Murli du jour du mardi 9 juillet 2024

09-07-2024 praatahmurli om shanti "baapdaada"' madhuban

meethe bachche - sachche baap ke saath andar baahar sachcha bano, tab hi devta ban sakenge। tum brahman hi farishta so devta bante ho

prashn:- is gyaan ko sunne va dhaaran karne ka adhikaari kaun ho sakta hai?

uttar:- jisne all-round part bajaaya hai, jisne sabse jaasti bhakti ki hai, vahi gyaan ko dhaaran karne mein bahut teekhe jaayenge। oonch pad bhi vahi paayenge। tum bachchon se koi koi poochhte hain - tum shaastron ko nahin maante ho? to bolo jitna hamne shaastra padhe hain, bhakti ki hai, utna duniya mein koi nahin karta। humein ab bhakti ka phal mila hai, isliye ab bhakti ki darkaar nahin।

om shanti। behad ka baap behad ke bachchon ko baith samjhaate hain, sabhi aatmaon ka baap sabhi aatmaon ko samjhaate hain kyonki woh sarva ka sadgati daata hai। jo bhi aatmaayen hain, jeev aatmaayen hi kahenge। shareer nahin to aatma dekh nahin sakti। bhal drama ke plan anusaar svarga ki sthaapna baap kar rahe hain parantu baap kehte hain main svarga ko dekhta nahin hoon। jinhon ke liye hai vahi dekh sakte hain। tumko padhaakar phir main to koi shareer dhaaran karta hi nahin hoon। to bigar shareer dekh kaise sakoonga। aise nahin, jahaan-tahaan mauzood hoon। sab kuchh dekhte hain। nahin, baap sirf dekhte hain tum bachchon ko, jinko gul-gul (phool) banaakar yaad ki yaatra sikhlaate hain। ‘yog' akshar bhakti ka hai। gyaan dene vaala ek gyaan ka saagar hai, unko hi satguru kaha jaata hai। baaki sab hain guru। sach bolne vaala, sachkhanda sthaapan karne vaala vahi hai। bhaarat sachkhanda tha, vahaan sab devi-devta nivaas karte the। tum abhi manushya se devta ban rahe ho। to bachchon ko samjhaate hain - sachche baap ke saath andar-baahar sachcha banna hai। pahle to kadam-kadam par jhooth hi tha, woh sab chhodna padega, agar svarga mein oonch pad paana chaahte ho to। bhal svarga mein to bahut jaayenge parantu baap ko jaankar bhi vikarmon ko vinaash nahin kiya to sajaayen khaakar hisaab-kitaab chuktu karna padega, phir pad bhi bahut kam milega। raajdhaani sthaapan ho rahi hai purooshottam sangamayug par। raajdhaani na to satayug mein sthaapan ho sakti, na kaliyug mein kyonki baap satayug ya kaliyug mein nahin aate hain। is yug ko kaha jaata hai purooshottam kalyaankaari yug। ismen hi baap aakar sabka kalyaan karte hain। kaliyug ke baad satayug aana hai isliye sangamayug bhi zaroor chaahiye। baap ne bataaya hai yeh patit puraani duniya hai। gaayan bhi hai door desh ka rahne vaala… to paraaye desh mein apne bachche kahaan se milenge। paraaye desh mein phir paraaye bachche hi milte hain। unhon ko achhi reeti samjhaate hain - main kismen pravesh karta hoon। apna bhi parichay dete hain aur jismen pravesh karta hoon unko bhi samjhaata hoon ki yeh tumhaara bahut janmon ke ant ka janma hai। kitna clear hai।

