Murli du jour du samedi 24 août 2024

24-08-2024 praatahmurli om shanti "baapdaada"' madhuban

“meethe bachche - baap ne tumhein sangam par jo smritiyaan dilaai hain, uska simran karo to sada harshit rahenge''

prashn:- sada halke rahne ki yukti kya hai? kis saadhan ko apnaao to khushi mein rah sakenge?

uttar:- sada halka rahne ke liye is janma mein jo-jo paap hue hain, woh sab avinaashi surgeon ke aage rakho। baaki janma-janmaantar ke paap jo sir par hain uske liye yaad ki yaatra mein raho। yaad se hi paap katenge, phir khushi rahegi। baap ki yaad se aatma satopradhaan ban jaayegi।

om shanti। meethe-meethe roohaani bachchon ko roohaani baap samjhaate hain - tumko smriti aai hai ki ham aadi sanaatan devi-devta dharma ke the, ham raajya karte the, ham barobar vishwa ke maalik the। us samay doosra koi dharma nahin tha। hamne hi satayug se lekar janma lete 84 ka chakra poora kiya। saare jhaad ki smriti aai hai। ham devta the phir raavan raajya mein aa gaye to devi-devta kahlaane ke laayak na rahe isliye dharma hi doosra samajh liya। aur kiska bhi dharma badalta nahin hai। jaise Christ ka Christian dharma, buddha ka bauddha dharma hi chala aata hai। sabki buddhi mein hai buddha ne phalaane time dharma sthaapan kiya। hinduon ko apne dharma ka pata hi nahin hai ki hamaara hindu dharma kab se shuru hua, kisne banaaya? laakhon varsha kah dete। saare srishti chakra ka knowledge tum bachchon ko hi hai, isko kehte hain gyaan-vigyaan। unhonne vigyaan bhavan naam bhal rakha hai parantu baap uska arth samjhaate hain - gyaan aur yog, rachta aur rachna ke aadi, madhya, ant ka gyaan, abhi tum samajhte ho ki ham bhi nahin jaante the, naastik the। satayug mein to yeh gyaan ho nahin sakta। abhi tumko teacher ne padhaaya hai। padhkar tumko raajya-bhaagya milta hai kyonki tumko rahne ke liye nai srishti chaahiye। is puraani srishti mein to pavitra devi-devtaayen pair rakh na saken। baap aakar tumhaare liye puraani duniya ka vinaash kar nai duniya sthaapan karte hain। hamaare liye vinaash zaroor hona hai। kalpa-kalpaantar ham yeh part bajaate hain। baba poochhte hain aage kab mile ho? to kehte hain - baba, har kalpa milte hain, aap se raajya bhaagya lene। kalpa pahle bhi behad sukh ka raajya bhaagya mila tha। yeh sab baaten jo smriti mein aai hain, ab unka simran hona chaahiye, jisko baba svadarshan chakra kehte hain। ham pahle sato-pradhaan the। yeh bhi tumhein smriti aai ki harek aatma ko apna-apna part mila hua hai। ham aatma chhoti avinaashi hain, unmein part bhi avinaashi hai jo chalta hi rahega। yeh bani banaai ban rahi… ismen nai baat koi add va kat nahin ho sakti hai। koi bhi moksha ko pa nahin sakte। koi mukti maangate hain, mukti alag hai, moksha alag hai। yeh bhi smriti mein rakhna hai। smriti mein hoga to auron ko bhi smriti dilaayenge। tumhaara dhandha hi yeh hai। baap ne jo smriti mein laaya hai, woh phir auron ko bhi smriti dilaao tab oonch pad pa sakenge। oonch pad paane ke liye bahut mehnat karni hai। mukhya mehnat hai yog ki। yeh hai yaad ki yaatra, jo baap ke sivaae aur koi sikhla nahin sakte। abhi tum manushya se devta banne ki padhaai padhte ho। tum jaante ho ki ham phir se nai duniya mein jaayenge। uska naam hi hai amarlok। yeh hai mrityulok। yahaan to achaanak baithe-baithe maut aa jaata hai। vahaan mrityu ka naam-nishaan nahin kyonki aatma ko to vaastav mein kaal khaata nahin। koi mithaai ki cheez thode hi hai। drama anusaar jab samay hota hai to aatma chali jaati hai। jis samay jisko jaana hota hai, woh chala jaata hai। kaal koi pakadta nahin hai। aatma ek shareer chhod doosra leti hai। kaal kuchh bhi nahin hai। yeh to kathaayen baith banaai hain। woh hai amarlok, vahaan nirogi kaaya rehti hai। satayug mein bhaaratvaasiyon ki aayu bhi badi thi, yogi the। yogi aur bhogi ka pharka bhi ab maaloom padta hai। tumhaari aayu vriddhi ko pa rahi hai। jitna tum yog mein rahenge, utna paap bhasma honge aur pad bhi oonch milega, aayu bhi badi hogi। yatha raaja raani aayu poori kar shareer chhodte hain, praja ka bhi aisa hota hai। parantu pad ka pharka hai।

