Murli du jour du vendredi 19 juillet 2024

19-07-2024 praatahmurli om shanti "baapdaada"' madhuban

“meethe bachche - tumhein double sirtaaj raaja banna hai to khoob service karo, praja banaao, sangam par tumhein service hi karni hai, ismen hi kalyaan hai''

prashn:- puraani duniya ke vinaash ke pahle harek ko kaun-sa shrringaar karna hai?

uttar:- tum bachche yogbal se apna shrringaar karo, is yogbal se hi saara vishwa paavan banega। tumko ab vaanaprastha mein jaana hai isliye is shareer ka shrringaar karne ki jaroorat nahin। yeh to worth not penny hai, isse mamatva nikaal do। vinaash ke pahle baap samaan merciful ban apna aur doosron ka shrringaar karo। andhon ki laathi bano।

om shanti। ab yeh to bachche achhi reeti samajh gaye hain ki baap aate hain paavan banne ka raasta bataane। unko bulaaya jaata hai isi ek baat ke liye ki aakar hamko patit se paavan banaao kyonki paavan duniya past ho gai, ab patit duniya hai। paavan duniya kab past hui, kitna samay hua, yeh koi nahin jaante। tum bachche jaante ho baap phir is tan mein aaya hua hai। tumne hi bulaaya hai ki baba aakar ham patiton ko raasta bataao, ham paavan kaise banen? yeh to jaante ho ham paavan duniya mein the, abhi patit duniya mein hain। abhi yeh duniya badal rahi hai। nai duniya ki aayu kitni, puraani duniya ki aayu kitni hai - yeh koi bhi nahin jaante। pakka makaan banaao to kahenge iski aayu itne varsha hogi। kachcha makaan banaayenge to kahenge iski aayu itne varsha hogi। samajh sakte hain yeh kitne varsha tak chal sakta hai। manushyon ko yeh pata hi nahin ki yeh jo saari duniya hai unki aayu kitni hai? to zaroor baap ko aakar bataana pade। baap kehte hain - bachche, ab yeh puraani patit duniya poori honi hai। nai paavan duniya sthaapan ho rahi hai। nai duniya mein bahut thode manushya the। nai duniya hai satayug jisko sukhdhaam kehte hain। yeh hai duhkhadhaam, iska ant zaroor aana hai। phir sukhdhaam ki history repeat honi hai। sabko yeh samjhaana hai। baap direction dete hain apne ko aatma samajh baap ko yaad karo aur phir auron ko bhi yeh raasta bataao। laukik baap ko to sab jaante hain, paarlaukik baap ko to koi jaante nahin। sarvavyaapi kah dete hain। kachchha-machchha avtaar ya 84 laakh yoniyon mein le gaye hain। duniya mein koi bhi baap ko nahin jaante। baap ko jaanen tab samjhen। agar patthar thikkar mein hai to varse ki baat hi nahin thaharti। devtaaon ki bhi pooja karte hain, parantu koi ka occupation nahin jaante, bilkul hi in baaton mein anjaan hain। to pahli-pahli mool baat samjhaani chaahiye। sirf chitron se koi samajh na sake। manushya bichaare na baap ko jaante hain, na rachna ko jaante hain ki shuru se lekar yeh rachna kaise rachi। devtaaon ka raajya kab tha, jinko poojte hain, kuchh bhi pata nahin। samajhte hain laakhon varsha sooryavanshi raajdhaani chali, phir chandravanshi laakhon varsha chale, isko kaha jaata hai agyaan। abhi tum bachchon ko baap ne samjhaaya hai, tum phir repeat karte ho। baap bhi repeat karte hain na। aise samjhaao, paigaam do, nahin to raajdhaani kaise sthaapan hogi। yahaan baith jaane se nahin hoga। haan, ghar mein baithne vaale bhi chaahiye। woh to drama anusaar baithe hain। yagya ki sambhaal karne vaale bhi chaahiye। baap ke paas kitne bachche aate hain milne ke liye kyonki shivbaaba se hi varsa lena hai। laukik baap ke paas bachcha aaya to woh samjhenge hamko baap se varsa lena hai। bachchi to jaakar half partner banti hai। satayug mein kabhi milkiyat aadi par jhagda hota hi nahin। yahaan jhagda hota hai kaam vikaar par। vahaan to yeh 5 bhoot hote nahin, to duhkh ka naam-nishaan nahin। sab nashtomoha hote hain। yeh to samajhte hain svarga tha, jo past ho gaya। chitra bhi hain parantu yeh khyaalaat tum bachchon ko abhi aate hain। tum jaante ho yeh chakra har 5 hazaar varsha ke baad repeat hota hai। shaastron mein koi yeh nahin likha hai ki sooryavanshi-chandravanshi dynasty 2500 varsha chali। akhbaar mein pada tha ki badauda ke raajabhvan mein raamaayan sun rahe hain। kuchh bhi aaphten aati hain to manushya bhakti mein lag jaate hain, bhagwan ko raazi karne ke liye। aise koi bhagwan raazi hota nahin hai। yeh to drama mein noondh hai। bhakti se kabhi bhagwan raazi nahin hota। tum bachche jaante ho aadhaakalpa bhakti chalti hai, khud hi duhkh uthaate rehte hain। bhakti karte-karte sab paise khalaas kar dete hain। yeh baaten to koi virle hi samjhenge jo bachche service par hain, woh samaachaar bhi dete rehte hain। samjhaaya jaata hai yeh eeshvareey parivaar hai। eeshvar to daata hai, woh lene vaala nahin hai। unko to koi bhi dete nahin, aur hi sab barbaad karte rehte hain।

