Murli du jour du vendredi 31 mai 2024

31-05-2024 praatahmurli om shanti "baapdaada"' madhuban

“meethe bachche - baap aaye hain kaanton ko phool banaane, sabse bada kaanta hai deh-abhimaan, isse hi sab vikaar aate hain, isliye dehi-abhimaani bano''

prashn:- bhakton ne baap ke kis karttavya ko na samajhne ke kaaran sarvavyaapi kah diya hai?

uttar:- baap bahuroopi hai, jahaan aavashyakta hoti second mein kisi bhi bachche mein pravesh kar saamne vaali aatma ka kalyaan kar dete hain। bhakton ko saakshaatkaar kara dete hain। woh sarvavyaapi nahin lekin bahut teekha rocket hai। baap ko aane-jaane mein deri nahin lagti। is baat ko na samajhne ke kaaran bhakta log sarvavyaapi kah dete hain।

om shanti। yeh hai chhota-sa gulshan। human gulshan। bageeche mein tum jaao to usmein puraane jhaad bhi hote hain kisma-kisma ke। kahaan mukhdiyaan bhi hoti hain, kahaan aadhi khili hui mukhdiyaan hoti hain। yeh bhi bageecha hai na। ab yeh to bachche jaante hain yahaan aate hain kaanton se phool banne। shreemat se ham kaante se phool ban rahe hain। kaante jangal ke hain, phool bageeche mein hote hain। bageecha hai svarga, jangal hai narka। baap bhi samjhaate hain yeh hai patit kaanton ka jangal, woh hai phoolon ka bageecha। phoolon ka bageecha tha, woh abhi phir kaanton ka jangal bana hai। deh-abhimaan hai sabse bada kaanta। uske baad phir sab vikaar aate hain। vahaan to tum dehi-abhimaani rehte ho। aatma mein gyaan rehta hai - abhi hamaari aayu poori hoti hai। ab ham yeh puraana shareer chhod doosra jaakar lenge। saakshaatkaar hota hai, ham garbha mahal mein jaakar viraajmaan honge। phir mukhdi bankar, mukhdi se phool banenge, yeh aatma ko gyaan hai। srishti chakra kaise phirta hai, yeh gyaan nahin hai। sirf yeh gyaan rehta hai ki yeh shareer puraana hai, isko ab badalna hai। andar mein khushi rehti hai। kaliyugi duniya ki koi bhi rasma aadi vahaan hoti nahin। yahaan hoti hai lok laaj kul ki maryaada, farka hai na। vahaan ki maryaada ko satya maryaada kaha jaata hai। yahaan to hai asatya maryaada। srishti to hai na। baap aate hi hain jabki aasuri sampradaay hai। usmein hi daivi sampradaay ki jab sthaapna ho jaati hai tab vinaash hota hai। to zaroor aasuri sampradaay hai, usmein hi daiveegun vaali sampradaay sthaapan ho rahi hai।

yeh bhi samjhaaya hai yogbal se tumhaare janma-janmaantar ke paap nashta hote hain। is janma mein bhi jo paap kiye hain, woh bhi bataane pade। usmein bhi khaas hai vikaar ki baat। yaad mein hai bal। baap hai sarvashaktimaan, tum jaante ho jo sarva ka baap hai unke saath yog lagaane se paap bhasma hote hain। yeh lakshmi-naaraayan sarva shaktimaan hain na। saari srishti par inka raajya hai। woh hai hi nai duniya। har cheez nai। ab to jameen hi kalraathi ho gai hai। abhi tum bachche nai duniya ke maalik bante ho। to itni khushi rahni chaahiye। jaise student vaisi khushi bhi jaasti hogi। tumhaari yeh hai oonch te oonch university। oonch te oonch padhaane vaala hai। bachche padhte bhi hain oonch te oonch banne ke liye। tum kitna neech the। ekdam neech se phir oonch bante ho। baap khud hi kehte hain tum svarga ke laayak thode hi ho। apvitra vahaan ja na saken। neeche hain tab to oonch devtaaon ke aage unhon ki mahima gaate hain। mandiron mein jaakar unhon ki oonchaai aur apni neechta ka varnan karte hain। phir kehte hain raham karo to ham bhi aise oonch banen। unhon ke aage maatha tekte hain। hain to woh bhi manushya parantu unmein daivi gun hain, mandiron mein jaate hain, unhon ki pooja karte hain ki ham bhi unhon jaise banen। yeh koi ko pata nahin hai ki unhon ko aisa kisne banaaya? tum bachchon ki buddhi mein saara drama baitha hua hai - kaise is daivi jhaad ka sapling lagta hai। baap aate bhi hain sangamayug par। yeh patit duniya hai isliye baap ko bulaate hain, hamko aakar patit se paavan banaao। abhi tum paavan hone ke liye purooshaartha karte ho। baaki sab hisaab-kitaab chuktu kar chale jaayenge shantidham। manamnaabhav ka mantra hai mukhya, jo tumko baap dete hain। guru log to dher ke dher hain, kitne mantra dete hain। baap ka hai hi ek mantra। baap ne bhaarat mein aakar mantra diya tha jisse tum devi-devta bane the। bhagvaanuvaach hai na। vo log bhal shlok aadi kehte hain parantu arth kuchh bhi nahin samajhte। tum arth samjha sakte ho। kumbha ke mele mein jaate hain, vahaan bhi tum sabko samjha sakte ho। yeh hai patit duniya narka। satayug paavan duniya thi jisko hi svarga kaha jaata hai। patit duniya mein koi paavan ho na sake। manushya ganga snaan kar paavan hone ke liye jaate hain kyonki samajhte hain shareer ko hi paavan banaana hai। aatma to sadaiv paavan hai hi। aatma so paramatma kah dete hain। tum likh bhi sakte ho, aatma pavitra hogi gyaan snaan se, na ki paani ke snaan se। paani ka snaan to roz karte rehte hain। jo bhi nadiyaan hain unmein roz snaan karte rehte hain। paani bhi vahi peete hain। ab paani se hi sab kuchh kiya jaata hai। baaten kitni sahaj hain parantu kiski bhi buddhi mein aati nahin hain।

