Murli du jour du vendredi 23 août 2024

23-08-2024 praatahmurli om shanti "baapdaada"' madhuban

“meethe bachche - duhkh harta sukh karta baap ko yaad karo to tumhaare sab duhkh door ho jaayenge, ant mati so gati ho jaayegi''

prashn:- baap ne tum bachchon ko chalte-phirte yaad mein rahne ka direction kyon diya hai?

uttar:- 1. kyonki yaad se hi janma-janmaantar ke paapon ka bojh utrega, 2. yaad se hi aatma satopradhaan banegi, 3. abhi se yaad mein rahne ka abhyaas hoga to ant samay mein ek baap ki yaad mein rah sakenge। ant ke liye hi gaayan hai - antakaal jo stri simre… 4. baap ko yaad karne se 21 janmon ka sukh saamne aa jaata hai। baap jaisi meethi cheez duniya mein koi nahin, isliye baap ka direction hai - bachche, chalte-phirte mujhe hi yaad karo।

om shanti। kiski yaad mein baithe ho? yeh hai pyaare te pyaara sambandh ek ke saath, jo sabko duhkhon se chhudaane vaala hai। baap bachchon ko dekhte hain to sab paap katte jaate hain। aatma satopradhaan taraph ja rahi hai। duhkh to athaah hai na। gaate bhi hain - duhkh harta, sukh karta। ab baap tumko sach-sach sab duhkhon se chhudaane aaye hain। svarga mein duhkh ka naam-nishaan nahin hota। aise baap ko yaad karna bahut zaroori hai। baap ka bachchon ke prati pyaar hota hai na, yeh to tum jaante ho baap ka kin-kin bachchon par pyaar hai। bachchon ko samjhaaya hai, apne ko aatma samjho, deh nahin samjho। jo achhe ratna hain woh baap ko chalte-phirte yaad karte hain, yeh bhi kyon kehte hain? kyonki tumhaara janma-janmaantar se paapon ka ghada bhara pada hai। to is yaad ki yaatra se hi tum paap aatma se punya aatma ban jaayenge। yeh bhi tum bachche jaante ho ki yeh puraana tan hai। duhkh aatma ko hi milta hai। shareer ko chot lagne se aatma ko duhkh feel hota hai। aatma kehti hai main rogi, duhkhi hoon। yeh hai duhkh ki duniya। kahaan bhi jaao duhkh hi duhkh hai। sukhdhaam mein to duhkh ho na saken। duhkh ka naam liya to goya tum duhkhadhaam mein ho। sukhdhaam mein to zara bhi duhkh nahin। samay bhi baaki thoda hai, ismen poora purooshaartha karna hai baap ko yaad karne ka। jitna yaad karte rahenge utna satopradhaan bante jaayenge। purooshaartha karke avastha aisi jamaani hai jo tumko pichhaadi mein sivaae ek baap ke kuchh yaad na aaye। ek geet bhi hai - antakaal jo stri simre....... yeh antakaal hai na। puraani duniya duhkhadhaam ka ant hai। abhi tum sukhdhaam chalne ka purooshaartha karte ho। tum shoodra se brahman bane ho। yeh to yaad rehna chaahiye na। shoodra ko hai duhkh, ham duhkh se nikal phir ab choti par chadh rahe hain to ek baap ko yaad karna hai। most beloved baap hai। unse meethi cheez kaun-si hoti hai? aatma us parampita paramatma ko hi yaad karti hai na। sab aatmaon ka baap hai, unse meethi is duniya mein koi cheez ho na sake। itne sab dher bachche hain, kitne mein yaad aate honge? second mein। achha, saare srishti ka chakra kaise phirta hai? woh bhi tum bachchon ki buddhi mein arth sahit hai। jaise koi drama dekhkar aate hain। koi poochhenge drama yaad hai? haan kahne se hi saara buddhi mein aa jaata hai, shuru se lekar ant tak। baaki woh varnan karke sunaane mein to samay lagega। baba behad ka baba hai, usko yaad karne se hi 21 janmon ka sukh saamne aa jaata hai। baap se yeh varsa milta hai। second mein bachchon ko baap ka varsa saamne aa jaata hai। bachcha paida hua, baap jaan jaate hain vaaris ne janma liya। saari milkiyat yaad aa jaayegi। tum bhi akele alag-alag bachche ho, alag-alag varsa milta hai na। alag-alag yaad karte ho। ham behad baap ke vaaris hain। satayug mein to ek hi bachcha hota hai। woh saari milkiyat ka vaaris thahra। bachchon ko baap mila aur vishwa ka maalik bana, second mein। deri nahin lagti। baap kehte hain tum apne ko aatma samjho। female mat samjho। aatma to bachcha hai na। baba kehte hain humein sab bachche yaad padte hain। aatmaayen sab bhaai-bhaai hain। jo bhi sab dharma vaale aate hain, woh kehte sab dharma vaale bhaai-bhaai hain। parantu samajhte nahin। abhi tum samajhte ho ki ham baba ke most beloved bachche hain। baap se poora behad ka varsa zaroor milega। kaise lenge? woh bhi tum bachchon ko second mein yaad aa jaata hai। ham satopradhaan the phir tamopradhaan banen, ab phir satopradhaan banna hai। tum jaante ho baba se hamko svarga ke sukhon ka varsa lena hai।

