Murli du jour du dimanche 2 juin 2024

02-06-24 praatahmurli om shanti ''avyakt-baapdaada'' revise 18-01-2000 madhuban

brahma baap samaan tyaag, tapasya aur seva ka vibration vishwa mein phailaao

aaj samartha baapdaada apne samartha bachchon ko dekh rahe hain। aaj ka din smriti divas so samartha divas hai। aaj ka din bachchon ko sarva shaktiyaan will mein dene ka divas hai। duniya mein anek prakaar ki will hoti hai lekin brahma baap ne baap se praapta hui sarva shaktiyon ki will bachchon ko ki। aisi alaukik will aur koi bhi kar nahin sakte hain। baap ne brahma baap ko saakaar mein nimitta banaaya aur brahma baap ne bachchon ko nimitta bhav ka vardaan de will kiya। yeh will bachchon mein sahaj powers ki (shaktiyon ki) anubhooti karaati rehti hai। ek hai apne purushaartha ki powers aur yeh hai parmaatma will dvaara powers ki praapti। yeh prabhu den hai, prabhu vardaan hai। yeh prabhu vardaan chala raha hai। vardaan mein purushaartha ki mehnat nahin lekin sahaj aur svatah nimitta banaakar chalaate rehte hain। saamne thode se rahe lekin baapdaada dvaara, vishesh brahma baap dvaara vishesh bachchon ko yeh will praapta hui hai aur baapdaada ne bhi dekha ki jin bachchon ko baap ne will ki un sabhi bachchon ne (aadi ratnon ne aur seva ke nimitta bachchon ne) us praapta will ko achhi tarah se kaarya mein lagaaya। aur us will ke kaaran aaj yeh brahman parivaar din pratidin badhta hi jaata hai। bachchon ki visheshta ke kaaran yeh vriddhi honi thi aur ho rahi hai।

baapdaada ne dekha ki nimitta bane hue aur saath dene vaale donon prakaar ke bachchon ki do visheshtaayen bahut achhi rahi। pahli visheshta - chaahe sthaapna ke aadi ratna, chaahe seva ke ratna donon mein sangathan ki unity bahut-bahut achhi rahi। kisi mein bhi kyon, kya, kaise… yeh sankalp maatra bhi nahin raha। doosri visheshta - ek ne kaha doosre ne maana। yeh extra powers ke will ke vaayumandal mein visheshta rahi isliye sarva nimitta bani hui aatmaon ko baba-baba hi dikhaai deta raha।

baapdaada aise samay par nimitta bane hue bachchon ko dil se pyaar de rahe hain। baap ki kamaal to hai hi lekin bachchon ki kamaal bhi kam nahin hai। aur us samay ka sangathan, unity - ham sab ek hain, vahi aaj bhi seva ko badha rahi hai। kyon? nimitta bani hui aatmaon ka foundation pakka raha। to baapdaada bhi aaj ke din bachchon ki kamaal ko ga rahe the। bachchon ne chaaron or se pyaar ki maalaayen pahnaai aur baap ne bachchon ki kamaal ke gungaan kiye। itna samay chalna hai, yeh socha tha? kitna samay ho gaya? sabhi ke mukh se, dil se yahi nikalta, ab chalna hai, ab chalna hai.... lekin baapdaada jaante the ki abhi avyakt roop ki seva honi hai। saakaar mein itna bada hall banaaya tha? baba ke ati laadle double videshi aaye the? to vishesh double videshiyon ka avyakt paalna dvaara alaukik janma hona hi tha, itne sab bachchon ko aana hi tha। isliye brahma baap ko apna saakaar shareer bhi chhodna pada। double videshiyon ko nasha hai ki ham avyakt paalna ke paatra hain?

