Murli du jour du dimanche 11 août 2024

11-08-24 praatahmurli om shanti ''avyakt-baapdaada'' revise 04-02-2001 madhuban

samay pramaan svaraajya adhikaari ban sarva roohaani saadhan teevragti se kaarya mein lagaao

aaj baapdaada vishwa ke sarva taraph ke apne svaraajya adhikaari bachchon ki raajya sabha dekh rahe hain। har ek svaraajya adhikaari, pavitrata ki light ke taajdhaari, adhikaar ki smriti ke tilakdhaari, apne-apne bhrikuti ke akaal takhtansheen dikhaai de rahe hain। is samay jitna svaraajya adhikaar anubhav karte ho utna hi bhavishya vishwa raajya adhikaari hai hi hain। “main kaun'' va “mera bhavishya kya?'' woh ab ke svaraajya ki sthiti dvaara svayan hi dekh sakte ho।

baapdaada har ek bachche ke sada svaraajya ki sthiti ko dekh rahe the। nirantar har karma karte hue, laukik alaukik kaarya karte hue svaraajya adhikaari ka nasha kitna samay aur kis percentage mein rehta hai? kyonki kai bachche apne svaraajya ke smriti ko sankalp roop mein yaad karte hain - main aatma adhikaari hoon, ek hai sankalp mein sochna। baar-baar smriti ko refresh karna - main hoon। doosra hai - adhikaar ke swaroop mein svayan ko anubhav karna aur in karmendriyon roopi karmachaari man-buddhi-sanskaar roopi sahayogi saathiyon par raajya karna, adhikaar se chalaana। jaise aap sabhi bachche anubhvi ho ki har samay baapdaada shreemat par chala raha hai aur aap sabhi shreemat pramaan chal rahe ho। chalaane vaala chala raha hai, chalne vaale chal rahe ho। aise he svaraajya adhikaari aatmaayen kya aapke svaraajya mein aapki sarva karmendriyaan arthaat karmachaari aapke man-buddhi-sanskaar sahayogi saathi sabhi aapke order mein chal rahe hain? ek do karmendriyaan thoda naaz-nakhda to nahin dikhaati? aapka raajya law aur order ke bajaae lav aur law mein yathaartha reeti se chal raha hai? kya samajhte hain? chal rahe hain ya thodi aanaakaani karte hain? jab kehte hi ho mera haath, mere sanskaar, meri buddhi, mera man, to mere ke oopar main ka adhikaar hai? ki kab mera adhikaari ban jaata, kab main adhikaari ban jaati? samay pramaan he svaraajya adhikaari abhi sada aur sahaj akaal takhtansheen bano tab hi anya aatmaon ko baap dvaara jeevan-mukti aur mukti ka adhikaar teevragti se dila sakenge।

samay ki pukaar ab teevragti aur behad ki hai। chhoti si rehearsal dekhi, suni। ek hi saath behad ka naksha dekha na! chillaana bhi behad, marna bhi behad, marne vaalon ke saath-saath jeene vaale bhi apne jeevan mein pareshaani se mar rahe hain। aise samay par aap svaraajya adhikaari aatmaon ka kya kaarya hai? check karo jaise sthool saadhnon ke liye bataate hain bhookampa aave to yeh karna, toofaan aave to yeh karna, aag lage to yeh karna, vaise aap shreshtha aatmaon ke paas jo saadhan hain - sarva shaktiyaan, yog ka bal, sneh ka chumbak, yeh sab saadhan samay ke liye taiyaar hain? sarva shaktiyaan hain? kisko shanti ki shakti chaahiye lekin aap aur koi shakti de do to woh santushta hogi? jaise kisko paani chaahiye aur aap usko 36 prakaar ke bhojan de do to kya woh santushta hoga? to ever ready banna sirf apne ashareeri banne ke liye nahin। woh to banna hi hai। lekin jo saadhan svaraajya adhikaar se praapta hue hain, parmaatma varse mein mile hain woh sab adhikaar ever ready hain? aise to nahin jaise samaachaaron mein sunte ho ki jo machinery is samay chaahiye woh foreign se aane ke baad kaarya mein lagaaya gaya। to saadhan ever ready nahin rahe na! sarva saadhan samay par kaarya mein nahin laga sake। kitna nuksaan ho gaya!

