Murli du jour du vendredi 14 juin 2024

14-06-2024 praatahmurli om shanti "baapdaada"' madhuban

“meethe bachche - nirantar yaad rahe ki hamaara baba, baap bhi hai, teacher bhi hai to satguru bhi hai, yeh yaad hi manamnaabhav hai''

prashn:- maaya ki dhool jab aankhon mein padti hai to sabse pahli gaphlat kaun-si hoti hai?

uttar:- maaya pahli gaphlat karaati jo padhaai ko hi chhod dete। bhagwan padhaate hain, yeh bhool jaata hai। baap ke bachche hi baap ki padhaai ko chhod dete hain, yeh bhi wonder hai। nahin to knowledge aisi hai jo andar hi andar khushi mein naachte rahen, parantu maaya ka prabhaav koi kam nahin hai। woh padhaai ko hi chhuda deti hai। padhaai chhodi maana absent hue।

om shanti। roohaani baap baith roohaani bachchon ko samjhaate hain। samjhaana unhon ko hota hai jisne kuchh kam samjha hai। koi bahut samajhdaar bante hain। bachche jaante hain yeh baba to bada wonderful hai। bhal tum yahaan baithe ho parantu andar mein samajhte ho, yeh hamaara behad ka baba bhi hai, behad ka teacher bhi hai। behad ki shiksha dete hain। srishti ke aadi-madhya-ant ka raaz samjhaate hain। student ki buddhi mein to yeh hona chaahiye na। phir saath mein zaroor le jaayenge। baap jaante hain, yeh puraani chhi-chhi duniya hai, inse bachchon ko le jaana hai। kahaan? ghar। jaise kanya ki shaadi hoti hai to sasurghar vaale aakar kanya ko apne ghar le jaate hain। abhi tum yahaan baithe ho। baba samjhaate hain bachchon ko andar mein zaroor aata hoga ki yeh hamaara behad ka baap bhi hai, behad ki shiksha bhi dete hain। jitna bada baba utni shiksha bhi badi behad ki dete hain। rachna ke aadi-madhya-ant ka raaz bhi bachchon ki buddhi mein hai। jaante hain baap is chhi-chhi duniya se hamko vaapas le jaayenge। yeh bhi andar mein yaad karne se manamnaabhav hi hain। chalte-phirte uthte-baithte buddhi mein yahi yaad rahe। wonderful cheez ko yaad karna hota hai na। tum jaante ho achhi reeti padhne se, yaad karne se ham vishwa ke maalik bante hain। yeh to zaroor buddhi mein chalna chaahiye। pahle baap ko yaad karna pade। teacher baad mein milta hai। bachche jaante hain hamaara behad ka roohaani baap hai। sahaj yaad dilaane ke liye baba yuktiyaan bataate hain - maamekam yaad karo। jis yaad se hi aadhaakalpa ke vikarma vinaash honge। paavan banne ke liye tumne janma-janmaantar bhakti, jap, tap aadi bahut kiye hain। mandiron mein jaate hain, bhakti karte hain, samajhte hain ham parampara se karte aaye hain। shaastra kab se sune hain? kahenge parampara se। manushyon ko kuchh bhi pata nahin hai। satayug mein to shaastra hote hi nahin। tum bachchon ko to wonder khaana chaahiye। baap bigar koi bhi yeh baaten samjha nahin sakte। yeh baap bhi hai, teacher bhi hai, satguru bhi hai। yeh to hamaara baba hai। inka koi maa-baap hai nahin। koi kah nahin sakte ki shivbaaba kisi ka bachcha hai। yeh baaten buddhi mein ghadi-ghadi yaad rahen - yahi manamnaabhav hai। teacher padhaate hain parantu khud kahaan se padha nahin hai। inko koi ne padhaaya nahin। woh knowledgeful hai, manushya srishti ka beejroop hai, gyaan ka saagar hai। chaitanya hone kaaran sab kuchh sunaate hain। kehte hain - bachchon, main jismen pravesh hua hoon in dvaara main tumko aadi se lekar is samay tak sab raaz samjhaata hoon। ant ke liye to phir peechhe kahenge। us samay tum bhi samajh jaayenge - abhi ant aata hai। karmaateet avastha ko bhi nambarvaar pahunch jaayenge। tum aasaar bhi dekhenge। puraani srishti ka vinaash to hona hi hai। yeh anek baar dekha hai aur dekhte rahenge। padhte aise hain jaise kalpa pahle padhe the। raajya liya phir ganvaaya phir ab le rahe hain। baap phir se padha rahe hain। kitna sahaj hai। tum bachche samajhte ho ham sach-sach vishwa ke maalik the। phir baba aakar hamko woh gyaan de rahe hain। baba raay dete hain aise-aise andar mein chalna chaahiye।

