Murli du jour du mercredi 29 mai 2024

29-05-2024 praatahmurli om shanti "baapdaada"' madhuban

“meethe bachche - yaad se yaad milti hai, jo bachche pyaar se baap ko yaad karte hain unki kashish baap ko bhi hoti hai''

prashn:- tumhaare paripakva avastha ki nishaani kya hai? us avastha ko paane ka purooshaartha sunaao?

uttar:- jab tum bachchon ki paripakva avastha hogi to sab karmendriyaan sheetal ho jaayegi। karmendriyon se koi ulta karma nahin hoga। avastha achal-adol ban jaayegi। is samay ki adol avastha se 21 janma ke liye karmendriyaan vash ho jaayengi। is avastha ko paane ke liye apni jaanch rakho, note karne se saavdhaan rahenge। yogbal se hi karmendriyon ko vash karna hai। yog hi tumhaari avastha ko paripakva banaayega।

om shanti। yeh hai yaad ki yaatra। sabhi bachche is yaatra par rehte hain, sirf tum yahaan nazdeek mein ho। jo jo jahaan bhi hain baap ko yaad karte hain, to woh automatically nazdeek aa jaate hain। jaise chandrama ke aage koi sitaare bahut nazdeek hote hain, koi bahut chamakte hain। koi nazdeek, koi door bhi hote hain। dekhne mein aata hai yeh star bahut chamakta hai। yeh bahut nazdeek hai, yeh to chamakta hi nahin hai। tumhaara bhi gaayan hai। tum ho gyaan aur yog ke sitaare। gyaan soorya mila hai bachchon ko। baap bachchon ko hi yaad karte hain। jo serviceable bachche hain। baap hai sarvashaktimaan। us baap ko hi yaad karte hain, to yaad se yaad milti hai। jahaan-jahaan aise-aise serviceable bachche hain to gyaan soorya baap bhi unhon ko yaad karte hain। bachche bhi yaad karte hain। jo bachche yaad nahin karte unko baap bhi yaad nahin karte। unko baap ki yaad bhi nahin pahunchti hai। yaad se yaad zaroor milti hai। bachchon ko bhi yaad karna hai। bachche poochhte hain - baba, aap hamko yaad karte hain? baap kehte hain kyon nahin। is reeti baap kyon nahin yaad karte। jo jaasti pavitra hain aur baap se bahut pyaar hai to kashish bhi aise karte hain। harek apne se poochhe ki ham kahaan tak baba ko yaad karte hain? ek ki yaad mein rahne se phir yeh puraani duniya bhool jaati hai। baap ko hi yaad karte-karte jaakar milte hain। ab milne ka samay aaya hua hai। drama ka raaz bhi baap ne samjhaaya hai। baap aate hain aakar bachchon ko apna roohaani bachcha banaate hain। patit se paavan kaise bano - so sikhaate hain। baap to ek hi hai unko hi sab yaad karte hain। parantu yaad sabko nambarvaar apne-apne purooshaartha anusaar milti hai। jitna bahut yaad karenge woh jaise ki saamne khade hain। karmaateet avastha bhi aise honi hai। jitna yaad karenge karmendriyaan chanchal nahin hogi। karmendriyaan chanchal bahut hoti hain na, isko hi maaya kaha jaata hai। karmendriyon se kuchh bhi kharaab karma na ho। yahaan yogbal se karmendriyon ko vash karna hai। vo log to davaaiyon se vash karte hain। bachche kehte hain - baba, yeh kyon nahin vash hoti hain? baap kehte hain tum jitna yaad karenge utna karmendriyaan vash ho jaayengi। isko kaha jaata hai karmaateet avastha। yeh sirf yaad ki yaatra se hi hota hai isliye bhaarat ka praacheen raajayog gaaya hua hai। so to bhagwan hi sikhlaayenge। bhagwan sikhlaate hain apne bachchon ko। tumhein in vikaari karmendriyon par yogbal se jeet paane ka purooshaartha karna hai। sampoorn pichhaadi mein honge। jab paripakva avastha hogi phir koi bhi karmendriyaan chanchalta nahin karengi। abhi chanchalta banda hone se phir 21 janma ke liye koi bhi karmendriy dhokha nahin degi। 21 janma ke liye karmendriyaan vash ho jaati hain। sabse mukhya hai kaam। yaad karte-karte karmendriyaan vash hoti jaayengi। abhi karmendriyon ko vash karne se aadhaakalpa ke liye inaam milta hai। vash nahin kar sakte hain to phir paap rah jaate hain। tumhaare paap yogbal se katte jaayenge। tum pavitra hote jaate ho। yeh hai number one subject। bulaate bhi hain patit se paavan hone liye। to baap hi aakar paavan banaate hain।

