Murli du jour du mardi 16 juillet 2024

16-07-2024 praatahmurli om shanti "baapdaada"' madhuban

“meethe bachche - drama ki yathaartha knowledge se hi tum achal, adol aur ekras rah sakte ho, maaya ke toophaan tumhein hila nahin sakte''

prashn:- devtaaon ka mukhya ek kaun-sa gun tum bachchon mein sada dikhaai dena chaahiye?

uttar:- harshit rehna। devtaaon ko sada muskaraate hue harshit dikhaate hain। aise tum bachchon ko bhi sada harshit rehna hai, koi bhi baat ho, muskaraate raho। kabhi bhi udaasi ya gussa nahin aana chaahiye। jaise baap tumhein right aur wrong ki samjhaani dete hain, kabhi gussa nahin karte, udaas nahin hote, aise tum bachchon ko bhi udaas nahin hona hai।

om shanti। behad ke bachchon ko behad ka baap samjhaate hain। laukik baap to aise nahin kahenge। unke to karke 5-7 bachche honge। yeh to jo sabhi aatmaayen hain, aapas mein brothers hain। un sabka zaroor baap hoga। kehte bhi hain ham sab bhaai-bhaai hain। sabke liye kehte hain। jo bhi aayenge, unke liye kahenge ham bhaai-bhaai hain। drama mein to sabhi baandhe hue hain, jisko koi nahin jaante। yeh na jaanna bhi drama mein noondh hai। jo baap hi aakar sunaate hain, kathaayen aadi jab baith sunaate hain to kehte hain - parampita parmaatmaae namah। ab woh kaun hai - yeh jaante nahin। kehte hain brahma devta, vishnu devta, shankar devta parantu samajh se nahin kehte hain। brahma ko vaastav mein devta nahin kahenge। devta vishnu ko kaha jaata hai। brahma ka kisko bhi pata nahin hai। vishnu devta theek hai, shankar ka to kuchh bhi part hai nahin। unki biography nahin hai, shivbaaba ki to biography hai। woh aate hi hain patiton ko paavan banaane, nai duniya sthaapan karne। abhi ek aadi sanaatan devi-devta dharma ki sthaapna aur sab dharmon ka vinaash hota hai। sabhi kahaan jaate hain? shantidham। shareer to sabke vinaash hone hain। nai duniya mein honge hi sirf tum। jo bhi mukhya dharma hain, unko tum jaante ho। sabke to naam le nahin sakenge। chhoti-chhoti taal-taaliyaan to bahut hain। pahle-pahle hai Deityism phir islaami। yeh baaten sivaae tum bachchon ke aur koi ki buddhi mein nahin hain। abhi woh aadi sanaatan devi-devta dharma praayahlop hai isliye banyan tree ka misaal dete hain। saara jhaad khada hai। foundation hai nahin। sabse badi aayu is banyan tree ki hoti hai। to ismen sabse badi aayu hai aadi sanaatan devi-devta dharma ki। woh jab praayah lop ho tab to baap aakar kahe ki abhi ek dharma ki sthaapna aur anek dharmon ka vinaash hona hai, isliye trimoorti bhi banaaya hai। parantu arth nahin samajhte hain। tum bachche jaante ho oonch te oonch bhagwan hai phir brahma-vishnu-shankar, phir srishti par aate hain to devi-devtaaon ke sivaae aur koi dharma hai nahin। bhakti maarga ki bhi drama mein noondh hai। pahle shiv ki bhakti karte phir devtaaon ki। bhaarat ki hi to baat hai। baaki to samajhte hain hamaara dharma, math, panth kab sthaapan hota hai। jaise aarya log kehte hain ham bahut puraane hain। vaastav mein sabse puraana to hai hi aadi sanaatan devi-devta dharma। tum jab jhaad par samjhaate ho to khud bhi samajh lenge ki hamaara dharma phalaane samay par aayega। sabko jo anaadi avinaashi part mila hua hai so bajaana hai, ismen koi ka dosh va bhool nahin kah sakte hain। yeh to sirf samjhaaya jaata hai paap aatma kyon bane hain। manushya kahenge ham behad ke baap ke sab bachche hain, phir sab brothers