baba hamaara baba bhi hai, teacher bhi hai। teacher ko kab bhoolenge kya! teacher dvaara to padhaai padhte rehte hain। koi-koi bachchon se maaya bahut gaphlat karaati hai। ekdam jaise aankhon me dhool daal deti hai। padhaai hi chhod dete hain। bhagwan padhaate hain, aisi padhaai ko chhod dete hain! padhaai hi mukhya hai। so bhi kaun chhodte hain? baap ke bachche। to bachchon ko andar mein kitni khushi rahni chaahiye। baap knowledge bhi har baat ki dete hain। jo kalpa-kalpa dete hain। baap kehte hain kam se kam is reeti mujhe yaad karo। kalpa-kalpa tum hi samajhte ho aur dhaaran karte ho। inka baba to koi hai nahin, vahi behad ka baap hai। wonderful baap hua na। mera koi baba hai bataao? shivbaaba kiska bachcha hai? yeh padhaai bhi wonderful hai jo is samay ke sivaae kab padh nahin sakte aur sirf tum brahman hi padhte ho। tum yeh bhi jaante ho ki baap ko yaad karte-karte ham paavan ban jaayenge। nahin to phir sajaayen khaani padengi। garbha jel mein bahut sajaayen khaani padti hain। vahaan par phir tribunal baithti hai। sab saakshaatkaar hote hain। bigar saakshaatkaar kisko saja de nahin sakte। moonjh pade ki yeh saja hamko kyon milti hai! baap ko maaloom rehta hai ki isne yeh paap kiya hai, yeh bhool ki hai। sab saakshaatkaar karaate hain। us samay aisa feel hota hai jaise ki itne sab janmon ki saja mil rahi hai। yeh jaise sab janmon ki ijzat gai। to baap kehte hain meethe-meethe bachchon ko purooshaartha achhi reeti karna hai। 16 kala sampoorn banne ke liye yaad ki mehnat karni hai। dekhna hai ki ham kisko duhkh to nahin dete hain? sukhdaata baap ke ham bachche hain na? bahut gul-gul banna hai। yeh padhaai hi tumhaare saath chalni hai। padhaai se hi manushya barrister aadi bante hain। baap ki yeh knowledge nyaari aur satya hai। aur yeh hai paandav government, gupta। tumhaare sivaae doosra koi samajh nahin sakte। yeh padhaai wonderful hai। aatma hi sunti hai। baap baar-baar samjhaate hain - padhaai ko kabhi chhodna nahin hai। maaya chhuda deti hai। baap kehte hain aise mat karo, padhaai chhodo nahin। baba ke paas report to aati hai na। register se sab maaloom padta hai। yeh kitna din absent raha। padhaai chhod dete hain to baap ko bhi bhool jaate hain। vaastav mein yeh bhoolne ki cheez to hai nahin। yeh to wonderful baap hai। samjhaate bhi hain। jaise ek khel hai। khel ki baat kisko bhi sunaane se jhat yaad rah jaati hai na। woh kabhi bhoolti nahin hai। yeh apna anubhav bhi sunaate hain। chhotepan mein hi vairaagi khyaalaat rehte the। kehta tha duniya mein to bahut duhkh hai। ab hamaare paas sirf 10 hazaar ho jaayen to phir 50 roopaya byaaj milega, itna bas hai। svatantra rahenge। gharbaar sambhaalna to museebat hai। achha, phir ek bioscope dekha saubhaagya sundari ka… bas vairaagya ki sab baaten toot gai। khyaal kiya shaadi karenge, yeh karenge। ek hi thappad maara maaya ne, kala kaaya chat kar di। to ab baap kehte hain - bachche, yeh to duniya hi dozak hai aur usmein phir yeh jo naatak (cinema) hain, woh bhi dozak hain। yeh dekhne se hi sabki vrittiyaan kharaab ho jaati hain। akhbaaren padhte hain, usmein achhi-achhi maaiyon ke chitra dekhte hain to vritti us taraph chali jaati hai। yeh badi achhi khoobsoorat hai, buddhi mein aaya na। vaastav mein yeh khyaal bhi chalna nahin chaahiye। baba kehte hain - yeh to duniya hi khatma ho jaani hai isliye tum aur sab bhool maamekam yaad karo, aise-aise chitra aadi kyon dekhte ho? yeh sab baaten vritti ko neeche le aati hain। yeh jo kuchh dekhte ho yeh to kabradaakhil hone hain। jo kuchh in aakhon se dekhte ho unko yaad na karo, inse mamatva mita do। yeh sab shareer to puraane chhi-chhi hain। bhal aatma shuddh banti hai parantu shareer to chhi-chhi hai na। is taraph dhyaan kya dena hai। ek baap ko hi dekhna hai।