gyaan se hi sadgati hoti hai second mein। phir kehte hain gyaan itna athaah hai, jo saara samudra syaahi banaao, jangal ko kalam banaao, dharti ko kaagaz banaao… to bhi ant nahin ho sakta। baap bhinna-bhinna points to roz samjhaate rehte hain। baap kehte hain aaj tumko bahut guhya baaten sunaata hoon। bachche kehte hain pahle kyon nahin sunaaya! are, pahle kaise sunaayenge। kahaani shuru se lekar nambarvaar sunaayenge na। pichhaadi ka part pahle kaise suna sakenge। yeh bhi baap sunaate rehte hain। yeh srishti chakra ke aadi-madhya-ant ka raaz tum jaante ho। tumse koi bhi poochhe to tum jhat response kar sakte ho। tumhaare mein bhi nambarvaar hain, jinki buddhi mein baitha hua hai। tumhaare paas aate hain, poora response nahin milta hai to baahar jaakar kehte hain yahaan to poori samjhaani nahin milti hai, phaaltu chitra rakhe hain isliye unhein samjhaane vaale bade achhe chaahiye। nahin to woh bhi poora samajhte nahin hain। samjhaane vaale bhi poora nahin to jaise ko taisa mila। baap kehte hain kahaan-kahaan ham dekhte hain, aadmi bada samajhdaar hai, bachche itne shrewd (hoshiyaar) nahin hain to phir ham hi unmein pravesh kar madad kar lete hain kyonki baap to hai bahut chhota rocket। aane-jaane mein deri nahin lagti hai। unhonne phir bahuroopi va sarvavyaapi ki baat utha li hai। yeh to baap tum bachchon ko baith samjhaate hain। koi-koi aadmi achhe hote hain to unhon ko samjhaane vaale bhi aise chaahiye। aajkal to koi chhotepan se bhi shaastra kantha kar lete hain kyonki aatma sanskaar le aati hai। kahaan bhi janma le phir vahaan ved shaastra aadi padhne lag padenge। ant mati so gati hoti hai na। aatma sanskaar le jaati hai na। abhi tum bachche samajhte ho aakhir woh din aaya aaj.... jo svarga ke dvaar sach-sach khulte hain। nai duniya ki sthaapna, puraani duniya ka vinaash hona hai। manushyon ko to yeh bhi pata nahin ki svarga nai duniya mein hota hai। tum bachche hi jaante ho ham sachchi-sachchi satya naaraayan ki katha va amarnaath ki katha sun rahe hain। hai ek hi katha, sunaai bhi ek ne hai। phir uske shaastra banaaye hain। drishtaanta sab tumhaare hain, jo phir bhakti maarga mein utha liye hain। to sangam par baap hi aakar sab baaten samjhaate hain। yeh bada bhaari behad ka khel hai, ismen pahle hai satayug-treta raam raajya, phir hota hai raavan raajya। yeh drama bana hua hai, inko anaadi avinaashi kaha jaata hai। ham sab aatmaayen hain, yeh gyaan koi ko hai nahin jo tumko baap ne gyaan diya hai। jo bhi aatmaayen hain unhon ka part drama mein noondha hua hai। jis samay jiska jo part hoga usi samay aayenge, vriddhi ko paate rahenge।