satayug mein kyon nahin hain? parantu drama mein part hi nahin hai। yeh anaadi drama bana hua hai, ismen nishchay rakho, aur koi baat bolo nahin। chakra bhi dikhaaya hai - kaise yeh phirta hai। kalpa vriksha ka bhi chitra hai। parantu yeh koi jaante nahin ki inki aayu kitni hai। baap koi ki ninda nahin karte hain। yeh to samjhaaya jaata hai, tumko bhi samjhaate hain tum kitne paavan the, abhi patit bane ho to pukaarte ho - he patit-paavan aao। pahle to tum sabko paavan banna hai। phir nambarvaar part bajaane aana hai। aatmaayen sab oopar mein rehti hain। baap bhi oopar mein rehte hain, phir unko bulaate hain ki aao। aise woh bulaane se aate nahin hain। baap kehte hain mera bhi drama mein part noondha hua hai। jaise had ke drama mein bhi bade-bade mukhya actors ka part hota hai, yeh phir hai behad ka drama। sab drama ke bandhan mein baandhe hue hain, iska matlab yeh nahin hai ki dhaage mein baandhe hue ho। nahin। yeh baap samjhaate hain। woh hai jad jhaad। agar beej chaitanya hota to usko maaloom hota na ki yeh kaise jhaad bada ho phir phal denge। yeh to hai chaitanya beej is manushya srishti roopi jhaad ka, isko ulta jhaad kaha jaata hai। baap to hai knowledgeful, unko saare jhaad ki knowledge hai। yeh hai vahi geeta ki knowledge। koi nai baat nahin hai। yahaan baba koi shlok aadi nahin uchchaarte hain। vo log granth padhkar phir arth baith samjhaate hain। baap samjhaate hain yeh hai padhaai, ismen shlok aadi ki darkaar nahin। un shaastron ki padhaai mein koi em-object hai nahin। kehte bhi hain gyaan, bhakti, vairaagya। yeh puraani duniya vinaash hoti hai। sannyaasiyon ka hai had ka vairaagya, tumhaara hai behad ka vairaagya। shankaraachaarya aate hain tab woh baith sikhlaate hain ghar baar se vairaagya। woh bhi shuru mein shaastra aadi nahin sikhaate। jab bahut vriddhi hoti jaati hai tab shaastra banaane shuru karte hain। pahle-pahle to dharma sthaapan karne vaala ek hi hota hai phir aahiste-aahiste vriddhi ko paate hain। yeh bhi samajhna hai। srishti mein pahle-pahle kaun-sa dharma tha। abhi to anek dharma hain। aadi sanaatan devi-devta dharma tha, jisko svarga heaven kehte hain। tum bachche rachayita aur rachna ko jaanne se aastik ban jaate ho। naastikapne ka kitna duhkh hota hai, nidhanke ban padte hain, aapas mein ladte-jhagadte rehte hain। kehte hain na - tum aapas mein ladte rehte ho, tumhaara koi dhani dhoni nahin hai kya? is samay sab nidhanke ban padte hain। nai duniya mein pavitrata, sukh, shanti sab tha, apaar sukh the। yahaan aparmaapaar duhkh hain। woh hain satayug ke, yeh hain kaliyug ke, abhi tumhaara hai purooshottam sangamayug। yeh purooshottam sangamayug ek hi hota hai। satayug-treta ke sangam ko purooshottam nahin kahenge। yahaan hain asur, vahaan hain devtaayen। tum jaante ho yeh raavan raajya hai। raavan ke oopar gadhe ka sheesh dikhaate hain। gadhe ko kitna bhi saaph kar us par kapde rakho, gadha phir bhi mitti mein letkar kapde kharaab kar dega। baap tumhaare kapde saaph gul-gul banaate hain, phir raavan raajya mein lithad kar, apvitra ban jaate ho। aatma aur shareer donon apvitra ban jaate hain। baap kehte hain tumne saara shrringaar ganva diya। baap ko patit-paavan kehte hain, tum bhari sabha mein kah sakte ho ki ham golden ej mein kitne shrringaare hue the, kitna first class raajya-bhaagya tha। phir maaya roopi dhool mein lithad kar maile ho gaye।

