Murli du jour du vendredi 19 avril 2024

19-04-2024 praatahmurli om shanti "baapdaada"' madhuban

“meethe bachche - baap aaye hain saari duniya ka haahaakaar mitaakar, jayjaykaar karne - puraani duniya mein hai haahaakaar, nai duniya mein hai jayjaykaar''

prashn:- kaun-sa eeshvareey niyam hai jo gareeb hi baap ka poora varsa lete, saahookaar nahin le paate?

uttar:- eeshvareey niyam hai - poora beggar bano, jo kuchh bhi hai use bhool jaao। to gareeb bachche sahaj hi bhool jaate hain parantu saahookaar jo apne ko svarga mein samajhte hain unki buddhi mein kuchh bhoolta nahin isliye jinko dhan, daulat, mitra, sambandhi yaad rehte woh sachche yogi ban hi nahin sakte hain। unhein svarga mein oonch pad nahin mil sakta।

om shanti। meethe-meethe nishchaybuddhi bachche to achhi reeti jaante hain, unhon ko pakka nishchay hai ki baap aaya hai saari duniya ka jhagda mitaane। jo sayaane samajhdaar bachche hain, woh jaante hain is tan mein baap aaye hue hain, jiska naam bhi hai shivbaaba। kyon aaye hain? haahaakaar ko mitaakar jayjaykaar karaane। mrityulok mein kitne jhagde aadi hain। sabko hisaab-kitaab chuktu kar jaana hai। amarlok mein jhagde ki baat nahin। yahaan kitna hangaama (haahaakaar) laga hua hai। kitni court, judge aadi hain। maaraamaari lagi hui hai। vilaayat aadi mein bhi dekho haahaakaar hai। saari duniya mein khitpit bahut hai। isko kaha jaata hai puraani tamopradhaan duniya। kichda hi kichda hai। jangal hi jangal hai। behad ka baap yeh sab-kuchh mitaane ke liye aaye hain। abhi bachchon ko bahut sayaana samajhdaar banna hai। agar bachchon mein bhi ladaai-jhagda hota rahega to baap ke madadgaar kaise banenge। baba ko to bahut madadgaar bachche chaahiye - sayaane, samjhu, jinmen koi khit-khit na ho। yeh bhi bachche samajhte hain yeh puraani duniya hai। anek dharma hain। tamopradhaan vicious world hai। saari duniya patit hai। patit puraani duniya mein jhagde hi jhagde hain। in sabko mitaane, jayjaykaar karaane baap aate hain। har ek jaante hain is duniya mein kitna duhkh aur ashaanti hai, isliye chaahte hain vishwa mein shanti ho। ab saare vishwa mein shanti koi manushya kaise kar sakenge। behad ke baap ko thikkar-bhittar mein laga diya hai। yeh bhi khel hai। to baap bachchon ko samjhaate hain, ab khade ho jaao। baap ke madadgaar bano। baap se apna raajya-bhaagya lena hai। kam nahin, athaah sukh hai। baap kehte hain - meethe bachche, drama anusaar tumko behad ka baap padmaapadma bhaagyashaali banaane aaya hai। bhaarat mein yeh lakshmi-naaraayan raajya karte the। bhaarat svarga tha। svarga ko hi kaha jaata hai wonder oph world। treta ko bhi nahin kahenge। aise svarga mein aane ka bachchon ko purooshaartha karna chaahiye। pahle-pahle aana hai। bachche chaahte bhi hain ham svarga mein aayen, lakshmi va naaraayan banen। abhi is puraani duniya mein bahut haahaakaar honi hai। rakta ki nadiyaan bahni hain, rakta ki nadiyon ke baad hoti hain ghi ki nadiyaan। unko kehte hain ksheersaagar। yahaan bhi bade talaav banaate hain, phir koi din mukrar hota hai jo aakar usmein doodh daalte hain। usmein phir snaan karte hain। shivling par bhi doodh chadhaate hain। satayug ki bhi ek mahima hai ki vahaan ghi, doodh ki nadiyaan hain। aisi koi baat nahin hai। har 5 hazaar varsha ke baad tum vishwa ke maalik bante ho। is samay tum gulaam ho, phir tum baadshaah bante ho। saari prakriti tumhaari gulaam ban jaati hai। vahaan kabhi bekaayde barsaat nahin padti, nadiyaan uchhal nahin khaati। koi upadrav nahin hota। yahaan dekho kitne upadrav hain। vahaan pakke vaishnav rehte hain। vikaari vaishnav nahin। yahaan koi vegetarian bana to unko vaishnav kehte hain। parantu nahin, vikaar se ek-do ko bahut duhkh dete hain। baap kitna achhi reeti samjhaate hain। yeh bhi gaayan hai gaanvade ka chhora… shreekrishna to gaanvade ka ho nahin sakta hai। woh to baikuntha ka maalik hai। phir 84 janma lete hain।