baap kehte hain meethe-meethe bachchon manzil bahut oonchi hai। vishwa ka maalik banne ke liye doosra koi to try bhi na kar sake। koi ki bhi buddhi mein na aa sake। maaya ka prabhaav koi kam nahin hai। science vaalon ki kitni buddhi chalti hai। tumhaari phir hai silence, sab chaahte bhi hain - ham mukti paaven। tumhaari phir em hai jeevanmukti ki। yeh bhi baap ne samjhaaya hai। guru aadi koi aisi knowledge de nahin sakte। tumhein grihastha mein rah pavitra banna hai, raajaai lena hai। bhakti mein bahut time vesta kiya hai। abhi samajhte ho hamne kitni bhoolen ki hai। bhool karte-karte besmajh, bilkul hi patthar buddhi ban pade hain। andar mein aata hai yeh to badi wonderful knowledge hai jisse ham kya se kya ban jaate hain, pattharbuddhi se paarasbuddhi। to khushi ka paara bhi chadhta hai ki hamaara baba behad ka baba hai। unko koi baap nahin। woh teacher hai, unka koi teacher nahin। kahenge kahaan se seekha! wonder khaayenge na। bahut log samajhte hain yeh to koi guru se seekha। to guru ke aur bhi shishya honge na। sirf ek shishya tha kya? gurooon ke shishya to dher hote hain। aagaakhaan ke dekho kitne shishya hain। gurooon ke liye kitna andar mein rehta hai, unko heeron mein vazan karte hain। tum aise satguru ko kismen vazan karaayenge। yeh to behad ka satguru hai। inka vazan kitna hai! ek heera bhi nahin daal sako।