baap kehte hain yeh andheri nagri hai। bhagwan ko sarvavyaapi kah diya hai, jo kuchh hua woh hoobhu repeat hoga, ismen moonjhane ki darkaar nahin hai। 5 hazaar varsha mein kitne minute, ghante, second hain, ek bachche ne sab dharma vaalon ka hisaab nikaalkar bheja tha, ismen bhi buddhi vyartha ki hogi। baba to aise hi samjhaate hain ki duniya kaise chalti hai।

prajaapita brahma hai great-great grand father। unka occupation koi nahin jaante। viraat roop banaaya hai to prajaapita brahma ko bhi uda diya hai। baap aur braahmanon ko yathaartha reeti jaante nahin hain। unko kehte bhi hain aadi dev। baap samjhaate hain main is jhaad ka chaitanya beejroop hoon। yeh ulta jhaad hai। baap jo satya hai, chaitanya hai, gyaan ka saagar hai, unki hi mahima ki jaati hai। aatma na ho to chal phir bhi na saken। garbha mein bhi 5-6 maas ke baad aatma pravesh karti hai। yeh bhi drama bana hua hai। phir aatma nikal jaati hai to khalaas। aatma avinaashi hai, woh part bajaati hai, yeh baap aakar realise karaate hain। aatma itni chhoti bindi hai, usmein avinaashi part bhara hua hai। parampita bhi aatma hain, unko gyaan ka saagar kaha jaata hai। vahi aatma ka realisation karaate hain। woh to sirf kah dete paramatma sarva shaktimaan, hazaaron soorya se tejomay hai। parantu samajhte kuchh nahin। baap kehte hain yeh sab bhakti maarga mein varnan kiya hua hai aur shaastron mein likh diya hai। arjun ko saakshaatkaar hua to kaha main itna tej sahan nahin kar sakta hoon, to woh baat manushyon ki buddhi mein baithi hui hai। itna tejomay kiske andar pravesh kare to phat jaae। gyaan to nahin hai na। to samajhte hain paramatma to hazaar soorya se tejomay hai, hamko unka saakshaatkaar chaahiye। bhakti ki bhaavna baithi hui hai to unko woh saakshaatkaar bhi hota hai। shuru-shuru mein tumhaare paas bhi aise bahut saakshaatkaar karte the, aankhe laal ho jaati thi। saakshaatkaar kiya phir aaj woh kahaan hain। woh sabhi hain bhakti maarga ki baaten। to yeh sab baap samjhaate hain, ismen glaani ki koi baat nahin hai। bachchon ko sadaiv harshit rehna hai। yeh to drama bana hua hai। mujhe itni gaaliyaan dete hain, phir main kya karta hoon? gussa aata hai kya! samajhta hoon drama anusaar yeh sab bhakti maarga mein phanse hue hain। naaraaz hone ki baat hi nahin hai। drama aisa bana hua hai। pyaar se samjhaani deni hoti hai। bichaare agyaan andhere mein pade hain, nahin samajhte hain to taras bhi padta hai। sadaiv muskaraate rehna chaahiye। yeh bichaare svarga ke dvaare aa nahin sakenge, yeh sab shantidham mein jaane vaale hain। sab chaahte bhi shanti hi hain। to baap hi real samjhaate hain। abhi tum jaante ho ki yeh khel bana hua hai। drama mein har ek ko part mila hua hai, ismen badi achal, stheriyam buddhi chaahiye। jab tak achal, adol, ek-ras avastha nahin tab tak purooshaartha kaise karenge। kuchh bhi ho, bhal toofaan aayen parantu stheriyam rehna hai। maaya ke toophaan to dher aayenge aur pichhaadi tak aayenge। avastha majboot chaahiye। yeh hai gupta mehnat। kai bachche purooshaartha kar toophaan ko udaate rehte hain। jitna jo paas hoga utna oonch pad paayega। raajdhaani mein pad to bahut hain na।

sabse achhe chitra hain trimoorti gola aur jhaad। yeh shuru ke bane hue hain। vilaayat mein service ke liye bhi yeh do chitra le jaane hain। in par hi woh achhi reeti samajh sakenge। aahiste-aahiste baba jo chaahte hain ki yeh chitra kapde par hon, woh bhi bante jaayenge। tum samjhaayenge ki yeh kaise sthaapna ho rahi hai। tum bhi isko samjhenge to apne dharma mein oonch pad paayenge। Christian dharma mein tum oonch pad paana chaahte ho to yeh achhi reeti samjho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is purooshottam sangamayug par pavitra ban svayan ka shrringaar karna hai। kabhi bhi maaya ki dhool mein lithadkar shrringaar bigaadna nahin hai।

2) is drama ko yathaartha reeti samajhkar apni avastha achal, adol, stheriyam banaani hai। kabhi bhi moonjhana nahin hai, sadaiv harshit rehna hai।

vardaan:- soch-samajhkar har karma karne vaale pashchaataap se mukta gyaani tu aatma bhav

duniya mein bhi kehte hain pahle socho phir karo। jo sochkar nahin karte, karke phir sochte hain to pashchaataap ka roop ho jaata hai। peechhe sochna, yeh pashchaataap ka roop hai aur pahle sochna - yeh gyaani tu aatma ka gun hai। dvaapar-kaliyug mein to anek prakaar ke pashchaataap hi karte rahe lekin ab sangam par aisa soch samajhkar sankalp va karma karo jo kabhi man mein bhi, ek second bhi pashchaataap na ho, tab kahenge gyaani tu aatma।

slogan:- merciful ban sarva gunon aur shaktiyon ka daan dene vaale hi master daata hain।