to he vishwa kalyaani, vishwa parivartak aatmaayen sarva saadhan ever ready hain? sarvashaktiyaan aapke order mein hain? order kiya arthaat sankalp kiya - nirnay shakti। to second se bhi kam samay mein nirnay shakti haazir ho jaae, kahe svaraajya adhikaari haajir। aise order mein hai? ya ek minute apne mein laane mein lagega phir doosre ko de sakenge? agar samay par kisko jo chaahiye woh nahin de sake to kya hoga? to sabhi bachchon ke dil mein yeh sankalp to chal hi raha hai - aage kya hona hai aur kya karna hai? hona to bahut kuchh hai। sunaaya na yeh to rehearsal hai। yeh 6 maas ke taiyaari ki ghanti baji hai, ghanta nahin baja hai। pahle ghanta bajega, phir nagaada bajega। darenge? thoda-thoda darenge? shakti swaroop aatmaon ka kya swaroop dikhaaya hai? shaktiyon ko (shakti swaroop mein paandav bhi aa gaye to shaktiyaan bhi aa gai) sada shaktiyon ko koi ko 4 bhuja, koi ko 6 bhuja, koi ko 8 bhuja, koi ko 16 bhuja, saadhaaran nahin dikhaate hain। yeh bhujaayen sarva shaktiyon ka soochak hain isliye sarvashaktivaan dvaara praapta apni shaktiyon ko emerge karo। iske liye yeh nahin socho ki samay aane par emerge ho jaayengi lekin saare din mein svayan prati bhinna-bhinna shaktiyaan use karke dekho। sabse pahla abhyaas svaraajya adhikaar saare din mein kahaan tak kaarya mein lagta hai? main to hoon hi aatma maalik, yeh nahin। maalik hoke order karo aur check karo ki har karmendriyaan mujh raaja ke lav aur law mein chalte hain? order karen manamnaabhav aur man jaaye negative aur vesta thoughts mein, kya yeh lav aur law raha? order karen madhurta swaroop banna hai aur samasya anusaar, paristhiti anusaar krodh ka mahaaroop nahin lekin sookshm roop mein bhi aavesh va chidchidaapan aa raha hai, kya yeh order hai? order mein hua?

order karen humein nirmaan banna hai aur vaayumandal anusaar socho kahaan tak dabkar chalenge, kuchh to dikhaana chaahiye। kya mujhe hi dabna hai? mujhe hi marna hai! mujhe hi badalna hai? kya yeh lav aur order hai? isliye vishwa ke oopar, chillaane vaale duhkhi aatmaon ke oopar raham karne ke pahle apne oopar raham karo। apna adhikaar sambhaalo। aage chal aapko chaaron or sakaash dene ka, vibration dene ka, mansa dvaara vaayumandal banaane ka bahut kaarya karna hai। pahle bhi sunaaya ki abhi tak jo jo jahaan tak seva ke nimitta hain, bahut achhi ki hai aur karenge bhi lekin abhi samay pramaan teevragti aur behad seva ki aavashyakta hai। to abhi pahle har din ko check karo svaraajya adhikaar kahaan tak raha? aatma maalik hoke karmendriyon ko chalaaye। smriti swaroop rahe ki main maalik in saathiyon se, sahayogiyon se kaarya kara raha hoon। swaroop mein nasha rahe to svatah hi yeh sab karmendriyaan aapke aage ji haajir, ji hajoor svatah hi karengi। mehnat nahin karni padegi। aaj vyartha sankalp ko mitaao, aaj sanskaar ko mitaao, aaj nirnay shakti ko pragat karo। ek dhak se sab karmendriyaan aur man-buddhi-sanskaar jo aap chaahte hain, woh karengi। abhi kehte hain na - baba chaahte to yeh hain lekin abhi itna nahin hua hai… phir kahenge jo chaahte hain woh ho gaya, sahaj। to samjha kya karna hai? apne adhikaar ki siddhiyon ko kaarya mein lagaao। order karo sanskaar ko। sanskaar aapko kyon order karta? sanskaar nahin mitta, kyon? bandha hua hai sanskaar aapke order mein। maalikpan laao। to auron ke seva ki bahut-bahut-bahut-bahut aavashyakta hai। yeh to kuchh bhi nahin hai, bahut naazuk samay aana hi hai। aise samay par aap udti kala dvaara pharishta ban chaaron or chakkar lagaate, jisko shanti chaahiye, jisko khushi chaahiye, jisko santushtata chaahiye, pharishte roop mein sakaash dene ka chakkar lagaayenge aur woh anubhav karenge। jaise abhi anubhav karte hain na, paani mil gaya bahut pyaas miti। khaana mil gaya, tent mil gaya, sahaara mil gaya। aise anubhav karenge pharishton dvaara shanti mil gai, shakti mil gai, khushi mil gai। aise antahvaahak arthaat antim sthiti, powerful sthiti aapka antim vaahan banega। aur chaaron or chakkar lagaate sabko shaktiyaan denge, saadhan denge। apna roop saamne aata hai? emerge karo। kitne pharishte chakkar laga rahe hain! sakaash de rahe hain, tab kahenge jo aap ek geet bajaate ho na - shaktiyaan aa gai... shaktiyon dvaara hi sarvashaktivaan svatah hi siddha ho jaayega। suna।

