Murli du jour du mardi 28 mai 2024

28-05-2024 praatahmurli om shanti "baapdaada"' madhuban

“meethe bachche - baap hai sarva sambandhon ke pyaar ki saccharin, ek meethe maashuk ko yaad karo to buddhi sab taraph se hat jaayegi''

prashn:- karmaateet banne ka sahaj purooshaartha va yukti kaun-si hai?

uttar:- bhaai-bhaai ki drishti ko pakka karne ka purushaartha karo। buddhi se ek baap ke sivaae aur sab kuchh bhool jaaye। koi bhi dehdhaari sambandh yaad na aaye tab karmaateet banenge। apne ko aatma bhaai-bhaai samajhna - yahi purushaartha ki manzil hai। bhaai-bhaai samajhne se deh ki drishti, vikaari khyaalaat khatma ho jaayenge।

om shanti। double om shanti। double kaise hai, yeh to tum bachchon ki hi buddhi mein hai। baap bhi bachchon ko hi baith samjhaate hain। pahle to baap ka nishchay hona chaahiye kyonki yeh baap bhi hai, teacher bhi hai, guru bhi hai। yoon to laukik reeti se alag-alag hote hain। teacher javaani mein kiya jaata hai। guru 60 varsha ki aayu ke baad karte hain। yeh to jab aate hain, teenon hi ikatthi service karte hain। kehte hain chhote-bade sab padh sakte hain। bachchon ki brain achhi fresh hoti hai। yeh to bachche samajh gaye, chhote-bade sab jeev ki aatma zaroor hain। aatma jeev mein pravesh karti hai। aatma aur jeev mein farka to hai na। yahaan tum bachchon ko aatma aur paramatma ka gyaan diya jaata hai। aatma to avinaashi hai, baaki shareer yahaan bhrashtaachaar se paida hota hai। vahaan to bhrashtaachaar ka naam hi nahin hota। gaaya jaata hai sampoorn nirvikaari duniya। shreshthaachaari aur bhrashtaachaari akshar hai na। yeh sab baaten baap hi samjhaate hain। bachchon ko sirf yeh pakka nishchay ho jaae ki ham aatmaon ka baap hamko padhaate hain। baap aate hi hain purushottam sangamayug par। to isse siddha hota hai kanishta se purushottam banaate hain। yeh duniya hi kanishta tamopradhaan hai, isko raurav narka kaha jaata hai। ab hamko vaapis jaana hai, isliye apne ko aatma samjho। baap aaye hain lene liye। ham bhaai-bhaai hain - yeh pakka nishchay kar lo। yeh deh to rahegi nahin। phir vikaar ki drishti khalaas ho jaayegi। yeh hai badi manzil। is manzil par bahut thode pahunch sakte hain, mehnat hai। pichhaadi mein koi bhi cheez yaad na aaye, isko kaha jaata hai karmaateet avastha। yeh deh bhi vinaashi hai, isse bhi mamatva nikal jaae। puraane sambandh mein mamatva nahin rakhna hai। ab to naye sambandh mein jaana hai। puraana aasuri sambandh stri-purush ka kitna chhi-chhi hai। baap kehte hain apne ko aatma samjho। ab vaapis jaana hai। aatma-aatma samajhte rahenge to phir shareer ka bhaan nahin rahega। stri-purush ki kashish nikal jaayegi। likha hua bhi hai antakaal jo stri simre, aise chintan mein jo mare… isliye kehte hain antakaal ganga jal mukh mein ho, shreekrishna ki yaad ho। bhakti maarga mein to shreekrishna ki yaad rehti hai। shreekrishna bhagvaanuvaach kah dete hain। yahaan to baap kehte hain deh ko bhi yaad nahin karna hai। apne ko aatma samjho aur sab taraph se dil hataate jaao। sabhi sambandhon ka pyaar ek mein jaise saccharin ho jaata hai। sabka meetha aur phir sabka maashuk bhi hai। maashuk ek hi hai। parantu bhakti maarga mein naam kitne rakh diye hain। bhakti ka vistaar bahut hai। yagya, tap, daan, teertha, vrat karna, shaastra padhna yeh sab bhakti ki saamagri hai। gyaan ki saamagri to kuchh bhi hai nahin। yeh bhi tum note karte ho samjhaane ke liye। baaki tumhaare kaagaz aadi kuchh bhi rahenge nahin। baap samjhaate hain - bachche, tum shantidham se aaye the, shant hi the। shanti ke saagar se tum shanti ka, pavitrata ka varsa lete ho। abhi tum varsa le rahe ho na। gyaan bhi le rahe ho। status saamne khada hai। yeh gyaan sivaae baap ke aur koi de na sake। yeh hai roohaani gyaan। roohaani baap ek hi baar aate hain, roohaani gyaan dene liye। unko kehte bhi hain patit-paavan।