baap kehte hain apne ko aatma samjho। deh to vinaashi hai। aatma hi shareer chhodkar chali jaati hai। phir jaakar doosra naya shareer garbha mein leti hai। putla jab taiyaar hota hai tab aatma usmein pravesh karti hai। parantu woh to hai raavan ke vash। vikaaron ke vash jel mein jaate hain। vahaan to raavan hota hi nahin, duhkh ki baat hi nahin। jab boodhe hote hain tab maaloom padta hai - abhi yeh shareer chhod ham doosre shareer mein jaakar pravesh karenge। vahaan to dar ki koi baat nahin rehti hai। yahaan to kitna darte hain। vahaan nidar hote hain। baap tum bachchon ko apaar sukhon mein le jaate hain। satayug mein apaar sukh hain, kaliyug mein apaar duhkh hain isliye ise kehte hi hain duhkhadhaam। baap to koi takleeph nahin dete hain। bhal grihastha vyavhaar mein raho, bachchon ko sambhaalo, sirf baap ko yaad karo। guru gosaai sabko chhodo। main to sab gurooon se bada hoon na। woh sab meri rachna hain। sivaae mere aur koi ko patit-paavan nahin kahenge। kya brahma, vishnu, shankar ko patit-paavan kahenge? nahin। devtaaon ko bhi nahin kah sakte sivaae mere। abhi tum bachche ganga ko patit-paavni kahenge? yeh paani ki nadiyaan to sadaiv bahti hain। ganga, brahmaputra aadi bhi to chali aati hain। inmen to snaan karte hi rehte hain। barsaat padti to flood aa jaati hai। yeh bhi duhkh hua na। athaah duhkh hain, baadh mein dekho kitne manushya mar gaye। satayug mein duhkh ki baat nahin, jaanavron ko bhi duhkh nahin hota hai, unki bhi akaale mrityu nahin hoti। yeh drama hi aise bana hua hai। bhakti mein gaate hain - baba, aap jab aayenge to ham aapke hi banenge। aate to hain na। duhkhadhaam ke ant aur sukh-dhaam ke aadi ke beech mein hi aayenge, parantu yeh kisko pata nahin। srishti ki aayu kitni hoti hai, yeh bhi nahin jaante। baap kitna sahaj batlaate hain। aage tum jaante the kya ki srishti chakra ki aayu 5 hazaar varsha hai? woh to laakhon varsha kah dete hain। abhi baap ne samjhaaya hai 1250 varsha ka har yug hota hai। svaastika mein poore 4 bhaag hote dikhaate hain। zara bhi farka nahin hota। vivek bhi kehta hai accurate hisaab hona chaahiye। puri mein bhi chaaval ka haanda chadhaate hain, to poore 4 hisse aapehi ho jaate hain - aisi yukti banaai hui hai। vahaan chaaval bahut khaate hain। jagannaath kaho va shreenaath kaho baat ek hi hai। donon hi kaale dikhaate hain। shreenaath ke mandir mein ghi ke bhandaar hote hain। sab ghi ki tali hui achhi-achhi cheezen milti hain। baahar mein dukaan lag jaate hain। kitna bhog lagta hoga। sab yaatri jaakar dukaandaaron se lete hain। jagannaath mein phir chaaval hi chaaval hote hain। woh jagat naath, woh shreenaath। sukhdhaam aur duhkhadhaam ko dikhaate hain। shreenaath sukhdhaam ka tha, woh duhkhadhaam ka। kaale to is samay ban gaye hain - kaam chita par chadhkar। jagannaath ko sirf chaaval ka bhog lagaate hain। inko gareeb, unko saahookaar dikhaate hain। gyaan ka saagar ek baap hi hai। bhakti ko kaha jaata hai agyaan, unse kuchh milta nahin। vahaan sirf guru logon ki aamadni bahut hoti, hoshiyaar hoga, unse koi seekhega to woh kahenge yeh hamaara guru hai। usne hamko yeh sikhaaya hai। woh sab jismaani hain, janma lene vaale।