ab baap tumko kehte hain - svadarshan chakradhaari bachchon, yeh alankaar tumhaare hain। grihastha vyavhaar mein rehte kamal phool samaan tum rehte ho। sivaae tumhaare aur koi rah na saken। yeh bhi smriti aai hai ki is janma mein hamne kitne paap kiye hain isliye baba kehte hain woh sab avinaashi surgeon ke aage rakho to halke ho jaayenge। baaki janma-janmaantar ke paap jo sir par hain, uske liye yog mein rehna hai। yog se hi paap katenge aur khushi bhi rahegi। baap ki yaad se satopradhaan ban jaayenge। maaloom hai ki ham yaad se yeh banenge to kaun yaad nahin karega। parantu yeh yuddha ka maidaan hai, mehnat karni padti hai itna oonch pad paane ke liye। yeh bhi bachchon ko smriti aai hai ki behad ke baap se ham oonch te oonch varsa lete hain, kalpa-kalpa lete hain। tumhaare paas bahut aayenge, aakar mahaamantra lenge manamnaabhav ka। manamnaabhav ka arth hai apne ko aatma samajh baap ko yaad karo। yeh hai mahaan mantra, mahaan aatma banne ke liye। woh koi mahaatma hai nahin। mahaatma to vaastav mein shreekrishna ko kaha jaata hai kyonki woh pavitra hai। devtaayen sadaiv pavitra rehte hain। devtaaon ka hai pravritti maarga, sannyaasiyon ka hai nivriti maarga। striyaan to dhakke kha na saken। yeh sab abhi kaliyug mein kharaabiyaan ho gai hain। striyon ko bhi sannyaasi banaakar le jaate hain। phir bhi unhon ki pavitrata par bhaarat thama rehta hai। jaise puraane makaan ko pochi aadi lagaai jaati hai to jaise naya ban jaata hai। yeh sannyaasi bhi pochi de kuchh bachaav karte hain। parantu baap kehte hain woh dharma hi alag hai, pavitra bante hain।