baap hi knowledgeful hai। baap kehte hain apne ko aatma samjho, baap ko yaad karo। yeh bhi knowledge hai। ek hai yog ki knowledge, doosra hai 84 janma ke chakra ki knowledge। do knowledge hain। phir usmein daiveegun automatically merge hain। bachche jaante hain ham manushya se devta bante hain to daiveegun bhi zaroor dhaaran karne hain। apni jaanch karni hai। note karne se apne oopar saavdhaan rahenge। apni jaanch rakhenge to koi bhool nahin hogi। baap khud kehte hain - maamekam yaad karo। tumne hi mujhe bulaaya hai kyonki tum jaante ho baba patit-paavan hai, woh jab aate hain tab hi yeh direction dete hain। ab is direction par amal karna hai aatmaon ko। tum part bajaate ho is shareer dvaara। to baap ko bhi zaroor is shareer mein aana pade। yeh bahut wonderful baaten hain। trimoorti ka chitra kitna clear hai। brahma tapasya kar yeh bante hain। phir 84 janmon ke baad yeh bante hain। yeh bhi buddhi mein yaad rahe ki ham brahman so devta the phir 84 ka chakra lagaaya। ab phir devta banne ke liye aaye hain। jab devtaaon ki dynasty poori ho jaati hai to bhakti maarga mein bhi bahut prem se unko yaad karte hain। ab woh baap tumko yeh pad paane liye yukti bataate hain। yaad bhi bahut sahaj hai, sirf sone ka bartan chaahiye। jitna purooshaartha karenge utni points emerge hongi। gyaan bhi achha sunaate rahenge। samjhenge jaise ki baba hamaare mein pravesh kar murli chala rahe hain। baba bhi bahut madad karte hain। auron ka bhi kalyaan karna hai। woh bhi drama mein noondh hai। ek second na mile doosre se। time paas hota jaata hai। itne varsha, itne maas kaise paas hote hain। shuru se lekar time paas hota aaya hai। yeh second phir 5 hazaar varsha baad repeat karenge। yeh bhi achhi reeti samajhna hai aur baap ko yaad karna hai jisse vikarma vinaash hon। aur koi upaay nahin। itna samay jo kuchh karte aaye ho woh sab thi bhakti। kehte bhi hain bhakti ka phal bhagwan denge। kya phal denge? kab aur kaise dete hain? yeh kuchh bhi pata nahin hai। baap jab phal dene ke liye aave tab lene vaale aur dene vaale ikatthe hon। drama ka part aage chalta jaata hai। saare drama mein abhi yeh hai antim life। ho sakta hai koi shareer bhi chhod de। aur koi part bajaana hai to janma bhi le sakte hain। kiska bahut hisaab-kitaab hoga to janma bhi le sakte hain। kiske bahut paap honge to ghadi-ghadi ek janma le phir doosra, teesra janma lete chhodte rahenge। garbha mein gaya, duhkh bhoga, phir shareer chhod doosra liya। kaashi kalvat mein bhi yeh haalat hoti hai। paap sir par bahut hain। yogbal to hai nahin। kaashi kalvat khaana - yeh hai apne shareer ka ghaat karna। aatma bhi samajhti hai yeh ghaat karte hain। kehte bhi hain - baba, aap aayenge to ham aap par balihaar jaayenge। baaki bhakti maarga mein bali chadhte hain। woh bhakti ho jaati hai। daan-punya, teertha aadi jo kuchh bhi karte hain woh kisse len-den hoti hai? paap aatmaon se। raavan raajya hai na। baap kehte hain khabardaari se len-den karna। kahaan koi kharaab kaam mein lagaaya to sir par bojha chadh jaayega। daan-punya bhi bada khabardaari se karna hota hai। gareebon ko to anna aur kapde ka daan kiya jaata hai va aajkal dharmashaalaayen aadi banaakar dete hain। saahookaaron ke liye to bade-bade mahal hain। gareebon ke liye hain jhopdiyaan। woh to gande naale ke aage rahe hue hain। us kichde ki khaad banti hai jo bikti hai, jis par phir kheti aadi hoti hai। satayug mein to aise kichde aadi par kheti nahin hoti hai। vahaan to nai mitti hoti hai। uska naam hi hai paradise। naam bhi gaaya hua hai pukhraaj pari, sabja pari। ratna hain na। koi kitni service karte hain, koi kitni karte hain। koi kehte ham service nahin kar sakte hain। baba ke ratna to sabhi hain parantu unmein bhi nambarvaar purooshaartha anusaar hain jo phir pooje jaate hain। pooja hoti hai devtaaon ki। bhakti maarga mein anek poojaayen hoti hain। woh sab drama mein noondh hai, jisko dekhkar maja aata hai। ham actors hain। is samay tumko knowledge milti hai। tum bahut khush hote ho। jaante ho bhakti ka bhi part hai। bhakti mein bhi bade khush hote hain। guru ne kaha maala phero। bas, us khushi mein pherte hi rehte hain। samajh kuchh bhi nahin।