subah ko bachchon ko baith drill karaate hain। vaastav mein isko drill bhi nahin kaha jaae। baap sirf kehte hain - bachche, apne ko aatma samajh mujhe yaad karo। kitna sahaj hai। tum aatma ho na। kahaan se aaye ho? paramdham se। aise aur koi bhi poochhenge nahin। paarlaukik baap hi bachchon se poochhte hain - bachchon, paramdham se aaye ho na, is shareer mein part bajaane। part bajaate-bajaate ab naatak poora hua। aatma patit bani to shareer bhi patit bana hai। sone mein hi alloy padti hai phir unko galaaya jaata hai। woh sannyaasi log aise arth kabhi nahin samjhaayenge। vo to eeshvar ko jaante hi nahin। baap se yog rakho, yeh maante hi nahin। baap jo sikhlaate hain woh aur koi sikhla na sake। ismen to practical mein mehnat karni hoti hai। baap to kitna sahaj karke samjhaate hain। gaate bhi hain patit-paavan hai, sarvashaktimaan hai, use hi shri-shri kaha jaata hai। aur shri kaha jaata hai devtaaon ko। unko shobhta hai। unhon ki aatma aur shareer donon pavitra hain। aatma ko to koi nirlep kah na sake। aatma hi 84 janma leti hai। parantu manushya na jaanne ke kaaran unrighteous ban pade hain। ek baap hi aakar righteous banaate hain। raavan unrighteous banaate hain। chitra to tumhaare paas hain। baaki aisa 10 sheesh vaala raavan koi hota nahin। satayug mein to raavan hai nahin, yeh to clear hai। parantu jo sunne vaale honge woh kahenge yahaan ka sapling hai। koi thoda sunenge, koi bahut bhi sunenge। bhakti maarga ka dekho vistaar kitna hai। anek prakaar ke bhakta hain। aur phir pahle se hi suna hai - bhagaate the। shreekrishna ke liye bhi kehte hain na - bhagaaya। phir aise shreekrishna ko pyaar kyon karte hain? poojte kyon hain? to baap baith samjhaate hain, shreekrishna to first prince hai। woh to kitna buddhivaan hoga। saare vishwa ka maalik kya kam buddhivaan hoga! vahaan unhon ko vajeer aadi hote nahin। raay lene ki darkaar nahin। raay lekar to sampoorn bana hai, phir raay kya lenge! tumko aadhaakalpa koi ki raay nahin leni hoti hai। svarga aur narka ka naam bhi suna hai। yeh to svarga ho na sake। pattharbuddhi hain jo samajhte hain yahaan hamko dhan hai, mahal aadi sab hain, yahi svarga hai। parantu tum jaante ho svarga to hai nai duniya। svarga mein to sab sadgati mein hote hain। svarga-narka ikattha thode hi hoga। svarga kisko kaha jaata hai, uski aayu kitni hai - yeh sab baap ne tumhein samjhaaya hai। duniya to ek hi hai। nai ko satayug, puraani ko kaliyug kaha jaata hai। ab bhakti maarga khalaas hona hai। bhakti ke baad chaahiye gyaan। sabhi jeev aatmaayen part bajaate-bajaate patit bani hain। yeh bhi baap ne samjhaaya hai। tum sukh jaasti paate ho। 3/4 hai sukh, baaki 1/4 hai duhkh। ismen bhi jab tamopradhaan ho jaate hain tab duhkh jaasti hota hai। aadha-aadha ho to maja hi kaise ho। maja tab hai jabki svarga mein duhkh ka naam-nishaan nahin rehta, tab to svarga ko sab yaad karte hain। nai duniya aur puraani duniya ka yeh behad ka khel hai, jisko koi jaan nahin sakta। baap bhaaratvaasiyon ko hi samjhaate hain, baaki jo sab hain, woh aadhaakalpa mein hi aate hain। aadhaakalpa mein ho sirf tum sooryavanshi, chandravanshi। tum pavitra rehte ho isliye tumhaari aayu badi rehti hai aur duniya bhi nai hai। vahaan everything new hai, anaaj, paani, dharni aadi sab naya। aage chalkar tum bachchon ko sab saakshaatkaar karaate rahenge ki aise-aise hoga। shuru mein bhi hue, phir pichhaadi mein bhi hone chaahiye। nazdeek aayenge to khushi hoti rahegi। manushya baahar desh se apne desh mein aate hain to khushi hoti hai na। koi baahar mein kahaan marte hain to unko aeroplane se bhi apne desh mein le aate hain। sabse first class pavitra te pavitra dharni bhaarat hai। bhaarat ki mahima ko tum bachchon ke sivaae aur koi jaante hi nahin। wonder oph di world hai na - uska naam hai svarga। woh jo wonders dikhaate hain, woh hain sab narka ke। kahaan narka ke wonders, kahaan svarga ke - raat-din ka farka hai! narka ke wonders bhi bahut manushya dekhne jaate hain। kitne dher mandir hain। vahaan to mandir hote nahin। natural beauty rehti hai। manushya bahut thode hote hain। sugandha aadi ki bhi darkaar nahin rehti hai। har ek ko apna-apna first class bageecha rehta hai, first class phool hote hain। vahaan ki to hava bhi first class hogi। garmi aadi kabhi tang nahin karegi। sadaiv bahaari mausam rahega। agarbatti ki bhi darkaar nahin। svarga ka to naam sunte hi mukh paani hota hai। tum kahenge aise svarga mein to jhat pahunchen, kyonki tum svarga ko jaante ho parantu phir dil kehti hai - abhi to ham behad ke baap ke saath hain, baap padhaate hain, aisa chance phir thode hi milega। yahaan manushya, manushya ko padhaate, vahaan devtaayen, devtaaon ko padhaayenge। yahaan to baap padhaate hain। raat-din ka farka hai! kitni khushi honi chaahiye।