bhaarat khanda mein hi itne devi-devtaaon ke mandir bhakti aadi hai। yeh bhi khel hai, jiska vritaanta tum bataate ho। bhakti maarga ke liye yeh sab bhi chaahiye na। ek shiv ke hi kitne naam rakh diye hain। naam par mandir banta gaya hai। dher ke dher mandir hain। kitna kharcha hota hai। milta phir bhi aadhaakalpa ka sukh hai। bas, bahut paise lagaate hain, moortiyaan toot phoot jaati hain। vahaan to mandir aadi ki darkaar nahin hai। yeh bhi abhi smriti aai hai ki aadhaakalpa bhakti chalti hai, aadhaakalpa phir bhakti ka naam nahin। baap kitni smriti dilaate hain - is variety jhaad ki। sirf kaliyug ki aayu hi 40 hajaar varsha ho phir to Christian aadi ki aayu bhi bahut badh jaaye। baap samjhaate hain Christian dharma ki itni hi limit hai। yeh jaante hain, Christ ko itna samay hua hai, phalaane ko itna samay hua dharma sthaapan kiye, lekin phir jaayenge kab? yeh pata nahin hai। kalpa ki aayu hi lambi kar di hai। abhi tum jaante ho yeh to vinaash ki taiyaariyaan ho rahi hain। unhon ki hai science, tumhaari hai silence। tum jitna silence mein jaayenge utna woh vinaash ke liye achhi-achhi cheejen taiyaar karte rahenge। din-pratidin maheen cheejen banaate rehte hain। tumko andar mein khushi hoti hai - baba to hamaare liye nai duniya banaane aaye hain। to ab ham puraani duniya mein thode hi rahenge। kamaal hai baba ki। baba aapke svarga sthaapan karne ki to kamaal hai। abhi tumko saari smriti aai hai। woh to rachta aur rachna ke aadi-madhya-ant ko jaante hi nahin hain। tum jaante ho। tum kitni roshni mein ho। manushya to ghor andhiyaare mein hai। pharka hai na। gyaan anjan satguru diya agyaan andher vinaash। bhakti vaale gyaan ko nahin jaante hain। abhi tum bhakti ko bhi jaante ho to gyaan ko bhi jaante ho। saari smriti aai hai - bhakti kab shuru hoti hai, phir kab poori hoti hai। baap kab gyaan dete hain, poora kab hoga, sab smriti hai। nambarvaar to hain hi। kisko bahut smriti hai, kisko kam। jinhon ko bahut smriti rehti hai, woh oonch pad paayenge। smriti rahe tab auron ko bhi samjhaayen। wonderful smriti hai na। aage tumhaari buddhi mein kya tha। bhakti, jap, tap, teertha karna, maatha tekna, saari tippad hi ghis gai hai। bhakti ki smriti aur gyaan mein kitna pharka hai। tum abhi bhakti ko jaante ho kyonki shuru se bhakti ki hai। jaante ho hamne pahle-pahle shiv ki bhakti ki, phir devtaaon ki। aur koi ko bhi yeh smriti nahin hai, tumko rachna ke aadi-madhya-ant, bhakti aadi ki sab smriti hai। aadhaakalpa bhakti karte-karte girte hi aaye ho।

abhi to duhkh ke pahaad girne hain। tum bachchon ko purooshaartha karna hai, yeh girne se pahle ham yaad ki yaatra se vikarma vinaash karen। sabko tum yahi samjhaate ho, tumhaare paas hazaaron aate hain। tum mehnat karte ho bhaai-bahinon ko raasta bataane ki। gyaan aur bhakti ki smriti aai hai। goya tum saare drama ko nambarvaar purooshaartha anusaar jaan gaye ho। jo jitna achhi reeti jaante hain woh samjha bhi sakte hain। samjhaana to bachchon ko hi hai। gaayan bhi hai san shows father। baap bachchon ko samjhaayenge, bachche phir aur bhaaiyon ko samjhaayenge। aatmaon ko samjhaate ho na। bhakti se yeh gyaan bilkul nyaara hai। gaayan bhi hai na - ek bhagwan aakar sab bhakton ko phal dete hain। ek baap ke sab bachche hain। baap kehte main sab bachchon ko shantidham, sukhdhaam mein le jaata hoon। kalpa-kalpa ka yeh gyaan bhi tumko abhi hai, vahaan nahin hoga। tum patit bante ho to paavan banaane ke liye baap tum par kitni mehnat karte hain isliye gaayan hai kurbaan jaaoon.... vaari jaaoon....। kis par? baap par। phir baap misaal bataate hain - yeh kurbaan kaise gaya। follow is sample ko karo। yahi phir lakshmi-naaraayan bante hain। agar itna oonch pad paana hai to aisa kurbaan jaana hai। saahookaar kabhi kurbaan ho na saken। yahaan to svaaha karna pade। saahookaar ko smriti zaroor aayegi। gaayan bhi hai na antakaal jo stri simre..... itne sab paise kya karenge। koi lega hi nahin kyonki sab khatma ho jaane hain। main bhi lekar kya karoonga। shareer sahit sab kuchh khalaas hona hai। aap muye mar gai duniya। yeh dhan aadi kuchh bhi nahin rahega। baaki garood puraan aadi mein to rochak baaten daal di hain, daraane ke liye।