shiv niraakaar hai, unko bhala doodh paani aadi kyon chadhaate hain? moortiyon ko bhog lagaate hain, woh koi khaati thode hi hain। bhakti ka peshgeer (vistaar) kitna bada hai। bhakti hai jhaad, gyaan hai beej। rachta aur rachna ko sivaae tum bachchon ke aur koi nahin jaante। koi-koi bachche to apni haddiyaan bhi is service mein svaaha karne vaale hain। tumko koi kehte hain yeh tumhaari kalpana hai। are, yeh to world ki history-geography repeat hoti hai। kalpana repeat thode hi hoti hai। yeh to knowledge hai। yeh hain nai baaten, nai duniya ke liye। bhagvaanuvaach। bhagwan bhi naya, unke mahaavaakya bhi naye। woh kehte hain krishna bhagvaanuvaach। tum kehte ho shiv bhagvaanuvaach। harek ki apni-apni baaten hain, ek na mile doosre se। yeh hai padhaai। school mein padhte ho। kalpana ki to baat hi nahin। baap hai gyaan ka saagar, knowledgeful। jabki rishi-muni bhi kehte hain ham rachta rachna ko nahin jaante hain। unhon ko yeh knowledge kahaan se mile jabki aadi sanaatan devi-devta hi nahin jaante! jinhon ne jaana, unhonne pad paaya। phir jab sangamayug aaye tab baap aakar samjhaaye। naye-naye in baaton mein moonjhate hain। kehte hain - bas, tum itne thode hi right ho, baaki sab jhoothe hain। tum samjhaate ho geeta jo maai baap hai use hi khandan kar diya hai। baaki sab to rachna hain। unse varsa mil na sake। vedon-shaastron mein rachta aur rachna ki knowledge ho na sake। pahle to bataao vedon se kaun-sa dharma sthaapan hua? dharma to hain hi 4, harek dharma ka dharmashaastra ek hi hota hai। baap brahman kul sthaapan karte hain। brahman hi phir sooryavanshi-chandravanshi kul mein apna pad paate hain। baap aakar tumko sammukh samjhaate hain - is rath dvaara। rath to zaroor chaahiye। aatma to hai niraakaar। unko saakaar shareer milta hai। aatma kya cheez hai, unko hi nahin jaante to baap ko phir kaise jaanenge। right to baap hi sunaate hain। baaki sab hain unrighteous, jisse phaayda kuchh bhi nahin। maala kiski simarte hain? kuchh pata nahin। baap ko hi nahin jaante। baap khud aakar apna parichay dete hain। gyaan se sadgati hoti hai। aadhaakalpa hai gyaan, aadhaakalpa hai bhakti। bhakti shuru hoti hai raavan raajya se। bhakti se seedhi utarte-utarte tamopradhaan ban pade hain। kiske bhi occupation ko nahin jaante hain। bhagwan ki kitni pooja karte hain, jaante kuchh bhi nahin। to baap samjhaate hain itna oonch pad paane ke liye apne ko aatma samajhna hai aur baap ko yaad karna hai। ismen hai mehnat। agar kiski buddhi moti hai to moti buddhi se yaad karen। parantu yaad ek ko hi karen। gaate bhi hain baba aap aayenge to aap se hi buddhiyog jodenge। ab baap bhi aaye hain। tum sab kisse milne aaye ho? jo praan daan dete hain। aatma ko amarlok mein le jaate hain। baap ne samjhaaya hai kaal par jeet pahnaata hoon, tumko amarlok mein le jaata hoon। dikhaate hain na amar-katha paarvati ko sunaai। ab amarnaath to ek hi hai। himaalay pahaad par baith thode hi katha sunaayenge। bhakti maarga ki har baat mein wonder lagta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yogbal se karmendriy jeet ban sampoorn pavitra banna hai। is avastha ko paane ke liye apni jaanch karte rehna hai।

2) sada buddhi mein yaad rakhna hai ki ham hi brahman so devta the, ab phir devta banne ke liye aaye hain isliye bahut khabardaari se paap aur punya ko samajhkar len-den karni hai।

vardaan:- sarva sattaaon ko sahayogi banaae pratyakshata ka parda kholne vaale sachche sevaadhaari bhav

pratyakshata ka parda tab khulega jab sab satta vaale milkar kahenge ki shreshtha satta, eeshvareey satta, aadhyaatmik satta hai to yahi ek parmaatma satta hai। sabhi ek stage par iktthe ho aisa sneh milan karen। iske liye sabko sneh ke sootra mein baandh sameep laao, sahayogi banaao। yeh sneh hi chumbak banega jo sab ek saath sangathan roop mein baap ki stage par pahunchenge। to ab antim pratyakshata ke hero part mein nimitta banne ki seva karo tab kahenge sachche sevaadhaari।

slogan:- seva dvaara sarva ki duaayen praapta karna - yeh aage badhne ki lift hai।