaya itni prabal hai jo sab-kuchh bhula deti hai। yahaan to donon light ikatthi hain। ek baap ki, ek inki - donon jabardasta hain, parantu yeh kehte hain tum ek hi jabardasta light ko pakdo। sab bachche yahaan bhaagte hain। samajhte hain double light hai। baap sammukh sunaate hain। gaayan hai tumheen se sunoon, tumhi se boloon... parantu aise nahin, yahaan baith jaana hai। 8 roz kaaphi hain। agar bitha den to dher ho jaayen।

drama anusaar sab kuchh chalta rehta hai, parantu tumko aantarik khushi bahut honi chaahiye। woh khushi unhein hoti, jo aapasmaan banaate hain। praja banaaven tab raaja banen। passport bhi chaahiye। baba se koi poochhe to baba phat se kehte hain apne ko dekho - mere mein kya avgun hain? stuti-ninda sab sahan karna padta hai। jo yagya se mile, usmein khush rehna hai। yagya ke bhojan se to bahut love chaahiye। sannyaasi thaali dhokar peete hain kyonki unko bhojan ka mahatva hai। samay aisa aana hai jo anaaj bhi na mile। to sab kuchh sahan karna padta hai, tab paas ho sakenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi mein bhi koi avgun dikhaai de to apna munh mod lena hai। padhaai se kabhi roothna nahin hai। dattaatrey misal sabse gun uthaane hain।

2) baahar se buddhi nikaal antarmukhi rahne ka abhyaas karna hain। dhandhedhori mein rehte dehi-abhimaani rehna hai। bahut baatcheet mein nahin aana hai।

vardaan:- eeshvareey seva ke bandhan dvaara sameep sambandh mein aane vaale royal family ke adhikaari bhav

eeshvareey seva ka bandhan najdeek sambandh mein laane vaala hai। jitni jo seva karta hai utna seva ka phal sameep sambandh mein aata hai। yahaan ke sevaadhaari vahaan ki royal family ke adhikaari banenge। jitni yahaan hard seva karte utna vahaan aaraam se sinhaasan par baithenge aur yahaan jo aaraam karte hain woh vahaan kaam karenge। ek-ek second ka, ek ek kaam ka hisaab-kitaab baap ke paas hai।

slogan:- sva parivartan dvaara vishwa parivartan ka vibration teevragti se phailaao।