baap kehte hain yeh shaastra aadi hain bhakti maarga ke। aadhaakalpa bhakti maarga chalta hai। jabki raavanraajya hota hai। koi se poochho raavan kab se jalaate ho? to kahenge parampara se। are parampara se to raavan hota hi nahin। maaloom hi nahin hai to kah dete hain parampara se। tum bachchon ko ab smriti aai hai - raavan raajya kab se shuru hota hai। rachta, rachna ka raaz bhi tum samajhte ho। ab baap kehte hain - bachche, maamekam yaad karo to paap katen। ek-do ko yahi saavdhaani dete raho। ghoomne-phirne aapas mein jaao to bhi yeh baaten karo। saara jhunda tumhaara is yaad ki avastha mein chakra lagaaye to tumhaare shanti ka prabhaav bahut padega। paadri log bhi bahut silence me jaate hain, Christ ki yaad mein। koi taraph dekhte bhi nahin hain। tum to yahaan bahut yaad mein rah sakte ho, koi gorakhdhandha nahin hai। bahut achha vaayumandal hai। baahar mein to bahut chhi-chhi vaayumandal rehta hai isliye sannyaasiyon ke aashram bhi bahut door-door hote hain। tumhaara to hai hi behad ka sannyaas। puraani duniya ab gai ki gai। yeh kabristaan hai phir paristaan hona hai। vahaan heere-javaahron ke mahal banenge। yeh lakshmi-naaraayan paristaan ke maalik the na। ab nahin hain। baap kehte hain main kalpa-kalpa, kalpa ke sangamayuge aata hoon। yeh saara chakra repeat hota hi rehta hai। is samay tumko sab smriti aai hai, jabki baap ne smriti dilaai hai। aage kuchh bhi buddhi mein nahin tha। is smriti ke nashe mein jab rahenge to kisko us khushi se samjha bhi sakenge। smriti mein rehte tumhein gharbaar sambhaalna hai। achha!

sada smriti ke nashe mein rahne vaale meethe-meethe roohaani bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) drama ke aadi-madhya-ant ko achhi tarah samajh, smriti mein rakh doosron ko bhi smriti dilaani hai। gyaan anjan dekar agyaan andhere ko door karna hai।

2) brahma baap samaan kurbaan jaane mein poora follow karna hai। shareer sahit sab khalaas ho jaana hai isliye isse pahle hi jeete ji marna hai, taaki ant samay mein kuchh bhi yaad na aaye।

vardaan:- visheshta ke sanskaaron ko natural nature banaae saadhaaranta ko samaapta karne vaale marjeeva bhav

jo nature hoti hai woh svatah apna kaam karti hai, sochna, banaana ya karna nahin padta hai lekin svatah ho jaata hai। aise marjeeva janmadhaari braahmanon ki nature hi hai vishesh aatma ke visheshta ki। yeh visheshta ke sanskaar natural nature ban jaaen aur har ek ke dil se nikle ki meri yeh nature hai। saadhaaranta past ki nature hai, abhi ki nahin kyonki naya janma le liya। to naye janma ki nature visheshta hai saadhaaranta nahin।

slogan:- royal woh hain jo sada gyaan ratnon se khelte, pattharon se nahin।