abhi tum yahaan purooshaarthi ho, sampoorn pavitra nahin। sampoorn pavitra ko pharishta kaha jaata hai। jo pavitra nahin unko patit hi kahenge। pharishta banne ke baad phir devta bante ho। sookshm vatan mein tum sampoorn pharishta dekhte ho, unhon ko pharishta kaha jaata hai। to baap samjhaate hain - bachche, ek alf ko hi yaad karna hai। alf maana baba, unko allaah bhi kehte hain। bachche samajh gaye hain baap se svarga ka varsa milta hai। svarga kaise rachte hain? yaad ki yaatra aur gyaan se। bhakti mein gyaan hota nahin। gyaan sirf ek hi baap dete hain braahmanon ko। brahman choti hain na। abhi tum brahman ho phir baajoli khelenge। brahman devta kshatriy........isko kaha jaata hai viraat roop। viraat roop koi brahma, vishnu, shankar ka nahin kahenge। usmein choti brahman to hain nahin। baap brahma tan mein aate hain - yeh to koi jaanta nahin। brahman kul hi sarvottam kul hai, jabki baap aakar padhaate hain। baap shoodron ko to nahin padhaayenge na। braahmanon ko hi padhaate hain। padhaane mein bhi time lagta hai, raajdhaani sthaapan honi hai। tum oonch te oonch purooshottam bano। nai duniya kaun rachega? baap hi rachega। yeh bhoolo mat। maaya tumko bhulaati hai, unka to dhandha hi yeh hai। gyaan mein itna interfere nahin karti hai, yaad mein hi karti hai। aatma mein bahut kichda bhara hua hai, woh baap ki yaad bigar saaph ho na sake। yog akshar se bachche bahut moonjhate hain। kehte hain baba hamaara yog nahin lagta। vaastav mein yog akshar un hathayogiyon ka hai। sannyaasi kehte hain brahm se yog lagaana hai। ab brahm tatva to bahut bada lamba-chauda hai, jaise aakaash mein stars dekhne mein aate hain, vaise vahaan bhi chhote-chhote star misal aatmaayen hain। woh hai aasmaan se paar, jahaan soorya chaand ki roshni nahin। to dekho kitne chhote-chhote rocket tum ho। tab baba kehte hain - pahle-pahle aatma ka gyaan dena chaahiye। woh to ek bhagwan hi de sakte hain। aise nahin, sirf bhagwan ko nahin jaante। parantu aatma ko bhi nahin jaante। itni chhoti si aatma mein 84 ke chakra ka avinaashi part bhara hua hai, inko hi kudrat kaha jaata hai, aur kuchh nahin kah sakte। aatma 84 ka chakra lagaati hi rehti hai। har 5 hajaar varsha baad yeh chakra phirta hi rehta hai। yeh drama mein noondh hai। duniya avinaashi hai, kabhi vinaash ko nahin paati। vo log dikhaate hain badi pralay hoti hai phir shreekrishna angootha choosta hua peepal ke patte par aata hai। parantu aise koi hota thode hi hai। yeh to bekaayde hai। mahaapralay kabhi hoti nahin। ek dharma ki sthaapna aur anek dharmon ka vinaash chalta hi rehta hai। is samay mukhya 3 dharma hain। yeh to auspicious sangamayug hai। puraani duniya aur nai duniya mein raat-din ka farka hai। kal nai duniya thi, aaj puraani hai। kal ki duniya mein kya tha - yeh tum samajh sakte ho। jo jis dharma ka hai, us dharma ki hi sthaapna karte hain। vo to sirf ek aate hain, bahut nahin hote। phir dheere-dheere vriddhi hoti hai।

baap kehte hain tum bachchon ko koi takleeph nahin deta hoon। bachchon ko takleeph kaise denge! most beloved baap hai na। kehte hain main tumhaara sadgati daata, duhkh harta sukh karta hoon। yaad bhi mujh ek ko karte hain। bhakti maarga mein kya kar diya hai, kitni gaaliyaan mujhe dete hain! kehte hain god is one। srishti ka chakra bhi ek hi hai, aise nahin, aakaash mein koi duniya hai। aakaash mein stars hain। manushya to samajhte hain ek-ek star mein srishti hai। neeche bhi duniya hai। yeh sab hain bhakti maarga ki baaten। oonch te oonch bhagwan ek hai। kehte bhi hain saare srishti ki aatmaayen tumhaare mein piroi hui hain, yeh jaise maala hai। inko behad ki roodra maala bhi kah sakte hain। sootra mein baandhi hui hain। gaate hain parantu samajhte kuchh nahin। baap aakar samjhaate hain - bachche, main tumko zara bhi takleeph nahin deta hoon। yeh bhi bataaya hai jinhonne pahle-pahle bhakti ki hai, vahi gyaan mein teekhe jaayenge। bhakti jaasti ki hai to phal bhi unko jaasti milna chaahiye। kehte hain bhakti ka phal bhagwan dete hain, woh hai gyaan ka saagar। to zaroor gyaan se hi phal denge। bhakti ke phal ka kisko bhi pata nahin hai। bhakti ka phal hai gyaan, jisse svarga ka varsa sukh milta hai। to phal dete hain arthaat narkavaasi se svargavaasi banaate hain ek baap। raavan ka bhi kisko pata nahin hai। kehte bhi hain yeh puraani duniya hai। kab se puraani hai - woh hisaab nahin laga sakte hain। baap hai manushya srishti roopi jhaad ka beejroop। satya hai। woh kabhi vinaash nahin hota, inko ulta jhaad kehte hain। baap oopar mein hai, aatmaayen baap ko oopar dekh bulaati hain, shareer to nahin bula sakta। aatma to ek shareer se nikal doosre mein chali jaati hai। aatma na ghatti, na badhti, na kabhi mrityu ko paati hai। yeh khel bana hua hai। saare khel ke aadi-madhya-ant ka raaz baap ne bataaya hai। aastik bhi banaaya hai। yeh bhi bataaya ki in lakshmi-naaraayan mein yeh gyaan nahin hai। vahaan to aastik-naastik ka pata hi nahin rehta hai। is samay baap hi arth samjhaate hain। naastik unko kaha jaata hai jo na baap ko, na rachna ke aadi-madhya-ant ko, na duration ko jaante hain। is samay tum aastik bane ho। vahaan yeh baaten hi nahin। khel hai na। jo baat ek second mein hoti woh phir doosre second mein nahin hoti। drama mein tik-tik hoti rehti hai। jo past hua chakra phirta jaayega। jaise bioscope hota hai, do ghante ya teen ghante baad phir vahi bioscope hoobhu repeat hoga। makaan aadi tod daalte hain phir dekhenge bana hua hai। vahi hoobhu repeat hota hai। ismen moonjhane ki baat hi nahin। mukhya baat hai aatmaon ka baap paramatma hai। aatmaayen paramatma alag rahe bahukaal.... alag hoti hain, yahaan aati hain part bajaane। tum poore 5 hazaar varsha alag rahe ho। tum meethe bachchon ko all-round part mila hai isliye tumko hi samjhaate hain। gyaan ke bhi tum adhikaari ho। sabse jaasti bhakti jisne ki hai, gyaan mein bhi vahi teekhe jaayenge, pad bhi oonch paayenge। pahle-pahle ek shivbaaba ki bhakti hoti hai phir devtaaon ki। phir 5 tatvon ki bhi bhakti karte, vyabhichaari ban jaate hain। abhi behad ka baap tumko behad mein le jaate hain, woh phir behad ke bhakti ke agyaan mein le jaate hain। ab baap tum bachchon ko samjhaate hain - apne ko aatma samajh mujh ek baap ko yaad karo। phir bhi yahaan se baahar jaane se maaya bhula deti hai। jaise garbha mein pashchaataap karte hain - ham aise nahin karenge, baahar aane se bhool jaate hain। yahaan bhi aise hai, baahar jaane se hi bhool jaate hain। yeh bhool aur abhul ka khel hai। abhi tum baap ke adopted bachche bane ho। shivbaaba hai na। woh hai sab aatmaon ka behad ka baap। baap kitna door se aate hain। unka ghar hai paramdham। paramdham se aayenge to zaroor bachchon ke liye saugaat le aayenge। hatheli par bahishta saugaat mein le aate hain। baap kehte hain second mein svarga ki baadshaahi lo। sirf baap ko jaano। sabhi aatmaon ka baap to hai na। kehte hain main tumhaara baap hoon। main kaise aata hoon - woh bhi tumko samjhaata hoon। mujhe rath to zaroor chaahiye। kaun-sa rath? koi mahaatma ka to nahin le sakte। manushya kehte hain tum brahma ko bhagwan, brahma ko devta kehte ho। are, ham kahaan kehte hain! jhaad ke oopar ekdam ant mein khade hain, jabki jhaad saara tamopradhaan hai। brahma bhi vahaan khada hai to bahut janmon ke ant ka janma hua na। baba khud kehte hain mere bahut janmon ke ant ke janma mein jab vaanaprastha avastha hoti hai tab baap aaye hain। jo aakar dhandha aadi chhudaaya। saath varsha ke baad manushya bhakti karte hain bhagwan se milne ke liye।