baap tum bachchon se poochhte hain, tumko kitne athaah paise diye। tumko svarga ka maalik banaaya phir woh sab kahaan gaya? itne kangaal kaise bane? abhi main phir aaya hoon, tum kitne padmaapadma bhaagyavaan ban rahe ho। manushya to in baaton ko koi bhi nahin jaante। tum jaante ho abhi is puraani duniya mein yahaan rehna nahin hai। yeh to khalaas ho jaani hai। manushyon ke paas jo dher paise hain woh kisi ke haath aane nahin hain। vinaash hoga to sab khalaas ho jaayenge। kitne mile mein bade-bade makaan aadi bane hue hain। dher ki dher milkiyat hai, sab khatma ho jaayegi kyonki tum jaante ho jab hamaara raajya tha to aur koi the hi nahin। vahaan athaah dhan tha। tum aage chal dekhte rahenge kya-kya hota hai। unke paas kitna sona, kitni chaandi, note aadi hain, woh sab budget nikalta hai, announce karte hain itna budget hai to itna kharcha hai। baarood par kitna kharcha hai। abhi baarood par itna kharcha karte hain। usse aamadni to kuchh hai nahin। yeh rakhne ki cheez to hai nahin। rakhne ka hota hai sona aur chaandi। duniya golden aged hai to sone ke sikke hote hain। silver ej mein chaandi hai। vahaan to apaar dhan hota hai, phir kam hote-hote abhi dekho kya nikla hai! kaagaz ke note। vilaayat mein bhi kaagaz ke nikle hain। kaagaz to kaam ki cheez nahin। baaki kya rahega? yeh badi-badi buildings aadi sab khatma ho jaayengi isliye baap kehte hain - meethe-meethe bachche, yeh jo kuchh dekhte ho, aise samjho yeh hai nahin। yeh to sab khalaas ho jaana hai। shareer bhi puraana birth not A penny hai। bhal koi kitna bhi sundar ho। yeh duniya hi baaki thoda samay hai। kuchh thikaana thode hi hai। baithe-baithe manushya ka kya ho jaata hai। heart fail ho jaate hain। manushya ka koi bharosa nahin। satayug mein thode hi aise hoga। vahaan to kaaya kalpatru samaan hoti hai, yogbal se। ab tum bachchon ko baap mila hai, kehte hain is duniya mein tumko rehna nahin hai। yeh chhi-chhi duniya hai। ab to yogbal se apna shrringaar karna hai। vahaan to bachche bhi yogbal se hote hain। vikaar ki baat hi vahaan nahin hoti। yogbal se tum saare vishwa ko paavan banaate ho to baaki kya badi baat hai। in baaton ko bhi vahi samjhenge jo apne gharaane ke honge। baaki to sabko shantidham mein jaana hai, woh to hai ghar। parantu manushya usko ghar bhi nahin samajhte hain। vo to kehte hain ek aatma jaati hai, doosri aati rehti hai। srishti vriddhi ko paati jaati hai। rachayita aur rachna ko tum jaante ho, isliye koshish karte ho auron ko samjhaane ki। yeh samajhkar ki baba ka student ban jaae, sab kuchh jaan jaae, khushi mein aa jaae। ham to ab amarlok mein jaate hain। aadhaakalpa to jhoothi kathaayen suni hain। ab to bahut khushi honi chaahiye - amarlok mein ham jaayenge। is mrityulok ka abhi ant hai। ham khushi ka khajaana yahaan se bharkar jaate hain। to is kamaai karne mein, jholi bharne mein achhi reeti lag jaana chaahiye। time vesta nahin karna chaahiye। bas, abhi to hamko auron ki service karni hai, jholi bharni hai। baap sikhlaate hain, merciful kaise bano? andhon ki laathi bano। yeh savaal to koi sannyaasi, vidvaan aadi poochh nahin sakte। unko kya pata svarga kahaan, narka kahaan hota hai। bhal kitne bhi bade-bade position vaale hain, commander chief aeroplanes ke hain, commander chief ladaai ke hain, steamer ke hain, lekin tumhaare aage yeh sab kya hain! tum jaante ho baaki thoda samay hai। svarga ka to koi ko pata hi nahin। is samay to sab taraph maaraamaari chal rahi hai, phir unhon ko aeroplanes athva lashkar aadi ki darkaar nahin rahegi। yeh sab khalaas ho jaayenge। baaki thode manushya rahenge। yeh battiyaan, aeroplane aadi rahenge parantu duniya kitni chhoti rahegi, bhaarat hi rahega। jaise model chhota banaate hain na। aur koi ki bhi buddhi mein nahin hoga ki maut aakhreen kaise aana hai। tum to jaante ho maut saamne khada hai। woh kehte hain ham yahaan baithe hi bombs chhodenge। jahaan girega sab khatma ho jaayenge। koi lashkar aadi ki darkaar nahin hai। ek-ek aeroplane bhi karodon kharcha kha jaata hai। kitna sona sabke paas rehta hai। tons ke tons sona hai, woh sab samudra mein chala jaayega।