84 janma bhi tumne liye hain। tum hi world ki history-geography ko jaante ho ki hamne to anek baar yeh raajya liya phir raavan raajya mein aaye। ab baap kehte hain, tum ek janma pavitra bano to 21 janma tum paavan ban jaayenge। kyon nahin banenge! parantu maaya aisi hai, bhaai-behen ki bhi daal nahin galti, kachche rah jaate hain। daal gale tab, jab apne ko aatma samajh bhaai-bhaai samjho। deh ka bhaan nikal jaae। yeh hai mehnat। sahaj bhi bahut hai। koi ko kahenge bahut difficult hai to unki dil hat jaayegi isliye iska naam hi hai sahaj yaad। gyaan bhi sahaj hai। 84 ke chakra ko jaanna hai, pahle-pahle baap ka parichay dena hai। baap ki yaad se hi aatma ki junk ud jaayegi aur pavitra duniya ka varsa paayenge। pahle baap ko yaad karo। bhaarat ka praacheen yog hi kehte hain, jisse bhaarat ko vishwa ki baadshaahi milti hai। praacheen kitne varsha hue? to laakhon varsha kehte। tum jaante ho 5 hazaar varsha ki baat hai, vahi raajayog phir se baap sikhla rahe hain, ismen moonjhane ki darkaar hi nahin। poochha jaata hai tum aatmaon ka nivaas sthaan kahaan hai? to kahenge hamaara nivaas sthaan bhrakuti hai। to aatma ko hi dekhna pade। yeh gyaan tumko abhi milta hai phir vahaan gyaan ki darkaar hi nahin rahegi। mukti-jeevanmukti ko pa liya, khalaas। mukti vaale bhi apne samay par jeevanmukti mein aakar sukh paayenge। sab jeevanmukti mein aate hain via mukti। yahaan se jaayenge shantidham aur koi duniya hai nahin। drama anusaar sabko vaapis jaana hi hai। vinaash ki taiyaariyaan ho rahi hain। itna kharcha kar bombs banaate hain so rakhne ke liye thode hi banaate hain। baarood hai hi vinaash ke liye। satayug-treta mein yeh cheejen hoti nahin। ab 84 janma poore hue, ham yeh shareer chhod ghar jaayenge। deepmaala par sab naye-naye achhe-achhe kapde pahante hain na। tum aatma bhi nai banti ho। yeh hai behad ki baat। aatma pavitra banne se shareer bhi first class milta hai। is samay artificial fashion karte hain, powder aadi lagaakar khoobsoorat ban jaate hain। vahaan to natural beauty hoti hai। aatma ever beautiful ban jaati hai। yeh to tum samajhte ho। school mein sab ek jaise nahin hote। tum bhi purushaartha karte ho - ham aisa lakshmi-naaraayan banen।