baap kehte hain tum sab manushya mat par the, abhi baba tumhein shreemat de rahe hain। shaastra likhne vaale bhi manushya hain। devtaayen to likhte nahin, na padhte hain। satayug mein shaastra hote nahin। bhakti hi nahin। shaastron mein sab karmakaanda likha hua hai। yahaan woh baat hai nahin। tum dekhte ho baba gyaan dete hain। bhakti maarga mein to hamne shaastra bahut padhe hain। koi poochhe tum vedon-shaastron aadi ko nahin maante ho? bolo, jo bhi manushya maatra hain unse jyaada ham maante hain। shuru se lekar avyabhichaari bhakti hamne shuru ki hai। abhi hamko gyaan mila hai। gyaan se sadgati hoti hai phir ham bhakti ko kya karenge। baap kehte hain - bachche, hear no evil, si no evil.... to baap kitna simple reeti samjhaate hain - meethe-meethe bachche, apne ko aatma nishchay karo। main aatma hoon, woh kah dete allaah hoon। tumko shiksha milti hai main aatma hoon, baap ka bachcha hoon। yahi maaya ghadi-ghadi bhulaati hai। deh-abhimaani hone se hi ulta kaam hota hai। ab baap kehte hain - bachche, baap ko bhoolo mat। time vesta mat karo। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) rachayita aur rachna ke raaz ko yathaartha samajh aastik banna hai। drama ke gyaan mein moonjhana nahin hai। apni buddhi ko had se nikaal behad mein le jaana hai।

2) sookshmavtanvaasi pharishta banne ke liye sampoorn pavitra banna hai। aatma mein jo kichda bhara hai, use yaad ke bal se nikaal saaph karna hai।

vardaan:- eeshvareey ras ka anubhav kar ekras sthiti mein sthit rahne vaali shreshtha aatma bhav

jo bachche eeshvareey ras ka anubhav kar lete hain unko duniya ke sab ras pheeke lagte hain। jab hai hi ek ras meetha to ek hi taraph attention jaayega na। sahaj hi ek taraph man lag jaata hai, mehnat nahin lagti hai। baap ka sneh, baap ki madad, baap ka saath, baap dvaara sarva praaptiyaan sahaj ekras sthiti bana deti hain। aisi ekras sthiti mein sthit rahne vaali aatmaayen hi shreshtha hain।

slogan:- kichde ko samaakar ratna dena hi master saagar banna hai।