yeh saara raavan raajya ek island hai। anginat manushya hain। tum sab apna raajya sthaapan kar rahe ho। to service mein busy rehna chaahiye। kahaan baadh aadi hoti hai to dekho kaise busy ho jaate hain। sabko khaana aadi pahunchaane ki service mein lag jaate hai। paani aata hai to pahle se hi bhaagna shuru karte hain। to vichaar karo sab kaise khatma honge। srishti ke all-round saagar hai। vinaash hoga to jalmai ho jaayegi, paani hi paani। buddhi mein rehta hai hamaara raajya tha to yeh baambe-karaachi aadi to the nahin। bhaarat kitna chhota jaakar rahega, so bhi meethe paani par। vahaan kuen aadi ki darkaar nahin। paani bada svachchha peene ka rehta hai। nadiyon par to khelpaal karte hain। gandagi ki koi baat nahin। naam hi hai svarga, amarlok। naam sunkar hi dil hoti hai jaldi-jaldi baap se poora padhkar varsa le leven। padhkar aur phir padhaaven। sabko paigaam den। kalpa pahle jinhonne varsa liya hai woh le lenge। purooshaartha karte rehte hain kyonki bichaare baap ko nahin jaante hain। baap kehte hain pavitra bano, jinko hatheli par bahishta milega woh kyon nahin pavitra rahenge। bolo, ham kyon nahin ek janma pavitra banenge, jabki humein vishwa ki baadshaahi milti hai। bhagvaanuvaach - tum is antim janma mein pavitra banenge to pavitra duniya ke maalik banenge, 21 janma ke liye। sirf yeh ek janma meri shreemat par chalo। rakshaabandhan bhi iski nishaani hai। to kyon nahin ham pavitra rah sakenge। behad ka baap guarantee karte hain। baap ne bhaarat ko svarga ka varsa diya tha, jisko sukhdhaam kehte hain। apaar sukh the, yeh hai duhkhadhaam। ek koi bade ko tum aise samjhaao to sab sunte rahenge। yog mein rah bataao to sabko time aadi hi bhool jaae। koi kuchh kah na sake। 15-20 minute ke badle ghanta bhi sunte rahen। parantu woh taakat chaahiye। deh-abhimaan nahin hona chaahiye। yahaan to service hi service karni hai, tab hi kalyaan hoga। raaja banna hai to praja kahaan banaai hai। aise hi baap thode hi maathe par paag rakh denge। praja double sirtaaj banti hai kya? tumhaari em object hi hai double sirtaaj banne ki। baap to bachchon ko hullaas dilaate hain। janma-janmaantar ke paap sir par hain, woh yogbal se hi kat sakte hain। baaki is janma mein kya-kya kiya hai woh to tum samajh sakte ho na। paap kaatne ke liye yog aadi sikhaaya jaata hai। baaki is janma ki to koi baat nahin। tamopradhaan se satopradhaan banne ki yukti baap baith batlaate hain, baaki kripa aadi to jaakar saadhuon se maango। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) amarlok mein jaane ke liye sangam par khushi ka khajaana bharna hai। time vesta nahin karna hai। apni jholi bhar-kar merciful ban andhon ki laathi banna hai।

2) hatheli par bahishta lene ke liye pavitra zaroor banna hai। svayan ko satopradhaan banaane ki yuktiyaan rach apne oopar aapehi kripa karni hai। yogbal jama karna hai।

vardaan:- hazoor ko sada saath rakh combined swaroop ka anubhav karne vaale vishesh paartadhaari bhav

bachche jab dil se kehte hain baba to dilaaraam haazir ho jaata hai, iseelie kehte hain hajoor haazir hai। aur vishesh aatmaayen to hain hi combined। log kehte hain jidhar dekhte hain udhar tu hi tu hai aur bachche kehte hain ham jo bhi karte hain, jahaan bhi jaate hain baap saath hi hai। kaha jaata hai karnakraavanhaar, to karanhaar aur karaavanhaar combined ho gaya। is smriti mein rahkar part bajaane vaale vishesh paartadhaari ban jaate hain।

slogan:- svayan ko is puraani duniya mein guest samajhkar raho to puraane sanskaaron aur sankalpon ko get out kar sakenge।