abhi tumhaare saath kaun hai? vichitra baap। woh kehte hain yeh mera shareer nahin hai। yeh tumhaare is daada ka shareer hai, jisne poore 84 janma liye hain, inke bahut janmon ke ant mein main ismen pravesh hota hoon, tumko sukhdhaam le jaane, isko gaoomukh bhi kah dete hain। gaoomukh par kitna door-door se aate hain। yahaan bhi gau mukh hai। pahaad se paani to zaroor aayega। kuen mein bhi roz-roz paani pahaad se aata hai, woh kabhi banda nahin hota। paani aata hi rehta hai। kahaan se bhi naala nikla to unko ganga jal kah denge। vahaan jaakar snaan karte hain। ganga jal samajhte hain lekin patit se paavan is paani se thode hi banenge। baap kehte hain patit-paavan main hoon, he aatmaayen maamekam yaad karo। deh sahit deh ke sabhi sambandh chhod apne ko aatma samajhkar mujhe yaad karo to tumhaare janma-janmaantar ke paap bhasma ho jaayen। baap tumko janma-janmaantar ke paapon se chhudaate hain। is samay to duniya mein sabhi paap karte rehte hain, karmabhog hai na। agle janma mein paap kiya hai, 63 janma ka hisaab-kitaab hai। thodi-thodi kala kam hoti jaati hai। jaise chandrama ki kalaayen kam hoti hain na। yeh phir hai behad ka din-raat। abhi saari duniya par, usmein bhi khaas bhaarat par raahu ki dasha baithi hui hai। raahu ka grahan laga hua hai। abhi tum bachche shyaam se sundar ban rahe ho isliye shreekrishna ko bhi shyaam-sundar kehte hain। sachmuch kaala bana dete hain। kaam chita par chadhe hain to nishaani dikha di hai। parantu manushyon ki kuchh buddhi chalti nahin। ek saanvara, doosra gora kar dete hain। abhi tum gora banne ka purooshaartha kar rahe ho। satopradhaan banne ka purooshaartha karenge tab to banenge na, ismen takleeph ki baat nahin। yeh gyaan abhi tum sunte ho phir praayahlop ho jaata hai। bhal geeta padhkar sunaayenge parantu yeh gyaan to suna na saken। woh hua bhakti maarga ke liye pustak। bhakti maarga ke liye dher saamagri hai, dher shaastra hain, koi kya padhte, koi kya karte। raam ke mandir mein bhi jaate hain, raam ko bhi kaala kar diya hai। vichaar karna chaahiye ki kaala kyon banaate hain? kaali kalkatte vaali bhi hai, maa-maa kah hairaan hote hain, sabse kaali woh hai aur bahut bhayaanak dikhaate hain। unko phir maata kehte hain। tumhaare yeh gyaan baan, gyaan kataari aadi hain। to unhon ne phir hathiyaar de diye hain। vaastav mein kaali par pahle manushyon ki bali chadhaate the। abhi government ne banda kar diya hai। aage sindh mein devi ka mandir nahin tha। jab bomb phata to ek brahman bola kaali ne humein aavaaz diya hai - hamaara mandir hai nahin, jaldi banaao, nahin to aur bhi bam phatenge। bas, dher paise ikatthe ho gaye, mandir ban gaya। abhi dekho dher mandir hain। kitni jagah bhatakte hain। baap tumko in sab baaton se chhudaane ke liye