aisi-aisi baaten tum bachchon ko vichaar karni hai। yeh to maheen baat hui। bhal yeh to sab kehte rehte hain he eeshvar। parantu yeh thode hi samajhte hain ki woh baap, teacher, guru bhi hai। yeh to saadhaaran reeti se baithe rehte hain। yeh oopar sandali par bhi isliye baithte hain ki mukhda dekh saken। bachchon par pyaar to rehta hai na। in madadgaar bachchon bigar sthaapna thode hi karenge। jaasti madad karne vaale bachchon ko zaroor jaasti pyaar karenge। jaasti kamaane vaala bachcha achha hoga to zaroor oonch te oonch pad lega। us par pyaar bhi jaata hai। bachchon ko dekh-dekh harshit hote hain। aatma bahut khush hoti hai। kalpa-kalpa bachchon ko dekh khush hota hoon। kalpa-kalpa bachche hi madadgaar bante hain। bahut pyaare lagte hain। kalpa-kalpaantar ka pyaar jut jaata hai। bhal kahaan bhi baithe raho, buddhi mein baap ki yaad rahe। yeh behad ka baap hai, inka koi baap nahin, inka koi teacher nahin। svayan hi sab kuchh hai jisko hi sab yaad karte hain। satayug mein to koi yaad nahin karenge, 21 janmon ke liye beda paar ho gaya to tumko kitni khushi honi chaahiye। bas, saara din baap ki service karen। aise baap ka parichay den। baap se yeh varsa milta hai। baap hamko raajayog sikhlaate hain aur phir sabko saath bhi le jaate hain। saara chakra buddhi mein hai। aisa chakra to koi bana na sake। arth ka to kisko pata nahin। tum abhi samajhte ho - baba hamaara behad ka baba bhi hai, behad ka raajya bhi dete hain phir saath bhi le jaayenge। aise-aise tum samjhaayenge phir koi sarvavyaapi kah nahin sakenge। woh baap hai, teacher hai to sarvavyaapi kaise ho sakta।

behad ka baap hi knowledgeful hai। saare srishti ke aadi-madhya-ant ko jaante hain। baap bachchon ko samjhaate hain - padhaai ko bhoolo mat। yeh bahut badi padhaai hai। baba parampita hai, param teacher hai, param guru bhi hai। in sab gurooon ko bhi le jaayenge। aisi-aisi wonderful baaten sunaani chaahiye। bolo, yeh behad ka khel hai। harek actor ko apna part mila hua hai। behad ke baap se ham hi behad ki baadshaahi lete hain। ham hi maalik the। vaikuntha hokar gaya hai, phir zaroor hoga। shreekrishna nai duniya ka maalik tha। ab puraani duniya hai phir zaroor nai duniya ka maalik banega। chitra mein bhi clear hai। tum jaante ho - ab hamaari laat narka ki taraph, munh svarga ki taraph hai, vahi yaad rehta hai। aise yaad karte-karte ant mati so gati ho jaayegi। kitni achhi-achhi baaten hain jinka simran karna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur goodmorning। roohaani baap ki roohaani bachchon ko namaste।

dhaarna ke liye mukhya saar:-

1) in aankhon se jo kuchh dikhaai deta hai, unse mamatva mitaana hai, ek baap ko hi dekhna hai। vritti ko shuddh banaane ke liye in chhi-chhi shareeron ki taraph jara bhi dhyaan na jaaye।

2) baap jo nyaari aur satya knowledge sunaate hain, woh achhi tarah padhni aur padhaani hai। padhaai kabhi miss nahin karni hai।

vardaan:- shanti ki shakti ke prayog dvaara har kaarya mein sahaj saphalta praapta karne vaale prayogi aatma bhav

ab samay ke parivartan pramaan shanti ki shakti ke saadhan prayog mein laakar prayogi aatma bano। jaise vaani dvaara aatmaon mein sneh ke sahayog ki bhaavna utpanna karte ho aise shubh bhaavna, sneh ki bhaavna ki sthiti mein sthit ho unhon mein shreshtha bhaavnaayen utpanna karo। jaise deepak, deepak ko jaga deta hai aise aapki shaktishaali shubh bhaavna auron mein sarvashreshtha bhaavna utpanna kara degi। is shakti se sthool kaarya mein bhi bahut sahaj saphalta praapta kar sakte ho, sirf prayog karke dekho।

slogan:- sarva ka pyaara banna hai to khile hue roohaani gulaab bano, murjhaao nahin।