yeh bhi tum abhi jaante ho ki hamne bhakti mein kitne dhakke khaaye, paise barbaad kiye। baba poochhte hain - tumko itne paise diye, raajya bhaagya diya, sab kahaan gaya? tumko vishwa ka maalik banaaya phir tumne kya kiya? baap to drama ko jaante hain। nai duniya so puraani duniya, puraani duniya so nai duniya banti hai। yeh chakra hai, jo kuchh past hua woh phir repeat hoga। baap kehte hain abhi thoda samay hai, purooshaartha kar bhavishya ke liye jama karo, puraani duniya ka sab-kuchh mitti mein mil jaana hai। saahookaar is gyaan ko lenge nahin। baap hai gareeb nivaaz। gareeb vahaan saahookaar bante hain। saahookaar vahaan gareeb bante hain। abhi to padmapti bahut hain। woh aayenge parantu gareeb banenge। woh apne ko svarga mein samajhte hain, woh buddhi se nikal nahin sakta। yahaan to baap kehte hain sab kuchh bhool jaao। khaali beggar ban jaao। aajkal to kilogram, kilometre aadi kya-kya nikaala hai। jo raaja gaddi par baithta hai woh apni bhaasha chalaate hain। vilaayat ki nakal karte hain। apna akla to hai nahin। tamopradhaan hain। America aadi mein vinaash ki saamagri mein dekho kitna dhan lagaate hain। aeroplane se bombs aadi giraate hain, aag lagni hai। bachche jaante hain, baap aate hi hain vinaash aur sthaapna karaane। tumhaare mein bhi samjhaane vaale sab nambarvaar hain। sab ek jaise nishchaybuddhi nahin hain। jaise baba ne kiya, baba ko follow karna chaahiye। puraani duniya mein yeh paai paise kya karenge। aajkal kaagaj ke note nikaale hain। vahaan to sikke (muhren) honge। sone ke mahal bante hain to sikkon ka vahaan kya moolya hai। jaise ki sab kuchh muphta mein hai, satopradhaan dharni hai na। abhi to puraani ho gai hai। woh hai satopradhaan nai duniya। bilkul nai jameen hai। tum sookshm vatan mein jaate ho to shoobeeras aadi peete ho। parantu vahaan jhaad aadi to hain nahin। na mool vatan mein hain। jab tum baikuntha mein jaate ho tab vahaan tumko sab kuchh milta hai। buddhi se kaam lo, sookshm vatan mein jhaad honge nahin। jhaad to dharni par hote hain, na ki aakaash mein। bhal naam hai brahm mahtatva parantu hai polaar। jaise yeh star thahre hue hain aakaash mein, vaise tum bahut chhoti-chhoti aatmaayen thahri hui ho। stars dekhne mein bade aate hain। aise nahin ki brahm tatva mein koi badi-badi aatmaayen hongi। yeh buddhi se kaam lena hai। vichaar saagar manthan karna hai। to aatmaayen bhi oopar mein thaharti hain। chhoti bindi hain। yeh sab baaten tumko dhaaran karni hai, tab kisko dhaaran kara sakenge। teacher zaroor khud jaante hain tab to auron ko padhaate hain। nahin to teacher hi kaahe ka। parantu yahaan teachers bhi nambarvaar hain। tum bachche baikuntha ko bhi samajh sakte ho। aise nahin ki tumne baikuntha nahin dekha hai। bahut bachchon ne saakshaatkaar kiya hai। vahaan svayanvar kaise hota hai, kya bhaasha hai, sab kuchh dekha hai। pichhaadi mein bhi tum saakshaatkaar karenge parantu karenge vahi jo yogayukta honge। baaki jinko apne mitra-sambandhi, dhan-daulat yaad aate rahenge woh kya dekhenge। sachche yogi hi ant tak rahenge, jinhon ko baap dekh khush honge। phoolon ka hi bageecha banta hai। bahut to 10-15 varsha rahkar bhi chale jaate hain। unko kahenge ak ke phool। badi achhi-achhi bachchiyaan jo mama-baba ke liye bhi direction le aati thi, drill karaati thi, ve aaj hain nahin। yeh bachchiyaan bhi jaanti hain aur baapdaada bhi jaante hain ki maaya badi jabardasta hai। yeh hai maaya se gupta ladaai। gupta toophaan। baba kehte hain maaya tumko bahut hairaan karegi। yeh haar-jeet ka bana hua drama hai। tumhaari koi hathiyaaron se ladaai nahin hai। yeh to bhaarat ka praacheen yog naameegraami hai, jis yogbal se tum yeh bante ho। baahubal se koi vishwa ki baadshaahi le na sake। khel bhi wonderful hai। kahaani hai do bille lade makkhan… kaha bhi jaata hai second mein vishwa ki baadshaahi। bachchiyaan saakshaatkaar karti hain। kehti