brahma baap ka tyaag drama mein vishesh noondha hua hai। aadi se brahma baap ka tyaag aur aap bachchon ka bhaagya noondha hua hai। sabse number one tyaag ka example brahma baap bana। tyaag usko kaha jaata hai - jo sab kuchh praapta hote hue tyaag kare। samay anusaar, samasyaaon ke anusaar tyaag shreshtha tyaag nahin hai। shuru se hi dekho tan, man, dhan, sambandh, sarva praapti hote hue tyaag kiya। shareer ka bhi tyaag kiya, sab saadhan hote hue svayan puraane mein hi rahe। saadhnon ka aarambha ho gaya tha। hote hue bhi saadhna mein atal rahe। yeh brahma ki tapasya aap sab bachchon ka bhaagya banaakar gai। draamaanusaar aise tyaag ka example roop mein brahma hi bana aur isi tyaag ne sankalp shakti ki seva ka vishesh part banaaya। jo naye-naye bachche sankalp shakti se fast vriddhi ko praapta kar rahe hain। to suna brahma ke tyaag ki kahaani।

brahma ki tapasya ka phal aap bachchon ko mil raha hai। tapasya ka prabhaav is madhuban bhoomi mein samaaya hua hai। saath mein bachche bhi hain, bachchon ki bhi tapasya hai lekin nimitta to brahma baap kahenge। jo bhi madhuban tapasvi bhoomi mein aate hain to brahman bachche bhi anubhav karte hain ki yahaan ka vaayumandal, yahaan ke vibration sahajyogi bana dete hain। yog lagaane ki mehnat nahin, sahaj lag jaata hai aur kaisi bhi aatmaayen aati hain, woh kuchh na kuchh anubhav karke hi jaati hain। gyaan ko nahin bhi samajhte lekin alaukik pyaar aur shanti ka anubhav karke hi jaate hain। kuchh na kuchh parivartan karne ka sankalp karke hi jaate hain। yeh hai brahma aur brahman bachchon ki tapasya ka prabhaav। saath mein seva ki vidhi - bhinna-bhinna prakaar ki seva bachchon se practical mein karaake dikhaai। usi vidhiyon ko abhi vistaar mein la rahe ho। to jaise brahma baap ke tyaag, tapasya, seva ka phal aap sab bachchon ko mil raha hai। aise har ek bachcha apne tyaag, tapasya aur seva ka vibration vishwa mein phailaaye। jaise science ka bal apna prabhaav pratyaksha roop mein dikha raha hai aise science ki bhi rachta silence bal hai। silence bal ko abhi pratyaksha dikhaane ka samay hai। silence bal ka vibration teevragti se phailaane ka saadhan hai - man-buddhi ki ekaagrata। yeh ekaagrata ka abhyaas badhna chaahiye। ekaagrata ki shaktiyon dvaara hi vaayumandal bana sakte ho। halchal ke kaaran powerful vibration ban nahin paata।

baapdaada aaj dekh rahe the ki ekaagrata ki shakti abhi jyaada chaahiye। sabhi bachchon ka ek hi dridh sankalp ho ki abhi apne bhaai-bahinon ke duhkh ki ghatnaayen parivartan ho jaaen। dil se raham emerge ho। kya jab science ki shakti halchal macha sakti hai to itne sabhi braahmanon ke silence ki shakti, merciful bhaavna dvaara va sankalp dvaara halchal ko parivartan nahin kar sakti! jab karna hi hai, hona hi hai to is baat par vishesh attention do। jab aap great-great grand father ke bachche hain, aapke hi sabhi biraadri hain, shaakhaayen hain, parivaar hai, aap hi bhakton ke ishta dev ho। yeh nasha hai ki ham hi ishta dev hain? to bhakta chilla rahe hain, aap sun rahe ho! woh pukaar rahe hain - he ishta dev, aap sirf sun rahe ho, unhon ko respond nahin karte ho? to baapdaada kehte hain he bhakton ke ishta dev abhi pukaar suno, respond do, sirf suno nahin। kya respond denge? parivartan ka vaayumandal banaao। aapka respond unhon ko nahin milta to woh bhi albele ho jaate hain। chillaate hain phir chup ho jaate hain।