jo ab tak kiya, jo chala woh samay pramaan achhe te achha hua। ab aage aur achhe te achha hona hi hai। achha। ghabraaye to nahin। samaachaar sunke, dekhke ghabraaye? yeh to kuchh nahin hai। aapke paas sab kuchh hai aur yeh kuchh bhi nahin hai। lekin phir bhi aapke bhaai bahinen hain isliye unhon ki seva karna bhi achha hai। abhi raajya adhikaar, akaaltakhta mein baithe raho, neeche oopar nahin aao phir dekho government ko bhi saakshaatkaar hoga - yahi hai, yahi hai, yahi hai। takhta se utro nahin, adhikaar chhodo nahin, adhikaar har samay chalaao, sva par, doosron par nahin। doosre par nahin chalaana। achha।

naye-naye bachche bhi bahut aaye hain। vriddhi to honi hi hai। jo is kalpa mein, is baari pahle baari aaye hain woh haath uthaao। achha kiya। himmat rakhke pahunch gaye to pahunch gaye na। jo baith gaye, woh baith gaye aur hua kuchh bhi nahin। himmat bahut aavashyak hai। koi bhi kaarya mein himmat hai to samjho saphalta hai। himmat kam saphalta kam, isliye himmat aur nirbhay, bhay mein nahin aana, yeh kya ho raha hai। mar raha hai koi to woh mar raha hai, bhay aapko aa raha hai। nirbhay। theek hai usko shanti ka sahayog do, us aatma ko merciful ki bhaavna se sahayog do, bhay mein nahin aao। bhay sabse bade mein bada bhoot hai। aur bhoot nikal sakte hain, bhay ka bhoot bahut mushkil nikalta hai। kisi bhi baat ka bhay, sirf marne vaalon ka bhay nahin, kai baaton ka bhay hota hai। jo anek prakaar ke bhay hain, apni kamjori ke kaaran bhi bhay hota hai। un sabmen nirbhay banne ka jo sahaj saadhan hai, woh hai sada saaph dil, sachchi dil। to bhay kabhi nahin aayega। zaroor koi dil mein baat samaai hui hoti hai jisse bhay hota hai। saaph dil, sachchi dil to saaheb raazi aur sarva bhi raazi।

achha - naye-naye aane vaale bachchon ko, nayi jeevan mein parmaatma bhaagya ko praapta karne ki mubaarak ho। achha। foreign ke bhi bahut aaye hain। foreign group haath uthaao। (kareeb 700 aaye hain) bhale padhaare। welcome।

mahaaraashtra, aandhrapradesh ki seva hai:- mahaaraashtra vaale haath uthaao। (4 hajaar aaye hain) to 4 hajaar ko 4 padam baar mubaarak ho। achha kiya hai, har group ki apni-apni seva ki shobha hai kyonki seva ke pahle to parivaar ke saamne najdeek aane ka golden chance milta hai। chance milta hai na? nahin to kaun poochhega mahaaraashtra hai ya aandhra hai? lekin vishesh seva ka chance lene se parivaar ke, daadiyon ke, daadaaon ke saamne aate hain। aur khushi bhi hoti hai, kyon khushi hoti hai kaaran? dekho centre par seva karte ho kitnon ki? chalo jyaada mein jyaada 50-100, aur yahaan jab seva karte ho to hajaaron ki seva karte ho aur hajaaron ki seva ke return mein jo sabki duaayen milti hain na, bahut achhi seva ki, bahut achhi seva ki। yeh duaayen nikalti hain। woh duaayen ek to vartamaan samay mein khushi dilaati hain aur doosra jama bhi hoti hain। double phaayda hai isliye jinhonne seva ki to seva ka meva khushi bhi mili aur jama ka khaata bhi jama hua। double phaayda ho gaya na! abhi majority sab zone achha seekh bhi gaye hain, abhyaas ho gaya hai। achha kiya, mubaarak hai। (100 kumaariyon ka samarpan hai) achha - 100 kumaariyaan utho। sabhi dekho। jahaan bhi T.vi. hai vahaan dikhaao। achha hai, vaise to samarpan to hain hi। lekin samarpan ka pakka stamp lagna hai। yeh almighty government ka stamp mit nahin sakega। pakka hai na! pakka! pakka? jo samajhte hain bahut-bahut-bahut pakka hai woh aise haath hilaao। bahut pakka? mahaaraashtra hai। koi mahaanta to dikhaayega na! bahut achha, baapdaada ke taraph se bahut-bahut arab-kharab baar mubaarak ho, badhaai ho। achha।