bachchon ke liye mukhya baat hai patit se paavan banna। bulaate bhi hain he patit-paavan aao। bachche hi bulaate hain। baap bhi kehte hain hamaare bachche kaam chita par baith bhasma ho gaye hain, yeh hain yathaartha baaten। aatma jo akaal hai, unka yeh takhta hai। loan liya hua hai। brahma ke liye bhi tumse poochhte hain yeh kaun hai? bolo, dekho likha hua hai bhagvaanuvaach, main saadhaaran tan mein aata hoon। woh saja hua shreekrishna hi 84 janma le saadhaaran banta hai, saadhaaran hi phir woh krishna banta hai। neeche tapasya kar rahe hain। jaante hain ham yeh banne vaale hain। trimoorti to bahuton ne dekha hai। parantu unka arth bhi chaahiye na। sthaapna jo karte hain phir paalna bhi vahi karenge। sthaapna ke samay ka naam, roop, desh, kaal alag, paalna ka naam roop, desh, kaal alag hai। yeh baaten samjhaane mein to badi sahaj hain। yeh neeche tapasya kar rahe hain phir yeh banne vaale hain। yahi 84 janma le yeh bante hain, kitna sahaj gyaan hai second ka। buddhi mein yeh gyaan hai ham yeh devta bante hain। 84 janma bhi in devtaaon ko hi lene hain aur koi lete hain kya? nahin। 84 ka raaz bhi bachchon ko samjha diya hai। devtaayen hi hain jo pahle-pahle aate hain। khilauna hota hai na machhliyon ka। machhli aise neeche aati hai, phir oopar chadhti hai। woh bhi jaise seedhi hai। bhramri, kachhue aadi ke bhi jo misaal diye jaate hain woh sab is samay ke hain। bhramri mein bhi dekho kitna akla hai! manushya apne ko bahut aklamand samajhte hain parantu baap kehte hain bhramri jitna bhi akla nahin hai। sarpa puraani khaal chhodkar nai le lete hain। bachchon ko kitna samajhdaar banaaya jaata hai, samajhdaar aur laayak। aatma apvitra hone ke kaaran laayak nahin hai। to unko pavitra banaae laayak banaaya jaata hai। woh hai hi laayak duniya। yeh to ek baap ka hi kaam hai jo is saari srishti ko hell se heaven banaate hain। heaven kya hota hai, yeh manushyon ko pata nahin hai। heaven kaha jaata hai devi-devtaaon ki raajdhaani ko। satayug mein hai devi-devtaaon ka raajya। tum samajhte ho satayug nai duniya mein ham hi raajya bhaagya karte the। 84 janma bhi hamne hi liya hoga। kitna baar raajya liya hai aur phir gavaanya hai, yeh bhi tum jaante ho। raam mat se tumne raajya liya hai, raavan mat se raajya gavaanya hai। abhi phir oopar chadhne liye tumko raam mat milti hai, girne liye nahin milti hai। samjhaate to bahut achhi tarah se hain parantu bhakti maarga ki buddhi badi mushkil change hoti hai। bhakti maarga ka show bahut hai। woh hai duban (daldal), ekdam gale tak usmein doob padte hain। jab sabhi ka ant hota hai tab main aata hoon, sabhi ko gyaan se paar le jaata hoon। main aakar in bachchon dvaara kaarya karaata hoon। baba ke saath service karne vaale tum brahman hi ho, jinko khudaai khidmatgaar kaha jaata hai। yeh sabse achhe te achhi khidmat hai। bachchon ko shreemat milti hai - aise-aise karo। phir unse chhaant kar niklenge। yeh bhi nai baat nahin hai। kalpa pahle bhi jitne devi-devta nikle the vahi niklenge। drama mein noondh hai। tumko sirf paigaam pahunchaana hai। hai bahut sahaj। tum jaante ho bhagwan aate hi hain kalpa ke sangam par jabki bhakti full force mein hai। baap aakar sabko le jaate hain। tum par abhi brihaspati ki dasha hai। sab svarga mein jaate hain phir padhaai mein nambarvaar hote hain। koi par mangal ki dasha, koi par raahu ki dasha baithti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) laayak aur samajhdaar banne ke liye pavitra banna hai। saari duniya ko hell se heaven banaane ke liye baap ke saath service karni hai। khudaai khidmatgaar banna hai।

2) kaliyugi duniya ki rasma-rivaaj, lok-laaj, kul ki maryaada chhod satya maryaadaaon ka paalan karna hai। daivi-gun sampanna ban daivi sampradaay ki sthaapna karni hai।

vardaan:- apvitrata ka ansh - aalasya aur albelepan ka tyaag karne vaale sampoorn nirvikaari bhav

dincharya ke koi bhi karma mein neeche oopar hona, aalasya mein aana ya albela hona - yeh vikaar ka ansh hai, jiska prabhaav poojyaneey banne par padta hai। yadi aap amritvele svayan ko jaagrit sthiti mein anubhav nahin karte, majboori se va susti se baithte ho to pujaari bhi majboori va susti se pooja karenge। to aalasya va albelepan ka bhi tyaag kar do tab sampoorn nirvikaari ban sakenge।

slogan:- seva bhale karo lekin vyartha kharcha nahin karo।