hain shreekrishna ke mukh mein maakhan hai। vaastav mein shreekrishna ke mukh mein nai duniya dekhte hain। yogbal se tum vishwa ki baadshaahi roopi maakhan lete ho। raajaai ke liye kitni ladaai hoti hai aur kitne ladaai se khatma hote hain। is puraani duniya ka hisaab-kitaab chuktu hona hai। is duniya ki koi bhi cheej rahni nahin hai। baap ki shreemat hai - bachche hear no evil, si no evil.... unhonne bandaron ka ek chitra banaaya hai। aajkal to manushyon ka bhi banaate hain। aage cheen ki taraph se haathi daant ki cheejen aati thi। choodiyaan bhi kaanch ki pahante the। yahaan to jevar aadi pahanne ke liye naak kaan aadi chhedte hain, satayug mein naak-kaan chhed karne ki jaroorat nahin। yahaan to maaya aisi hai jo sabke naak-kaan kaat leti hai। tum bachche ab svachchha bante ho। vahaan natural beauty rehti hai। koi cheez lagaane ki jaroorat nahin। yahaan to shareer hi tamopradhaan tatvon se bante hain, isliye beemaariyaan aadi hoti hain। vahaan yeh baaten hoti nahin। abhi tumhaari aatma ko bahut khushi hai ki hamko behad ka baap padhaakar nar se naaraayan athva amarpuri ka maalik banaate hain isliye gaayan hai ateendriy sukh poochhna ho to gop-gopiyon se poochho। bhakta log in baaton ko nahin jaante hain। tumhaare mein bhi khush rahe aur in baaton ka simran karte rahen - aise bachche bahut thode hain। ablaaon par kitne atyaachaar hote hain। jo gaayan hai dropdi ka, woh sab practical mein ho raha hai। dropdi ne kyon pukaara? yeh manushya nahin jaante। baap ne samjhaaya hai - tum sab dropdiyaan ho। aise nahin, female sadaiv female hi banti hai। do baari female ban sakti hai, jaasti nahin। maataayen pukaarti hain - baba raksha karo, hamko dushaasan vikaar ke liye hairaan karte hain, isko kaha jaata hai veshyaalay। svarga ko kaha jaata hai shivaalay। veshyaalay hai raavan ki sthaapna, shivaalay hai shivbaaba ki sthaapna। aur tumko knowledge bhi dete hain। baap ko knowledgeful bhi kaha jaata hai। aise nahin knowledgeful maana sabke dilon ko jaanne vaala। inse phaayda kya! baap kehte hain yeh srishti ke aadi-madhya-ant ki knowledge mere bigar koi de na sake। main hi tumko baith padhaata hoon। gyaan saagar ek hi baap hai। vahaan hai bhakti ki praalabdha। satayug-treta mein bhakti hoti nahin। padhaai se hi raajdhaani sthaapan ho rahi hai। president aadi ke dekho kitne vajeer hain। advice dene ke liye vajeer rakhte hain। satayug mein vajeer rakhne ki jaroorat nahin। ab baap tumko aklamand banaate hain। yeh lakshmi-naaraayan dekho kitne aklamand the। behad ki baadshaahi baap se milti hai। shiv-jayanti baap ki manaate hain। zaroor shivbaaba bhaarat mein aakar vishwa ka maalik banaakar gaye hain। laakhon varsha ki baat nahin hai। kal ki to baat hai। achha, jyaada kya samjhaaoon। baap kehte hain manmanaabhav। vaastav mein yeh padhaai ishaare ki hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ka poora madadgaar banne ke liye sayaana, samajhdaar banna hai। andar koi khitpit na ho।

2) sthaapna aur vinaash ke kartavya ko dekhte hue poora nishchaybuddhi ban baap ko follow karna hai। puraani duniya ke paai-paise se, buddhi nikaal poora beggar banna hai। mitra-sambandhi, dhan-daulat aadi sab kuchh bhool jaana hai।

vardaan:- sangathan mein rehte, sabke snehi bante buddhi ka sahaara ek baap ko banaane vaale karmayogi bhav

koi koi bachche sangathan mein snehi banne ke bajaae nyaare ban jaate hain। darte hain ki kahin phans na jaaen, isse to door rehna theek hai। lekin nahin, 21 janma parivaar mein rehna hai, agar darkar kinaara karenge to yeh bhi karma-sannyaasi ke sanskaar hue। karmayogi banna hai, karma sannyaasi nahin। sangathan mein raho, sabke snehi bano lekin buddhi ka sahaara ek baap ho, doosra na koi। buddhi ko koi aatma ka saath, gun va koi visheshta aakarshit na kare tab kahenge karmayogi pavitra atma।

slogan:- baapdaada ke right hand bano, left hand nahin।