brahma baap ke har kaarya ke utsaah ko to dekha hi hai। jaise shuru mein umang tha, chaabi chaahiye। abhi bhi brahma baap yahi shiv baap se kehte - abhi ghar ke darvaaje ki chaabi do। lekin saath jaane vaale bhi to taiyaar hon। akela kya karega! to abhi saath jaana hai na ya peechhe-peechhe jaana hai? saath jaana hai na? to brahma baap kehte hain ki bachchon se poochho agar baap chaabi de de to aap ever ready ho? ever ready ho ya ready ho? ready nahin, ever ready। tyaag, tapasya, seva teenon hi paper taiyaar ho gaye hain? brahma baap muskaraate hain ki pyaar ke aansu bahut bahaate hain aur brahma baap woh aansu moti samaan dil mein samaate bhi hain lekin ek sankalp zaroor chalta ki sab ever ready kab banenge! date de deven। aap kahenge ki ham to ever ready hain, lekin aapke jo saathi hain unhein bhi to banaao ya unko chhodkar chal padenge? aap kahenge brahma baap bhi to chala gaya na! lekin unko to yeh rachna rachni thi। fast vriddhi ki jimmevaari thi। to sabhi ever ready hain, ek nahin? sabhi ko saath le jaana hai na ya akele-akele jaayenge? to sabhi ever ready hain ya ho jaayenge? bolo। kam se kam 9 laakh to saath jaayen। nahin to raajya kis par karenge? apne oopar raajya karenge? to brahma baap ki yahi sabhi bachchon ke prati shubh kaamna hai ki ever ready bano aur ever ready banaao।

aaj vatan mein bhi sabhi vishesh aadi ratna aur seva ke aadi ratna emerge hue। advance party kehti hai ham to taiyaar hain। kis baat ke liye taiyaar hain? woh kehte hain yeh pratyakshata ka nagaada bajaayen to ham sabhi pratyaksha hokar nai srishti ki rachna ke nimitta banenge। ham to aahvaan kar rahe hain ki nai srishti ki rachna karne vaale aaven। abhi kaam saara aapke oopar hai। nagaada bajaao। aa gaya, aa gaya... ka nagaada bajaao। nagaada bajaane aata hai? bajaana to hai na! abhi brahma baap kehte hain date le aao। aap log bhi kehte ho na ki date ke bina kaam nahin hota hai। to iski bhi date banaao। date bana sakte ho? baap to kehte hain aap banaao। baap kehte hain aaj hi banaao। conference ki date fix kiya hai aur yeh, iski bhi conference karo na! videshi kya samajhte hain, date fix ho sakti hai? date fix karenge? haan ya na! achha, daadi jaanki ke saath raay karke karna। achha।

desh videsh ke chaaron or ke, baapdaada ke ati sameep, ati pyaare aur nyaare, baapdaada dekh rahe hain ki sabhi bachche lagan mein magan ho lavleen swaroop mein baithe hue hain। sun rahe hain aur milan ke jhoole mein jhool rahe hain। door nahin hain lekin naynon ke saamne bhi nahin, samaaye hue hain। to aise sammukh milan manaane vaale aur avyakt roop mein lavleen bachche, sada baap samaan tyaag, tapasya aur seva ka saboot dikhaane vaale sapoot bachche, sada ekaagrata ki shakti dvaara vishwa ka parivartan karne vaale vishwa parivartak bachche, sada baap samaan teevra purushaartha dvaara udne vaale double light bachchon ko baapdaada ka bahut-bahut-bahut yaadapyaar aur namaste।