abhi ek second mein pharishta ban vishesh jahaan yeh arth quake hui hai, un chaaron taraph pharishta ban udti kala dvaara shanti, shakti aur santushtata ki sakaash phailaake aao। chakkar lagaakar aao ek second mein। sabke sab chakkar lagaake aao। achha। (drill)

chaaron or ke desh aur videsh ke pharishte roop mein viraajmaan, sva adhikaari bachchon ko sada lav aur law se apne sahayogi, sookshm va sthool sahayogi saathiyon ko chalaane vaale, sada baapdaada dvaara praapta roohaani saadhnon ko ever ready banaane vaale, main aatma raaja ban raajya adhikaar ka anubhav karne vaale, sada udti kala dvaara pharishte roop se chaaron or sakaash dene vaale shakti swaroop aatmaon ko sada saaph dil, sachchi dil dvaara nirbhay, niraakaari sthiti mein anubhav karne vaale vishwa kalyaani, vishwa parivartak aatmaon ko baapdaada ka yaadapyaar aur namaste।

daadiyon se:- aap sabko khushi ho rahi hai na, hamaari nimitta daadiyaan, daade saamne aaye hain to khushi hai na! ki aap bhi aane chaahte hain? aur hi saamne achha hai। saamne vaalon ko jyaada dekhte hain। yahaan to aise karna padega। aur saamne vaalon ko to baar-baar dekh rahe hain।

achha (jagdeesh bhaai se) sabhi theek hai। sabse achhi baat hai apne ko shareer sahit baap ke havaale kar liya। vaise to baap ko apna sab de diya hai। de diya hai na ki dena hai? aap logon ne, nimitta aatmaon ne to diya hai, tab aapko saakaar roop mein follow kar rahe hain। saakaar roop mein mahaarthiyon ko dekh sabko shakti milti hai। to yeh saara group kya hai? shakti ka srot hai। hai na! (daadi jaanki kah rahi hain chalaane vaala bahut ramazbaaj hai) ramajbaaj nahin hota to itni vriddhi kaise hoti। baap kehte hain chalne vaale bhi baap se jyaada chatursujaan hain।

achha, sabhi sada ek shabd dil se gaate rehte “mera baba''। yeh geet gaana sabko aata hai na! mera baba, yeh geet gaana aata hai? sahaj hai na! mera kaha aur apna bana liya। baap kehte hain, bachche baap se bhi hoshiyaar hain। kyon? bhagwan ko baandh liya hai। (daadi jaanki se) baandha hai na! to baandhane vaale shaktishaali hue ya bandhane vaala? kaun shaktishaali hue? baandhane vaale ne sirf tareeka aapko suna diya ki aise baandho to bandh jaaoonga। achha, om shanti।

vardaan:- svayan ko nimitta samajh vyartha sankalp va vyartha vritti se mukta rahne vaale vishwa kalyaankaari bhav

main vishwa kalyaan ke kaarya arth nimitta hoon - is jimmavaari ki smriti mein raho to kabhi bhi kisi ke prati va apne prati vyartha sankalp va vyartha vritti nahin ho sakti। jimmevaar aatmaayen ek bhi akalyaankaari sankalp nahin kar sakte, ek second bhi vyartha vritti nahin bana sakte kyonki unki vritti se vaayumandal ka parivartan hona hai। isliye sarva ke prati unki shubh bhaavna, shubh kaamna svatah rehti hai।

slogan:- agyaan ki shakti krodh hai aur gyaan ki shakti shanti hai।