yeh hai tumhaara eeshvareey kul। phir hota hai sooryavanshi-chandravanshi gharaana। tum braahmanon mein raajaai nahin hai। tum abhi sangam par ho। kaliyug mein ab raajaai hai nahin। bhal koi raajaai rah bhi jaati, nil to kabhi hoti nahin। ab tum yeh banne liye purushaartha kar rahe ho। dekhenge ham aatmaayen bhaai-bhaai hain aur woh hai baap। baap kehte hain ek do ko bhaai-bhaai dekho। teesra netra gyaan ka to mila hai। tum aatma kahaan nivaas karti ho? aatma bhaai poochhta hai, aatma kahaan rehti hai? to kehte hain - yahaan, bhrakuti mein। yeh to common baat hai। ek baap ke sivaae kuchh bhi yaad na aaye। pichhaadi mein to shareer bhi aise baap ki yaad mein chhoote - yeh practice pakki karni hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) satayug mein first class sundar shareer praapta karne ke liye abhi aatma ko paavan banaana hai, kat utaar deni hai। artificial fashion nahin karna hai।

2) ever pavitra banne ke liye practice karni hai ki ek baap ke sivaae kuchh bhi yaad na aaye। yeh deh bhi bhooli hui ho। bhaai-bhaai ki drishti natural pakki ho।

vardaan:- shubh bhaavna, shubh kaamna ke sahayog se aatmaon ko parivartan karne vaale saphalta sampanna bhav

jab kisi bhi kaarya mein sarva brahman bachche sangathit roop mein apne man ki shubh bhaavnaaon aur shubh kaamnaaon ka sahayog dete hain - to is sahayog se vaayumandal ka kila ban jaata hai jo aatmaon ko parivartan kar leta hai। jaise paanch anguliyon ke sahayog se kitna bhi bada kaarya sahaj ho jaata hai, aise har ek brahman bachche ka sahayog sevaaon mein saphalta sampanna bana deta hai। sahayog ki result saphalta hai।

slogan:- kadam-kadam mein padmon ki kamaai jama karne vaala hi sabse bada dhanvaan hai।