raajasthaan ke sevaadhaari:- bahut achha seva ka chance raajasthaan ko mila। raajasthaan ka jaise naam hai raajasthaan, to raajasthaan se raaje quality vaale nikaalo। praja nahin, raaj-gharaane ke raaje nikaalo। tab jaisa naam hai raajasthaan, vaise hi jaisa naam vaise seva ki quality niklegi। hain koi chhipe hue raaje log ya abhi baadlon mein hain? vaise jo businessman hain unhon ki seva par vishesh attention do। yeh minister aur potri to badalte hi rehte hain lekin businessman baap se bhi business karne mein aage badh sakte hain। aur businessman ki seva karne se unki parivaar ki maataayen bhi sahaj aa sakti hain। akeli maataayen nahin chal sakti hain lekin agar ghar ka stambha aa jaata hai to parivaar aapehi dheere-dheere badhta jaata hai isliye raajasthaan ko raaje quality nikaalni hai। aise koi nahin hain, aisa nahin kaho। thoda dhoondhana padega lekin hain। thoda sa unhon ke peechhe samay dena padta hai। busy rehte hain na! koi aisi vidhi banaani padti jo woh najdeek aaven। baaki achha hai, seva ka chance liya, har ek zone leta hai yeh bahut achha najdeek aane aur duaayen lene ka saadhan hai। chaahe aap logon ko sab dekhen ya nahin dekhen, jaanen ya nahin jaane, lekin jitni achhi seva hoti hai to duaayen svatah nikalti hain aur woh duaayen pahunchti bahut jaldi hain। dil ki duaayen hain na! to dil mein jaldi pahunchti hain। baapdaada to kehte hain sabse sahaj purushaartha hai duaayen do aur duaayen lo। duaaon se jab khaata bhar jaayega to bharpoor khaate mein maaya bhi disturb nahin karegi। jama ka bal milta hai। raaji raho aur sarva ko raaji karo। har ek ke svabhaav ka raaz jaankar raaji karo। aise nahin kaho yeh to hai hi naaraaz। aap svayan raaz ko jaan jaao, uski nabja ko jaan jaao phir dua ki dava do। to sahaj ho jaayega। theek hai na raajasthaan! raajasthaan ki teachers utho। seva ki mubaarak ho। to sahaj purushaartha karo, duaayen dete jaao। lene ka sankalp nahin karo, dete jaao to milta jaayega। dena hi lena hai। theek hai na! aisa hai na! daata ke bachche hain na! koi de to den। nahin, daata banke dete jaao to aapehi milega। achha।

jo is kalpa mein pahli baar aaye hain vo haath uthaao। aadhe pahle vaale aate hain, aadhe naye aate hain। achha - peechhe vaale, kinaare mein baithe hue sabhi sahajyogi ho? sahaj yogi ho to ek haath uthaao। achha।

vidaai ke samay:- (baapdaada ko rath yaatraaon ka samaachaar sunaaya) chaaron taraph ka yaatraaon ka samaachaar samay prati samay baapdaada ke paas aata rehta hai। achha sab umang-utsaah se seva ka part baja rahe hain। bhakton ko duaayen mil rahi hain aur jin bhakton ki bhakti poori hui, unhon ko baap ka parichay mil jaayega aur parichay vaalon se jo bachche banne honge woh bhi dikhaai dete rahenge। baaki seva achhi chal rahi hai aur jo bhi saadhan banaaya hai woh saadhan achha sabko aakarshit kar raha hai। abhi result mein kaun-kaun kis category mein nikalta hai woh maaloom pad jaayega lekin bhakton ko bhi aap sabki najar-drishti mili, parichay mila - yeh bhi achha saadhan hai। ab aage badhkar inhon ki seva kar aage badhaate rehna। jo bhi rath yaatra mein seva kar rahe hain, athak ban seva kar rahe hain, un sabhi ko yaadapyaar। baapdaada sabhi ko dekhte rehte hain aur saphalta to janma siddha adhikaar hai। achha।

Mauritius mein apne eeshvareey vishwa vidyaalay ko national unity award prime minister dvaara mila hai:- Mauritius mein vaise bhi vi.aai.pi. ka connection achha raha hai aur prabhaav bhi achha hai isliye gupta seva ka phal mila hai to sabhi ko khaas mubaarak। achha, om shanti।

vardaan:- shvaanson shvaans yaad aur seva ke balance dvaara blessing praapta karne vaale sada prasannachit bhav

jaise attention rakhte ho ki yaad ka link sada juta rahe vaise seva mein bhi sada link juta rahe। shvaanson shvaans yaad aur shvaanson shvaans seva ho - isko kehte hain balance, is balance se sada blessing ka anubhav karte rahenge aur yahi aavaaj dil se niklega ki aasheervaadon se pal rahe hain। mehnat se, yuddha se chhoot jaayenge। kya, kyon, kaise in prashnon se mukta ho sada prasannachit rahenge। phir saphalta janma siddha adhikaar ke roop mein anubhav hogi।

slogan:- baap se inaam lena hai to svayan se aur saathiyon se nirvighna rahne ka certificate saath ho।