samjhaate hain, kiski glaani nahin karte hain। baap drama samjhaate hain। yeh srishti chakra kaise bana hua hai। jo kuchh tumne dekha woh phir hoga। jo cheez nahin hai woh banti hai। tum samajh gaye ho hamaara raajya tha, woh hamne ganvaaya hai। ab phir baap kehte hain - bachche, nar se naaraayan banna hai to purooshaartha karo। bhakti maarga mein tum bahut kathaayen sunte aaye ho। amraktha suni phir koi amar banen? kisko gyaan ka teesra netra mila? yeh baap baithkar samjhaate hain। in aankhon se kuchh bhi evil na dekho। civil aankhon se dekho, criminal se nahin। is puraani duniya ko na dekho। yeh to khalaas ho jaani hai। baap kehte hain - meethe-meethe bachchon, ham tumko raajya dekar jaate hain 21 janma ke liye। vahaan aur koi ka raajya hota nahin। duhkh ka naam nahin, tum bade sukhi aur dhanvaan hote ho। yahaan to manushya kitna bhookh marte rehte hain। vahaan to saare vishwa mein tum raajya karte ho। kitni thodi jameen chaahiye। chhota bageecha phir vriddhi hote-hote kaliyug ant tak kitna bada ho jaata hai aur 5 vikaaron ki praveshta ke kaaran woh kaanton ka jangal ban jaata hai। baap kehte hain kaam mahaashatru hai inse tum aadi, madhya, ant duhkh paate ho। gyaan aur bhakti ko bhi ab tumne samjha hai। vinaash saamne khada hai, isliye ab jaldi-jaldi purooshaartha karna hai। nahin to paap bhasma nahin honge। baap ki yaad se hi paap katenge। patit-paavan ek baap hi hai। kalpa pahle jinhonne purooshaartha kiya hai woh karke hi dikhaayenge। thande mat bano। sivaae ek baap ke aur koi ko yaad na karo। sab duhkh dene vaale hain। jo sada sukh dene vaala hai, unko yaad rakho, ismen gaphlat nahi karni hai। yaad nahin karenge to paavan kaise banenge? achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) in aankhon se evil (bura) nahin dekhna hai। baap ne jo gyaan ka teesra netra diya hai, us civil netra se hi dekhna hai। satopradhaan banne ka poora purooshaartha karna hai।

2) grihastha vyavhaar ko sambhaalte hue pyaari cheez baap ko yaad karna hai। avastha aisi jamaani hai jo antakaal mein ek baap ke sivaae doosra kuchh bhi yaad na aaye।

vardaan:- apni shreshtha vritti dvaara vishwa ka vaataavran parivartan karne vaale aadhaarmoorta bhav

aap bachche sirf apne jeevan ke liye aadhaar nahin ho lekin vishwa ki sarva aatmaon ke aadhaarmoorta ho। aapki shreshtha vritti se vishwa ka vaataavran parivartan ho raha hai। aapki pavitra drishti se vishwa ki aatmaayen aur prakriti donon pavitra ban rahi hain। drishti se srishti badal rahi hai। aapke shreshtha karmo se shreshthaachaari duniya ban rahi hai। abhi jab aap itni badi jimmevaari ke taajdhaari bante ho tab bhavishya mein taaj takhta milta hai।

slogan:- sarvashaktimaan baap ko apna saathi bana lo to koi bhi vighna aapko rok nahin sakta।